ዎሲ ጳዉሎስኒ ዎሲያ
ኤፌሶንኪ አሱኒ ሜያክ
ጋችግሩ
ጳዉሎስ ኤፌሶኑክ ፌሴ አሱኒ ሜያክ ትችና ዎሲያሲ ቴሱኒ አላማባስ፦ «ሀኦሲ ኮፖ ዎስቶታ ፌሻናክ ሳማክናዋ ሀን ዳስታክና ፋሴ ቴስቶሲክቶ ዙቴራ እሳ ዳ ዎል ላ እሳ ክርስቶስኒ ሀእሱሲ ስካሎሲ ፎና ዎናስ ዮናክዋ» (1:10)። ኤስ ባርስታን ደይ ዳይቶኖን ክርስቶስኔን አነ እሳር ስናክ አሱኒ ዛላ ዙቴራ እሳር ስናናክ ሀን አካማ ኮፖሶን ዎስቶታ ፌሹሶነክ ሀኦኒ አሱኒ ሜያኖን ያዳትሱክዋ።
ኤፌሶኒ ዎሲያ ቴሱኒ ባግቶስታክ ትች ባር እሳር ስንኒ ቾዋሶን ትቹናክ ካብና ሳፋራባሶን ታግሬ አባ ሀኦስ ዳራባስን ኣካክ ኮሪናማቶ፤ ናዉባ የሱስ ክርስቶስኒኪ ካሞ ቦርቤሲሲ ፋክያኖን ኣካክ ዳነቴማቶናዋ ብርማዱምማ ኬሳር ስኖነክና ሀኦስ አካማ አብድኒ ካምኒማቶ ኮርቶ አያናስኪ ካሞ ኣካክ ፉቶ ስንና አርቴናማቶ ያዳትሶነክቱ ዛግ። (ኤደባ 1-3)።
ሄፕሳኒ ትቻሲ ባግቶ ደይ ትች ባር ሀን ትቻሶን ፌሬትሴፌ ባሶ እሳሪክ ፌሴቴ ካባሲክ ክርስቶስኒክ ፋ እሳር ስኖቤሲስ ፉቶ ስናናክ ኣካክ ፎ ችሞሶነማቶቱ ያዳቴሲፌ። (ኤደባ 4-6)
አሱኒ ሜያ ክርስቶስኒኪ ካሞ ፋ እሳርቤሲሲክ ባሶትና ባሶትና ኣካክ ፎሶነማቶ ሾዎ ቴሳ ቤሶኒ ካማክቱ ኮትቴ ቤሲ። ቤቴክርስታኒስ አቱ ስንፋና ካባሲክ ክርስቶስ አቱሲክ ቴትዋ። ቤቴክርስታኒስ ሹእኒ ኬኒማቶ ስንፋና ካባሲክ ክርስቶስ ኤስ ሹእኒ ኬያሲ ካጃኒ ሹእዋ። ቤቴክርስታኒስ ኬሪኝኛኒማቶ ስንፋና ካባሲክ ክርስቶስ ቴጎንማቶዋ። ትቺ ባር ክርስቶስኒኪ ካሞ አምማኖን ኬስሳ ቤስቴ ሀኦሲ ኦትማኖን አካማኖን ዲንቆክ ዳጀፌና ካባሲክ አካማኖን ዶእኦ ሳፋራባ ፋና ያዳ እሜት ፌርዋ፤ ዙታምባሴ አሲን ቢፌናስ ክርስቶስኒ ኬሽታናሲክ፥ ባሳ ማአ ስናሲክ፥ ፋክያ ዛጉባሶን፥ ባርኪ ካሞ ቤስቴ ኦትማሴዋ ናጋሴ አሲንዋ።
ሀን ማፃፋስ ሲሩክ ኤጵና ኤጶባስ
ጋችግሩ 1:1-2
ክርስቶስናዋ ቤቴክርስታኒሴ 1:3—3:21
ክርስቶስኒኪ ካሞ ቤስቶኒ ጋድዶ ካስ 4:1—6:20
ኮርኡባ 6:21-24
1
1 ሀኦኒ ፍቃድክ የሱስ ክርስቶስኒ ዎሲ ስና ጳዉሎስኒኪን፥ የሱስ ክርስቶስኒክ አማናምቶ ስና ኤፌሶኑክ ፌሴ ኮርቶኒ ሜያክ፥
2 አባ ሀኦኒስኪንናዋ ዳም የሱስ ክርስቶስኒክንና ኦቱማሴዋ ናጋሴ ንቶክ ስንፋውጝዋ።
ክርስቶስኒኪ ካሞ ቤስቴፋ አያናኒ ኤባ
3 ደን ሳማኪ ፋ አያናኒ ኤባ ዙታምባሴ አሲክ ክርስቶስኒኪ ካሞ እኖትን ኤቢስ ዳምኒ የሱስ ክርስቶስኒ አባ ስና ሀኦሲክ ጋላታ ስንፋውጝዋ።
4 ኮርቶናዋ ዝናባ ፎንቶና ስናኒክ ሀን ዳስ ቴስቶኖይፌን ዜምማ ክርስቶስኒኪ ካሞ እኖትን ኮሪዋ።
5 ሀኦኒ ማአ ፍቃድ ስኒን የሱስ ክርስቶስኒኪ ካሞ ባሪ ናንጎታ ስንናኒክ ዜምማ ኬሽታንባሲክ እኖትን ኮሪዋ።
6 ኤስ ባሮን ደይ ዛግናስ ሹንቶ ናዉባስኪ ካሞ ባክ እኖክ እምና ኡልፍንቶ ኦቱምባስ ጋላታምቶናክዋ።
7 ኤስ ባሮን ደይ ዛግናስ ሀኦሲ ኦቱምኒ አርኩታን ካብ ቾዋ እኖትን ሹና ናዉባሳ ሀንናክ ፉርቴራ ሚርአኒሲ ፋክያኖን ዳንኒዋ።
8 ቴችማ ዙታምባሴ አሲክናዋ ያዳታክና፤
9 ሀኦስ አላማባሲክ ክርስቶስኒኪ ካሞ ዜምማ ኮፓኤናማቶ ፍቃድባሲ ኣቾ ቾዋኖን አሩኒክ ዛግዋ።
10 ዎንባስ ካርፋና ካባሲክ ዎስቶታ ፌሹና ኮፖባስ ሳማክናዋ ሀን ዳስታክና ፋሴ ቴስቶ ዙታምባሴ እሳሪክ እሳ ክርስቶስኒ ሀእሱኒ ስካሎሲ ስናናክዋ።
11 ዙታምባሴ አሲን ፍቃድባሲ ኪቶኒማቶ ዎስቴፋ ሀኦስ ዜምማ እኖክ ኮፓኤና ኮፖሲማቶ ክርስቶስኒኪ ካሞ ባሳ ኬን ስንናኒክ እኖትን ኮሪዋ።
12 ኤስ ባር ደይ ስንናስ ክርስቶስኒን አብድኒ ዛጉኒክ ቴሱኒር ስና እኖኪ ካሞ ሀኦሲ ኡልፍና ጋላታምቶናክዋ።
13 ንቶ ደይ ፉቶኒ ካማሶን፤ ኤስ ባር ደይ ፋሩኒ ምስራቹኒ ካማሶን ኦደራ አማነቲ ካባሲክ ንቶክ አብድ ግርቴ ኮርቶ አያናሲክ ማታማ እቼትዋ።
14 ኤስ አያናስ ኡልፍንባሲክ ጋላታ ስናናክ ሀኦ ባሪር ስና ባሶትን ዙትራ ፉሮና ካባኔን ዳናኒክ ፋ ርስትኒሲክ ካብድዋ።
ጳዉሎስ ኤፌሶንኪ አሱኒ ሜያክ ሺጴ
15 ኤስ ባሪ ቦርኣ ዳምኒ የሱስኒክ ፋ አማንቶኒትሴዋ ኮርቶኒ ሜያ ዙታምቤሲሴ አሲክ ፋ ኬሽታንትሴ አስን ኦደራ፥
16 ሺጶናሲክ ንቶትን ያዳቴት ንቶ ቦርአ ሀኦናሶን ጋላቶሶን ኣነ ቤዩት።
17 ኡልፍንኒ አባ ዳምኒ የሱስ ክርስቶስኒ ሀኦሶን ማእስራ አሩሶትክ ቴቹምነዋ አምማ ክስሬ ቢኒ አያናሴ ንቶክ እምቶናክ ሺጴፋዉጙዋ።
18 ኤሲስማቶ አዉነ ፋ አብድክ ቴግቴሴትማቶናዋ ኮርቶኒ ሜያ ዋራሶነክ ፋ ኡልፍንቶ ርስትስ አዉነ ፋ አካማ ስንናማቶን አሩሶትክና ንብንትሲ ኣፋ ጋቾናክ ሺጴፋዉጙዋ።
19-20 ሆሱስቶኖይ አካማ ሁግናባስ አማነፌ እኖክ አዉነ ፋ እኛ ስንባሶን አሩትክ ሺጴፋዉጙዋ፥ ኤስ አካማ ሁግናሶን ዎስቶክ ቤሲናስ ክቱን ካብግራ ሳማኪ ድማስታ ኦእታ ቴሽባስታ ዱስና ናውባ ክርስቶስኒኪ ካሞዋ።
21 አባ ሀኦስ ክርስቶስኒን ሳማኪ ኦእታ ቴሽባስታ ዱሲናስ ኣፋ ሀእሱታናዋ ሀእሱኒ ሁግናስታና ደይ ሁግናነዋ ዳም ስናሲ ደናሎነ ደይ ኤሲስማቶ ሀን ዳስታክ ኮእባ ስኖይናሮን ዮኒ ዳስታክ ሱናኔን ደናሎ ስና ሱና እማዋ።
22 ሀኦስ ዙታምባሴ ባሳ ሀእሱሲ ስካሎሲ ሀእኡናክ ዛጊዋ። ቤቴክርስታኒሲክ ደይ ዙታምባሴ አሲስታን ደናሎ ስናናክ ቴት ዛግዋ።
23 ቤቴክርስታኒስ ደይ ባር ዙታምባሴ አሲን ኣፋ ኡግናክኑ ዙትሬ ቱንፌና ባሳ ቱማ አቱባስዋ።