ዎሲ ጳዉሎስኒ ዎስያ
ጋላትያኪ አሱኒ ሜያክ
ጋችግሩ
የሱስኒ ፋቱኒ ቾዋሲክ ማኬፋ ምስራቹኒ ካማስ ድማ ድማሲ ማክቴት ኣዛብ ስና አሱኒ ሜያ ደይ ካማሶን ኤጴቴሴት ሀሞቤሲሴ፦ «ክርስታና ስንናክ ሙሴኒ ቱማሶን ዎስቶታ ፌሹ ሾልሱጝዋ ወደይ ኣነንሶ?» ይፋ ማምሱስ ደይ ኤስ ባርኔን አነ ካብ፥ ሀቴ ኢስያ ስና ሮማዊኒ ሜኒ ሀእሱሲ ፋ ጋላትያክ ፋሴ ቤቴክርታኒሲክቶኒ ጋነያሲ «አስሱ ሀኦሲ ስና ኦኮ ስናናክ የሱስኒክ አማኖስ ባር ባር ኮእባ ስኖይናሮን ሙሴኒኪ ካሞ እምቴ ቱማሶን ዛጉናክ ሾልስፋዋ» ኡክ ጳዉሎስኒን ቱጋሴት ፌሴ አሱኒ ሜያ ፌሴቴር።
ጳዉሎስ ሀን ጋላትያኒ ዎሲያሶን ትችናስ ሀን ኤሻ አስሱሲክ ኤክ ሀጝ ይት ፌ አሱኒ ሜያኖን ፉቶኒ አማንቶሲክናዋ ፉቶኒ ክርስታናኒ ሜኒ ፎሲክና ዞንሱክዋ፥ ጳዉሎስ የሱስ ክርስቶስኒ ዎሲ ስንባሶን ማእስሬ ማኮክቱ ጃማሬ። ዎሲ ስናናክ ባሪን ቴጌስ ሀኦስታኖ አሱ ስና ቤይናማቶናዋ ባር ዎስቴሬ ዬናስ አዛብኒ ሜያክ ስንናማቶ ኮትቴ ማኬፌዋ፥ ሀን ማፃፋሲ ኮእኒ ኤዴሲክቶሲ ክርስትናኒ ካስ ቤስቴፋናስ የሱስኒን አማኖክ ቤስቴፋ ኬሽታናስኪን ኬሳር ስንናማቶቱ ኮትቴ ማኬፋ።
ማሳፋስ ሲሩክ ኤጵና ኤጶባስ
ጋችግሩ 1:1-10
ጳዉሎስ ዎሲ ስንናማቶ ቤስፋ ሀእሱኒ ሁግና 1:11—2:21
ሀኦሲ ኦትማኒ ምስራቹኒ ካማ 3:1—4:31
ክርስትናኒ ብርማዱምማነዋ አማንቶነ 5:1—6:10
ኮርኡባ 6:11-18
1
1 አሱኒኪን ወደይ አሱኒኪ ካሞ ዎስቴ ዎስያክ ስኖይናሮን የሱስ ክርስቶስኒክንናዋ ባሪን ክቱን ካብግ አባ ሀኦስኪንና ዎሲ ስንነ ዎስቴ ታ ጳዉሎስኒኪን፤
2 ደይ ታኔን አነ ፌሴ አይኒ ሜያ ዙታምቤሲሴ አሲስኪን ጋላትያክ ፋሴ ቤቴክርስታኒሲክቶክ ዎስቴ ናጋ፥
3 አባኒ ስና ሀኦኒስኪን ዳም የሱስ ክርስቶስኒኪን ሀኦሲ ኦትምነዋ ናጋነ ንቶክ ስንፋውጝዋ።
4 ሀን ማጙ ነያሲን እኖትን ፉኦናክ ሀኦኒሲ ፍቃዲኒማቶናዋ አባኒሳ ፍቃድኒማቶና የሱስ ክርስቶስ ሾዎ ቦርኒሲክ ቴትባሶን ኣትሬ እሚ።
5 ኮእባኔን ኮእባ ፎንቶኖን አባ ሀኦሲክ ኡልፍና ስንፋውጝዋ! ኣሚን።
ፉቶኒ ምስራቹኒ ካማስ እሳርዋ
6 ክርስቶስኒ ኦትማሲክ ንቶትን ቴጌ ሀኦስኪን ኤካ ታፕቴራ ኦር ኬስኒትሴዋ ኦማ ምስራቹኒ ካማሲክ ዎሉንቲሴ ታን ዲንቅስሲዋ።
7 ኤስ ባሮን ይናስ ንቶትን ዳግስሴሬናዋ ክርስቶስኒ ምስራቹኒ ካማሶን ኤልጝሱክ ሾልሴፌ እሳ እሳ ሜያ ፌሴቴር ስንና ቦርአታኖ ኦማ ምስራቹኒ ካማ ኣፋዋ።
8 ስኑንታኖ እንኖኑ ስንፌኒክ ወደይ ሳማኪ ሀኦሲ ዎስያኑ ስንፋናክ እንኖ ማኬኒ ምስራቹኒ ካማስታን ኦማ ምስራቹኒ ካማ ንቶክ ማኬፋናነ ኤርዉቶ ስኖዋ።
9 ዜሞ ስናክ ማኬናሲማቶ ሀሽ ደይ ሄፕሳ ማኬፋውጙዋ፤ ንቶ ኤጳ ታሴት ምስራቹኒ ካማስታን ኦማ ምስራቹኒ ካማ ኦኑ ንቶክ ማኬፋናነ ኤርዉቶ ስኖዋ።
10 ኤካን ታ፤ ሾሌፋናስ አሱ ታን ጋላቶናኮሶ? ወደይ ሀኦሲ ታን ጋላቶናኮሶ? ወደይ አሱኒን ግርሱናክ ሾሌናር ስንና ንቶክ ቤስቴዎሶ? አሱኒ ሜያኖን ግርሱናክ ሾሌት ፋናር ስንናፋናነ ክርስቶስኒ ዎስትኛ ስና ቤያና ካባዋ።
ጳዉሎስኒ ዎሲ ስንነ ቴግቶ
11 አይታሳክቶኖ! ታ፤ ንቶክ ማኬና ምስራቹኒ ካማስ አሱኒኪን ቤስቴር ስና ቤይናማቶ አሪሶትክ ሾሌፋዉጙዋ።
12 ሀን ምስራቹኒ ካማሶን የሱስ ክርስቶስቱ ታክ አምማኖን ክስሬ ቤስትቴኖ ኣፌ አሱኒክኑ ኣነ ኤጱት ወደይ ኣፌ አሱኑ ታን ኣነ አስሱዌዋ።
13 ዜሞ አይሁድኒ አማንቶሲክ ዞኑስቴፋና ካባሲክ ኣካክ ፋናማቶ ንቶ ኦደሴትዋ፥ ሀኦሲ ቤቴክርታኒሶን አካማኖን ካብግራ ትሽኩናክ ካቤት ፋናርዋ።
14 አይሁድኒ አማንቶሶን ኦዳክ ኤስ ነያሲክ ፌሴ አይሁድኒ ሜያ ዙታምቤሲሴ አሲስታን ታ፤ ደናሎዋ፤ አባን ሜኒ ዱቢዮሲክ ደይ አካማኖን ኮነት ፋናርዋ።
15 ስኑንታኖ ኮንቶናስኔን ዜምማ ሀኦስ ታን ኮሪዋ፤ ኦቱምባሲክ ደይ ታን ቴጌዋ።
16 አዛብኒ ሜያክ ናሳ ቾዋኒ ምስራቹኒ ካማሶን ማኮናክ ሀኦስ ናባስን ታክ አምማኖን ቤሱናክ ቡግና ካባሲክ ጌሬጌሬ ኦኔንኑ ኣነ ሜርኮትዋ።
17 ወደይ ታይስታን ዜምሜ ዎሲ ስና ባሶትን ኡጶናክ የሩሳሌም ኣነ ሀሙትዋ። ስኑንታኖ ዜምማ አራባኒ ሜኒ ዳቱ ሀሚንዋ። ሄፕሳ ደይ ደማስኮ ዎልንዋ።
18 ቱስራ ደይ ኬዝ ዎጋኔን ኦርፎ ኬፋ ይስቴፌ ጴጥሮስኒን ብያናክ የሩሳሌም ሀሚንዋ። ኤስታክ ደይ ባርኔን አነ አሲሬ ኡቼ ዎና ዲንዋ።
19 ዳሚሳ አይ ያቆብንንቱ ቢንታኖ ኦም ዎሲኒ ሜያስን ኦኒንኑ ኣነ ብዩትዋ።
20 ሀን ታ፤ ንቶክ ትችፋና ባር ኤሻ ስና ቤይባሶን ሀኦሲ ስና ንቶክ ችኒራ ማኬፋውጙዋ።
21 ኤሴን ኦርፎ ሶርያኒ ዳስታናዋ ቅልቅያኒ ዳስታናቱ ሀሚንዋ።
22 ዩዳኒ ዳስታክ ፋሴ ክርስቶስኒ ቤቴክርስታኒሲክቶ ታኔን አነ ኣፌ ኣፌ ቢሬ ኣነ አሪሶቶዋ።
23 ባሶ ኦደሴቴስ፦ «ኤስ ዜሞቲ እኖትን ካብግት ፌ አሱስ ኤስ ትሽኩናክ ካብና አማንቶሶን ሀሽ ዎል ሌ ማኬድፌዋ» ይፋ ካማሶን ኮእባዋ።
24 ታ፤ ቦርአ ሀኦሶን ጋላቴሴት ፌሴቴርዋ።