ዎሲ ጳዉሎስኒ እሶንሳ ዎስያ
ቴሴሎንቄኪ አሱኒ ሜያክ
ጋችግሩ
ቴሴሎንቄ ሜቀዶንያ ይስቴፋ ሮምንኒ ሀእሱሲ ፋ አሪኪ ካታማዋ። ጳዉሎስ ቴሴሎንቄኒ ቤቴክርስታኒሶን ቶክናስ ፍልጲስዩስኖን ቤየ ሀሚናኔን ኦርፎዋ። ስኑንታኖ አይሁድኒ ሀይማኖትሶን ኤጴቶሶነክ ታእሴሴሬ ፌሴ አዛብኒ ሜያ ጳዉሎስ ማኬፌና ክርስትናኒ ዎስያሲክ ዛቴሴሬ ፌሴቴር ስንና ቦርአ አይሁድኒ ሜያ ኮነሴሬ ጳዉሎስኒን ቱጋኦክ ካቡግሴት ፌሴቴር። ኤስ ባሪ ቦርኣ ጳዉሎስ ቴሴሎንቄኖን ጋፍክሬ ቤርያ ሀማክ ባሪክ ግድ ስኒ። ጋሮኖን ፌሬ ቆሮንጦስ ካርናይሴ ታእሴሬ ፌፋት ባሪን አርጋስፌ ትሞትዮስ ቴሴሎንቄ ሀሜ ዎሊናይሴ ቤቴክርስታኒሲ ፋ ቾዋሶን እሳርባ እሳርባሲክ ኮቴ ማኬ።
ጳዉሎስ ቴሱኒ ዎሲያሶን ቴሴሎንቄኪ አሱኒ ሜያክ ትችናስ ክርስታናኒ ሜያኖን ችኑክናዋ ዛጉክናዋ። ባሶ አማንቶሲክናዋ ባሶ ኬሽታናሲክና ማአ ዎል ላ ኦደና ቦርአ ሀኦሶን ጋላቴ። ጳዉሎስ ደይ ባሶ ጋነያሲ ፌና ካባሲክ አሮ ካክ ፌናማቶ ባሶክ ያዳታ እሚ። ኤስታን ክርስቶስኒ ዎል ሌ ዮሶን ቢፋ ማምሱሲክ ዎልጉባ እሚ። ኤስ ማምሱሲክቶስን እሳ እሳይስ፦
«ክርስቶስ ዎል ሌ ዮባስኔን ስናክ ክት አማኝ ክርስቶስኒ ዎል ሌ ዮስ እማና ኮእባ ፎንቶ ካሶን ሃኦክ ችምኒሮሶ? ክርስቶስ ዎል ሌ ዮናስ ኣጌንሶ?» ይፋርዋ። ጳዉሎስ ደይ ኤስ ያ ቾዋሲታ ካሞ ካብሬ «ክርስቶስኒ ዎል ሌ ዮባስ አሱኖን አብድክ ኦደት ኤስ ካባኔን ሻክራ ዎስቶኒትሶን ዎስቶሶት» ኡክ ባሶትን ኪት።
ማፃፋሲ ስሩክ ኤጵና ኤጶባስ
ጋችግሩ 1:1
ጳዉሎስኒ ግራነዋ ጋላትነ 1:2—3:13
ክርስታናኒ ካኒ ዞንሲያ 4:1-12
ክርስቶስኒ ዎል ሌ ዮኒ ቾዋሲ አስሱ 4:13—5:11
ኮእኒ ኪቶ 5:12-22
ኮርኡባ 5:23-28
1
1 አባ ሀኦሶንናዋ ዳም የሱስ ክርስቶስኒንና አማነሬ ቴሴሎንቄኪ ቤቴክርስታኒስ ፌሴ አማኝኒ ሜያክ ጳዉሎስኒኪን፥ ስላስኒክንናዋ ጢሞትዮስኒክንና ዎስቴ ዎስያ። ሀኦሲ ኦቱምነዋ ናጋነ ንቶክ ስንፋውጝዋ።
ቴሴሎንቄኪ አሱኒ ሜኒ አማንቶሲክ ማክቴ ጋላታ
2 እንኖ ዎንና ዎንና ሺጶኒሲክ ንቶትን ያዳቴፋፋ ሀኦሶን ጋላቴት ፋኒር።
3 ሀኦኒሲ ስናክናዋ አባኒሳ ስናክና አማንቶኒትስ ዎስቴፋና ዎስቶስ፤ ኬሽታናክ ዛግሴፌት ባሬዋ ዳምኒ የሱስ ክርስቶስኒስታ ፋ ንቶ አብዲሶን ፋኪያክ ኦደት ፎንትሲክ ዎንና ዎንና ያዳቴት ፋኒርዋ።
4 ሀኦሲክ ሹንቶ አይኒ ሜያነ! ሀኦስ ንቶትን ኮሪናማቶ እንኖ አርፌኒዋ።
5 እንኖ ምስራቹኒ ካማሶን ንቶክ ማኬኒስ ዎል ላ ዎል ላክ ስኖይናሮን ሁግናክናዋ ኮርቶ አያናክና ደይ ምስራቹኒ ካማሲ ቾዋ ፉቶ ስንባሶን ማእስሬ አሩክዋ። ንቶኔን አነ ፋኒ ካባሲክ ንቶክዋ እያት ኣካክ ፋኒማቶ ንቶ አርሴድፌትዋ።
6 ሾዎ ሻና ንቶስታ ካርፋናክኑ ኮርቶ አያናስኪን ቤስቴ ግራሲኪ ካሞ ካምባሶን ኤጳ ታራ እኖትንናዋ ዳም የሱስ ክርስቶስኒ ኡግናሲክና ዞኑስቴር ስነትዋ።
7 ኤስ ባሪ ቦርኣ ሜቀዶንያክናዋ አኪያክና ፌሴ አማኝኒ ሜያ ዙታምቤሲሴ አሲክ ማአ ቤሶ ስነትዋ።
8 ዳሚሳ ካማ ንቶኪን ኬሳ ኦድቴናስ ሜቀዶንያክናዋ አኪያክና ኮእባ ስኖይናሮን ሀኦስታ ፋ ንቶ አማንቶስ ዳ ዙታምባሴ አሲስ አሪቴራ ፋርዋ። ኤስ ባሪ ቦርኣ ሀን ቾዋሲክ እንኖ እሳ ዉዛነ ማኮኒክ ኣነ ሾልሲፋዋ።
9 ንቶኪ ያፌኒ ካባሲክ እኖትን ኣካክ ኤጳ ታሴትማቶ፤ ሀየዋ ደይ ፉቶ ስና ሀኦሲክ ዎስቶክ ኮልኦኒ ሺጶስን ኦር ኬስሳ ሀኦስኪ ኣካክ ዎልሴትማቶ ኤስ አሱኒ ሜያ ቴትቤሲሲክ ዛላ ስኖነዋ።
10 ኤሲስማቶ ሀኦስ ክቱን ካብግና ባሪን ዮኒ ግአሲን እኖትን ፉኦኒ ናዉባ የሱስ ክርስቶስኒ ሳማን ዮሶን ኦደት ፋኒርዋ።