ዎሲ ጳዉሎስኒ ሄፕሳ ዎሲያ
ቴሴሎንቄኪ አሱኒ ሜያክ
ጋችግሩ
ክርስቶስኒ ሄፕሳ ዮኒ ቾዋስታ ካብ ማምሱስ ሾርኮ ካብግት ሀምና ቦርአ ቴሴሎንቄኪ ቤቴክርስታኒሲ ፋ ራክኮስ አሪክት ሀሚ። ጳዉሎስ ቴሴሎንቄኪ አሱኒ ሜያክ ትችና ሄፕሳ ዎስያስ «ዳሚስ ዮና ዎናስ ካርእ» ይፋ አማንቶስ ዛግራ ማኬት ፋር። ጳዉሎስ ደይ ክርስቶስ ዮባስኔን ዜምማ «ማጙኒ አሱ» ይስቴፌ ክርስቶስኒ ቱጋኤፌ ባሳ ዞንሲያሲክ ሀን ዳስታክ ማጙነዋ ጃልንነ አርኪት ሀማና ይት ባሶ አማንቶሶን ካይኑክ ካቤ።
ዎሲስ ፌሬትፌ ባሶ ሻናነዋ ራኮነ ባሶስታ አርክፋናክኑ አማንቶቤሲሲክ ዛጉሶነክ ባርናዋ ኦም ዎስቶኒ ዞሞባሳክቶና ዛግሴፌሲማቶ ፎቤሲሲክ ሾልሲሶን ዳናክ ችምሜ ዎስቶሶነክ፤ ኤሲስማቶ ደይ ማአ ዎስቶሶን ዎስቴት ፎሶን ቤዮኖይቴማቶ ዛግሬ ኪት።
ማፃፋሲ ስሩክ ኤጵና ኤጶባስ
ጋችግሩ 1:1-2
ጋላታነዋ አዳራነ 1:3-12
ክርስቶስኒ ሄፕሳ ዮሲክ እምቴ አስሱ 2:1-17
ክርስትናኒ ፎኒ ኪቶ 3:1-15
ኮርኡባ 3:16-18
1
1 አባ ሀኦሲር ስና ባሶትናዋ ዳምኒ የሱስ ክርስቶስኒር ስና ቴሴሎንቄኒ ቤቴክርስታኒሲ ፌሴ አማኝኒ ሜያክ ጳዉሎስኒኪን፤ ስላስኒኪንናዋ ጢሞትዮስኒኪንና ዎስቴ ዎሲያ፤
2 አባ ሀኦኒስኪንናዋ ዳም የሱስ ክርስቶስኒኪንና ኦቱምነዋ ናጋነ ንቶክ ስንፋውጝዋ።
ክርስቶስ ዎል ሌ ዬፌና ካባሲክ እምቶኒ ማጝሱኒ ካርአ
3 አይኒ ሜያነ! አማንቶኒትስ ዎንና ዎንና ድቼት ሀሚባሲክናዋ ንቶትና ንቶትና አሲ ኬሽታናስ ደይ ዳይሲት ሀሚድፋር ስንና ቦርአ ሀኦሶን ማእስራ ጋላቶኒክ ሾልሱዋ።
4 ኤስ ባሪ ቦርኣ አዉነ ፋሮንኑ አካማ ራኮነዋ ሻናነ ንቶስታ ካርፋናክኑ ንቶ ኣካክ ፋክሴትማቶናዋ አማንቶኒትሲክ ደይ ኣካክ ችሜሴትማቶና ሀኦኒ ቤቴክርስታኒሲክቶኒ ጋነያሲ ፋኒ ካባሲክ ንቶክቱ ቴቴፌኒዋ።
5 ኤስ ባር ዙታምባሴ ቤሲፋናስ ሀኦሲ ማጝሱኒ ካርአ ፉቶ ስንባሶንናዋ ሻና ኤጳ ታሴቲ ሀኦሲ ታቶሲ ግሩክ ችምሜ ሆሬሬ ፌር ዛጉክዋ።
6 ሀኦስ ፉቶክ ማጝሱ ካርአር ስንና ቦርአ ንቶስታ ሻና ካትሴፌ ባሶስታ ሻና ቴሾክ ዋግቤሲሶን ካሱናዋ።
7 ሀሽ ሻና ኤጴቴሴ ንቶክ ደይ እኖኔን አነ ቤይሳ እማናዋ። ኤስ ባር ደይ ስንናናስ ዳም የሱስ አካማ ሁግናቤሲ ፋና ዎስባሲክቶኔን አነ ሳማን ዬፌና ካባሲክዋ።
8 ኤስ ካባሲክ ሳሜት ድ ጌያክ ሀኦሶን አሩኖይ ባሶትንናዋ ዳምኒ የሱስ ክርስቶስኒ ምስራቹኒ ካማሲክ አጃጃሞኖይ ባሶትንና ኬኡና።
9 ባሶ ዳሚሳ ስንታናዋ አካማ ሁግናባሲ ኡልፍንታና ኦር ኬሴሬ ኮእባ ፎንቶ ትሹኒ ኬኦ ኤጴቶሶነ።
10 ኤስ ዎኖ ዳሚስ ኮርቶኒ ሜያክ ኡልፍንቶናክናዋ ባሪክ አማነፌ ባሶ ዙታምቤሲሴ አሲክ ዲንቆስቶናክና ዬፌና ካባሲክዋ። ንቶ ደይ እንኖ ማኬኒ ዛላሶን ኤጳ ታራ አማነሴት ቦርአ ኮርቶኒ ሜያኔን አነቱ ፋድቶሶትዋ።
11 ኤስ ባሮን ሳፋሮክ ንቶ ቾዋሲክ ዎንና ዎንና ዬቱኖይ ሺጴት ፋኒስ ሀኦኒስ ንቶትን ቴጌና ቴጎሲክ ሆሬር ስንናትክናዋ ማአሮን ዛጉክ ፋ ፍቃድንትሴዋ አማንቶኒ ዎስቶኒትሶንና ዙትሬ ሁግናባሲክ ኮእሱናክዋ።
12 ኤሲስማቶ ደይ ዳምኒ የሱስ ክርስቶስኒ ሱናስ ንቶክ ኡልፍንቶናክናዋ ንቶ ደይ ሀኦኒ ስንና ዳምኒ የሱስኒ ኦትማሲክ ካፑቴራ ባሪክ ኡልፍንቶትክናቱ ሺጴፌኒዋ።