እብራዊኒ ሜያክ ዎስቴ ዎሲያ
ጋችግሩ
ሀን ዎሲያስ ትቼናስ አማኝኒ ሜያስታ አካማ ቱጋኦ ካርና ቦርአ አማንቶቤሲሶን ቤዮኖይቴማቶ ቴትኒትሶን አሩቲ ኡክናዋ ችኑክዋ፤ ሀን ትቻሶን ትች ባር እብራዊኒ ሜኒ አማኝኒ ሜያክ የሱስ ክርስቶስ ፉቶ ደይ ሀኦሶን አምማኖን ኬስሬ ቤስር ስኒባሶን ቤሱናክ። ኤስ አማኝኒ ሜያ አማንቶቤሲሲክ ዛጉሶነክ ባሶትን ችኒድፌር። ኤስ ባሮን ደይ ዛግፌና ካባሲክ ኬዝ ፉቶ አምማኖን ክስሬ ቤሲ፦
1. ኤጴቴና ሻናሲኪ ካሞ አባሲክ ፉቶክ አጃጃምቴር ስና የሱስ ኮእባ ፎንቶ ሀኦኒ ናዋ። ሀኦኒ ና ስንባሲክ ኩርኡ ቴያኒ ካማሲ ራጁኒ ሜያ፤ ሙሴኒስታንናዋ ሀኦሲ ዎስያሲክቶታንና ባር አካማኖን ደናሎዋ።
2. የሱስ ኩርኡ ቴያኒ ካማሲ ማግኒ ሜያስታን አካማኖን ደናሎ ስና ኮእባ ፎንቶ ማግ ስንባሶን ሀኦስ ቴትባሲክ ማኬዋ።
3. የሱስኒኪ ካሞ አማኝኒ ሜያ ቦርኣስን፥ ድጋስንናዋ ክቱስንና ፉእቶሶነ። የሱስ ማግኒ ሜኒ ማግ ስንባሲክ እብራዊኒ ሜኒ አማንቶሲክናዋ ስትሪሲክና ካባሬ የሬ ዋግኒ ማኣስ ይራራኒማቶ ስንና ቢስቴት ፋ ፋሩስ ፉቶ ስናናክ ዛግ።
ሀን ትቻሶን ትች ባር እስራኤልኒ ሜኒ ቶቾሲክ አርቶ ስንና አሱኒ ሜኒ አማንቶሶን ቤሶ ዛግሬ ኬአክ (ኤድዴ 11) ፌሬትሴፌ አሱኒ ሜያ አማንቶቤሲሲክ ዛጉሶነክ ያዳስድፌር። ኤሲስማቶ ኤድደ 12 ፌሬትሴፌ አሱኒ ሜያ ኣፍቤሲሶን የሱስኒስታ ዛጉክ አማንቶቤሲሲክ ዛጉሶነክናዋ ኣፋ ሻነዋ ራኮነ ባሶስታ ካርፋና ካባሲክ ፋኩሶነክቱ ኪትፌ። ኮእባስታክ ደይ ኪቶነዋ ቴትኒትሶን ኦድት ይፋ ካምነ ማኮክ ዎሲባሶን ኮርእ።
ማፃፋሲ ስሩክ ኤጵና ኤጶባስ
ጋችግሩ ሀኦስ ክርስቶስኒኪ ካሞ አምማኖን ቤስቶባስ 1:1-3
ክርስቶስ ሀኦሲ ዎስያንክቶታኒ ደናሎ ስንናማቶ 1:4—2:18
ክርስቶስ ሙሴኒስታንናዋ እያሱኒስታንና ደናሎ ስንናማቶ 3:1—4:13
ክርስቶስ ማግሳታን ደናሎ ስኒባስ 4:14—7:28
ክርስቶስኒ ቴያኒ ካማስ ደናሎ ስንናማቶ 8:1—9:22
ክርስቶስኒ ማአ ስናስ አርክራ ቤስቴ፤ 9:23—10:39
አማንቶሲ አካማ ስና 11:1—12:29
ሀኦሶን ግርሱ 13:1-19
ኮእኒ ሺጶ 13:20-21
ኮርኡባ 13:22-25
1
ሀኦስ ናዉባስኪ ካሞ ማኬ
1 ሀኦስ ዜሞቲ ነያሲ ሾዎ ኡግናክ፤ ራጁኒ ሜያኪ ካሞ እንኖ አባኒ ሜያክ ሾዎ ካባ ማኬት ፋር።
2 ስኑንታኖ ሀሽ ኦርፎቲ ነያሲ ዙታምባሴ አሲን ዋራሶኒር ዛግና ናዉባሲኪ ካሞ እኖክ ማኬ። ሀን ዳሶን ደይ ዙታምባሴ አሲን ቴሲናስ ባሪክዋ።
3 ባር ሀኦሲ ኡልፍናኖን ፓልፓልግሬ ቤሲር። ባር ሃላባሲክ ሀኦስኔን አነ ማእስሬ እሳርዋ። ካምባሲ ሁግናክ ሀን ዳሶን ዙትሬ ቴቤ ኤጲዋ፥ አሱኒ ሜያኖን ደይ ቦርቤሲስን ካይምስንናኔን ኦርፎ ሳማኪ ሁግናባ ፋና ሀኦሲ ሆእታ ዲ።
4 ባሪክ እምቴ ሱናስ ሀኦሲ ዎስያኒ ሱንታን ደናሎ ስንናማቶ ሀኦሲ ና ሀኦሲ ዎሲያታን አካማኖን ደናሎዋ።
ሀኦሲ ና ሀኦሲ ዎሲያታን አካማኖን ደናሎ
5 ሀኦሲ ባሪ ዎሲያሲ ጋነያስን፦
«ነ ናታዋ፤
ሀውጙ ኔን ኮኒን»
ሄፕሳ ደይ፦ «ታ ባሪክ አባ ስናና፤
ባር ደይ ታክ ናታ ስናና»
ይናስ ኦንኒንሶ?
6 ሀኦስ ኡዛ ናዉባስን፤
ሀን ዳስታክ ዎሲፋና ካባሲክ፤
«ሀኦሲ ዎሲያ ዙቴራ፤
ባሪክ ሳጋዶና» ይፋዋ።
7 ስኑንታኖ ሀኦሲ ዎስያኒ ቾዋሲክ፤
ደይ፦ «ሀኦስ ዎሲያኒክቶኖን አያናኒክቶ፤
ሀኦሲክ ዎስቴሴፌ ባሶትን፤
ደይ ጌኒ ውኖኒክቶ ዛጉኒር» ይፋዋ።
8 ስኑንታኖ ናሳ ቾዋክ፤
«ሀኦሴ፤ ዝግሞኔስ ኮእባ ፎንቶኖን ፎኒር፤
ታቶኔስ ደይ ኦኮኒ ሃሮ።
9 ኦኮሶን ሹኒት፤ ማንጉሶን ደይ ኦምቴት፤
ኤስ ባሪ ቦርኣ ዳማ ሀኦኔስ፤
ዞሞኔሳታን ደናሎኖን ግራ፤
ሙዳክ ኔን ሙድ» ይፋ።
10 ኤሲስማቶ ደይ፦
«ዳሚሶ! ነ ዜምማ ዳሶን ቴሲትዋ፤
ሳማሲክቶ ደይ ኩሹኔሲ ዎስቶዋ።
11 ኤስ ባርኪቶ ዙቴራ ትሹኒር፤
ስኑንታኖ ነ ፎታር፤
ዙታምባሴ ማምኒማቶ ኩርኡና።
12 ማምኒማቶ ደይ ዛግራ ብሩታ፤
ባርኪቶ ደይ ማምኒማቶ ስንና ሶልቶና፤
ስኑንታኖ ነ ኣጌነ ኣጌነ ስንፋናክ፤
ነ ነኔሲክ ኮእባ ኣፋ» ይፋ።
13 ሀኦስ ባሪ ዎስያሲክቶኒ ጋነያስን፦
«ጉማኔሳክቶኒን ዎቾኔሲ፤
ስካሎሲ ዛጉና ካባኔን፤
ታ ሆእታ ቴሻስታ ዱዋ»
ይናስ ኦንኒንሶ?
14 ኤካን ሀኦሲ ዎሲያ ዙቴራ ፋሩኒ አሱኒ ሜያክ ዎስቶናክ ዎስቴራ ያ ሀኦኒ ዎስትኛ ስና አያናኒክቶታኖሶ?