6
1 ኤሴ ክርስቶስኒ ቾዋሲክ እምቴ ቴሱኒ አሱስታን ኣታ ኤክ ችማ አስሱሲኪ ሀማኒዋ፤ ክቱ ዎስቶስን ሀርሙኒ ቾዋሲክናዋ ሀኦሲክ አማንቶኒ ቾዋሲክና አሲ ካፕታሶን ሄፕሳ ዎል ላ ካፑታኒታ።
2 ኤሲስማቶ ሀጱቅቶሶን፥ ኩሹክ ታኡሶን፥ ክቱን ካቡሶን፥ ኮእባ ፎንቶ ማጝሱኒ ካርኣሲ አሱኒ ቾዋሶን ሄፕሳ ዎል ላ ካፑታኒታ።
3 ሀኦ እያናነ ኤስ ባሮን ዛጉኒ።
4 አማንቶቤሲሶን ሞርሜ አሱኒ ሜያኖን ሀርምሬ ዎልሶነክ ዛጉ ኣካክ ችምቶኒሪንሶ? ኤስ ኤፌቴና አሱኒ ሜያ ዜሞ ባሶክ ቻሬፋ ቻሬራ ፋር። ሳማኪ እማሶን ቤችሬ ቢሬ ፌሴቴር። ኮርቶ አያናስኔን አነ ሃኤር ስንነ ፌሴቴር።
5 ሀኦሲ ማአ ካማኖንናዋ ሀኔንቲ ዮኒ ዎናሲ ሁግናኖንና ቤችሬ ቢሬ ፌሴቴር።
6 ኤስ ኤፌቴና አሱኒ ሜያ አማንቶቤሲሶን ሞርሜሴፋቴነ ባሶ ቴትቤሲሲክ ሀኦሲ ናኒን ሄፕሳ ዎልግሬ ሱቴሴፌ ቦርአናዋ አምማኖን ሳልጲሲሴፌ ቦርአና ባሶትን ሀርሙሶነክ ዛጉ ኣፋ ችምቶና ዉዛ።
7 ሾዎ ዎና ባሪስታ ኬሬት ፋ እሮሶን ኡሽፋ ባሬዋ ቡለፌ ባሪክ ደይ ጋና እምፋ ዳሴ ሀኦስኪን ኤብባ ዳናና።
8 ስኑንታኖ ሴርነዋ አሴዉነ ካይጋናነ ዋግባ ፎንቶቱ ስናና፤ ኤርዉቶናክ ደይ ታእ፤ ባሪ ኮኣስ ደይ ጌሲ ኪቾዋ።
9 ሹንቶ ሜያነ! ሀን ባሮን ማኬፋናክኑ ንቶ ፋሩንቲሶን ኤጳ ዮኒ ማአ ዉዝንቲ ፋናማቶ እንኖ ፉቶክ አሪፌኒዋ።
10 ሀኦስ ፉቶክቱ ማጝሱ ካርፋዋ። ኤስ ባሪ ቦርኣ ዎስቶኒትሴዋ ዜሞ ስኑን ሀሽቲ ፋ ኮርቶኒ ሜያኖን አርጋሱንቲሴ አሲክ ባሪ ሱናሲክ ዛግሴት ኬሽታናሶን ኣፋ ዳጎናዉዛ።
11 ኒቶ ዙታምኒትሴ አብድክ ኦዴት ፋሴት ዉዛሶን ኩሹንትሲ ኤጳ ጌዳቲ ካባኔን ዱዶንትሶን ሀምማ ኮእባስታ ካርአና ካባኔን ቤሱትክቱ ችኒራ ኤናንቴፌኒዋ።
12 ኤናንቴፌኒስ አማንቶክናዋ ፋኪያክና ዛግሬ የሮክ እምቴ አብዲሶን ዋራሶኒ አሱኒ ሜያነ ፌር ስናትክታኖ አዉጃ ስናትክታዋ።
ሀኦሲ አብድ አማናምቶ ስንባስ
13 ሀኦስ አብራሀምኒክ አብድ እምፋና ካባሲክ ባር ቴጌራ ቴዉናክ ባሪስታን ደናሎ ኦም ኦኑ ኣፌ ስንና ቦርአ ኤካ ይት ባር ባሪ ቴታሲክ ቴይ፦
14 «ፉቶሲክ ኔን ኤቢሱናዋ፤ ዛልኔሶን ደይ ሾዎሱናዋ»
15 አብራሀም ፋኪያክ ኦደ ባሪክ እምቴ አብዲሶን ዳኒ።
16 አሱኒ ሜያ ቴይሴፌ ካባሲክ ባሶስታን ደናሎ ስና ሱና ቴግሴሬቱ ቴይሴፌ። ዎሉምቤሲሶን ቴያክ ዛግሴሬ ባሶ ጋነያሲ ፋ ክርክሪሶን ዙትሬ ትሽክሴፌ።
17 ኤሲስማቶ ሀኦስኪን ቡድ አላማባስ ሶልቶኖር ስንባሶን አምማኖን ቤሱናክ ሾሌፋት አብዲሶን ኤጴቶኒ ባሶክ ቴያክ ዛግ።
18 ኤሲስማቶ ሀኦስ ሀን ሄፕ ሶልቶኖይ ባሪ አብዲሶንናዋ ቴያሶንና እኖክ እሚ፤ ኤስ ባር ደይ ሀኦስ ኤሻክ ኣነ ችምፋ ስንና ቦርአ ስኒስታ ፋ አብዲሶን ዛግራ ኤጳክ ባሪኪ ኤልሌ ሀማ እንኖ አካማ ችማቱ ዳንኒዋ።
19 ኤስ አብዲስ ካኒሲክ ማርካቢስ ሾርኮኖይናማቶ ዛታ ዬትፋ ብታሲማቶዋ። ኤስ አብዲስ ይኑሶን ኣታ ስርኪ ባግቶሪ ግር።
20 የሱስ ሜልኬሴደቅኒ ማግ ስንነ ታቶሳማቶ ኮእባ ፎንቶኖን ማግኒ ጋኝኜ ሜኒ ጋኛ ስንነ እኖክዋ እያት ዜምሜ ስር ግሪዋ።