8
የሱስ ጋድዶ ቴያሲ ማግኒ ጋኘ ሜኒ ጋኛ ስንናማቶ
1 ኤሴ ዎሎኒ ዉዛሲክቶስን አሪክስ ሀኒስዋ፦ ሳማክ ዙታምባሴ አሲስታን ደናሎ ስና ሀኦሲ ዝግሞኒ ሆእታ ቴሻስታ ድ ኤፌቴና ማግኒ ጋኝኜ ሜኒ ጋኛኒ እኖክ ፌርዋ።
2 ባር ዎስቴት ፌናስ ፉቶኒ ዱርካኒ ስና ሜቅዴሲሲዋ። ኤስ ዱርካኒስ ቶክቴናስ አሱኒ ኩሹክ ስንኖይናሮን ዳሚሲክዋ
3 ማግኒ ጋኝኜ ሜኒ ጋኛ እሳርባ እሳርባስ ታቴፌናስ ማባነዋ ማአነ አሲን እማናክዋ። ኤስ ባሪ ቦርኣ ኤስ ማግስ ደይ እማና እሳ ዉዝባ ፎናክ ሾልሱዋ።
4 ቱማሲማቶ ማባሶን እሜፌ ማግኒ ሜያ ፌሴቴር ስንና ቦርአ ባር ሀን ዳስታኪር ስኒ ስንፋናነ ማግ ስናና ካባታዋ።
5 ሀን ማግኒ ሜያ ዎስቴሴፌ ዱርካኒስ ሳማኪ ፋ ባሪ ቤሶነዋ ይራራነ አሲክ ኮእባዋ። ኤስ ባር ደይ ስንናስ ሙሴ ዱርካኒሶን ዎስቴፌና ካባሲክ ሀኦስ፦ «ኣማስታክ አምማኖን ኔክ ቤሲናስነ ፋሮን ዙታምባሴ ማእስራ ኦዳ ዛጉዋ» ይራ አጃጀናሲማቶዋ።
6 ስኑንታኖ ሀሽ የሱስ ጋነኒር ደይ እሳር ዛግና ቴያሲ ኩርኡ ቴያስታን ደናሎ ስና አብዲስታ የሬር ስንናማቶ ባሪክ እምቴ ዎስቶስ ደይ አርኪርዋ።
7 ዜምማቲ ቴያስ ዝናባ ፎንቶ ስንና ቤስቴ ስንፋናነ ሄፕሳኒ ቴያስ ሾልሱና ካባታዋ።
8 ሀኦስ ዳራባሳታ ዝና ፎባሶን ቤሱክ ኤካ ይፋዋ፦
«ኤሴ እስራኤልኒ ዳራስኔንናዋ ዩዳኒ ዳራስኔንና፤
ጋድዶ ቴያኒ ካማ ግሩና ዎና ዮናዋ»
ይፌዋ ዳሚስ።
9 «ኤስ ቴያስ ደይ ኩሹቤሲሶን ኤጳ ግጵጽኒ ሜኒ ዳስታን፤
ባሶትን ክስፋና ካባሲክ፤
ባሶ አባስኔን አነ ግሪና ቴያስነ ፋርታዋ።
ባሶ ታ ቴያኒ ካማሲክ ኣነ የሮሶቶ ስንና ቦርአ፤
ታ ደይ ካሽጝዋ»
ይፌዋ ዳሚስ።
10 «ኤሴ ሀን ዎናስኔን ኦርፎ፤
እስራኤልኒ ዳራስኔን አነ፤
ግሩና ቴያኒ ካማስ ሀኒስዋ፤
ይፌዋ ዳሚስ፤
ታ ቱማሶን ባሶ፤
ካኑስሲ ፎናክ ዛጉና፤
ንብቤሲስ ደይ ትቹና፦
ታ ደይ ባሶክ ሀኦቤስ ስናና፤
ባሶ ደይ ታክ ዳራ ስኖነ.
11 ‹ዳሚስን አሩዋ› ይሬ ዎልኮባስን ስኑን፤
አይባስን አሱኒር ኦኑ ኣፋ ፎና ዉዛ፤
ጋሮሳታን ካብራ ሀምማ፤
አርኪሳታ ካርአና ካባኔን፤
ዙቴሬ ታን አርሶነ፦
12 ማጝሱቤሲሶን ፌሹን ኡና፤
ቦርቤሲሶን ደይ፤
ኣፋ ዎላ ያዳቶና ዉዛ።»
13 ኤሴ፦ «ጋድዶ ቴያኒ ካማ» ይፋና ካባሲክ ስናቲ ቴያኒ ካማሶን ኩርኡ ዛጊዋ ኡዋ። ኤስ ባሪ ቦርኣ ኩርእ ባሬዋ ኩርኡ ዉዛ ዙታምባሴ ትሹና ዎናስ ታእሴዋ።