ዎሲ ዮሀኒስኒ እሶንሳ ዎሲያ
ጋችግሩ
ዎሲ ዮሀኒስኒ ቴሱኒ ዎሲያስ ሄፕ አርኪ አርኪ ዎሲባ ፋር፤ ኤሲስ ደይ ፌሬትሴፌ ባሶ ሀኦስኔንናዋ ናስኔንና አነ ፋ እሳርቤስ ፎናክ ችኑናክናዋ ኤስ እሳርቤሲሶን ደይ ትሽኩክ ችምኒ ኤሻ አሱሲን ዎኬ ቴትቤሲሶን ኦዶሶነክ ዛጉክዋ። ኤስ ካባሲክ ያ ኤሻ አሱስ ማንጙ ዉዛስ ኬስፋናስ ሀን እኛ ዓለሚስኔን ዎል ኡጴሬ ፎሲክ ስንና ቦርአ ሀኦሲ ና ሲና የሱስ ክርስቶስ እሳንነ አፋ አሱ ስንናናክ ቼማናዉዛ ወደይ አሱ ስንኒ አማላባ ኣፋ ፎና ዉዛ ይፋርዋ። ኤስ አስኛኒ ሜያ «ፋሩ ኡስ ሀን ዳስታኪ ፎኒ ቾዋሲክዋ ኢያት ራካቶሶን ቤይየ ብርማዱምማ ኬሳ አሱስዋ» ይሴት ፌሴቴር። ኤስ ባርኔን አነ ደይ «ኮፕፖሲክ ስኑን ኦማ አሱሲክ ኬሽታናሶን ቤሱስ ፋሩስኔን አነ እሳንነ እሳርባ ኣፋዋ» ይሴት ፌሴቴር።
ትች ባር ኤስ አሱሶን ቱጋእኦክ የሱስ ክርስቶስ ዮኡባ ፎንቶ አሱዋ፤ የሱስኒክ አማነፌ ባሶናዋ ሀኦሶን ሹነፌ ባሶና ዙቴሬ ባሶትና ባሶትና ዋል ሹኖሶነክቱ ሾልሲፋዋ ይት አስሲት ፌር።
ማፃፋስ ስሩክ ኤጵና ኤጶባስ
ጋችግሩ 1:1-4
ቻሬፍነዋ ታሉምነ 1:5—2:29
ሀኦሲ ናንጎትነዋ ዳቡሎስኒ ናንጎታሴ 3:1-24
ፉቶነዋ ኤሽነ 4:1-6
ኬሽታኒ ግድ 4:7-21
ኬጀራ ሜሬፋ አማንቶስ 5:1-21
1
ካኒ ካማ
1 ዜምማኔን ፋ ካኒ ቾዋሲ ካማኖንቱ ንቶክ ትችፌኒዋ፤ ኤስ ካኒ ካማስ ደይ ኦደኒ ባሬዋ ኣፍኒሲክ ቢኒ ባሬ፤ ደይ ጋዝግራ ቢኒ ባሬዋ ኩሹኒሲክ ደይ ታእራ ቢኒ ባሬዋ።
2 ኤስ ካስ ደይ አምማኖን ኬስሳ ቤስቴዋ፤ እንኖ ደይ ቢኒ፤ ቢኒ ባሮንቱ ደይ ዛላ ማኮኒዋ። አባስኪክ ፋ ባሮንናዋ እኖክ ደይ አምማኖን ኬስሳ ቤስቴ ባሮንና ኮእባ ፎንቶ ካሶንቱ ንቶክ ማኬፌኒዋ።
3 እኖኔን አነ እሳርኒት ፎናክ ቢኒ ባሮንናዋ ኦደኒ ባሮንናቱ ንቶክ ማኬፌኒዋ። እሳር ስንኒስ ደይ አባስኔንናዋ ና የሱስ ክርስቶስኔንናዋ።
4 ግራኒስ ቱማ ስናናክቱ ሀን ባሮን ንቶክ ትችፌኒዋ።
ሀኦስ ቻሬፋዋ
5 ባርኪን ኦደኒስ ደይ ንቶክ ማኬፌኒ ዎሲያስ፦ «ሀኦሲ ቻሬፋዋ፤ ታልማስ ደይ ባሪኪክ እሳንነ ኣፋዋ» ይፋርዋ።
6 ኤስ ባሪ ቦርኣ፦ «ሀኦስኔን አነ እሳርኒ ፋርዋ» ይፋት ታልማሲ ፋኒር ስንፋናነ እንኖ ኤሽኛዋ፤ ፉቶሲክ ደይ ኣነ ፋፌኒ ኡዋ።
7 ስኑንታኖ ባር ቻሬፋስሲ ፌናማቶ እንኖ ደይ ቻሬፋስሲ ፋፋኒነ እኖትና እኖትና ዎል እሳርኒ ፎናዋ። ደይ ናዉባ የሱስ ክርስቶስኒ ሀንናስ ቦርአ ዙታምባሴ አሲስን እኖትን ካይንኑናዋ።
8 እንኖ ቦርእኒ ኣፋዋ እያኒነ ቴትንሶንቱ ኤሽድፌኒዋ። ፉቶስ ደይ እኖስሲ ኣፋዋ።
9 ቦርኒሶን ሀኦሲክ ሀርምፋኒነ ባር አማናምቶ ደይ ኦኮ ስንና ቦርአ ቦርእኒሶን ዙታምባሴ አሲን ፌሹን ኡናዋ። ማጝሱኒ ዙታምባሴ አሲስን ደይ እኖትን ካይንኑናዋ።
10 ቦርአ ኣነ ዎስቶዌኒዋ እያንነ ሀኦሶን ኤሽኛ ዛግኒርዋ፤ ካምባስ ደይ እኖስሲ ኣፋዋ።