ያቆብኒ ዎሲያ
ጋችግሩ
ሀን ያቆብኒ ዎሲያስ ዎንና ዎንናት ፎኒሲክ ዞንሲያ ስንኒ ሳፋራባ ስሩክ ኤጶ ስንፋት ትቼናስ ደይ ሀን ዳስታክ ሲክቴሬ ፌሴ አሲሬ ሄፔ አሲቴሴሪሲክቶክዋ። ትች ባር ቴችማሶን አምማኖን ዎስቶታ ፌሹኒ ኡግናሶን፤ ክርስታናኒ ሜያ ዎል እርባሲት ፎነዋ አማላነ አሲክ ቾዋሲ ዞንሲያ ስንኒ ዉዛሲክቶኖን አምማ ስና ቤሶባ ፋና ዎላክቱ ማኬዋ። ቱካም ስንኒ ቾዋሴዋ ኦቱም ስንኒ ቾዋሴ፤ ፋታናኒ ቾዋ፤ ማአ አማላኒ ቾዋ፤ ኮናኒ ቾዋ፤ አማንቶነዋ ማአ አማላነ፤ ቴርማኒ ማእነዋ ማጙነ፤ ቴቹምኒ ቾዋ፤ ዎል ፋሶኒ ቾዋ፤ ቤጋንቶነዋ ጋራምነ አሲ ቾዋ፤ ኦሚሳታ ማጝሱኒ ካርኒ ቾዋ፤ ቤጋንቶኒ ቾዋ፥ ፋኪኒ ቾዉነዋ ሺጶነ፤ ክርስታናኒ ሜያ ዛግሶነክ ሾልሲፋ ግድነ አስን እሳርባ እሳርባሲክ ኮትቴቱ ትች።
ዎሲያስ ክርስትናኒ ካኒ አማንቶነዋ ዎስቶታ ፌሹኒ ቾዋሶን ማእስራቱ ቤሲፋ።
ማፃፋስ ስሩክ ኤጵና ኤጶባስ
ጋችግሩ 1:1
አማንቶነዋ ቴቹምነ 1:2-8
ቱካማነዋ ኦቱምነ 1:9-11
ፋታና 1:12-18
ሀኦሲ ካማኖን ኦዶነዋ ዛጉነ 1:19-27
ኮሩ ዛግቶኖይናማቶ እምቴ ኪቶ 2:1-13
አማንቶነዋ ዎስቶነ 2:14-26
ክርስታናስናዋ ቴሩምባሴ 3:1-18
ክርስታናስናዋ ሀን ዳሴ 4:1—5:6
ሾዎ ቴሳ ዉዛክ እምቴ ኪቶ 5:7-20
1
ያቆብኒ ዎሲያ
1 ዳሲ ብራቶታ ቦክቴሬ ፌሴ አሲሬ ሄፔ አሲቴሴርሲክቶክ ሀኦሲሬዋ ዳምኒ የሱስ ክርስቶስኒ ዎስትኛ ስና ያቆብንኪን ዎስቴ ዎሲያ፤ ናጋ ንቶክ ስንፋውጝዋ።
አማንቶነዋ ቴቹምነ
2 አይታሳክቶኖ! ሾዎ ቴሳ ፋታና ንቶስታ ካርፋና ካባሲክ ንቶትን ግርሱኒ ዉዛ ዳንትንነ ፋሮን ዛግራ ፋዱትዋ።
3 አማንቶቲሲ ፋታንቶ ፋኪያክ ችምሜ ፎሶን አሩትክዋ።
4 ፋኪያክ ችምሜ ፎንትስ እሳንነ ዮኡኖይናማቶ ቱም ስንና ፎትክ ዛግር ስኑንጝዋ።
5 ንቶ ጋነያሲ ቴችማባ ዮእና አሱ ፌፋናነ ኮሩኖይ ጋራማክ እምፋ ሀኦሶን ሺጶዎዋ። ባር ደይ እማናዋ።
6 ስኑንታኖ ሄፕ ሳፋራባ ፌና ባር ስሩ ቱጋን ኤክ ሀጝ ሾርኬት ኩኒ ባሪኒ አካስነ ፌር ስንና ቦርአ ኤክ ሀጝ ኡኖይ አማንቶክ ሺጶዎዋ።
7-8 ሄፕ ሳፋራባ ፌና ባር ኡጉንባስታክ ኤክ ሀጝ ሾርኬት የሬፌ ባር ሀኦስኪን እሳ ዉዛነ ዳንኒርነ ፋር ስንና ባሪክ ቤስቶናታዋ።
ቱካም አሱናዋ ኦቱም አሱና
9 ፎባሲክ ቱካም ስንነ ፌ አይስ ሀኦስ ባሪን ደን ቴጉኒር ስንና ቦርአ ግሮዎዋ።
10 ኤሲስማቶ ደይ ፎባሲክ ኦቴሬ ፌ አይስ ሀኦስ ባሪን ዳ ኬስሳናነ ግሮዎዋ
11 አሱኒ ኦትማ ኩዋኒ ፉርኒማቶ ዎቶኒርዋ፤ አዋ ኪችፋና ካባሲክ ደይ ኩዋሶንናዋ ፉርአሶንና እችንስርዋ፤ ፉርኣስ ዎቴራ ጋዳባስ ደይ ትሽር። ኤሲስማቶቱ ኦቱም አሱ ዎስቶክ ኤክ ሀጝ ይፌት ትሽፌዋ።
አሱኒስታ ካርፋ ፋታና
12 ፋታናሶን ፋኪያክ ችማ ባሪክ ዳሚስ አብድኒ ካምባሲማቶ ሀኦሶን ሹነፌ ባሶክ ካኒ አክልሊሶን እማናዋ። ኤስ ባሪ ቦርኣ ፋታና ባሳስታ ካርፋና ካባሲክ ችምሜ ኣትፌ አሱስ ሱስቶዋ።
13 ሀኦስ ማጙ ዉዛሲክ ኣነ ፋታንቴፋ፤ ኤሲስማቶ ባር ደይ ኦኒንኑ ማጙ ዉዛ ዛጉናክ ኣነ ፋትታነፋዋ። ኤስ ባሪ ቦርኣ ኦኑ ስንፋናነ ፋታንቴፌና ካባሲክ፦ «ሀኦስ ታን ፋታነዋ» ኡናታዋ።
14 ስኑንታኖ አሱ ቴትባሲ ማጙ ኤናንቶክ ዛቴሬናዋ ኤሽቴፌና ካባሲክቱ ፋታንቴፌዋ።
15 ኤስታን ማጙ ኤናንቶባስ ናኔርቴራ ቦርኣሶን ኮኒፋ፤ ቦርኣስ ደይ ድቻ ክቱ ቴሸፋዋ።
16 ኬሽቴፋና አይታሳክቶኖ፤ ኤሽቶትታዋ።
17 ማአ እማሴዋ ቱማ ኤባሴ ዙቴራ ደን ሀኦስክጝዋ። ኤስ ባር ደይ ይራራኒማቶ ሻቶኖይ ወደይ ሶልቶባ ፎንቶ ቻሬፍኒ አባ ሲና ሀኦስክጝዋ።
18 ሀኦስ ቴስቶ ዙታምባሴ አሲ ኡዛ ስናኒክ ባሪ ፍቃዲሲማቶ ፉቶኒ ካምባሲክ እኖትን ታነዋ።
ኦደኒ ውዛሶን ዎስቶታ ፌሹ
19 ኬሽቴፋና አይታሳክቶኖ! አሱ እሳርባ እሳርባስ ኦዶክ ታፕቴር ስኖዋ። ዎሎክናዋ ግእቶክና ታፕቶኖር ስኖዋ።
20 ኤሲስ ደይ አሱኒ ግእአስ ሀኦስ ሾሌፋና ኦኮ ስንነ ፎሶን ፎኒክ ኣነ ዛግፋዋ።
21 ኤስ ባሪ ቦርኣ ኪናሶንናዋ ቱምማ ፋ ማንጉሶንና ዙትራ ንቶስታን ዎክሳት ሀኦስ ንቶ ንብባሲ ኩንሲና ካንትሶን ፋቱክ ችምኒ ካምባሶን ማአ ንባክ ኤጳቶትዋ።
22 ካምባሶን ኦዴሬ ዎስቶታ ፌሺር ስንትታኖ ቴትኒትሶን ኤሸት ባክ ኦደር ስናትታዋ።
23 ካምባሶን ኦዴሬ ዎስቶታ ፌሹኖይ አሱ ቴትባሲ ግቶኖን እንካሊሲ ብያ አሱነ ፌርዋ።
24 ኤስ አሱስ ኣፍባሲ ቢሬ ሀምፋት ጌሬጌሬ ደይ ባር አዉነፌር ስንናማቶ ዳጌፌዋ።
25 ስኑንታኖ ብርማዱምማ ክሱኒ ዮኡባ ፎንቶ ቱማሶን ጋሳሲሬ ቢሬ ባሪክ ችምሜ ፌ ባር ኦዴሬ ዳጌር ስኖይናማቶ ዎስቶታ ፌሽፌ ባር ዎስቴፌና ዎስቶሲክ ሱስቶዋ።
26 ቴሩምባሶን ኦድኖይ፦ «ሀኦሶንቱ ሺጴድፋንዋ» ይፌ አሱ ቴትባሶንቱ ኤሽፌዋ። ባሳ ሀኦኒ ሺጶስ ደይ ዋግባ ኣፋዋ።
27 አባ ሀኦሲ ስና ኪንባ ፎንቶ ሺጶስ ሃኒስዋ፦ «አባ እንቶቤሲ ክትና ናንጎታሲክቶኖን፤ ኤሲስማቶ ደይ ቴጎቤስ ክትና ማሽካሱሲክቶኖን ራኮቤሲሲክ አሪጋሱ፤ ቴትኒሶን ደይ ሀን ዳስታኪ ፋ ኪና ዉዛሲን ኦዳስዋ።»