ዮሀኒስ ትችና
ዳምኒ የሱስ ክርስቶስኒ ምስራቹኒ ካማ
ጋችግሩ
ዮሀኒስ ትችና ምስራቹኒ ካማስ የሱስኒ ቾዋሶን ቤሱናክ ሾሌናስ አሻ ማየ አሱኒ ሜኒ ጋነሲ ቤስቴ ሀየዋ ሀኦኒ ካማ ስኒባሶን አምማኖን ቤሱክዋ። ማፃፋሲ ቴትባሲክ ማኬፋናስ ሀን ምስራቹኒ ካማሶን ፌሬትፌ ባሶ የሱስ ፋቱኒር ስኒነ ዮኒር ይስቴ ሀኦኒ ና ስኒባሶን አማኖሶነክናዋ ባርኪ አማኖሶቤሲሲክ ኮእባ ፎንቶ ካ ዳኖሶነማቶና ያዳቶሶነክዋ። (20:31)
ምስራቹኒ ካማሲ ቴሱኒ ድማስ ኮእባ ፎንቶ ሀኦሲ ካምነዋ የሱስና እሳር ስኖቤሲሶንቱ ጋችግሩ ዛግሬ ቤስ። (ኤደባ 1:1-18) ኤስታን የሱስ ፋቱኒር ስኒነ ዮኒር ይስቴ ሀኦኒ ና ስኒባሶን ቤስፋ ሾዎ ቴሳ ቢስቴራ አሪቶኖይ ዉዛሲክቶኖንቱ ማኬፋ። (ኤደባ 1:19—12:50) ኤስታን ኤስ ቢስቴራ አሪቶኖይ ዉዛሲክቶስኒ አሮ ቡአ ቤስቴናማቶ ቤስፋ ቶቾሶን ቱስራ ማኬፋ። ኤስ ቴሱኒ ድማስ ማኬፋናስ እሳ እሳ አሱኒ ሜያ የሱስኒክ አማነሴሬ ባሳ ዞንስ ስኖቤሲሶን፤ ኦምኒ ሜያ ደይ ኣካክ ቱጋሴቴማቶናዋ ባርኪ ኣፋ አማኖኒዉዛ ይሴቴማቶናዋ። (ኤደባ 13-17) የሱስ ኦቴና ዎኖ ዋልን ናዎኒ ሜያኔን አዉነ ፋ ታእሶ እሳርቤስ ፋናማቶ ሱቶና ዎናሲክ ደይ ሆሱኒ ካምነዋ ችኑኒ ካምነ ባሶክ ማኬናማቶቱ ማኬፋ። ኮእኒ ኤዴሲክቶ የሱስኒ ኦቶሶንናዋ ማጝሱ ካቶናክ ታእባሶንና፤ ባሳ ሱቶሶሴዋ ክቱኒ ካቡባሶንና፤ ኤሲስማቶ ደይ ክቱኒ ካብናኔን ኦርፎ ናዎኒ ሜያክ አምማኖን ቤስቶባሶንቱ ማኬፋ። (ኤደባ 18-21)።
ዮሀኒስ የሱስ ክርስቶስኒኪ ካሞ ቤስቴፋ ኮእባ ፎንቶ ካሶን ቴግራ ቤስፋ ኤስ ሀኦሲ ኦትማ ሀውጙኔን ካብራ የሱስኒን ኡግና ዛግሬ፤ ፉቶ ዛግሬ፤ ካ ዛግሬ ኤጴቴሴፌ ባሶክዋ። ዮሀኒስኒ ምስራቹኒ ካማሶን ኦማ ዛግፋስ አያናክ ፎስ ፉቶኖን አሱክ አርቶ ዎንና ዎንናት ፎሲክ ኤጳ ኬእፌኒ ዉዛሲክቶኖን፤ ኤሲስ ደይ አካ፥ ቱሻ፥ ቻሬፋ፥ ኬሜር፥ ፋንቱኒክቶ፥ ዋይኒን ቶኮነዋ ዋይኒን ጋናነ ፋ ዉዛሲክቶኖን ቤሶ ዛግሬ ኤጴ ኬእባስዋ።
ማፃፋሲ ስሩክ ኤጵና ኤጶባስ
ጋችግሩ፤ 1:1-18
ሀጵቅፌ ዮሀኒስናዋ የሱስኒ ቴሱኒ ናዎኒ ሜና 1:19-51
የሱስ አምማኖን ዎስቶ ጃማሮባስ 2:1—12:50
የሩሳሌምኒስናዋ ብራቶባስታክና ዎስቶባስ ደይ ኮእኒ ዎናሲክቶኔ 13:1—19:42
ዳሚሳ ክቱኒ ካቡነዋ አምማኖን ቤስቶባሴ 20:1-31
ኮርኡባስ፦ ጋሊላክ ሄፕሳ ናዎኒ ሜያክ አምማኖን ቤስቶባስ 21:1-25
1
ዮሀኒስ ትችና ሀኦኒ ካኒ ካማ
ም
1 ዜምማኔን ካም ፌር። ባር ደይ ሀኦሲክቱ ፌ፤ ካሚስ ደይ ሀኦ፤
2 ባር ደይ ዜምሜ ሀኦስኔንቱ ፌ።
3 ዙታምባሴ ባሪክቱ ቴስቴ፤ ቴስቴ ዉዛስ ዙቴራ ባርኪ ካሞቱ ቴስቴ፤ እሳ ዉዛኔ ባርኔን ጌራካሎ ቴስቴር ኣፋ።
4 ካ ባርኪክ ፋር፤ ኤስ ካስ ደይ አሱኒክ ቻሬፋ ስንና ፋር።
5 ቻሬፋስ ታልማስ ቻርስር፤ ታልማስ ባሮን ኣነ ሜሮዋ።
6 ሀኦስኪን ዎስቴሬ የ ሱምባ ዮሀኒስ ይስቴ እሳ አሱ ፌር።
7 ዙታምቤሲሴ ባርኪ ካሞ አማኖሶነክ ባር ቻሬፋሲ ቾዋኖን ዛላ ማኮናክቱ የ።
8 ቻሬፋሲ ቾዋኖን ዛላ ማኮናክቱ ዬቴኖ ባር ቻሬፍቴ።
9 አሱ ዙታምባሴ አሲክ ቻሱኒ ፉቶኒ ቻሬፋ ሀን ዳስታክ ያድፋር።
10 ሀን ዳስታክ ፌር፤ ሀን ዳስ ባሪክቱ ቴስቴ፤ ስኒፋናክኑ ሀን ዳስ ኣነ ኤጳቶዋ።
11 ባሳ ኬን ስና ባሶኪ የ፤ ስኑንታኖ ባሶ ባሪን ኣነ ኤጴቶሶቶ።
12 ስኑንታኖ ኤጴቴሴሬ ሱንባሲክ አማነፌ ባሶ ዙቴሬ ሀኦኒ ናንጎታ ስኖነክ ማብት ባሶክ እምቴ።
13 ባሶ ሀኦኒ ናንጎታ ስንነቴስ አሱኒ ቱማክ ወደይ ሀንናኪን ወደይ አሻኪን ወደይ ቴጎኒ ፍቃድክ ኣነ ኮንቶሶቶ። ባሶ ኮንቴሴቴስ ሀኦኪጝዋ።
14 ካማስ አሻ ስንና እንኖ ጋነያሲ ሀእ። እንኖ ደይ አባባስክ ፌና ካባሲክ ፋ ኡልፍንባስነ ፋ እሳ ና ባር ባሳ ኡልፍናሶን ቢኒ። ባር ደይ [ሀኦኒ ኦቱማክናዋ ፉቶክና ቱሚ]።
15 ዮሀኒስ ባሳ ቾዋሶን ዛላ ማኬት፦ « ‹ታ ኦርፎስታ ዮኒ ባር ታኔን ስናክ ፌር። ታይስታን ደይ ደናሎ› ይራ ማኬናስ ባርዋ» ይሬ ቻጊ።
16 ባሳ ቱማስታን እንኖ ዙታምኒሴ ኦትማስታን ኦትማ ዳይስራ ኤጳታኒ።
17 ቱማስ ሙሴኒኪ ካሞ እምቴ። ስኑንታኖ ኦቱምነዋ ፉቶነ የሱስ ክርስቶስኒኪ ካሞ ያ።
18 ሀኦሶን ብያር ኦኑ ኣፌ። ስኑንታኖ አባን ስና ሀኦሲኔን ፌ እሳ ናስ ባር ባር ሀኦስ ኦ ስንናማቶ እኖክ አምማኖን ቤሲ።
ሀጵቅፌ ዮሀኒስ ማኬና ዛላ
19 አይሁድኒ ሜኒ አስሲኛኒ ሜያ የሩሳለሙን ማግኒ ሜናዋ ባሶትን አሪጋሴፌ ሌዊኒ ሜና አሲን ዮሀኒስኒኪ ዎስሴሬ፦ «ነ ኦንሶ?» ይሬ ማሙስሴቴ ካባሲክ ማኬና ዛልኒ ካማስ ሀኒስዋ።
20 ባር ደይ ኣቹኖይ፦ «ዮኒር ይስቴ ሙድቶስ ታቴዋ » ይሬ አምማኖን ማኬ።
21 ባሶ ደይ፦ «ኤኪን ነ ኦንሶ? ኤልያስኖሶ?» ይሬ ማሙስሴቴ። ባር ደይ፦ «እንዳነዋ» ይሬ ዎልጊ። ባሶ ደይ፦ «ኤኪን ራጁኖሶ?» ይሴቴ። ባር ደይ፦ «እንዳነዋ» ይሬ ዎልጊ።
22 ባሶ ደይ፦ «ኤኪን ነ ኦንሶ? እኖትን ዎሲ ባሶክ ሀማ ማኮኒክ ነ ነ ቴታሶን ኦ ይፋትሶ?» ይሴቴ።
23 ባር፦ «ራጁ እሳያስኒሲ ማክቴናሲማቶ ‹ዳሚሳ ኡግናኖን ዜጵት› ይሬ ኢችማ ዳስ ሲ ቻግፌ አሱሳ ካማ ታዋ» ይ።
24 ባሶ ዎስቴሬ ዬሴቴስ ፌርሳዊኒ ሜያኪንዋ።
25 ባሶ ደይ ዮሀኒስኒን፦ «ኤሴ ነ ክርስቶስ ወደይ ኤልያስ ወደይ ዮኒር ይስቴ ራጁኡስ ስና ሻካታነ አዉኒሮን ሀጵቅድፋታሪንሶ?» ይሴሬ ማሙስሴቴ።
26 ዮሀኒስ ዎልግሬ፦ «ታ አካክቱ ሀጵቁና። ስኑንታኖ ንቶ አሩኖይትር ጋነንትሲ የሬፌርዋ።
27 ታ ኦርፎስታ ዮኒ ባሳ ቻእማሲ ታርአኖን ኮታክ ሾልሱኖይናር ባርዋ።»
28 ሀን ባር ዙቴራ ስንናስ ዮሀኒስ ሀጵቅት ፌና ዮርዳኖስኒ አካሲ የሳሎ አዋ ኬስናርኪክ ፋ ብታኒያክዋ።
ሀኦኒ ፋንቱ
29 ዎኖትርክ የሱስ ዮሀኒስኒኪ ዬፌን ብያት ኤካ ይ፦ «ኤሴ ሀን ዳስታክ ፌ አሱሳ ቦርአኖን ባሶስታን ትሽኩኒ ሀኦኒ ፋንቱ፤
30 ‹ታ ኦርፎስታ ዮኒ ባር ታኔን ስናክ ፌር። ታይስታን ደይ ደናሎ› ይራ ማኬናስ ባርዋ።
31 ታኑ ኤስ ዮኒ ባሪን ኣነ አሪፋትዋ። ስኑንታኖ ታ አካክ ሀጵቅት ያናስ እስራኤልኒ ሜያ ባሪን አሪሶነክዋ።»
32 ዮሀኒስ ኤካ ይሬ ዛላ ማኬ፦ «ኮርቶ አያና ሳማን ናካሎነ ፋር ስንና ባሳስታ ኬሬፌን ቢን።
33 አካክ ሀጵቁናክ ታን ዎሲስ ባር፦ ‹ኮርቶ አያና ኬሬፌንናዋ ባሳስታ ዲፌንና ብያታ ባርቱ ኮርቶ አያናክ ሀጵቁኒስዋ› ይራ ማኬና ካባኔን ታኑ ኣነ አሩትዋ።
34 ታ ደይ ቢና ቦርአ ባር ሀኦኒ ና ስኒባሶን ዛላ ማኬንጝዋ።»
ቴሱኒ የሱስኒ ናዎሳክቶ
35 ዎኖትርክ ዮሀኒስ ሄፕ ናዎባስኔን ኤስታ የሬፌር።
36 የሱስ ኤስታክ ኣትፌን ዮሀኒስ ብያት፦ «ኤሴ ሀኒስ ሀኦሲ ፋንቱዋ» ይ።
37 ሄፕ ዮሀኒስኒ ናዎሳክቶ ዮሀኒስ ኤስ ባሮን ማኬፌን ኦደሴፋት የሱስኒ ኦርፎሴ ሀሜቴ።
38 ባሶ የሱስኒ ኦርፎሴ ሀሜፌን የርእቀሬ ብያት «አዉ ሾሌድፌትሪንሶ?» ይ። ባሶ ደይ፦ «ሬቢ! አይንሶ ፋፋታርሪ?» ይሴቴ። ሬቢ! ኡስ አስሲኛ ኡዋ።
39 ባር ደይ፦ «ያራ ቢትዋ» ይ። ሀሜሬ ፌፌናማቶ ብየሬ ኤስ ዎኖ አነ ፌሸቴ። ኤስ ካባሲክ ደይ ዎናሲ አስር ሳአት ስናና።
40 ዮሀኒስ ማኬና ካማሶን ኦዴሬ ባርኔን አነ ሀሜ ናዎሳስን እሳይስ ስሞን ጴጥሮስኒ አይ ስና አንድርያስ ፌር።
41 ባር ዜምሜ አይባ ስሞኒኪ ሀምሜ፦ «ሜሲስን ዳንኒዋ» ይ። ሜሲ ኡስ ሙድቶ ኡዋ።
42 የሱስኒኪ ደይ ኤጴ የ። የሱስ ባሪን ቢሬ፦ «ነ ዮንናዓኒ ና ስሞንዋ፥ ነ ሀውጙኔን ኤካሎ ‹ኬፋ› ይስቴራቱ ቴግቶታዋ» ይ። ኮትባስ ደይ «ጴጥሮስ ወደይ እኛ ሹአ» ኡዋ።
የሱስ ፍልጶስኒንናዋ ናትናኤልንና ቴጌ
43 ዎኖትሪክ የሱስ ጋሊላ ሀማናክ ሾሌ። ፍልጶስኒን ደይ ዳንነ፦ «ታኔን አነ ሀምንዋ» ይ።
44 ፍልጶስ ደይ አንድርያስናዋ ጴጥሮስና አስሲማቶ ቤቴሳይዳኪ ካታማስቱ ፌሴፌ።
45 ፍልጶስ ናትናኤልንን ዳንነ፦ «ሙሴኒ ቱማሲናዋ ራጁኒ ሜያ ባሳ ቾዉባሶን ትችሴቴ ባሪን ዳንጝዋ። ኤሲስ ደይ ዮሴፍኒ ና ናዝሬትክ የሱስዋ» ይ።
46 ናትናኤል ደይ፦ «ናዝሬቱን ማአ ዉዛ ኬሳክ ችምንሮሶ?» ይ። ፍልጶስ፦ «ያራ ቢዋ» ይ።
47 የሱስ ደይ ናትናኤል ሀጝ ባርኪ ዬፌን ብያት፦ «ፉቶኒ እስራኤልኒ አሱ ሀንፌዋ» ይ።
48 ናትናኤል ደይ፦ «ታን አይክ አሪፋትሶ?» ይት ማምሲ። የሱስ ዎልግሬ፦ «ፍልጶስ ቴጎኖይፌን ቤለስኒ እኦሲ ዲሲ ዲፌን ቢጝዋ» ይ።
49 ናትናኤል ዎልግሬ፦ «አስሲኛኖ! ነ ሀኦኒ ናዋ። ነ እስራኤልኒ ታቶዋ» ይ።
50 የሱስ ዎልግሬ፦ « ‹ቤለስኒ እኦሲ ዲሲ ዲፌን ቢጝዋ› ይና ቦርአኖሶ አማነታሪ? ሀኒስታን ደናሎ ዉዛኑ ብያታርዋ።
51 ፉቶክ ንቶክ ማኬፋውጙዋ፤ ሳማስ ጋቼፌን ሀኦሲ ዎስያ ደይ ዳ አሱኒ ናስኪ ኬሬፌንናዋ ኬስፌንና ብያትዋ» ይ።