ማርቆስ ትችና
ዳም የሱስ ክርስቶስኒ ምስራቹኒ ካማ
ጋችግሩ
ማርቆስኒ ምስራቹኒ ካማስ፦ «ሀን ሀኦሲ ና የሱስ ክርስቶስኒ ምስራቹኒ ካማሲ ቴሱ» ይትቱ ማኬፌዋ። ሀን ምስራቹኒ ካማስ የሱስ ዎስቶኒ አሱናዋ ሀእሱኒ ሁግናባ ፋና አሱና ስንነቱ የ። ሀእሱኒ ሁግናባስ ደይ አስሱባሲክ፤ ኪና አያናስታ ፋ ሁግናባሲክናዋ አሱኒ ቦርኣሶን ፌሹን ኡባሲክናቱ አምማኖን ኬስሳ ቢስቴ። የሱስ፦ «ታ አሱኒ ሜያኖን ቦርኣሲ ቦዝሱስን ብርማዱምማ ክሱናክ ካናሶን ፉሮኒር ዛግራ እማናክ የ አሱኒ ናዋ» ይሬቱ ባር ቴትባሲክ ማኬ።
ማርቆስ የሱስኒ ቶቾሶን ቤሲናስ ዜጵቶነዋ ሁግናክ ቱማ ኡግና ስንፋት ዛጊግሬ ማኬናስ ደይ የሱስኒ ካማስታንናዋ አስሱስታንና ስኖይናሮን ባር ዎስቴና ዲንቂ ዎስቶሶንዋ። ሀጵቅፌ ዮሀኒስኒ ቶቾሲክ ደይ፤ የሱስኒ ሀጱቅቶሴዋ ፋታንቶሴ አሲክ ካዉና ጋችግሩ እምናኔን ኦርፎ ትችፌ ባር የሱስኒ አስሱሲ ቾዋኖንናዋ ሜሮስን ፋቱባሲ ዎስቶኖንናቱ ኮቴ ማኬፌ። ዎንናኔን ኦርፎ የሱስኒክ ዞኑስቴፌ ሜያ የሱስኒን ማእስሬ አርሴት ሀሜቴስንነ ፋሮን የሱስኒን ቱጋሴፌ ባሶ ደይ አርክስሬ ኦምቴሴት ሀሜቴርዋ። ኮእኒ ኤዴሲክቶ የሱስኒ ካስታ ኮእኒ ቶርባኒሲ ዛግቴ ዉዛሲክቶኖን፤ አሪክሮን ደይ ባሳ ሱቶሴዋ ባሳ ክቱን ካቡሴ አሲንቱ ማኬፋ።
ምስራቹኒ ካማሲ ኮእታ ኩኒ ሄፕ ባግቶሲክቶስን እሳ እሳ ትቻሲክቶሲ ኮእባቱ ፋርዋ።
ትቻስ ስሩክ ኤጵና ኤጶባስ
ምስራቹኒ ካማሲ ቴሱ 1:1-13
የሱስ ባሳ ዎስቶሶን ጋሊላክ ዎስቶባስ 1:14—9:50
የሩሳሌም ሀምሜ ዎስቶባስ 10:1-52
የሩሳለሙክናዋ ብራቶስታና ፋ ኬኤሲ ኮእኒ ቶርባኒሴ 11:1—15:47
የሱስኒ ክቱን ካቡ 16:1-8
ክቱን ካቢ ዳሚሳ አምማኖን ቤስቶነዋ ደን ሳማ ሀምነ 16:9-20
1
ሀጵቅፌ ዮሀኒስኒ ምስራቹኒ ካምኒ ማኮ
(ማት. 3:1-12፤ ሉቃ. 3:1-18፤ ዮሀ. 1:19-28)
1 ሀኒስ ሀኦኒ ና ስና የሱስ ክርስቶስኒ ቾዋሶን ማኬፋ ምስራቹኒ ካማሲ ቴሱዋ።
2 ራጁ ስና ኢሳያስኒ ማፃፋስሲ፦
«ኡጉኔሶን ሳብሱኒ ዎስታርን፤
ነ ስናስታ ዜምማ ዎሱናዋ»
3 ደይ፦
« ‹ዳሚሳ ኡግናኖን ሆሱት፤
ሳብስራ ደይ ማእሱት› ይት፤
ኢችማ ዳስ ሲ ቻግፌ አሱኒ ካማ።»
ይስቴራ ትቼዋ።
4 ኤስ ባሪ ቦርኣ ሀጵቅፌ ዮሀኒስ ኢችማ ዳስ ሲ፦ «ቦርኒትስ ፌሹን ኡስቶናክ ሀርምራ ሀጱቅቶት» ይት ማኬት የ።
5 ዩዳኒ ዳስታክናዋ የሩሳሌምኒ ካታማስና ዙቴሬ አካም ሾዎ አሱኒ ሜያ ዮሀኒስኒኪ ዬሴሬ ቦርቤሲሶን ሀርምፋፌ ዮርዳኖስኒ አካስሲ ባሪክ ሀጱክቴሴት ፌሴቴር።
6 ሀጵቅፌ ዮሀኒስኒ ማማስ ደይ ጋላኒ ኤሳክ ውቾኖንቱ ማይፌ። ጌሾባሶን ደይ ታልፋክቱ ታርኤፌ። ሙባስ ደይ ብልጛነዋ ዛቦኒ ኤስስነ።
7 አሱኒ ሜያክ፦ «ታ ሙግራ ቻኣማባሲ ታርአኖን ኮታክ ሾልሱኖይናር ታይስታን አካማኖን ኡልፍንቶ ታ ኦርፎስታ ዮኒር።
8 ታ ንቶትን አካክቱ ሀጵቁና። ስኑንታኖ ባር ኮርቶ አያናክቱ ንቶትን ሀጵቁና» ይት ማኬት ፌር።
የሱስኒ ሀጱቅቶነዋ ፋታንቶነ
(ማት. 3:13-17፤ 4:1-11፤ ሉቃ. 3:21-22፤ 4:1-13)
9 ኤስ ካባሲክ የሱስ ጋሊላኪ ዳስታ ፋ፤ ካታማ ናዝሬቱን ዬሬ ዮርዳኖስኪኪ አካስሲ ዮሀኒስኒክ ሀጱክቴ።
10 ጌሬጌሬ የሱስ አካስን ኬስፌና ካባሲክ ሳማስ ጋቼፌንናዋ ሀኦኒ አያና ናካሎኒማቶ ስንና ባሳስታ ኬሬፌንና ቢ።
11 ኤስ ካባሲክ፦ «ሹንፋና ናታ ነዋ። ኔክቱ ታ ግሬፋውጙዋ» ይፋ ካማ ደን ሳማን ኦድቴ።
12 ጌሬጌሬ ኮርቶ አያና ባሪን ኢችማ ዳስ ሲ ታሚ።
13 ኢችማ ዳስ ሲ ሴጣናክ ፋታንቴት አቼቻስር ዎና ድ። ቡርኡኒ ጎኞኔንቱ ፌ። ሀኦኒ ዎስያስ ደይ ያራ ባሪን አርጋስሴ።
ቴሱኒ ናዎኒ ሜኒ ኮርቶ
(ማት. 4:14-17፤ ሉቃ. 4:14-15)
14 ዮሀኒስ ታቶኒ ኬር ግሪናኔን ኦርፎ የሱስ ሀኦሲ ምስራቹኒ ካማኖን ማኬት ጋሊላ ሀሚ።
15 አሲፌና ካባሲክ ደይ፦ «ዎናስ ኮእ፥ ሀኦሲ ታቶኒ ሀእሱስ ታእሴ። ቦርኒትሶን ሀርምራ ምስራቹኒ ካማሲክ አማኖት» ይት ማኬት ፌር።
16 የሱስ ጋሊላኪ ባርሲ ቴሻ ካሞ ኣትፌት ዎስቶቤስ ቁርጡምኒ ኤሻ ስና ስሞንናዋ አይባ እንድርያስና ዩጉዶቤሲሶን አካስሲ ሀእሴፌን ቢ።
17 የሱስ ደይ ባሶክ፦ «ታኔን አነ ዮትዋ። ኤካት ሀኦሲ ታቶሲ አሱኒን ዙቱትክ ዛጉናዋ» ይ።
18 ባሶ ደይ ጌሬጌሬ ዩጉዶቤሲሶን ቤይፋት ባርኔን አነ ሀሜቴ።
19 ኤስታን ጋሮኖን ኤክሴፌና ካባሲክ ዛብድዮስኒ ናንጎት ያቆብናዋ አይባ ዮሀኒስና ፌሴቴር። ባሶ ጎኑስታ ዲሴፋት ዩጉዶቤሲሶን ማእሴፌን ቢ።
20 ኤስታን ጌሬጌሬ ሀጝ ባርኪ ዮሶነክ ቴጌ። ባሶ ደይ አባቤስ ዛብድዮስኒን ዎስትኛሳክቶኔን ጎኑስታ ቤይየ ሀኣት ባርኔን አነ ሀሜቴ።
የሱስ ኪና አያናሶን ክስ
(ሉቃ. 4:31-37)
21 የሱስናዋ ናዎባሳክቶና ክፍርናሆም ካታማ ሀሜቴ። ጌሬጌሬ የሱስ ቤይሳኒ ዎናሲክ አይሁድኒ ሺጶኒ ኬያስሲ ግሪሬ አሱ ኤጲ።
22 የሱስ ሙሴኒ ቱማሲ አስሲኛኒ ሜያ አሲሴፌማቶ ስኖይናሮን ዳሶን ሀእሲፌ ባሶሲማቶ ስንና ቦርአ አሲፌና አሱሲክ ዲንቀሴቴ።
23 ኤስ ካባሲክ አይሁድኒ ሺጶኒ ኬያስሲ ኪና አያና ኤጵና እሳ አሱ ኤካ ይት ቻጊ፦
24 «ናዝሬትኪ የሱስኖ! እንኖ ነኔን አዉኒ እሳርኒ ፋሪንሶ? እኖትን ትሽኩታክ ያታሮሶ? ነ ኦ ስንታማቶ ታ አሪፋውጙዋ። ነ ሀኦሲ ኮርቶዋ!»
25 የሱስ ደይ፦ «እሳ ካማ ኮትኖይ ባሳስን ኬስ!» ይት ችኒሬ ኬእ።
26 ኪና አያናስ አሱስን ጋንስራ ቶኮናክ ዛግራ አካማ ካማክ ቻግጋ ባሳስን ኬስ።
27 አሱኒ ሜያ ዙቴሬ ዲንቆክ፦ «ሀን ባር ኣምባንሶ? አሮን ጋድዶ አስሱንሶ? ኪና አያናሶን ሀእሱኒ ሁግናክ አጃጀን ባሪኪቶ ደይ አጃጃሜር» ይት ባሶትና ባሶትና ማምሲት ፌሴቴር።
28 ጌሬጌሬ የሱስኒ ቾዋሲ ዎል ላ ጋሊላኒ ብራቶስታ ፋ፤ ዳ፤ ዙታምባሴ አሲስ ዝእ።
የሱስ ሾዎ ሜታንኒ ሜያኖን ፋቲ
(ማት. 8:14-17፤ ሉቃ. 4:38-41)
29 ኤስ ካባሲክ የሱስ አይሁድኒ ሺጶኒ ኬያስን ኬስሴ ያቆብኔን ዮሀኒስኔን አነ ስሞንናዋ አንድርያስና አሲ ኬር ግሪ።
30 ኤስታክ ስሞኒ አሱሲ እንቶ ጉምታኒ ሜሮ ሜቴራ ኩንፋር። ባሪ ሜቶሶን ጌሬጌሬ የሱስኒክ ማክሴቴ።
31 የሱስ ባርኪ ታእሴሬ ኩሹባስሲ ዛትቴ ካብግ። ሜሮስ ደይ ማእን ካብራ ባሶትን እርባሲ።
32 አዋ ግሪን ታልሜፋና ካባሲክ አሱኒ ሜያ ሜታንኒ ሜያኖንናዋ ኪና አያና ኤጵና ሜያኖንና ዙትሬ የሱስኒኪ ኤጴ ዬሴቴ።
33 ካታማስሲ ፌ አሱኒ ሜያ ዙታምቤሲሴ ኬያሲ ፎቻታ ዙቴሬ ፌሴቴርዋ።
34 የሱስ ሾዎ ቴሳ ሜሮክ ሜቴሬ ፌ ሾዎ አሱኒ ሜያኖን ፋቲ። ሾዎ ኪና አያናሶን ደይ ክሲ። ኪና አያናስኑ ባር ኦ ስንናማቶ አርሴራ ፋሴር ስንና ቦርአ የሱስ እሳ ዉዛነ ማክሶናክ ኣኔ ሾሎዌ።
የሱስ ሻቶ ድምታ ሀምሜ ሺጴ
(ሉቃ. 4:42-44)
35 ዎንሳ ዋስሲ ካብሬ ዎኖይፌን የሱስ ኬሩን ኬሴ እሳ ፉችቻ ድማ ሀምሜ ሀኦ ሺጴ።
36 ስሞንናዋ ባርኔን አነ ፌሴ ባሶትና ሾሎክ ካቢ ሀሜቴ።
37 ዳነሬ፦ «አሱ ዙቴሬ ኔን ሾሌድፌርዋ» ይሴቴ።
38 የሱስ ዎልግሬ፦ «ታ ያናስ ኤሲሲክ ስንና ቦርአ ሀንታን ኦማ ታእሶ ድማስታ ፋሴ ካታማስሲ ደይ ሀምፋኒ ካምባሶን ማኮጝዋ» ይ።
39 አይሁድኒ ሺጶኒ ኬያስሲ ካምባሶን ማኬት ኪና አያናሶን አሱሳስኒ ኪስት ጋሊላኒ ዳ ዙታምባሴ አስሲ ኩቲት ፌር።
የሱስ አዋታቶኒ ሜታኒስን ፋቲ
(ማት. 8:1-4፤ ሉቃ. 5:12-17)
40 እሳ አዋታቶኒ ሜታን ባርኪ ዬሬ ካአነፋት፦ «ነ ሹንፋታኔ ታን ፋቱክ ችማታዋ» ይት ሺጴ።
41 የሱስ ባሪክ ኬናሽቴፋት ኩሹባሶን ሾሬ አቱባሶን ታፕትሬ፦ «ሹንፋኡጝዋ፥ ካይማ» ይ።
42 አሱስ ደይ ጌሬጌሬ ሜሮባስን ፋሪ።
43 የሱስ አሱስን ማእስሬ ኪትሬ ጋፍካት፦
44 «ሀን ባሮን ኦንኒክኑ ማኮኖይታማቶ አሩዋ። ስኑንታኖ ሀምማ ቴትኔሶን ማግሲክ ቤሱዋ። ባሶክ ዛላ ስናናክ ፋሩኔሲክ ሙሴኒ ቱማስ ማኬና ማኣሶን እምማ» ይ።
45 ስኑንታኖ አሱስ ኤስታን ኬስናይሴ ስና ቾዋሶን አሱ ዙታምባሴ አሲክ ዎሎክ ካቢ። ኤስ ባሪ ቦርኣ የሱስ አምማኖን ኬስሴ ኣፋ ካታማሲኑ ግሩናክ ኣነ ችሜ። ባክ ጌራካሎ አሱ ፎንቶ ድማ ሀምሜ ድ። አሱኒ ሜያ ደይ ዳ ዳስን ባሪክ ዬሴት ፌሴቴር።