8
የሱስ አቼች ኩማ አሱኒ ሜያኖን ማስ
(ማት. 15:32-39)
1 ኤስ ዎናሲክ ሾዎ ዳራ ሄፕሳ ደይ ዙቴ። ሙሶነ ሙ ኣፋ ስንና ቦርአ የሱስ ናዎኒ ሜያኖን ባርኪ ቴጌሬ፦
2 «ዳራስ ሀውጙ ኬዝ ዎና ካርኤ ታኔን አነቱ ፌሴቴ። ሙቤስ ኣፋ ስንና ቦርአ ባሶክ ሳፋሬፋዉጝዋ።
3 ባሶስኒ እሳ እሳይስ ዎካ ዳኒ ዬሴቴር ስንና ቦርአ አፉር ኬቤስ ጋፍካናነ ኡጉንታ ጎዳ ታቴሴቴርዋ» ይ።
4 ናዎባሳክቶ ደይ፦ «ሀን ኢችማ ዳስ ሲ አሱ አይን ቱሻ ዳና ሀን ኤፌቴና ዳራስን ማሱክ ችምንሪንሶ?» ይሬ ዎሉግሴቴ።
5 የሱስ፦ «ንቶክ አፑን ቱሻንሶ ፋሪ?» ይሬ ማምሲ። ባሶ ደይ፦ «ናፉን ቱሻቱ ፋርዋ» ይሴቴ።
6 ዳራስን ዳስታክ ዱሶነክ አጃጀ። ኤስታን ናፉን ሙማ ቱሻሶን ኤጴ ሀኦ ጋላቴፋት ባቴ ዎሾነክ ናዎባሳክቶኒክ እሚ። ባሶ ደይ ዳራሲክ ዎሸቴ።
7 ባሶክ ጋሮ ቁርጡም ፋር። ኤስ ባርኪ ሀኦሶን ጋላቴፋት ዎሾነክ ናዎባሳክቶኒን አጃጀ።
8 ናዎሳክቶ ደይ አሱኒ ሜያ ሜሴሬ ጋዉሴቴን ፉእቴ ባቶሶን እኛ እኛ ናፉን ማሳ ቱማኖን ዙትሴቴ።
9 ቱሻሶን ሜሴ አሱኒ ሜያ አቼች ኩም ስኖነ። ኤስታን ጌጌሲ።
10 ኤሴን ኦርፎ ናዎባሳክቶኔን ጎኑስሲ ዲሴሬ ዳልማኑታ ይስቴፋ ዳስታክ ሀሜቴ።
ቢስቴራ አሪቶኖይ ዉዛ ብያክ ማሙስቴ ማምሱ
(ማት. 16:1-4)
11 ፌርሳዊኒ ሜያ የሱስኒክ ዬሴሬ ባርኔን ካራካሮ ኤጴቴ። ፋታኖክ ሾልሴፋት ቢስቴራ አሪቶኖይ ዉዛ ሳማን ቤሱናክ ማሙሴቴ።
12 ባሳ ቴታሲክ አካማኖን ስካለሬ ሳፋሬፋት፦ «ሀን ኮንቶስ አዉኒ ቦርአ ቢስቴራ አሪቶኖይ ዉዛ ሾሌፋሶ? ፉቶክቱ ማኬፋውጙዋ፥ ሀን ኮንቶሲክ እሳ ቢስቴራ አሪቶኖይ ዉዛ ኣፋ እምቶና ዉዛ» ይ።
13 ፌርሳዊኒ ሜያኖን ቤይፋት ሄፕስ ዎል ሌ ጎኑስ ዲሬ የሳሎ ፍኒ።
ፌርሳዊኒ ሜናዋ ሄሮድስኒ ማሶሴ
(ማት. 16:5-12)
14 ናዎባሳክቶ ቱሻ ኤጴ ሀማ ዳግሴቴ ቦርአ ጎኑስ ፋዪስ እሳ ቱሻታኖ ኦማ ኣፋ።
15 የሱስ ባሶትን፦ «ፌርሳዊኒ ሜናዋ ሄሮድስና አሲ ማሶስኒ ቴትንትሶን ኦድትዋ» ይሬ አጃጀ።
16 ባሶትና ባሶትና፦ «እኖክ ቱሻ ኣፋ ስንና ቦርአዋ» ይት ዎሉምሴቴ።
17 የሱስ ኤስ ባሶ ሳፋራሶን አሪፋት፦ « ‹ቱሻ እኖክ ኣፋ ስንና ቦርአዋ› ይት ንቶትና ንቶትና አዉኒሮን ዎሉምሴድፌትሪንሶ? ሀሽኔን ኣነ ጋዝጉዌትኖሶ? ኣነ አሩዌትኖሶ? ንብንትስ ያዳቶ ቤይዮሶ?
18 ኣፍንት ፌን ኣነ ብፌትኖሶ? ኦዶንት ፌን ኣነ ኦደፌትኖሶ? ንብንትስ ኣነ ካርፋኖሶ?
19 ኡች ሙማ ቱሻሶን ኡች ኩም አሱሲክ ባትፋና ካባሲክ ፉእቴ ባቶሶን አፑን ማሳ ካቡግሴትሶ?» ይ። ባሶ ደይ፦ «አሲሬ ሄፔ» ይሴቴ።
20 ደይ «ናፉን ሙማ ቱሻሶን አቼች ኩም አሱኒክ ባትፋና ካባሲክ ፉእቴ ባቶሶን አፑን ማሳ ካቡግሴትሶ?» ባሶ ደይ፦ «ናፉን» ይሴቴ።
21 ባር ደይ፦ «ሀሽኑ ኣነ አሩዌትኖሶ?» ይ።
የሱስ ቤቴሳይዳክ እሳ ኣፍትሹንን ፋቲ
22 ቤቴሳይዳ ካርኤፌ ካባሲክ አሱኒ ሜያ እሳ ኣፍትሹንን ኤጴ ዬሴሬ የሱስ ታፕቱናክ ደይ ሺጵሴቴ።
23 ባር ደይ ኣፍትሹስ ኩሹባስ ዛቴ ኬኤሲ ጌራካሎ ክስሬ ኣፋስ ቱጅፋት ኩሹባሲክ ታእሬ፦ «እሳ ቢድፋ ታ ዉዛ ፋሮሶ?» ይሬ ማምሲ።
24 ኣፍትሹስ ደን ካነ፦ «አሱሳክቶ ኩቲት የሬ እኦኒማቶ ኩትሴድፌን ቢድፋዉጝዋ» ይ።
25 ሄፕሳ የሱስ ኩሹባሶን ኣፋስታ ታእ። ኤስታን አሱስ ማእስሬ ቢ። ፋሪሬ ዎክሶክኔን ፋ ዉዛሶን ዙትሬ ማእስሬ ቢ።
26 ኤስታን የሱስ አሱስን ኬባ ጋፍካት፦ «ኬኤስ ግሩታታ » ይ።
ጴጥሮስ የሱስኒን፦ «ነ ሙድቶዋ» ኡባስ
(ማት. 16:13-20፤ ሉቃ. 9:18-21)
27 የሱስናዋ ናዎባሳክቶና ኬሳርያኒ ፍልጶስ ይስቴፋ ካታማስ ቴሻ ፋ ኬኤሲክቶስ ሀሜቴ። ኡግናስታክ፦ «አሱኒ ሜያ ታ ኦ ስንናማቶ ማክሴፌሶ?» ይሬ ናዎባሳክቶኒን ማምሲ።
28 ባሶ ደይ ዎልግሬ፦ «እሳ እሳይስ ሀጵቅፌ ዮሀኒስዋ፤ ኦሚስ ደይ ኤልያስዋ፤ ኦሚስ ደይ ራጁሳስን እሳይስዋ» ይሬቱ ማክሴፌዋ።
29 «ኤካኒ ንቶኬ፤ ታን ኦ ይፌትሶ?» ይሬ ማምሲ። ጴጥሮስ ዎልግሬ፦ «ነ ክርስቶስዋ » ይ።
30 የሱስ ባሶክ፦ «ታ ቾዋሶን ኦንክኑ ማኮትታ» ይሬ አጃጀ።
የሱስ ክቱና ባሮን እሶንሳ ማኬ
(ማት. 16:21-28፤ ሉቃ. 9:22-27)
31 የሱስ ናዎኒ ሜያክ ኤካ ይት አስሱ ኤጲ፦ «አሱኒ ና አካማ ሻና ኤጴቶናክ ሾልስፋዋ። ኩርኡኒ ሜኒ ስናክ፥ ማግኒ ጋኛን ስናክ፥ ሙሴኒ ቱማሲ አስሲኛኒ ሜኒ ስናክ ካሽስቶኒር ደይ ዎርቶኒር። ስኑንታኖ ኬዝ ዎናኔን ኦርፎ ክቱኒ ካቡኒር።»
32 ኤስ ባሮን ደይ አምማኖን ባሶክ ማኬ። ኤስ ካባሲክ ጴጥሮስ የሱስኒን ኦር ኤጴ፦ «ኤካ ኡታታዋ» ይት ኬእ።
33 ስኑንታኖ የሱስ ናዎባሳክቶኒክ የርቀሬ ብያት ጴጥሮስኒን ኤካ ይሬ ኬእ፦ «ነ ሴጣና፥ አሱሳሮንታኖ ሀኦሲሮን ኣነ ሳፋሬፌ ስንና ቦርአ ሄክ ኦርፎና ሀማ።»
34 ኤስታን የሱስ ዳራስን ናዎባሳክቶኔን አነ ቴጌሬ ኤካ ይ፦ «ታኔን አነ ሀማክ ሾሌ ባር ባሳ ቴትን ሳፋራሶን ቤዮዋ። ባሳስታ ካርን ማስቃልን ሻናሶን ዎርኤ ታኔን አነ ሀሞዋ።
35 ካባሶን ፉኦክ ሾሌፌ ባር ዙቴሬ ቱርኩና። ታክናዋ ምስራቹኒ ካማሲክና እያት ካባሶን ቱርክ ባር ዙቴሬ ፋቱና።
36 አሱ ሀን ዳስታኪ ፋ ዉዛሶን ዙትሬ ዳንፋት ካባሶን ቱርክፋናነ ባርኪ አዉ ኬኢንሪንሶ?
37 አሱ ካባሶን ፉሮክ አሮ ዋጋ ካሱንሪንሶ?
38 ሀን አማኖኖይናዋ ቦርባሬ የሬ ኮንቶስ ጋነሲ ታክናዋ ታ ካማሲክና ኢቼፌ ባር ዙታምባሴ አሱኒ ና አባባሳ ኡልፍናክ ኮርቶ ዎሲያስኔን አነ ዬፌና ካባሲክ ባርኪ ኢቾና።»