ማትዎስ ትችና
ዳምኒ የሱስ ክርስቶስኒ ምስራቹኒ ካማ
ጋችግሩ
ማትዎስኒ ምስራቹኒ ካማ የሱስ ዮባሲ አብዲ ዜምማ ማክቴና ፋቱኒር ሲንባሶንናዋ ሀኦስ ኩርኡ ቴያሲ ዳራሲክ እምና አብድን ካማሶን ኮእሲናስ ባርኪ ካሞ ሲኒባሶን ማኬፋ ምስራቹኒ ካማሶን ኤጶዋ። ኤስ ምስራቹኒ ካማስ የሱስ ባሶ ጋነያስ ኮንቴሬ ድችና አይሁድኒክ ኮእባ ስኖይናሮን ዳ ዙታምባሴ አስክኔንዋ።
ማትዎስኒ ምስራቹኒ ካማስ ማአ ሆሮክ ትቼ ማፃፋዋ፤ የሱስኒ ኮንቶስታን ካብፋት ባሳ ሀጱክቶሲ ቾዋኖንናዋ ባሳ ፋታንቶሲ ቾዋኖንና ኮታ ማኬናኔን ኦርፎ ጋሊላክ ዛግና ካምባሲ ማኮኖን፤ አሱሶናዋ መሮስኒ ፋቱባስ ዎስቶኖንናቱ ቤስፋ። ኤስታን ቱስራ ደይ የሱስ ጋሊላን የሩሳሌም ዛግና ኩቱሶን ሀን ዳሲታ ፌና ነያስ ኮእን ቶርባኒስሲ ስና ዉዛስክቶኖን እሳርባ እሳርባሲክ ማኬፋ። ኤስ ዉዛሲክቶ ደይ ሱቶባሶን፥ ክቱባሶንናዋ ክቱን ካቡባሶንናቱ ኮርኡባ ዛግፋ።
ሀን ምስራቹኒ ካማስ የሱስኒን፦ ሀኦሲ ቱማኖን ኮቴ ማኮክ ሀእሱኒ ሁግናባ ፋና ደይ ሀኦሲ ታቶኒ ቾዋኖን አሱኒ አርቶ አስሲኛ ስንናማቶ ዛግራቱ ቤስፋ። ባሳ አስሱሲ ጋነስን አርክ ስናስ ሾዎ ግቶክ ሆሬ ኡች ክፍልቱ ማድዳፐቴፋ፦
1. ሀኦሲ ታቶኒ አሱኒ ሜኒ አማላ፥ ዎስቶ፥ ማብት፥ ዛግሶነክ ሾልሱሴዋ ኮእኒ እጣቤሲሴ አሲን አስሲፋ ኣማስታክ ካምባስ ማኬ፤ (ኤድደ 5-7)።
2. አሲሬ ሄፔ ናዎኒ ሜያ ምስራቹኒ ካማስ ማኮክ ዎስቴሴሬ ሀሜፌ ካባሲክ ባሶክ እምቴ ዞንሲያሲክቶ፤ (ኤድደ 10)።
3. ሀኦሲ ታቶኒ ቾዋክ እምቴ ሾዎ ቴሳ ቤሶ፤ (ኤድደ 13)።
4. ናዎ ስንኒ ዉዛስ አዉ ስንናማቶ አስሲፋ አስሱ፤ (ኤድደ 18)
5. ሀሽቲ ፋ ነያሲ ኮእነዋ ሀኦሲ ታቶኒ ዮነ አሲክ እምቴ አስሱ፤ (ኤድደ 24-25)።
ማፃፋሲ ኮርኡባ
የሱስ ክርስቶስኒ ዛላሲ ቱዝነዋ ኮኒቶነ፤ 1:1—2:23
ሀጵቁኒ ዮሀኒስኒ ዎስቶ፤ 3:1-12
የሱስኒ ሀጱክቶነዋ ፋታንቶነ፤ 3:13—4:11
የሱስ ዎስቶባሶን ጋሊላክ ጃማሮባስ፤ 4:12—18:35
ጋሊላን የሩሳሌም፤ 19:1—20:34
ኮእኒ ቶርባኒስ የሩሳሌምኒስናዋ ብራቶባስታና፤ 21:1—27:66
ዳምኒሳ ክቱን ካቡነዋ አምማኖን ቤስቶባሴ፤ 28:1-20
1
የሱስኒ ኮንቶኒ ቱዛ
(ሉቃ. 3:23-38)
1 ዳዊትኒ ዛላስን አብራሀምኒ ዛላስኒ ኮንቴ የሱስ ክርስቶስኒ ኮንቶኒ ቱዛስ ሀኒስዋ፦
2 አብራሀም ይሳቅንን ኮኒ። ይሳቅ ያቆብኒን ኮኒ። ያቆብ ዩዳናዋ አይባሳክቶኒና ኮኒ።
3 ዩዳ ፋሬስኒንናዋ ዛራንና ትማር ስኒፋ አሱስኪን ኮኒ። ፋሬስ ኤስሮምኒን ኮኒ።
4 ኤስሮም ደይ ኣራምንን ኮኒ። ኣራም አምናዳብን ኮኒ። አምናዳብ ደይ ነአሶኒን ኮኒ። ነአሶን ደይ ሴልሞኒን ኮኒ።
5 ሴልሞን ራኬብ ይስቴፋ አሱስኪን ቦየዝንን ኮኒ። ቦየዝ ሩት ይስቴፋ አሱስኪን እዮቤድኒን ኮኒ። እዮቤድ እሴይኒን ኮኒ።
6 እሴይ ደይ ታቶ ስና ዳዊትኒን ኮኒ። ታቶ ዳዊት ኦርዮን አሱስኪን ሶሎሞኒን ኮኒ።
7 ሶሎሞን ደይ ሮብያምኒን ኮኒ። ሮብያም አብያንን ኮኒ። አብያን አሳፍኒን ኮኒ።
8 አሳፍ እዮሳፍጥኒን ኮኒ። እዮሳፍጥ እዩራምኒን ኮኒ። እዩራም ኦዝያኒን ኮኒ።
9 ኦዝያን እዩአታምኒን ኮኒ። እዩአታም አካዝኒን ኮኒ።
10 አካዝ እዝቅያስኒን ኮኒ። እዝቅያስ ምናሴንን ኮኒ። ምናሴ አሞስኒን ኮኒ።
11 አሞስ እዩስያስኒን ኮኒ። እዩስያስ ባብሎን ቦጆን ነያሲክ እኮኒዮናዋ አይባሳክቶኒና ኮኒ።
12 ባብሎን ቦቾኔን ኦርፎ እኮኒዮን ሴላትያልንን ኮኒ። ሴላትያል ዘሩባቤልንን ኮኒ።
13 ዘሩባቤል አብዩድንን ኮኒ። አብዩድ ኤልያኬምኒን ኮኒ። ኤልያኪም አዛርንን ኮኒ።
14 አዛር ሳዶኪንን ኮኒ። ሳዶክ አክምኒን ኮኒ። አክም ኤልዩድኒን ኮኒ።
15 ኤልዩድ አላዛርኒን ኮኒ። አላዛር ማታንን ኮኒ። ማታን ያቆብንን ኮኒ።
16 ያቆብ ክርስቶስ ይስቴ የሱስኒን ኮኒ ማራሚኖን ቴጌ ዮሴፍንን ኮኒ።
17 ኤሴ አብራሀምኒስታን ካብራ ዳዊትኒስታ ካርአናኔን አሲሬ አቼቼ ኮኒቶ። ዳዊትኒስታን ካብራ ባብሎን ቦጆ ካርአናኔን አሲሬ አቼቼ ኮንቶ። ባብሎን ቦጆስታን ካብራ ክርስቶስኒ ኮንቶስታ ካርአናኔን አሲሬ አቼቼ ኮንቶዋ።
የሱስ ክርስቶስኒ ኮንቶ
(ሉቃ. 2:1-7)
18 የሱስ ክርስቶስኒ ኮንቶኒ ቶቾስ ሀኒስዋ፤ እንቶባ ማራሚ ዮሴፍኒክ ቴግቴራ ዲስ ግሩኖይ ኮርቶ አያናክ ናኔርቴራ ቤስቴ።
19 ቴጌሬ ዱስ ዮሴፍ ኦኮ አሱ ስንና ቦርአ ማራሚኖን አሱኒ ስና ክስሬ ማኮክ ኣኔ ሾሎዌ። ባክ ኣቾክ ቤያናክ ሾሌ።
20 ስኑንታኖ ባር ኤካ ሳፋሬፌን ዳሚሳ ዎስያ ሚቶክ ቤስቴራ፦ «ዳዊትኒ ና ዮሴፍኖ! ቴጌራ ዱስታ ናዋስ ናኔርቴናስ ኮርቶ አያናኪን ስንና ቦርአ ማራሚኖን ኤጳክ ድጎታታዋ።
21 ባር ናኒን ታኖንር፤ ኤስ ናስ ዳራባስን ቦርእቤሲስን ፋቱኒር ስንና ቦርአ ሱንባሶን ‹የሱስ› ይራቱ ሱንሱታ።»
22 ኤስ ባር ደይ ስንናስ ዳሚስ ራጁሲክ፦
23 «ኤሴኑ ዱርባስ ናኔርቶና፤ ናኒን ደይ ታኖና፤ ሱንባሶን ደይ ‹አማኑኤል› ኡሶነ ይስቴ ባር ስናናክቱ ሀን ባር ዙቴራ ስኒ። ኮትባስ ደይ፦ ‹ሀኦስ እኖኔን አነቱ ፋዋ› ኡዋ» ይ።
24 ዮሴፍ አፋይኒታን ጉዝሬ ዳሚሳ ዎስያ ማኬናሲማቶ ዛግ። ቴጌሬ ዱስና ማራሚኖን ኤጴ ኬባ ሀሚ።
25 ኡዙን ናዉባስን ታኖናኔን ዮሴፍ ባርኔን ኣነ ኩነ። ኮንቴ ናሳ ሱናኖን «የሱስ» ይሬ ሱንስ።