11
ሀጵቁን ዮሀኒስኒኪን የሱስኒኪ ዎስቴሬ ሀማ አሱኒ ሜያ
(ሉቃ. 7:18-35)
1 የሱስ አስሬ ሄፔ ናዎባሳክቶኒክ ኤስ አጃጂሶን ማኬሬ ኮእስናይሴ ኤስታን ኬሴ ታእሶስታ ፋ ካታማሲክቶሲ አሱክናዋ ማኮናክና ሀሚ።
2 ሀጵቅፌ ዮሀኒስ ታቶኒ ኬር ፌጌዶ ክርስቶስኒ ዎስቶሶን ኦዴሬ ናዎባሳስን ባርኪ ዎስሬ፦
3 «ኤስ ዮኒር ይስቴ ክርስቶስ ነጝዋ ወደይ ኦምንን ኦዳንሪንሶ?» ይ።
4 የሱስ ደይ ዎልግሬ፦ «ሀምፋት ቢት ባሮንናዋ ኦደት ባሮንና ዙትራ ዮሀኒስኒክ ማኮት።
5 ኣፍትሹኒ ሜያ ብዮሶነር። ኤግትኒ ሜያ ኩቱሶነር። አዋታቶኒ ሜታኒ ሜያ ፋርሶነር። ኦዶ ኦዮኒ ሜያ ኦዶሶነር። ክቱኒ ሜያ ክቱኒ ካብሶነር። ቱካምኒ ሜያክ ምስራቹኒ ካማስ ማክቶኒር።
6 ታ ቾዋሲክ ቱሳኦኖይ ባር ዙቴሬ ሱስቶዋ» ይ።
7 ዮሀኒስኒ ዎሲሳክቶ ዎሌ ሀሞቤሲሴ የሱስ ዳራሲክ ዮሀኒስኒ ቾዋሲክ ኤካ ይት ማኮ ኤጲ፦ «አዉ ብያትኪንሶ ኢችማ ዳስ ሲ ኬሴትሪ? ስሩስ ሾርክፋና ሶቦቆሶንኖሶ?
8 ወደይ አዉ ብያትኪንሶ ኬሴትሪ? ጋዳ ማያ ማዬ አሱኒንኖሶ? ኤሴኑ ጋዳ ማያ ማዬ ባሶ ታቴ ሜኒ ኬርቱ ፌሴቴዋ።
9 ወደይ አዉ ብያትኪንሶ ኬሴትሪ? ራጁኒኖሶ? ንቶክ ማኬፋውጙዋ፤ ራጁሳታን ደናሎ ስና ባርጝዋ።
10 ‹ኤሴ ኡጉኔሶን ሳብሱን ዎስታስን ነ ስናስታ ዜምማ ዎሱናዋ› ይስቴራ ትቼናስ ባሪክዋ።
11 ፉቶ ንቶክ ማኬፋውጙዋ፤ ማሽካሱኪን ኮንቴ አሱኒ ሜኒ ጋነያስን ሀጵቅፌ ዮሀኒስኒስታን ደናሎ ኣነ ካቡየዋ። ስኑንታኖ ሳማኪ ታቶሲ አቴር ስና ባር ዮሀኒስኒስታን አሪኩና።
12 ሀጵቁኒ ዮሀኒስኒ ነያስታን ካብራ ሀሽ ሀውጙ ካርአናኔን ሳማኪ ታቶስ አካማኖን ቱግቴቱ ፋ። ስር ግሩክ ካቤፌ ባሶ ዳኖነ።
13 «ራጁኒ ሜኒ አሱሴዋ ሙሴኒ ቱማሴ ሀጵቅፌ ዮሀኒስኒ ነያስታ ካርአናኔን ራጅ ማክቴ።
14 ኤሴ ደይ ኤጴቶክ ሾሌፋትነ ዮኒር ይስቴ ኤልያስ ሀን ዮሀኒስዋ።
15 ኦዶኒ ኦዶባ ፌና ባር ኦዶዎዋ።
16 «ኤኪን ሀን ዎን ኒ ኮንቶሶን አዉኔን ሆሱናሪንሶ? ጋባታ ዲሴፋት ዞሞባሶን ቴግሴፋፋ፤
17 ‹ኡሉለ ንቶክ ፉግኒ፥ ኣነ ሱሩዌት። ሶሶ ሶሶኒ ኣነ ዋሱዌት› ይሴፋ ናንጎታስንነ ፌሴቴርዋ።
18 ዮሀኒስ ሙኖይናዋ ዋይንኒ ኡሻ ኡሽኖይና ዬን፦ ‹ኪና አያና ባሳስ ፋርዋ› ይሴቴ።
19 አሱኒ ና ሜትናዋ ዋይንኒ ኡሻ ኡሸትና ዬን፦ ‹ሙነዋ ዋይንኒ ኡሻ ሹናር ደይ ግርቦ ዙትፌ ባሶናዋ ቦእርኒ ሜና አሲ ኮንዋ› ይሴቴ። ስኒፋናክኑ ማፃፋሲ ፉቶ ስና ዎስቶባሲክ አሪቴዋ።»
አማኖ ቤዮቤሲሲክ ዌእቴ ካታማሲክቶ
(ሉቃ. 10:13-15)
20 ኤስታን የሱስ አሪክሮን ቢስቴራ አሪቶኖይ ዉዛ ዛግቴና ካታማሲክቶኒ ሀርሙ ቤያሲክ ኤካ ይት ዌኦ ኤጲ።
21 «ሀይቡነዌ ኮራዝን፥ ሀይቡነዌ ቤቴሳይዳ! ንቶሲ ዛግቴ ቢስቴራ አሪቶኖይ ዉዛስ ጥሮሱክናዋ ስዶናክና ዛግቴ ስንፋናነ ሱሞኒ ማያ ማየሬ ቤድና ቴትቤሲስታ ዎችሬ ሾዎ ዎና ዜምሜ ሀርሙሶነ ካባዌ።
22 ኤሴ ንቶክ ማኬፋዉጝዌ፥ ማጝሱኒ ካእርኒ ዎኖ ኬእኦስ ንቶስታን ትሮሱክናዋ ስዶናክናቱ ካሾ ስናናዌ።
23 ክፍርናሆምነ ደን ሳማ ቴግቶሴ? ዬት ኬእኦኒ ድማስቱ ኬሮታርዌ። ነይስ ዛግቴ ቢስቴራ አሪቶኖይ ዉዛስ ሶዶሙክ ዛግቴ ስንፋናነ ባር ትሹኖይ ሀሽ ሀውጙኔን ካርአ ፎና ካባዌ።
24 ኤሴ ኔክ ማኬፋዉግዌ፤ ማጝሱኒ ካርኒ ዎኖ ነይስታ ካርኒ ኬእኦስታን ሶዶሚክቱ ካሾናዌ» ይ።
ክርስቶስ እምፌና ቤይሳ
(ሉቃ. 10:21-22)
25 ኤስ ካባሲክ የሱስ ኤካ ይ፦ «ሳማሴዋ ዳሴ አሲ ዳም አባታሶ! ሀን ባሮን ቴቹምኒ ሜያክናዋ አሩኒ ሜያክንና ኣቻት ሀን ጋሮ ጋሮ ናንጎታሲክ አምማኖን ክስራ ቤስታ ባሪክ ኔን ጋላቴፋዉጙዋ።
26 ኣ፥ አባታሶ ሀን ባሮን ዛጉታክ ነ ማአ ሳፋራ ስኒዋ።
27 አባታስ ዙታምባሴ አስን ታክ እምዋ። አባስኔን ኦም ናስን አሪፌር ኦኑ ኣፌዋ። ኤሲስማቶ ደይ ናስኔን ኦም አባስን አሪፌር ኦኑ ኣፌዋ። ናስ አምማኖን ክስሬ ቤሱ ሻካናነ አባስን ኦኑ አሩክ ኣፋ ችማናዉዛ።
28 «ንቶ ባአንት ፋይና ሆፒስ ዙቴራ ታክ ዮትዋ። ታ ንቶክ ቤይሳ እማናዋ።
29 ዋንጆናሶን ዎርቲ፤ ታኪን ደይ አሩትዋ። ታ ጋራም ደይ ኬናሽቴርዋ። ካንትሲክ ደይ ቤይሳ ዳናት።
30 ዋንጆናስ ኩልኖር፥ ባአናስ ደይ ካሾዋ።»