ዎሲ ጳዉሎስኒ ዎሲያ
ፍልጵስዩስኪ አሱኒ ሜያክ
ጋችግሩ
ጳዉሎስ ሀን ዎሲያሶን ትችናስ ሜቀዶኒያ ይስቴፋ ሮምኒ ሀእሱስሲ ፋ ፍልጵስዩሱክ ፋ ቤቴክርስታኒሲክዋ። ኤስ ቤቴክርስታኒስ ጳዉሎስ አዉሮፓኒ ዳስታክ ቴሱስታክ ቶክናርዋ። ዎሲያስ ትቼናስ ታቶኒ ኬር ፌና ካባሲክ ኦም ክርስታና ዎስትኛኒ ሜያኪን ባሳስታ ቱጋኦ ካርእና ካባሲክ ፍልጵስዩስኒ ቤቴክርስታኒሲ ካብ ኤሽኒ አሱሲ ቦርአ ንብባሲ ሱሜራ ፋና ካባሲክዋ። ስኑንታኖ ጳዉሎስ የሱስ ክርስቶስኒስታ ፋ አማንቶባስ አካማኖን ዛጋ ስንባሲክ ሀን ዎሲያስ ቴግራ ቤስቴፋስ ግራነዋ ቱማ አማንቶነዋ።
ጳዉሎስ ሀን ዎሲያሶን ትችና ቴሱኒ ቾዋሲ ራክኮባሲ ዎኖ ባሪን አሪጋሱክ ባሪክ እማ እሜሬ ፌሴቴር ስንና ቦርአ ፍልጵስዩሲኪ አማኝኒ ሜያኖን ጋላቶናክዋ። ባሳስታ ስኑን ባሶስታ ሾዎ ቴሳ ራክኮ ካርአ ፋር ስንፋናክኑ ዛጉሶነክናዋ ቱማ አማንቶ ባሶስሲ ፎናክና ባሶትን ችኒድፌር። ቤጋንቶነዋ ቴቶነ አሲን ቤየሬ የሱስ ክርስቶስ ቴትባሶን ዳ ኤጵናሲማቶ ቴትቤሲሶን ዳ ኤጶሶነክ ማእስሬ ባሶክ ማኬ። የሱስ ክርስቶስኔን አነ አያናክ እሳር ስናክ ዳነቴ ካሶን ሀኦሲ ኦቱምኒ እማስታን ኬሳር ደይ አማንቶክ ዳነቴርታኖ ቱማሶን ዛጉክ ቤስቴር ስና ቤይባሶን ባሶትን ያዳትሲትፌር። የሱስ ክርስቶስኔን አነ እሳር ስንነ ፌሴ ባሶ ዙታምቤሲሴ አሲክ ሀኦስ ባሶክ እማና ናጋነዋ ግራነ አሲን ያዳትሲሬ ትች።
ሀን ዎሲያስ አርቴፋናስ ግራሶን፥ አማናምቶሶን፥ እሳር ስናሶን፤ ክርስትንናኒ አማንቶሲክናዋ ካስክና ችምሜ ፎሶን ማእስራቱ ቤስፋ። ዳይስሬ ደይ ዎሲ ጳዉሎስ ፍልጵስዩሲክ ቤቴክርስታኒሲ ፋ አካማ ኬሽታንባሶን አምማኖን ክሲሬ ቤሲ።
ማፃፋሲ ስሩክ ኤጵና ኤጶባስ
ጋችግሩ 1:1-11
ጳዉሎስ ፌና ባሳ ቴትኒ ቾዋ 1:27—2:18
ትሞትዮስኒክናዋ ኤጳፍሮድቱስኒክና ፋ ኮፖባስ 2:19-30
አማንቶሶን ቱጋኤሴፌ ባሶኪን ካርአ ዴሱ 3:1—4:9
ጳዉሎስ ፍልጵስዩስኪ ክርስታናኒ ሜያክ እምና ጋላታነዋ ኡልፍንነ 4:10-20
ኮርኡባ 4:21-23
1
1 የሱስ ክርስቶስኒ ዎስትኛኒ ሜያ ስና ጳዉሎስኒኪንናዋ ትሞትዮስኒክንና ፍልጵስዩስኒ ካታማሲ ፌሴፌ የሱስ ክርስቶስኒክ አማነሬ ሀኦኒ አሱ ስና ባሶ ዙታምቤሲሴ አሲክ ደይ ቤቴክርስታኒሶን ሀእሲፌ ኩርኡኒ ሜያክናዋ ዳቆኝኚኒ ሜያክክና፥
2 አባኒስና ሀኦስኪንናዋ ዳም የሱስ ክርስቶስኪንና ኦቱምነዋ ናጋነ ንቶክ ስንፋውጝዋ።
ጳዉሎስኒ ጋላትኒ ሺጶ
3 ንቶትን ያዳቴፋና ካባሲክ ዎንና ዎንና ሀኦናሶን ጋላቴፋዉጙዋ፥
4 ንቶ ዙታምኒትሴ አሲክ ሺጴፋና ካባ ዙታምባሴ አሲክ ሺጴፋና ሺጶናስ ግራክ ቱምቶዋ።
5 ቴሱኒ ዎናስታን ካብራ ሀሽ ሀውጙ ካርአና ካባኔን ምስራቹኒ ካማሶን ማኮክ ዎስቶናሶን አርጋሲር ስንነት ቦርአ ሀኦሶን ጋላቴፋዉጙዋ።
6 ሀን ማአ ዎስቶሶን ዎስቶትክ ዛግ ሀኦሲ፥ የሱስ ክርስቶስ ዎል ሌ ዮና ኮእኒ ዎናስታ ካቱናማቶ ማእስራ አርፋውጙዋ።
7 ሀሽ ታቶኒ ኬር ፋና ካባሲክናዋ ታቶኒ ኬር ግሩኖይ ፋና ካባሲክና ምስራቹኒ ካማሲ ፉቶኖን ኦዳናክናዋ ኤስ ባሮን ደይ ችኑናክና ሀኦስ ኦቱምባሲክ ታክ እምና እጣሶን ንቶ ዙታምኒትሴ ሃኤር ስንነት ቦርአ ዎንና ዎንና ንብናሲቱ ፋሴትዋ። ኤስ ባሪ ቦርኣ ንቶ ቾዋሲክ ታክ ቤስቴት ፋ ባር ልኪዋ።
8 የሱስ ክርስቶስኒ ኬሽታናሲክ ንቶ ዙታምኒትሴ አሲን አዉነ ፋሮን ካልቴት ፋናማቶ ሀኦስ ታክ ዛላዋ።
9 ኬሽታኒትስ አሩክናዋ ያዳታክና ቱማ ስንና ድቼት ሀማናክ ሺጴፋዉጙዋ።
10 ኤሲስ ደይ ማአር ስና ዉዛስ አዉ ስንናማቶ ቱንእራ አሩትክናዋ፥ ክርስቶስ ዎል ሌ ዮና ዎኖ ካይምናዋ ዝናንት ፎንቶና ስንና ቤስቶትክዋ።
11 ኤስ ባርክ ካኒትስ የሱስ ክርስቶስኒኪን ቤስቴፋ ኦኮ ስንና ዉዛሲክ ቱማር ስና ሀኦሲክ ኡልፍነዋ ጋላትነ እማር ስናትዋ።
ጳዉሎስኒ ታቶሲክ ምስራቹኒ ካማስ ታግ
12 አይኒ ሜያነ! ታይስታ ካርአ ዉዛስ ምስራቹኒ ካማስ ማእስራ ታጉናክ ዛግናማቶ አሩትክ ሾሌፋዉጙዋ።
13 ታ ደይ ታቴናስ ክርስቶስኒክ ዎስቴና ቦርአ ስንናማቶ ታቴ ሜኒ ማሳራሶን ኦደፌ ታሶኒ ሜናዋ ኦም አሱኒ ሜና ዙትቴሬ አርሴቴርዋ።
14 ታ ታቶኒ ኬር ግሩሲ ቦርአ አማነሬ ፌ አይኒ ሜያስን ሾዎቤሲስ ዳሚሲክ ቴቶሶነክ ስኒዋ። ኤስ ባሪ ቦርኣ ሀኦሲ ካማኖን ድጋ ፎንቶኖን ማኮክ ዜሞቲስታን ዳይስሬ ችማ ዳነቴዋ።
15 ስኑንታኖ እሳ እሳ ሜያ ክርስቶስኒ ምስራቹኒ ካማሶን ማክሴፌስ ኮናክዋ፥ ኦምኒ ሜያ ደይ ታይስቱ ሜሮ ኡኒ ሳፋራክዋ፥ ስኑንታኖ ኦምኒ ሜያ ደይ ምስራቹኒ ካማሶን ማክሴፌስ ማአ ንባክዋ።
16 ኤስ ባሶ ሀኦሲ ካማኖን ማአ ንባክ ማክሴፌስ ኬሽታናክዋ፥ ባሶ ደይ ታ ምስራቹኒ ካማስ ፉቶ ትሹኖይናማቶ እያት ሀንታ ሀእቴናማቶ አርሴቴ ቦርአዋ።
17 ስኑንታኖ ኤክ ባሶ ክርስቶስኒ ቾዋሶን ኤልጝሲሬ ማክሴፌስ ማአ ንባክ ስኖይናሮን ቴትኒ ሹናክናዋ ታ ታቶስታ ኦማ ራክኮ ዳይሱሶነክ ሳፋርሴፋትዋ።
18 ማአ ንባክ ስኑን ማጙ ንባክ ክርስቶስ ማክቶባሲክ አካማኖን ግሬፋውጙዋ፤ ሀንኔን ደይ ግሮናርዋ።
19 ኤስ ግሬፋናስ ደይ ንቶ ሺጶሲክናዋ የሱስ ክርስቶስኒ አያናስ አሪጋሱሲክና ብርማዱምማ ኬሳናማቶ አሪፋና ቦርአዋ።
20 እሳንነ ኣፋ ኢቾናዉዛ ስንናማቶ አብድክቱ ኦድትፋዉጝዋ። ስኑንታኖ ዎንና ዎንና ዛግትፋናሲማቶናዋ ሀውጙ ደይ ካክ ፋፋናክ ወደይ ክትፋናክ ክርስቶስ ታይሲ ኡልፍንቶናዋ ይራ ድጎኖይ ማኬፋውጙዋ።
21 ኤስ ባሪ ቦርኣ ታክ ካ ኡስ ክርስቶስኒክ ፎስዋ። ክቱስ ደይ ታክ ቡአዋ።
22 ስኑንታኖ ሀንታክ ካክ ፎኒሪ ስንፋናነ ጋንባሬ ዬሬ ዎስቶ ዎስቶናክ ሾልስፋዋ፥ ስንፋናክኑ ካክ ፎስታንናዋ ክቱስታንና ኣኣፋሮን ኮሩናማቶ ኣነ አሩትዋ።
23 ኤስ ሄፕ ሳፋራሲክ ራካቴድፋን። እሳ ሀሚናሪክ ክርስቶስኔን አነ ፎስ ዙታምባሴ አሲስታን ደናሎ ስንና ቦርአ ሀን ካስታን ኦር ኬስሳ ክርስቶስኔን አነ ፎናክ ካልቴፋዉጝዋ፥ ኤሲስ ደይ ክርስቶስኔን አነ ፎስ አካማኖን ማአር ስንና ቦርአዋ።
24 ኦማ ኡግናክ ካክ ፎናስ ንቶክ አካማኖን ሾልሱዋ።
25 ኤስ ባሪክ ቴቶክ ክቱታስን ፉእቴራ አማንቶኒስ ድቻትክናዋ ግራ ዳናትክና ንቶ ዙታምኒትስኔን አነ ፎና ባሮን አሪፋውጙዋ።
26 ታ ሄፕሳ ዎል ላ ንቶኪ ያፋና ካባሲክ ታ ቦርአ ፋ ቴቶኒትስ የሱስ ክርስቶስኔን አነ ፎንትሲክ አርኩናዋ።
27 ኤሴ ዙታምባሴ አሲስታን ካንቲሲክ ክርስቶስኒ ምስራቹኒ ካማሲክ ሾልሱ ፎ ፎቲዋ። ኤስ ባር ደይ ታ ያራ ቢፋናክ ወደይ ዎክፋናክ እሳ አላማክ ችምሜ ዬሮንትሶንናዋ ምስራቹኒ ካማሶን እሳሪክ ካቱክ ካቦንትሶንና ኦዶናዋ።
28 ንቶትን ቱጋእሴፌ ባሶትን እሳንነ ድጎቲታዋ፥ ስኑንታኖ ኤስ ችምኒትስ ባሶክ ትሹኒ ቤሶ ስንፋና ካባሲክ ንቶክ ሀኦስኪን እምቴ ፋሩኒ ቤስቶዋ።
29 ክርስቶስኒክ ዎስቶትክ እምቴ እጣስ ባሪክ አማኖትክ ኮእባ ስንኖይናሮን ባሳ ቾዋሲክ ሻና ኤጳቶትክነጝዋ።
30 ኤስ ባሪ ቦርኣቱ ሀሽ ታኔን አነ ሻናሶን ሃኤር ስንነትዋ፥ ኤስ ሻናስ ደይ ዜሞ ስናክ ታይስታ ካርእን ብየቲ ባሬዋ ሀሽኑ ደይ ታይስታ ካርኤት ፋናማቶ ኦደት ፋሴት ባሬዋ።