ዎሲ ጳዉሎስኒ ዎስያ
ሮምኪ አሱኒ ሜያክ
ጋችግሩ
ዎሲ ጳዉሎስኒ ዎስያ ሮምኪ አሱኒ ሜያክ ትቼናስ ጳዉሎስ ሮሙክ ፋ ቤቴክርስታኒሶን ማምሱክ ኮፓኤሬ ፌር ስንና ቦርአ ሆሬሬ ኦዶሶነክ ዛጉክዋ። ጳዉሎስኒ ኮፖስ ሮሙክ ፌሴ አማኝኒ ሜያኔን ጋሮ ዎና ዎስቴናኔን ኦርፎ ባሶ አሪጋሱሲክ እስፐን ሀማናክዋ። ክርስትናኒ አማንቶሲክ ባርክ ጋለ ባሮናዋ ክርስታናኒ ሜያ ካቤሲሲክ ዎስቶታ ፌሹሶነክ ዛግሴፌ ክርስትናኒ አሱሲ ቾዋኖን እሳርባ እሳርባሲክ ትችዋ። ጳዉሎስኒ ዎስያስ ስሩክ ቱማ ፋናስ ሀን ዎስያሲክዋ።
ጳዉሎስ ሮሙክ ፌሴ አማኝኒ ሜያክ ናጋባሶን ካትናኔን ኦርፎ ደይ ባሶክ ሺጴት ፌር ስንባሶን አብድ እምናኔን ኦርፎ ዎስባሲ አርክ ሳፋራባሶን (1:17) «ሀኦስኪን ቤስቴፋ ኦኮ ስናስ አማንቶክ፤ አማንቶሲክ ስንባሶን ምስራቹኒ ካማሲ አምማኖን ኬስሳ ፋርዋ» ይፋ ካማስ ስንባሶንቱ ቤስፋ።
ኤሴን ኦርፎ ጳዉሎስ ኤስ ሳፋራሶን ታግሬቱ ትች። አይሁድ ስኖቶ አዛብኒ ሜያ ዙቴሬ ቦርኣሲ ሲካሎሲ ሀእሴር ስንነቴ ቦርአ ሀኦሲኔን አነ ጋኖስቱ ሾልስፋርዋ። አሱኒ ሜያ ሀኦሲኔን አነ ጋኖክ ችሞሶኔስ ደይ የሱስ ክርስቶስኒክ አማኖክዋ። ኤስ ባርክ ሀኦሲኔን አነ ካፑቶሶነ ጋድዶ እሳር ስናሲ ጋና ጋድዶ ካ ስንባሶን ጳዉሎስ ታግሬ አሲዋ። አማኚስ ሀኦሲኔን አነ ናጋባ ፎና፤ ሀኦሲ አያናክ ቦርኣስንናዋ ክቱስንና ብርማዱምማ ኬሱና። ኤደባ 5-8 ጳዉሎስ ሀኦሲ ቱማክናዋ አማኝኒ ሜኒ ካሴ አስን ዎስቴት ፋ ሀኦሲ አያናኒ ሁግናነ አሲ አላማስ አዉ ስንናማቶ አምማኖን ቤሱናክዋ። ኤስ ባርስታን ቱስሬ ጳዉሎስ፦ «ሀኦሲ አሱኒ ዛላሲክ ፋ ኮፖባስ አይሁድናዋ ኣዛብና ኣካክ እሳ ድማ ዎሉክ ችሞነሪን?» ይፋ ማምሱሲክ ዎልጉባ እማናክ ካቤድፌት ፌርዋ።
ሄፕሳ ደይ ጳዉሎስ አምማኖን ቤስናስማቶ አይሁድ የሱስኒን ኤጴቶሶኖይ ፉእቶቤሲስ ሀኦኒ አላማዋ። ኤስ ባር ደይ ስንናስ የሱስ ክርስቶስኒኪ ካሞ ሀኦሲ አምማኖን ቤስና ፉእቶኒ ኦትማሶን አሱኒ ዛላ ዙታምባሴ ባርሲ ግሩናክ ዛጉክናዋ። ስኑንታኖ አይሁድኒ ሜያ የሱስኒን ኤጴቶሶነ ዎና ዮናማቶቱ ጳዉሎስ አማነፌዋ። ኮእባስታ ጳዉሎስ ክርስትናኒ ካሶን ኣካክ ፎክ ችምቶናማቶ አርክሮን ደይ አማኝኒ ሜያ ባሶትና ባሶትና ፋ ኡጶቤሲሶን ኬሽታኒ ኡግናሲክ ዞኑስቶሶነክ ሾልስፋናማቶቱ ባሶክ አሲ። ሀኦሲክ ዎስቶኒ ቾዋሶን፤ ክርስታናኒ ሜያ ዳቤሲሲ ቾዋኖንናዋ ባሶትና ባሶትና አሲክ ፋ ሃላፊነትሴ ደይ ካኑኒ ቦርአ ካብፋ ማምሱሲክቶኖን እሳርባ እሳርባሲክ ኮቴ አሲዋ።
ማፃፋሲ ስር ኤጵና ኤጶባስ
ማፃፋሲ ኤጵና ጋናሲ ጋችግሩ 1:1-17
ፋሩ አሱኒ ናንክ ሾልሱ ስኒባስ 1:18—3:20
ሀኦሲ ፉኦኒ ኡግና 3:21—4:25
ክርስቶስኒኪ ካሞ ቤስቴፋ ጋድዶ ካ 5:1—8:39
እስራኤል ሀኦሲ ኮፖስ 9:1—11:36
ክርስታናኒ አማላ 12:1—15:13
ኮርኡባሴዋ ናጋን ኦሾነ 15:14—16:27
1
ክርስቶስ የሱስኒ ዎስትኛ ደይ ዎሲ ስናናክ ቴግቴሬ ሀኦሲ ምስራቹኒ ካማኖን ማኮናክ ኮርቴሬ ፌ ጳዉሎስኒኪን ዎስቴ ዎስያ። ኤስ ምስራቹኒ ካማስ ሀኦሲ ራጁኒ ሜያኪ ካሞ ኮርቶ ማፃፋሲክቶሲ ዜምሜ እምና አብድን ካማስዋ። ኤስ ምስራቹኒ ካማስ ሀኦሲ ና አሻክ ዳዊትኒ ዛላስን ኮንቶባሶንቱ ማኬፋ። ኤሲስማቶ ደይ ዳምኒ የሱስ ክርስቶስ ኮርቶ አያናክናዋ አካማ ሁግናክና ክቱን ካቡባሲክ ሀኦኒ ና ስንባስ አርቴ። ክርስቶስኒ ሱናሲክ አዛብኒ ሜያ ዙቴሬ አማኖሶነክናዋ አጃጃሞሶነክና ዛጉክ ባርኪ ካሞ ዎሲ ስንነ ቴግቶኒ ሀኦኒ ኦትማ ዳናኒክዋ። ንቶ ደይ የሱስ ክርስቶስኒር ስናትክ ሀኦሲ ቴጌና አዛብኒ ሜያስን እሳይስዋ። ኤስ ባሪ ቦርኣ ሀኦሲክ ሹንቴሬናዋ ባሪ ኮርቶ ዳራ ስናትክ ቴግቴሬ ፌ ሮማንኪ አሱኒ ሜያክ ዙቴሬ፦
አባን ስና ሀኦስ፤ ዳም የሱስ ክርስቶስኒ ኦትማሴዋ ናጋሴ ንቶክ ስንፋውጝ።
ጋላትን ሺጶ
ንቶ አማንቶሲ ዎላ ሀን ዳስታክ ዙቴራ ኦድቴና ቦርአ ዙታምባሴ አሲስታን ዜምማ የሱስ ክርስቶስኒኪ ካሞ ዙታምኒቲሴ አሲክ ሀኦናሶን ጋላቴፋንዋ። ዎንና ዎንና ሺጴት ፋናማቶ ናሳ ቾዋኖን ማኬፋ ምስራቹኒ ካማሶን ማኮክ ቱማ ንብናሲክ ዎስቴፋና ሀኦሲ ታክ ዛላዋ። 10 ሀሽ ደይ ኮእባስታክ ንቶኪ ዮናክ ሀኦሲ ፍቃድ ስንና ኡጉናስ ካናናክ ዎንና ዎንና ሺጴፋዉጙዋ። 11 አማንቶክ ችምማ ፎትክ ዛጉኒ አያናኒ እማ ንቶክ ሃአናክ ንቶትን ብያናክ ካልቴንዋ። 12 ኤሲስ ደይ ታ ንቶ አማንቶሲክ ንቶ ደይ ታ አማንቶሲክ እኖትና እኖትና ዎል ችማኒክዋ።
13 አይታሳክቶኖ! ኦም አዛብኒ ሜኒ ጋነያሲ ሾዎ አማኝኒ ዳንናይሲማቶ ንቶ ጋነያስን ደይ አማኝኒን ዳናናክ ሾሌት ፋናርዋ። ስኑንታኖ ንቶኪ ዮናክ ሾዎ ዎና ሆሬራ ኬስና ሀሽኔን ካርአ ታክ ስና ቤይናማቶ አሩትክ ሾሌፋንዋ። 14 ግሪክኒ አሱ ስና ባሶትናዋ ግሪክኒ አሱ ስኖይ ባሶትና፥ አሪ ባሶትናዋ አሩኖይ ባሶትና አሲክ ማኮናክ አዳራ ታይስታ ፋርዋ። 15 ኤስ ባሪ ቦርኣ ሮሙክ ፌሴ ንቶክ ምስራቹኒ ካማሶን ማኮናክ አካማኖንቱ ሾሌጝዋ።
ምስራቹኒ ካማሲ ሁግና
16 ታ ምስራቹኒ ካማሲክ ኣፋ ኢቾናዉዛ። ምስራቹኒ ካማስ ዜምማ አይሁድኒ ሜያክ ደይ አዛብኒ ሜያክናዋ፤ ኤሲስማቶ ደይ አማነሴፌ ባሶትን ዙትራ ፋቱክ ችምኒ ሀኦኒ ሁግናዋ። 17 ኦኮስ አማንቶክቱ ካ ዳናና ይስቴራ ትቼዋ። ሀኦሲ ኦኮ ደይ ምስራቹኒ ካማሲክ አምማኖን ኬሳ ቤስቴና ቦርአ ቴሱስታን ካብራ ሀምማ ኮእባ ካርአና ካባኔን አሱ ኦኮ ስናናስ አማንቶክዋ።
አሱኒ ሜኒ ማጙ
18 አሱኒ ሜያ ማጙቤሲሲክ ፉቶስ አርቶኖይናማቶ ዛግሴፌ። ሀኦሶን ድጎ ቤዮቤሲሲክናዋ ማጙቤሲሲ ቦርአና ዙታምቤሲሴ አሲስታ ሀኦኒ ግኢአ ሳማን ዮኒርዋ። 19 ባሶትን ኬኡናስ ሀኦሲ ቾዋኖን አርሶነክ ሾልሲ ባሮን ሀኦስ ባሶክ አምማኖን ቤስን አርሴሬ ፌሴቴር ስንና ቦርአዋ። 20 ሀን ዳስ ቴስቴናኔን ካብራ አሱኒ ሜያክ ቤስቶኖይ ሀኦሲ ሃላ ኮእባ ፎንቶ ሁግናባሴዋ ባር ሀኦ ስንባሴ ቴስና ቴስቶስኪ ካሞ አምማኖን ኬሳ ቤስቴና ቦርአ አሱኒ ሜያ ማጝስሴፌ ማጝሱሲክ ቴቶነ ዉዝቤስ ኣፋዋ። 21 ባሶ ሀኦሶን አርሴሬ ፌሴፌት ባር ሀኦ ስንባሲክ ሾልሱ ኡልፍንነዋ ጋላትነ ባርክ ኣነ እሞሶቶ። ሳፋራቤሲሲክ ኬእኖር ስንነቴ። ያዳቶኖይ ንብቤሲስ ደይ ታልሜ። 22 «ቴቹምኒ ፋር» ይሴፌት ጎዋ ስንነቴ። 23 ኮእባ ፎንቶ ሀኦሶን ኡልፍንሱስታን ኣትኒ ዉዛ ስንና አሱኒ ግቶክ፥ ካሳክ፥ አቼች ዎቾባ ፋና ዋጋክ ወደይ ዳስታ ቦኮቴፋ ቴስቶሲ ግቶክ ዎሱስቴ ሱራሲክ ኡልፍና እሜቴ።
24 ኤስ ባሪ ቦርኣ ባሶትና ባሶትና ባሶ አሻስታ ኢቹ ዉዛ ዛግሶነክ ሀኦስ ኪናክ ቱማ ማጙ ኤናንቶቤሲሲክ አጃጃሞሶነክ ኣትራ ባሶትን እሚዋ። 25 ኤስ ባር ደይ ስንናስ ሀኦሲ ፉቶኖን ኤሻክ ሶልሴሬ ቴሲ ባሮን ቤይፋት ቴስቶሶን ሀኦ ዛግሴሬ ሺጵሴቴ ቦርአናዋ ባርክ ደይ ዎስቴሴቴ ቦርአናዋ። ስኑንታኖ ሀኦስ ኮእባ ፎንቶኖን ጋላታምቶዋ። ኣሚን። 26 አሱኒ ሜያ ኤስ ባሮን ዛግሴቴ ቦርአ ሀኦሲ ባሶክ ስኖይ ኢቹ ኤናንቶቤሲሲክ ኣትራ እሚ። ማሽካ አሱቤሲሲክቶ አርቴራ ፋ ኣርቃሱስኔን አነ ኩኑሶን ቤይፋት አርቶኖይ ኡግናክ ሶልሴቴ። 27 ኤሲስማቶ ደይ ኣርቃሱኒ ሜያ አርቴራ ፋ ማሽካሱስኔን ኩኑሶን ቤየ ባሶትና ባሶትና እጋክ ኪቼሴቴ። ኤስ ባሪ ቦርኣ ኣርቃሱኒ ሜያ ኣርቃሱስኔን ኢቹ ዉዛ ዛግሴቴ። ኤስ ማጙ ዎስቶቤሲሲክ ሾልሲ ኬኦ ባሶስታ ካርእን ኤጴቶሶነርዋ።
28 አሱኒ ሜያ ሀኦሶን አሩክ ሾሎ ቤየቴ ቦርአ ኢቹ ዉዛ ዛግሶነክ ሀኦስ ኬእኖይ ካኑክ ባሶትን ኣትራ እሚ። 29 ኤስ ባሪ ቦርኣ ሚርኦክ፥ ማጝሱክ፥ ትታናክ፥ ኑሩክ፥ ኮናክ፥ ካኒ ዎሩክ፥ ፋሶክ፥ ኤሽሹክ፥ ማጙ ሳፋራክኔን ቱምሜ ፌር ስንነቴ። ኤሲስማቶ ደይ ሀማትር ስኖነ። 30 አሱኒ ሱና ማጝስር፤ ሀኦሶን ኦምቴር፤ አሱኒን ኡልፍንሱኖር፤ ቤጋንቶ፤ ታነ ፌ አሱ ኣፌ ይር፤ ማጙ ዉዛ ዎስቶ ሾሌር፤ አባ እንቶቤሲሲክ አጃጃሞኖርዋ። 31 ያዳትቤስ ፎንቶ፤ ዉል ቦኬር፤ ኬሽታምቤስ ፎንቶ ኬና ቡዱዋ። 32 «ኤስ ባሮን ዛግፌ ባሶ ዙቴሬ ክቱሶነክቱ ሾልስፋዋ» ይፋ ሀኦሲ ቱማኖን አሪሴፌት ኤስ ባሮን ዙትሬ ዛግሴፌዋ። ዛጉ ኮእባ ስኖይናሮን ኤሲስማቶ ዛግሴፌ ባሶትን ደይ ችኒሴፌዋ።