ዮሀኒስኒ ራእ
ጋችግሩ
ዮሀኒስኒ ራእ ትቼናስ ክርስታናንኒ ሜያ የሱስ ክርስቶስ ዳምቤስ ስንባሶን አማነሴቴ ቦርአ ካቡግቶነዋ ሻናነ ባሶስታ ካርና ካባሲክዋ። ትች ባር ማኮክ ሾሌናስ ፌሬትሴፌ ባሶ አብድቤሲስ ቱማ ስናናክ ችኑክናዋ ባሶስታ ካርኒ ካቡግቶሲክናዋ ሻናሲክና አማንቶቤሲሲክ ዛግ ስኖነክናዋ።
ሀን ማፃፋሲ አርኪ ስና ባግቶስሲ ሾዎ ቱስቶባ ፋና ራእሲክቶኖነዋ አምማኖን ኬስሴ ቤስቶነ ኤጶ። ራእሲክቶ ደይ ኤስ ነያሲክ ፌሴ አማኝኒ ሜያኖን ያዳሶክ ችሞነር፤ ስኑንታኖ ኦምኒ ሜያክ ኣቾ ቾዋ ስንና ፎኒ ሱራኒ ቤሶክ ማክቴርዋ። ጋማሲ ዞንሲያኖን ዎሉግቴፋፋ ጋምቴፋናሲማቶ ሀን ማፃፋሲ ኤዴሲ ሾዎ ቴሳ ራእስኪ ካሞ ሾዎ ኡግናክ ሄፓ ሄፓ ዎልታፋ ማክቴዋ። ማፃፋሲ ኮታኒ ቾዋሲክ ሾዎ ቴሳ ሳፋራ ፋር ስንፋናክኑ አርኪ ስና ሳፋራስ አምማዋ። ኤሲስ ደይ ሀኦስ ዳም ክርስቶስኒኪ ካሞ ሄፕሳ ዎሉኖይና ኡግናክ እሳርጋ ኮእስራ ሴጣናሶን ጌዳ ጉማባስን ዙትሬ ሜሮና፤ ኬጀሬ ሜሮስ ደይ ኮእናኔን ኦርፎ አማናምቶ ስና ባሶክ ጋድዶ ሳማሴዋ ጋድዶ ዳሴ አሲ ኤባኖን እማና ይፋ ባርዋ።
ማፃፋስ ስሩክ ኤጵና ኤጶባስ
ጋችግሩ 1:1-8
ራእሲ ጋቾነዋ ናፉን ቤቴክርስታኒሲክቶክ ዎስቴ ዎሲያሲክቶነ 1:9—3:22
ማፃፋሴዋ ናፉን ማታማሲክቶነ 4:1—8:1
ናፉን ማርካታሲክቶ 8:2—11:19
ዳርቦሴዋ ሄፕ ጎኞሲክቶነ 12:1—13:18
ሾዎ ቴሳ ራእሲክቶ 14:1—15:8
ሀኦሲ ናፉን ግእኒ ቶፎሲክቶ 16:1-21
ባብሎንኒ ትሹ፤ ጎኞስ፤ ኤሽኛ ራጁስናዋ ዳቡሎስና አሲ ሜርቶ 17:1—20:10
ኮእኒ ማጝሱኒ ካርአ 20:11-15
ጋድዶ ሳማ፤ ጋድዶ ዳ፤ ጋድዶ የሩሳሌም 21:1—22:5
ኮርኡባ 22:6-21
1
1 ሀን ራእስ ታአ ዎናስሲ ስንኒ ቾዋሶን ዎስትኛባሳክቶኒክ ቤሱናክ ሀኦስ የሱስ ክርስቶስኒክ እምናርዋ፤ የሱስ ክርስቶስ ደይ ባሳ ዎሲያሶን ዎሲሬ ሀኦሲ ዎስትኛ ስንና ዮሀኒስኒክ አምማኖን ኪስሬ ቤስ።
2 ዮሀኒስ ደይ ሀኦሲ ካማኖንናዋ የሱስ ክርስቶስ ማኬና ዛላሶንና፤ ኤሲስማቶ ደይ ባር ቢና ዉዛ ዙታምባሴ አሲን ዛላ ማኬ።
3 ኤስ ባር ዙታምባሴ ኮኡና ዎናስ ታአ ስንና ቦርአ ሀን ራጅኒ ካማሶን ፌሬትፌ ባር ሱስቶዋ። ኤሲስማቶ ደይ ራጅኒ ካማሶን ኦደሴፌ ባሶናዋ ራጅኒ ማፃፋስሲ ትቼ ባሮን ዛግሴፌ ባሶና ደይ ሱስቶዋ።
ኢስያክ ፋ ናፉን ቤቴክርስታኒሲክቶክ ዎስቴ ናጋኒ ኦሾ
4-5 ዮሀኒስኒኪን ኢስያኪ ናፉን ቤቴክርስታኒሲክቶክ፤ ዜምሜ ፌይስኪን፤ ፌ ባርኪንናዋ፤ ዮኒ ሀኦስኪን፤ ዝግሞሲ ስና ፋሴ ናፉን አያናሲክቶኪን፤ ኤሲስማቶ ደይ ክቱን ካቡባሲክ ኡዙን ስና ሀን ዳስ ታቶኒ ሜኒ አእስኛ፤ አማናምቶ ዛል፤ እኖትን ሹንነ ሀርንባሲክ ቦርኒስን ብርማዱምማ ክሲ የሱስ ክርስቶስኒ ኦትማሴዋ ናጋሴ ንቶክ ስንፋውጝ።
6 የሱስ ክርስቶስኒ አባ ሀኦሲክ ዎስትኛ ስናኒክ እኖትን ታቶሲ ማግኒ ሜያ ዛግ የሱስ ክርስቶስኒክ ኮእባ ፎንቶኖን ኡልፍነዋ ሁግናነ ባሪክ ስንፋውጝ! ኣሚን!።
7 ኤሴ ሳማኪ ሻሩስታ ካሞ ዮኒር፤ ባሪን ኬጃ አሱኒ ሜያኑ ፉእቶኖይ አሱ ዙቴሬ ባሪን ብያናዋ፤ ሀን ዳስታኪ ዳራኒ ሜያ ዙቴሬ ባሳ ቦርአ ዋሶነዋ፤ ኤስ ባር ደይ ፉቶዋ፤ ኣሚን!
8 ፌይስ፥ ፌ ባር፥ ዮኒ ባርናዋ ዙታምባሴ አሲን ችምፌ ዳም ሀኦስ «አልፋነዋ ኦሜጋነ፤ ቴሱኒ ባርናዋ ኮእኒ ባርና ታዋ» ይፌ።
ክርስቶስ ራእክ አምማኖን ቤስቴ
9 የሱስ ክርስቶስኒ ሻናሶንናዋ ባሳ ታቶሶንና፤ ኤሲስማቶ ደይ ፋኪባሶን ንቶኔን አነ ሃኤር ስና ንቶ አይ ሲና ታ ዮሀኒስ ሀኦሲ ካምኒ ቾዋክናዋ የሱስኒ ዛላሲ ቾዋክና ታቴራ ፍጢሞ ይስቴ አካኒ ጋነሲ ኩኒ ዳታቱ ፋን።
10 ዳሚሳ ዎናክ አያናክ ቱምማ ፋና ማርካታኒ ካማነ ፋ አካማ ካማ ኦርፎናስታ፦
11 «ቢታ ባሮን ማፃፋስታ ትችራ ናፉን ቤቴክርስታኒሲክቶክ ኤሲስ ደይ ኤፌሶኒክ፥ ሴሜርነሲክ፥ ፐርጋሞኒክ፥ ትያትሮኒክ፥ ሴርደሲክ፥ ፍላደልፍያክናዋ ሎዶቅያክና ዎሱዋ» ይፌን ኦደን።
12 ታክ ማኬፌስ ኦ ስንናማቶ አሩናክ ኦርፎ የርቀን፤ የርቀፋና ካባሲክ ዋርቄኒ ናፉን ሜቅሬዚሶን ቢን።
13 ኤስ ሜቅሬዚሲ ጋነሲ አሱኒ ናነ ፌ አሱኒን ቢን፤ ባር ሃምማ ዎቾባስታኔን ካርአ ድቻ ማማ ማዮ፤ ንባስታ ደይ ዋርቄኒ ታልፋ ታርአ።
14 ቴትባሴዋ ሶምባሴ እሮኒ ሸአነ ፋ ፎሮ፤ ኣፍባስ ደይ ጌኒ ዊኖነ ፋር።
15 ዎቾባስ ደይ ጌኒ ካዮስን ኬሳ ናስኒ ብታነ ፋር፤ ካምባስ ደይ አካማኖን ጎሴት ኩኒ አካኒ ፉሳሲ ካማነ ፋር።
16 ሆእታ ኩሹባስሲ ናፉን ባኩራሲክቶኖን ኤጶ፤ ካድባስ ሄፕክ ኮግቶ ሲፎ ኖኖባስን ኬስድፋር፤ ስንባስ ዙቴራ አካማኖን ፓልፓልት ፋ አዉኒ ቻሬፋነ ፋር።
17 ቢናይሴ ክቱ አሱነ ፌር ስንና ዎቾባስሲ ጋንደን፤ ስኑንታኖ ባር ሆእታ ኩሹባሶን ታይስታ ታእሬ ኤካ ይ፦ «ድጎታታዋ፤ ቴሱኒስናዋ ኮእኒስና ታዋ።
18 ታ ሀየውዋ፤ ዜሞ ኪትን፤ ስኑንታኖ ኮእባ ፎንቶኖን ታ ሀየውዋ፤ ክቱስታናዋ ኬኦኒ ድማስታና ሀእሱኒ ሁግናና ፋርዋ።
19 ኤሴ ኤስ ቢታ ዉዛሶን፤ ሀሽ ፋ ባሮንናዋ ዎልት ዮኒ ባሮንና ትቹዋ።
20 ሆእታ ኩሹናስሲ ቢታ ናፉን ባኩራሴዋ ናፉን ዋርቄኒ ሜቅሬዚሴ አሲ ኣቾ ቾዋ ሀኒስዋ፤ ናፉን ባኩራሲክቶ ናፉን ቤቴክርስታኒሲክቶክ ዎስቴ ሀኦኒ ዎሲያዋ፤ ናፉን ሜቅሬዚሲክቶ ናፉን ቤቴክርስታኒሲክቶዋ።»