3
ቤቴክርስታንኒ ዞንስኒ ሜያ
1 እሳ አሱ፦ «ቤቴክርስታንኒ ኩርኡ ስናናክ ሾሌፋናነ ኡልፍንቶ ዎስቶቱ ካልቴፌዋ» ይፋ ካማስ ፉቶዋ።
2 ኤስ ባሪ ቦርኣ ቤቴክርስታንንኒ ኩርኡ ስና አሱ ዝናባ ፎንቶ፥ እሳ አሱኒ ቴጎ፥ ማአሪክ ፌፌር፥ ቴትባሶን ሀእሲር፥ ሾልሱ ኡግናሲክ ዎስቴር፥ እርባኒ ኤጳር፥ አሱክ ችምባ ፌናር፤
3 ዛዮኖር፥ ክርክር ሹንኖር፥ ጋራም፥ ቾዋ ሾሎኖር፥ ዋጋ ኬሽቶኖር፤
4 ባሳ ኬርኪ አሱኒ ሜያኖን ማእስሬ ሀእሱክ ችማር፥ ናንጎትባሲክ ሾልሱ ኡልፍና እሜት አጃጃሜር ስናናክቱ ሾልሲፋዋ።
5 አሱ ባሳ ኬርኪ አሱኒ ሜያኖን ሀእሱክ ችምኖር ስንፋናነ ሀኦኒ ቤቴክርስታኒሶን ኣካክ ሀእሱክ ችምኒርን?
6 ቤጋንቶክ ቴትባሶን ቴግሬ ዳቡሎስኒስታ ማጝሱ ካቴናሲማቶ ስንኖይናማቶ ጋድዶ አማኚስ ቤቴክርስታኒሲ ዞንሲ ስናናታዋ።
7 ዝናክናዋ ሴጣናኒ ኤሽምያሲ ግሩኖይናማቶና አማኖኖይ አሱኒ ሜኒ ስና ማአ ሱንባ ፎናክ ሾልሲፋዋ።
ዳቆኝኒ ሜያ
8 ኤሲስማቶ ዳቆኝኒ ሜያ ኡልፍንቶናዋ ዎሉምቤሲሲክ ዛግ፤ አካማ ዋይኒን ኡሻ ኡሽኖር፤ ዋጋ ጆሮኖር ስኖነክቱ ሾልሲፋዋ።
9 ደይ አማንቶኒ ኣቾ ቾዋሶን ካይማ ካኑክ ኦዳር ስናናክ ሾልስፋ።
10 ባሶ ደይ ዜምሜ ፋታንቶሶቶ፤ ኤስታን ዝናቤስ ፎንቶ ስነሬ ቤስቴሴፋቴነ ዳቆኝ ስንነ ዎስቶሶቶ።
11 ኤሲስማቶ አሱቤሲሲክቶ ኡልፍንቶ፤ አሱኒን ሀማቶኖር፤ ማአሪክ ፋር፤ ዙታምባሴ አሲስታክ አማናምቴር ስናናክ ሾልሲፋ።
12 ዳቆኝኒ ሜያ እሳ እሳርቤሲስ እሳ አሱኒ ቴጎ ስኖነክ ሾልሲፋ። ናንጎትቤሲሶንናዋ ኬርኪ ባሶትንና ማአሪክ ሀእሱሶነክቱ ሾልሲፋ።
13 ዳቆኝኒ ዎስቶሶን ማአሪክ ዎስቴሴፌ ባሶክ አካማ ኡልፍናቱ ሾልሲፋዋ። የሱስ ክርስቶስኒስታ ፋ አማንቶቤሲሲክ ደይ ድጋ ፎንቶኖን ማኮኒ ችማ ዳኖሶነዋ።
አካማ ኣቾ ዉዛ
14 ኔኪ ዮናክ አብዲ ዛግፋናክኑ ሀን አጃጂሶን ኔክ ትችፋዉጝዋ።
15 ኤስ ባሮን ደይ ትቺናስ ታ ዎክፋናክኑ አሱኒ ሜያ ሀኦሲ ኬሩክ ኣካክ ፎሶነማቶ አሩታክዋ። ኬያስ ደይ ሀየዋ ሀኦሲ ቤቴክርስታኒዋ። ባር ደይ ፉቶኒ ዬቶነዋ ካፑትነዋ።
16 ፉቶኒ ሀይማኖቲሲ ኣቾ ቾዋ ኤክ ሀጝ ኡባ ፎንቶኖን አካማዋ። ኤስ ባር ደይ ሀኦስ፦
«አሱ ስንነ አምማኖን ቤስቴ፤
ፉቶ ስንባስ አያናክ አርቴ፤
ሀኦኒ ዎሲያክ ቤስቴ፤
ዳራ ዙታምባሴ አሲክ ማክቴ፤
ሀን ዳስታኪ ፌ አሱኒ ሜያ አማነሴቴ፤
ኡልፍናክ ደን ሳማ ሀሚ» ይፋርዋ።