ዎሲ ጳዉሎስኒ ሄፕሳ ዎሲያ
ጢሞትዮስኒክ
ጋችግሩ
ጳዉሎስ ጢሞትዮስኒክ ትችና ሀን ሄፕሳ ዎሲያስ፤ ጳዉሎስኒን ታሶኖን አሪጋሲ ዎስቶኒ ዞሞባይ ስና ናኦ ጢሞትዮስኒክ እምና ኪቶሶን ኤጶዋ። ዳይስሬ ደይ ኪትናስ ፋክያክ ችናክዋ። ጢሞትዮስ ኪቶነዋ ችኑኒ ካማ ዳንናስ የሱስ ክርስቶስኒ ቾዋሶን አማናምቶክ ዛላ ማኮናክ ዛግሬ ኤጳናክናዋ አዉነ ፋሮንኑ ሻናሴዋ ቱጋኦሴ አርክፋናክኑ አሱሲክናዋ ምስራቹኒ ካማሲ ማኮኒ ዎስቶሲክና ዱዶናክዋ።
ጢሞትዮስ አርክሮን ቴትባሶን ኦዳናክ ማክቴናስ ጎዉማክ ዛግቴፋ ስንኖይ ክርክሪስን ዎካናክዋ። ኤስ ኤፋቴና ዉዛስ ኦደፌ ባሶትን ትሽኩታኖ ኦማ ኬእፋና ዉዛባ ኣፋዋ።
ኤስ ዉዛ ዙታምባሴ አሲክ ጢሞትዮስ ያዳቶናክ ሾልሲናስ ጳዉሎስኒ ካሴዋ ፎሴ አርክሮን ደይ አማንቶባሶን፤ ፋክባሶን፤ ኬሽታንባሶን፤ ችምባሶንናዋ ካቡግቶክ ባሳስታ ካርአ ሻናሲ ቤሶክና ዞኑስቶናክዋ።
ማፃፋስ ስሩክ ኤጵና ኤጶባስ
ጋችግሩ 1:1-2
ጢሞትዮስኒክ እምቴ ኪቶ 1:3—2:13
ሞርሞኒ ካባሲክ አማናምቶ ስንነ ቤስቶ 2:14—4:5
ኤስ ካባሲክ ፋሴ ዉዛአሲክቶነዋ ሾልሱ ዞንሱነ 4:6-18
ኮርኡባ 4:19-22
1
1 የሱስ ክርስቶስኒኪን ቤስቴ ካኒ አብዲሲክ ሀኦሲ ፍቃድክ የሱስ ክርስቶስኒ ዎሲ ስና ጳዉሎስኒኪን ዎስቴ ዎሲያ፤
2 ሹንቶ ናታ ጢሞትዮስኒክ፤ አባ ሀኦኒሲክንናዋ ዳምኒ የሱስ ክርስቶስኒክንና ኦቱምነዋ ፋክነ ደይ ናጋነ ኔክ ስንፋውጝዋ።
ጢሞትዮስኒክ እምቴ ኪቶ
3 ዎንና ዎንና ዎንነዋ ዋልነ ሺጶናሲክ ኔን ሳፋሬፋና ካባሲክ ታ አባኒ ሜያ ዛግሴቴሲማቶ ታ ደይ ካይማ ካኑክ ባሪክ ዎስቴፋና ሀኦሶን ጋላቴፋዉጙዋ።
4 አራፍኔሶን ያዳቴድፋዉጝዋ፤ ኤስ ባሪ ቦርኣ አካማኖን ግሮናክ ኔን ብያናክ ካልቴፋዉጝዋ።
5 ኔኪክ ፋ ፉቶኒ አማንቶሶን ያዳቴድፋንዋ። ኤፋቴና አማንቶስ ዜምማ አፋነ ሎይድያኪክ ደይ እንቶነ ኤዉንቄኪክቱ ፋዋ። ኔኪክ ደይ ፋናማቶ አሪጙዋ።
6 ኤስ ባሪ ቦርኣ ኩሹናሶን ነይስታ ታእፋና ካባሲክ ኔክ እምቴ ጌኒማቶ ስንና ነይሲ ፋ ሀኦሲ እማኖን ሄፕሳ ዎልግራ ጌኒማቶ ሳምማ ዳይሲት ሀማናክ ያዳሲፋዉጝዋ።
7 ሀኦ እኖክ እምና እማስ ሁግናኒር፥ ኬሽታኒር፥ ደይ ቴትኒ ሀእሱኒ ኮርቶ አያናታኖ ድጋኒ አያናታዋ።
8 ኤሴ ዳምኒሳ ቾዋኖን ማኮሶን ኢቾታታዋ። ባሳ ቦርአ ታቴሬ ፌ ታክ ደይ ኢቾታታዋ። ስኑንታኖ ሀኦ ኔክ እማና ሁግናሲክ ምስራቹኒ ካማሲ ቦርአ ዮኒ ሻናሶን ኤጳቶዋ።
9 ባር እንኖ ዛግኒ ማአ ዎስቶክ ስንኖይናማቶ ቴትባሲ ሹናክናዋ ኦቱምባሲክና እኖትን ፋቲዋ። ኮርቶ ስንና ፎኒክ እኖትን ቴጌ። ኤስ ኦትማሶን ነያኔን ስናክ የሱስ ክርስቶስኒኪ ካሞ እኖክ እሚዋ።
10 ኤስ ኦትማስ ደይ እኖትን ፋቲ የሱስ ክርስቶስ ዮባሲክ አምማኖን ቤስቴ። ባር ክቱሲ ሁግናኖን ትሽክሬ ምስራቹኒ ካማሲኪ ካሞ ክቱኖይ ኮእባ ፎንቶ ካ አምማኖን እኖክ ቤሲ።
11 ታ ደይ ኤስ ምስራቹኒ ካማሶን ማኮኒ ዎሲ፤ አስኛ ስንና ቴግቴን።
12 ሀን ራክኮሶን ኤጳታት ፋናስ ደይ ኤስ ባሪ ቦርኣዋ። ስኑንታኖ ኦኒን አማነናማቶ አሪፋና ቦርአ ኣፋ ኢቾናዉዛ። ታ እምና አዳራሶን ክርስቶስ ዎል ሌ ዮና ካባኔን ባር ኦዳ ችማናማቶ አሪፋውጙዋ።
13 ታኪን አሪታ አማናምቶ ካማሶን ቤሶ ዛግራ የሱስ ክርስቶስኒክ ፋ አማንቶሲክናዋ ኬሽታናሲክና ኦድዋ።
14 እንኖሲ ፋፋ ኮርቶ አያናስኪ ካሞ ኔክ እምቴ ማአ አዳራሶን ኦድዋ።
15 ኢስያኒ አዉራጃሲ ፌ ባሶ ዙቴሬ ታን ቤየ ሀሜቴማቶ አርፋትዋ። ባሶ ጋነያስን ፍጌሉስናዋ ሄርሞጌነስና ፌሴቴርዋ።
16 ዳሚስ ኦነስፎርኒ ኬርኪ ሜያክ ፋክባሶን እማዎዋ። ባር ሾዎ ዎና ታን ችኒ። ታቶናሲክኑ ኣነ ኢቾዌ።
17 ሮምኪ ካታማ ዬና ካባሲክ ደይ ሾሌፌ ሾሌፌቱ ታን ዳኒ።
18 ማጝሱኒ ካርኒ ዎኖ ዳሚስ ፋክባሶን እማዎዋ። ኤፌሶኑክ ፋና ካባሲክ አዉነ ፋሮን ታን አርጋሲናማቶ ነ ቴትኔሲክ ማእስራ አሪፋትዋ።