ዎሲ ጳዉሎስኒ ዎሲያ
ቲቶኒክ
ጋችግሩ
ቲቶ አሬማዊ ስናስን ክርስትናስኪ ዎሊር ስንፋት ምስራቹኒ ካማሲ ማኮኒ ዎስቶኖን ታእሶክ ጳዉሎስኒን አርጋስት ፌ ዎስቶኒ ዞሞባዋ። ጳዉሎስ ሀን ዎሲያሶን ትችናስ ዎጋባሲክ ጋሮ ስና ሀን ዎስቶኒ ዞሞባ ስና ትቶኒክ ስንፋት ቲቶ ኤስ ካባሲክ ቤቴክርስታንኒ ዎስቶሶን ቢሬ ዞንሲት ቀርቴሱክቱ ዲፌ። ሀን ዎሲያሲ ዛጊግራ ቤሲፋናስ ኬዝ አርኪ አርኪ ዉዛሲኪቶኖንዋ።
1 ቤቴክርስታንኒ ዞንስኒ ሜያ አርክሮን ደይ ቀርጠስኪ ሜያ ማጙ አማላቤስ ፎባሲክ አሮ አማላ ባሶክ ፎናማቶ ትቶኒክ ችኒሬ ማኬ።
2 ቤቴክርስታኒስሲ ፋሴ ሾዎ ቴሳ ቡዱኒስ ኤሲስ ደይ ዎጋቤሲሲክ ዎክኬ ፌሴ ኣርቃሱኒ ሜያኖንናዋ ማሽካ ሜያኖንና፤ ኤሲስማቶ ናኦ ኣርቃሱኒ ሜያኖንናዋ ዎስትኛኒ ሜያኖንና ኣካክ አእሱናክ ሾልሲፋናማቶ ትቶኒን ኪት።
3 ኮእባስታክ ደይ ክርስትናኒ አማላ አርክሮን ደይ ናጋነዋ ኮንቴሬ ፎነ፤ ኤሲስማቶ ደይ ቤቴክርስታኒስ ፋሶ፤ ካራካሮነዋ ኦር ኦር ኬስነ አሲን ትሽኩክ፤ ትቶኒክ ኪቶነዋ ዞንስነቱ እሚ።
ማፃፋሲ ስሩክ ኤጵና ኤጶባስ
ጋችግሩ 1:1-4
ቤቴክርስታንኒ ዞንስኒ ሜያ 1:5-16
ቤቴክርስታኒሲ ሾዎ ቴሳ ዎስቶኒ ሃኦ ፎባስ 2:1-15
ኪቶነዋ ቴትኒ ኦድነ 3:1-11
ኮርኡባ 3:12-15
1
1 ሀኦስ ኮርና አሱኒ ሜያኖን አማንቶቤሲሲክ ችሞነክናዋ አማንቶኒ ቾዋሶን ደይ ፉቶኒ አያናክ ፎሶን አርሶነክና ዛጉክ ሀኦሲ ቦዝናዋ የሱስ ክርስቶስኒ ዎሲ ስና ጳዉሎስኒኪን ዎስቴ ዎሲያ።
2 ኤስ አማንቶስ ኮእባ ፎንቶ ካኒ አብዲስታ ካፑቴራ የሬርዋ፤ ኤሽኖይ ሀኦስስ ሀን ካሶን እማናክ ሾዎ ነያኔን ስናክ ዜምማ ቴያ እኖክ ግሪዋ።
3 ኤስ ነያስ ካርፋና ካባሲክ እኖትን ፋቲ ሀኦሲ አጃጅኒማቶ ታክ እምቴ አዳራሲክ ምስራቹኒ ካማሶን ማኮናክ ሀኦስ ካምባሶን ታክ አምማኖን ክስራ ቤሲዋ።
4 እኖክ ጋራ ስና አማንቶሲክ ፉቶኒ ናታ ስና ትቶኒክ፤ አባ ሀኦስኪንናዋ እኖትን ፋቲ የሱስ ክርስቶስኒኪንና ኦቱማሴዋ ናጋሴ ንቶክ ስንፋውጝዋ።
ቲቶ ቀርጠሱክ ዎስቴና ዎስቶ
5 ኔን ቀርጠሱክ ፎታክ ዛግናስ፤ ማእስቶኖይ ዉዛሲክቶኖን ማእሱታክናዋ ታ ኔን አጃጀናሲማቶ ቤቴክርስታኒስ ኩርኡኒ ሜያኖን ካታማ ካታማሲ ታትሱታክዋ።
6 ቤቴክርስታንኒ ኩርኡ ስንኒ አሱ ካሽስቶኖርናዋ እሳ አሱኒ ቴጎ ስናር፤ ጋፎ ስንኖርናዋ አጃጃምቶ ቤያክና ሀማቶኖይ ናንጎትባ ፋናር ስናናክቱ ሾልሲፋዋ።
7 ቤቴክርስታንኒ ኩርኡስ ሀኦሲ ዎስቶኖን አዳራክ ኤጳት ፌር ስንና ቦርአ ካሽስቶኖር ስናናክቱ ሾልሲፋዋ። ኤሲስማቶ ደይ ጌእኖር፥ ታእኖን ግእቶኖር፥ ዛዎኖር፥ ፋሶኖር፥ ዋግኒ ጆራባ ፎንቶ ስናናክቱ ሾልሲፋዋ።
8 ኤስ ባርስታን ኦማ ኬባሲክ እርባኒን እርባሱክ፤ ማአር ስና ዉዛሶን ሹናር፤ ቴትባሶን ሀእሲር፤ ቴትባሲክ ማአር፤ ሀኦሲ ዎስቶክ ቴትባሶን ኮሪር፤ ታክ ፋ ፎናስ ሆሬ ይሬ ፎክ ችማር ስናናክቱ ሾልሲፋዋ።
9 ፉቶኒ አሱሶን አስሲት፤ ኪቱክናዋ ቱጋኤሴፌ ባሶክ ዎልጉባ እማ ችማታክ ነ አሪታ አሩኒ ካማሲክ ችምማ የሮዋ።
10 ሾዎ አሱኒ ሜያ አይሁድኒ ኬን ስና አማኝኒ ሜያ፤ ሃርኮ ኩንሱኒ ስትሪሲክ ሀምኖር፤ አጃጃሞኖር፤ ሽማሲክ ሳሴትናዋ ኤሸትና ፌሴ አሱኒ ሜያ ፌሴቴርዋ።
11 ኤስ ባሶ ሻኩሶነክ ዛጉንክቱ ሾልሲፋዋ፤ ባሶ ስንኖይ ኡግናክ ዳኖሶነክ ሾልሱኖይ ዉዛሲክቶኖን አሲፋፌ አሱሳ ኬያኖን ዙታምባሴ አሲን ሾርኪት ፌሴቴርዋ።
12 ባሶ ጋነያስን ባሶ ራጁ ስና ባር፦ «ቀርጠስኪ አሱኒ ሜያ ኣጌኑ ስንፋናክ ኤሽኛ ደይ ማጙ ጎኞ፤ ዎስቶ ኮትኛ ደይ ጆርቱዋ» ይዋ።
13 ኤስ ዛላስ ደይ ፉቶዋ፤ ኤስ ባሪ ቦርኣ ቱማ አማንቶቤስ ፎናክ ባሶትን ኬእኡዋ።
14 አይሁድኒ ሜኒ ቶቾሶን ኤጴቶሶኖይቴማቶናዋ ፉቶሶን ቱጋእሴፌ ባሶ አጃጂሶን ኦዶሶኖይቴማቶና ማእስራ ኬእኡዋ።
15 ካይምኒ ሜያክ ዙታምባሴ ካይማዋ። ስኑንታኖ ኪና ዉዛ ዎስቴሴፌ ሜያክናዋ አማኖ ቤየፌ አሱኒ ሜያክና ካይማ ስና ዉዛ እሳንነ ኣፋዋ። ኤሲስማቶ ደይ ካኑቤሲስ ስኑን ያዳትቤሲስ ኪናዋ።
16 «ሀኦሶን አርፌኒዋ» ይሴቴርዋ፤ ስኑንታኖ ዎስቶቤሲሲክቱ ሞርሜሴፌዋ፤ ኤስ ባሶ ሳልጳቱ፤ አጃጃምቶኖር ደይ ማአ ዎስቶ ዎስቶክ ችሞኖይ አሱኒ ሜያዋ።