Meeŋka Jooŋ Matta 1

Meeŋka Ïñjïïl Matta

Nüütïn Woo Ïñjïïl yen Matta

Ïñjïïl yen Matta a meeŋkani yaaka kä ŋan ika ti yaŋkalaŋ, aŋ a Jiik Ḍoocin Kïccäŋgenen yaaka nüütï üṇṇü yen Yeecüwa Macii ye. Aŋ iken yaakka ti yaŋkalaŋ daa battä me ogo, “Ïñjïïl,” aŋ aŋan ogo “jiik ŋerkä.” Aŋ kä tïïññä yen wääktäŋ laṇṇä, tüüjgï yaaka kä ŋan ye, piṭṭä ääl yen Yeecüwa. Aŋ iken a Matta, ke Maarkoc, ke Lüka ke Yuhanna.

Aŋ m'ana piṭṭä meeŋka yaanni ye, a Matta yaana a ḍüṭo yen tiilgä ina, i batta mor kiingä Yeecüwa ogo wuuto ogo baaddo yeene. Aŋ ike cäänna ŋäjjänä me yäṇtonḍe yaŋkalaŋ ogo Laawï. Aŋ Matta a tüüjgï yaaka kä caay witken kä yew ye ti. Aŋ ike piṭṭä meeŋka yaanni nüütï ogo Yeecüwa ogo Macii, magdo yen wakon kä Jooŋ yaana bäṭṭene bäṭoni yek Jooŋ yaaka kä on ye. Aŋ Matta meeŋka yaanni perre kä lemmä Yünaanni, aŋ ken yeli me yok kä lemmä Mäbaan ogo Mäbaan ŋäjjo wakkä yaakki cäänna.

Matta uccin kä päŋŋä ïñjïïl kä giidä yen Yeecüwa Macii ke ïïjjïn ti yen ñuugala yeene. Aŋ ŋuca Matta päkï kä waak yäwkä ḍiirken yaaka naŋdi Yeecüwa ye, ogo mäbaan ukco gïtï teynä yaana ïññïïda ko Jooŋ ye. Aŋ Yeecüwa ṭiiññä rackä aŋ booŋïnni ñooṭṭe woo. Aŋ Matta cäänna ṭäkï ogo mäbaan ŋäjjo nüüṇṇü Yeecüwa. Aŋ Yeecüwa nüüttü kä mügdïn yen Jooŋ pare. Aŋ Matta cäänna piṭṭä kä yaac kä Yätkïtïn yen Jooŋ. Aŋ Yühüüṇṇï ḍüücï ogo Yeecüwa bi wääto ogo yätkä yeenen yen ŋommañ wiñe. Aŋ Matta waŋe tïïcce kä yaac erdee kä paydin yen yätkïtïn mänbaan kä nüütïn woo Yätkïtïn Jooŋ ogo yätkïtïn yen wääktäŋ. Aŋ düüñïn wiñ yen Matta a tüwnü yen Yeecüwa Macii ke juwin yeene tüwnü ti kä teynä yen Jooŋ.

Aŋ yaakki ïkïïn yüükkïdïn ti ŋäjjin Yeecüwa a ŋaani. Aŋ ŋäjjin meeŋka yaanni jï ïkïïn yüükkïdïn ti cääyïn kä ŋäjjin ŋommañ wic, aŋ ïkïïn tütkïdïn üṇṇü naana ïkïïn tüünïn ye. Aŋ dale Jooŋ ïkïïn ïñïn ŋäjjin yaanni! Aamiin!

Yeecüwa Macii Dänkä Yurge

1 Perrä yaanni a yen Yeecüwa Macii dänkä yurge, a kaaynä Daawüüt ke Abrayiim,

2 Abrayiim a Icaak wäyen,

Aŋ Icaak a Yaagüüp wäyen,

aŋ Yaagüüp a Yahüüja wäyen ke mädge,

3 aŋ Yahüüja a Paaric wäyen ke Jüra meen a Taamaar,

aŋ Paaric a Hïjïroon wäyen,

aŋ Hïjïroon a Aaraam wäyen,

4 aŋ Aaraam a Amïnadaap wäyen,

aŋ Amïnadaap a Naac wäyen,

aŋ Naac a Caalim wäyen,

5 aŋ Caalim a Buwaac wäyen meen a Raahaap,

aŋ Buwaac a Ubeet wäyen meen a Rawüüc,

aŋ Ubeet a Yecce wäyen,

6 aŋ Yecce a Yätkä Daawüüt wäyen.

Aŋ Daawüüt a Cïlïmaan wäyen kä iŋ Üürïya ti,

7 aŋ Cïlïmaan a Raabaam wäyen,

aŋ Raabaam a Abïïya wäyen,

aŋ Abïïya a Acaap wäyen,

8 aŋ Acaap a Yucapaat wäyen,

aŋ Yucapaat a Yüraam wäyen,

aŋ Yüraam a Üüjïya wäyen,

9 aŋ Üüjïya a Yütaam wäyen,

aŋ Yütaam a Ahaac wäyen,

aŋ Ahaac a Hijakïya wäyen,

10 aŋ Hijakïya a Manacca wäyen,

aŋ Manacca a Amüün wäyen,

aŋ Amüün a Yüücïya wäyen,

11 aŋ Yüücïya a Yükünïya wäyen ke mädgen waan yen näpkïtïn ti Baabïl.

12 Aŋ wääna näpkïtïn ti Baabïl ye,

Yükünïya a Caaltïïl wäyen,

aŋ Caaltïïl a Jarabaabïl wäyen,

13 aŋ Jarabaabïl a Abïyüüt wäyen,

aŋ Abïyüüt a Ïlïyakïïm wäyen,

aŋ Ïlïyakïïm a Ajüür wäyen,

14 aŋ Ajüür a Caadik wäyen,

aŋ Caadik a Akkïïm wäyen,

aŋ Akkïïm a Alïyüüt wäyen,

15 aŋ Alïyüüt a Ïlïyaajar wäyen,

aŋ Ïlïyaajar a Mattaan wäyen,

aŋ Mattaan a Yaagüüp wäyen,

16 aŋ Yaagüüp a Yuucip wäyen or Märïyam, yaana gittä Yeecüwa, yaana battä me ogo Macii ye.

17 Aŋ kilkä muure yaaka juwu Abrayiim ti atee ke Daawüüt ti ye kilkä kä caay witken kä ŋan, aŋ yaaka juwu Daawüüt ti atee ke näpkïtïn ti Baabïl ye kilkä kä caay witken kä ŋan, aŋ yaaka juwu näpkïtïn ti Baabïl atee ke Macii ti ye kilkä kä caay witken kä ŋan.

Giidä yen Yeecüwa Macii

18 Aŋ giidä yen Yeecüwa Macii näŋŋä ḍoŋe kä waan yaanni ogo aŋŋi. Wääna meen Märïyam wuuke daa Yuucip ye, i mor iken yoken batta coorgu, kañi me cäyge minneni kä Wääktäŋ Laṇṇä yen Jooŋ. 19 Aŋ oore Yuucip, ike a män woṇṇu, aŋ batta ṭäkï iccede loon gïtï aŋ ike jaajjin jone ti ogo daljebu liidid.

20 Aŋ wääna ike paydee kä aŋan ye, i malak yen Pïṭo üükïn woo ike ti kä lääggï, aŋ ike kiini ogo, “Yuucip, minneni Daawüüt, ŋana ïkï booju kä koownu Märïyam ogo ïïŋü, a Wääktäŋ Laṇṇä ken ina laaccee kä yaanna. 21 Aŋ ike bi giit minneni, aŋ bi äkkä yäṇtäŋ ogo Yeecüwa a yaana bi määkee kä woo mä yeeke kä nääŋken yaacken ye.”

22 Aŋ yaakki muure näŋŋä ḍuuggen ḍääkit jiik'a jaayi Pïṭo kä bäṭo ye ogo,

23 “Yoore, ṭuul yaana kücï oon ye, bi laacï

aŋ bi giit minneni,

aŋ bi battä me ogo

Ïmaanuwel,”

aŋ naana aŋan ye, i ogo, “Jooŋ ke ïkïïn.”

24 Aŋ wääna Yuucip cuuyenee kä nïïnkä ti ye, ike näŋjin bata yaana daa kiinene daa malak yen Pïṭo ye, aŋ iiŋe koowne, 25 aŋ yoken batta agene kä coorgin ke iiŋe giide minneni. Aŋ äkki Yuucip ogo Yeecüwa.