12
ಪವಿತ್ರ್ ಆತ್ಮ್ಯಾಚೆ ವರು
1 ಭಾವಾನು ಅನಿ ಭೆನಿಯಾನು ಪವಿತ್ರ್ ಆತ್ಮ್ಯಾಚ್ಯಾ ವರಾಂಚ್ಯಾ ವಿಶಯಾತ್ಲೆ
ಖರೆ ತುಮಿ ಗೊತ್ತ್ ನಸಲ್ಲೆ ಹೊವ್ನ್ ರ್‍ಹಾವ್ಚೆ ನ್ಹಯ್ ಮನುನ್ ಮಾಜಿ ಅಶಾ.
2 ತುಮಿ ವಿಶ್ವಾಸಾತ್ ನತ್ತ್ಯಾಶಿ ತನ್ನಾ ತುಮ್ಚ್ಯಾ ಮನಾಕ್ ಯೆತಾ ತಸೆ ಮುಕ್ಕ್ಯಾ ಮುರ್ತಿಯಾಂಚೆ ಆರಾದನ್ ಕರುಕ್ ತುಮಿ ಪಳುನ್ ಖೆಳುಕ್ ಲಾಗಲ್ಲ್ಯಾಸಿ ಮನುನ್ ತುಮ್ಕಾಚ್ ಗೊತ್ತ್ ಹಾಯ್.
3 ಹೆಚ್ಯಾ ಸಾಟ್ನಿ ಮಿಯಾ ತುಮ್ಕಾ ಸಾಂಗ್ತಾ, ದೆವಾಚ್ಯಾ ಆತ್ಮ್ಯಾಚ್ಯಾ ಪ್ರೆರನಾಚ್ಯಾ ವೈನಾ ಬೊಲ್ತಲ್ಲೊ ಕೊನ್‍ಬಿ ಮಾನುಸ್ ಜೆಜು ಸರಾಪ್ ಪಡಲ್ಲೊ ಮನಿನಾ! ತಸೆಚ್ ಪವಿತ್ರ್ ಆತ್ಮ್ಯಾಚೊ ಪ್ರಭಾವ್ ನಸ್ತಾನಾ ಕೊನ್‍ಬಿ ಮಾನುಸ್ “ಜೆಜುಕ್ ಧನಿ” ಮನುನ್ ಸಾಂಗುಕ್ ಸಕಿನಾ.
4 ಹೊಲ್ಯಾರ್ಬಿ ಆತ್ಮಿಕ್ ವರಾ ಲೈ ಲೈ ಥರಿಚಿ ಹಾತ್ ಖರೆ ಎಕುಚ್ ಪವಿತ್ರ್ ಆತ್ಮೊ ತಿ ದಿತಾ.
5 ಸೆವಾಬಿ ಎಗ್ಳ್ಯಾ ಎಗ್ಳ್ಯಾ ಥರಾಚಿ ಹಾಯ್; ಖರೆ ಎಕುಚ್ ಧನಿಯಾಚಿ ಸೆವಾ ಕರುನ್ ಹೊತಾ.
6 ಅನಿ ಕಾಮಾಬಿ ದುಸ್ರಿ ದುಸ್ರಿ ಥರಿಚಿ ಹಾತ್; ಖರೆ ಸಗ್ಳ್ಯಾಂಚಿ ಸಗ್ಳಿ ಕಾಮಾ ಹೊಯ್ ಸರ್ಕೆ ಕರ್‍ತಲೊ ದೆವ್ ಎಕ್ಲೊಚ್.
7 ಹರ್ ಎಕ್ಲ್ಯಾಕ್ ದಿಸುನ್ ಯೆತಾತ್ ತಿ ಪವಿತ್ರ್ ಆತ್ಮ್ಯಾಚಿ ವರಾ ಸಗ್ಳ್ಯಾಂಚ್ಯಾ ಬರ್‍ಯಾಪಾನಾಸಾಟ್ನಿ ಮನುನ್ ದಿಲ್ಲಿ ಹಾತ್.
8 ಅಶೆ ಪವಿತ್ರ್ ಆತ್ಮೊ ಎಕ್ಲ್ಯಾಕ್ ಬುದ್ದಿಚೊ, ಅನಿಎಕ್ಲ್ಯಾಕ್ ಶಾನ್ಪಾನಾಚೊ ವರು ದಿತಾ. ಅನಿಎಕ್ಲ್ಯಾಕ್ ತೆಚೊ ಅರ್ಥ್ ಸೊಡ್ಸುನ್ ಸಾಂಗ್ತಲೆ ವರು ದಿತಾ.
9 ಎಕ್ಲ್ಯಾಕ್ ತ್ಯಾಚ್ ಆತ್ಮ್ಯಾ ವೈನಾ ವಿಶ್ವಾಸಾಚೆ ವರು ಗಾವ್ತಾ ಅನಿಎಕ್ಲ್ಯಾಕ್ ಪಿಡಾ ಗುನ್ ಕರ್‍ತಲೆ ವರು ಗಾವ್ತಾ.
10 ಎಕ್ಲ್ಯಾಕ್ ವಿಚಿತ್ರ್ ಕಾಮಾ ಕರ್‍ತಲೆ ವರು ಗಾವ್ತಾ, ಅನಿಎಕ್ಲ್ಯಾಕ್ ಪ್ರವಾದ್ ಕರ್‍ತಲೆ, ತಿನ್ವೆಚ್ಯಾಕ್ ಪ್ರೆರಕ್ ಆತ್ಮೆ ಪರಿಕ್ಷಾ ಕರುನ್ ಬಗ್ತಲೆ ವರು ಗಾವ್ತಾ. ಎಕ್ಲ್ಯಾಕ್ ದುಸ್ರಿ ದುಸ್ರಿ ಬಾಶಾ ಬೊಲ್ತಲೆ ವರು ಗಾವ್ತಾ, ಅನಿಎಕ್ಲ್ಯಾಕ್ ಹ್ಯಾ ಬಾಶಾಂಚೊ ಅರ್ಥ್ ಸಾಂಗ್ತಲೆ ವರು ಗಾವ್ತಾ.
11 ಖರೆ ಹಿ ಸಗ್ಳಿ ವರಾ ದಿತಲೊ ಎಕ್ಲೊಚ್ ಅನಿ ತೊಚ್ ಪವಿತ್ರ್ ಆತ್ಮೊ; ಅಪ್ನಾಂಚ್ಯಾ ಮನಾಕ್ ಯೆತಾ ತಸೆ ಹರಿ ಎಕ್ಲ್ಯಾಕ್ ತೊ ತಿ ವಾಟುನ್ ದಿತಾ.
ಲೈ ಭಾಗ್ ಹೊತ್ತ್ಯೆ ಎಕ್ ಆಂಗ್
12 ಆಂಗ್ ಎಕ್ ಹೊಲ್ಯಾರ್ಬಿ ತೆಚಿ ಭಾಗಾ ಲೈ ಹಾತ್; ಅನಿ ಅಂಗಾಚಿ ತಿ ಸಗ್ಳಿ ಭಾಗಾ ಲೈ ಹೊಲ್ಯಾರ್ಬಿ ಎಕುಚ್ ಆಂಗ್ ಹೊತ್ತ್ಯಾತ್, ತಸೆಚ್ ಕ್ರಿಸ್ತಾತ್‌ಬಿ ಘಡ್ತಾ.
13 ಅಮಿ ಸಗ್ಳ್ಯಾನಿ, ಜುದೆವಾನಿ ಅನಿ ಜುದೆವ್‍ ನ್ಹಯ್ ಹೊತ್ತ್ಯಾನಿ, ಸ್ವತಂತ್ರ್ ಹೊತ್ತ್ಯಾನಿ, ಅನಿ ಗುಲಾಮಾನಿ ಎಕ್ ಆಂಗ್ ಹೊವಸಾಟ್ನಿ ಎಕುಚ್ ಆತ್ಮ್ಯಾಚ್ಯಾ ವೈನಾ ಬಾಲ್ತಿಮ್ ಘೆಟ್ಲಾಂವ್; ಅನಿ ಎಕುಚ್ ಆತ್ಮೊ ಅಮ್ಕಾ ಸಗ್ಳ್ಯಾಕ್ನಿ ಎಕ್ ಫಿವನ್ ಸಾರ್ಕೆ ದಿಲ್ಲೊ ಹಾಯ್.
14 ಆಂಗ್ ಮಟ್ಲ್ಯಾರ್ ಎಕುಚ್ ಭಾಗ್ ನ್ಹಯ್, ತೆ ಲೈ ಭಾಗಾನಿ ಹೊಲ್ಲೆ ಹಾಯ್.
15 ಜರ್ ಪಾಯ್ “ಮಿಯಾ ಹಾತ್ ನ್ಹಯ್, ತಸೆ ಮನುನ್ ಮಿಯಾ ಆಂಗಾಚೊ ಭಾಗ್ ನ್ಹಯ್”, ಮನಿಲ್ ತರ್ ತೊ ಆಂಗಾಚೊ ಭಾಗ್ ಹೊಯ್ ನಸ್ತಾನಾ ರ್‍ಹಾತಾ ಕಾಯ್?
16 ಅನಿ ಕಾನ್ ಜರ್,“ಮಿಯಾ ಡೊಳೊ ನ್ಹಯ್, ತಸೆ ಮನುನ್ ಆಂಗಾಚೊ ಭಾಗ್”, ಮನಿಲ್ ತರ್ ತೊ ಆಂಗಾಚೊ ಭಾಗ್ ನ್ಹಯ್ ಹೊತಾ ಕಾಯ್?
17 ಸಗ್ಳೆ ಆಂಗ್ ಡೊಳೆಚ್ ಹೊಲ್ಲೊ ರ್‍ಹಾಲ್ಯಾರ್ ಆಯಿಕ್ತಲಿ ತಾಕತ್ ಖೈ ರ್‍ಹಾಯ್ ಹೊತ್ತಿ? ತಸೆಚ್ ಸಗ್ಳೆ ಆಂಗ್ ಕಾನುಚ್ ಹೊವ್ನ್ ರ್‍ಹಾಲ್ಯಾರ್ ವಾಸ್ ಘೆತಲಿ ತಾಕತ್ ಖೈ ರ್‍ಹಾಯ್ ಹೊತ್ತಿ?
18 ತಸೆ ಮನುನ್ ಎಕ್ ಅಂಗಾತ್ ದುಸ್ರ್ಯಾ, ದುಸ್ರ್ಯಾ ಭಾಗಾಕ್ನಿ ದೆವಾನ್ ಅಪ್ನಾಂಚ್ಯಾ ಮನಾಕ್ ಯೆತಾ ತಸೆ ದುಸ್ರೊ ದುಸ್ರೊ ಜಾಗೊ ದಿಲ್ಯಾನಾಯ್.
19 ತಿ ಸಗ್ಳಿ ಎಕುಚ್ ಭಾಗ್ ಹೊವ್ನ್ ರ್‍ಹಾಲ್ಯಾರ್; ಆಂಗ್ ಖೈ ರ್‍ಹಾಯ್ ಹೊತ್ತೆ?
20 ಖರೆ ಭಾಗಾ ಲೈ ಹೊಲ್ಯಾರ್ಬಿ ಆಂಗ್ ಎಕುಚ್.
21 ಡೊಳ್ಯಾನ್ ಹಾತಾಕ್ನಿ ಮಾಕಾ ತುಜಿ ಗರಜ್ ನಾ ಮನುಕ್ ಹೊಯ್ನಾ; ತಸೆಚ್ ಟಕ್ಲ್ಯಾನ್ ಪಾಂಯಾಕ್ನಿ ಮಾಕಾ ತುಮ್ಚಿ ಗರಜ್ ನಾ" ಮನುಕ್ ಹೊಯ್ನಾ.
22 ಹೆ ಸೊಡುನ್ ಆಂಗಾಚಿ ಲೈ ಬಳ್ ನಸಲ್ಲಿ ಮನುನ್ ದಿಸ್ತಲಿ ಭಾಗಾ ಲೈ ಗರ್ಜೆಚಿ ಹಾತ್.
23 ಅನಿ ಕಮ್ಮಿ ಮರ್ಯಾದಿಚೆ ಮನುನ್ ಚಿಂತಾಂವ್ ತಸ್ಲ್ಯಾ ಭಾಗಾಕ್ನಿ ಅಮಿ ವಿಶೆಸ್ ಮಾನ್ ದಿತಾಂವ್. ಅಶೆ ಸ್ವಭಾವಿಕ್ ಅಮ್ಚಿ ಭಾಗಾ ಅಮಿ ಬರೆ ನೆಸುನ್ ಬರೆ ದಿಸಿ ಸಾರ್ಕೆ ಕರ್ತಾಂವ್;
24 ಖರೆ ಬರೆ ದಿಸ್ತಲ್ಯಾ ಭಾಗಾಕ್ನಿ ನೆಸ್ವುತಲಿ ಗರಜ್ ನಾ. ಖರೆ ದೆವಾನ್ ಕಮಿಚ್ಯಾ ಅಂಗಾಕ್ ಮಾನ್ ದಿ ಸಾರ್ಕೆ ಕರುನ್ ನಿಪ್ವುನ್ ಥವ್ಲಾ.
25 ಅಶೆ ಅಂಗಾತ್ ತಾಂಡೆ ಹೊಯ್‌ನಸ್ತಾನಾ ರ್‍ಹಾವ್ಕ್ ಅನಿ ಭಾಗಾನಿ ಎಕಾಮೆಕಾಚ್ಯಾ ಬರೆಪಾನಾಸಾಟಿ ರಾಬುಕ್ ಮನುನ್ ದೆವಾನ್ ರಚ್ಲ್ಯಾನಾಯ್.
26 ಎಕ್ ಭಾಗಾಕ್ ದುಕ್ತಾ ಹೊಲ್ಯಾರ್;ಸಗ್ಳ್ಯಾ ಭಾಗಾಕ್ನಿಬಿ ದುಕ್ತಾ; ಎಕ್ ಭಾಗಾಕ್ ಮಾನ್ ಗಾವ್ಲ್ಯಾ ಸಗ್ಳ್ಯಾ ಭಾಗಾಕ್ಬಿ ಖುಶಿ ಹೊತಾ.
27 ತುಮಿ ತರ್ ಕ್ರಿಸ್ತಾಚೆ ಆಂಗ್ ಅನಿ ಹರ್ ಎಕ್ಲೊಬಿ ತೆಚೊ ಭಾಗ್.
28 ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾತ್ನಿ ದೆವಾನ್ ನೆಮಲ್ಲೆ ಕೊನ್ ಮಟ್ಲ್ಯಾರ್ ತೆನಿ ಹೆ: ಪೈಲೆಚೆ ಅಪೊಸ್ತಲಾ, ದೊನ್ವೆಚೆ ಪ್ರವಾದಿ, ತಿನ್ವೆಚಿ ಶಿಕ್ವುತಲಿ ಲೊಕಾ; ಹೆಂಚ್ಯಾ ಮಾನಾ ವಿಚಿತ್ರ್ ಕಾಮಾ ಕರ್‍ತಲೆ, ಪಿಡಾ ಗುನ್ ಕರ್‍ತಲೆ, ದುಸ್ರ್ಯಾಂಚಿ ಸೆವಾ ಕರ್‍ತಲೆ, ಅಧಿಕಾರ್ ಚಾಲ್ವುತಲೆ ಅನಿ ದುಸ್ರಿ ದುಸ್ರಿ ಬಾಶಾ ಬೊಲ್ತಲೆ.
29 ತಸೆ ಜಾಲ್ಯಾರ್ ಸಗ್ಳೆ ಜಾನಾಬಿ ಅಪೊಸ್ತಲಾ ಕಾಯ್? ಸಗ್ಳೆ ಜಾನಾಬಿ ಪ್ರವಾದಿ ಕಾಯ್? ಸಗ್ಳೆ ಜಾನಾಬಿ ಶಿಕ್ವುತಲಿ ಲೊಕಾ ಕಾಯ್? ಸಗ್ಳೆ ಜಾನಾಬಿ ವಿಚಿತ್ರ್ ಕಾಮಾ ಕರ್‍ತಲಿ ಲೊಕಾ ಕಾಯ್?
30 ಸಗ್ಳ್ಯಾಕ್ನಿಬಿ ಗುನ್ ಕರ್‍ತಲಿ ತಾಕತ್ ಹಾಯ್ ಕಾಯ್? ಸಗ್ಳೆ ಜಾನಾಬಿ ದುಸ್ರ್ಯಾ ದುಸ್ರ್ಯಾ ಬಾಶಾನಿ ಬೊಲ್ತ್ಯಾತ್ ಕಾಯ್? ಸಗ್ಳೆಬಿ ತೆಚೊ ಅರ್ಥ್ ಸೊಡ್ವುನ್ ಸಾಂಗ್ತಲೊ ಕಾಯ್?
31 ಜಾಲ್ಯಾರ್ಬಿ ಹ್ಯಾ ಸಗ್ಳ್ಯಾ ವರಾಂಚ್ಯಾನ್ಕಿ ಮೊಟೆ ವರು ಘೆವ್ಕ್ ತುಮಿ ರಾಕುನ್ ರ್‍ಹಾವಾ.
ಸಗ್ಳ್ಯಾಂಚ್ಯಾನ್ಕಿ ಬರಿ ವಾಟ್ ಮಿಯಾ ತುಮ್ಕಾ ದಾಕ್ವುತಾ.