ಪೌಲನು ಗಲಾತ್ಯದವರಿಗೆ ಬರೆದ ಪತ್ರಿಕೆ
ಗಾಲಾತ್‌ಕಾರಾಕ್ನಿಪಾವ್ಲುನ್ ಲಿವಲ್ಲಿ ಚಿಟಿ
ವಳಕ್
ಹಿ ಚಿಟಿ ಅಪೊಸ್ತಲ್ ಪಾವ್ಲುನ್ ಗಾಲಾತ್‌ಕಾರಾಕ್ನಿ ಲಿವ್ಲಾ 1:1ಹಿ ಚಿಟ್ ಪಾವ್ಲುನ್ ಗಾಲಾತಾತ್ಲ್ಯಾ ದೆವಾಚ್ಯಾ ತಾಂಡ್ಯಾಕ್ನಿ ಲೈ ಕರುನ್ ಕ್ರಿಸ್ತ್ ಉಪಾಜಲ್ಯಾ ಮಾನಾ ಚಾಳಿಸಾರ್ ಆಟಾಕ್ನಾ ಪನ್ನಾಸಾರ್ ಸತ್ ವರ್ಸಾಂಚ್ಯಾ ಮದ್ದಿ ಲಿವ್ಲಾ. ಗಾಲಾತಾತ್ಲಿ ಲೊಕಾ ರೊಮ್ ಸಾಮ್ರಾಜ್ಯಾಚ್ಯಾ ಗಾಲಾತ್ ಮನುನ್ ಬಲ್ವುತಲ್ಯಾ ಪ್ರಾಂತ್ಯಾತ್ ಜಿವನ್ ಕರಿತ್. ಹಿ ಚಿಟ್ ಲಿವ್ತಾನಾ ಪಾವ್ಲು ಖೈ ಹೊತ್ತೊ ಮನ್ತಲೆ ವಿದ್ವಾಂಸಾಕ್ನಿ ಖಚಿತ್ ಹೊವ್ಕ್ ನಾ. ಖರೆ ಎಫೆಜ್ ಅನಿ ಕೊರಿಂಥ್ ಹ್ಯಾ ದೊನ್ ಶಾರಾತ್ನಿ ತೊ ಹೊತ್ತೊ ಹೊವ್ಕ್ ಫಿರೆ.
ಪಾವ್ಲುನ್ ಹಿ ಚಿಟ್ ಗಾಲಾತಾತ್ಲ್ಯಾ ದೆವಾಚ್ಯಾ ತಾಂಡ್ಯಾತ್ಲ್ಯಾ ಜುದೆವ್ ಅನಿ ಜುದೆವ್ ನ್ಹಯ್ ಹೊತ್ತ್ಯಾ ದೆವಾಚ್ಯಾ ಲೊಕಾಕ್ನಿ ಮನುನ್ ಲಿವ್ಲಾ. ತೊ ಲೈ ಕರುನ್ ದೆವಾಚ್ಯಾ ತಾಂಡ್ಯಾಚಿ ಲೊಕಾ ಜುನ್ನ್ಯಾ ಕರಾರಾಚ್ಯಾ ಜುದೆವಾಂಚ್ಯಾ ಖಾಯ್ದ್ಯಾಂಚ್ಯಾ ಸಾರ್ಕೆ ಚಲುಚೆ, ಲೈ ಕರುನ್ ಸುನ್ನತ್ ಕರ್ಸುನ್ ಘೆವ್ಚೆ ಮನ್ತಲ್ಯಾ ಝುಟ್ಯಾ ಶಿಕಾಪಾಕ್ನಿ ಜವಾಬ್ ಹೊವ್ನ್ ಲಿವ್ಲಾ.
ದೆವಾಚ್ಯಾ ಲೊಕಾಂಚ್ಯಾ ಮದ್ದಿ ಜುದೆವಾಂಚೆ ಮನುನ್ ಬಲ್ವುತಲ್ಯಾ ಜುದೆವ್ ನ್ಹಯ್ ಹೊತ್ತ್ಯಾ ದೆವಾಚ್ಯಾ ಲೊಕಾನಿ ಸುನ್ನತ್ ಕರುನ್ ಘೆವ್ಚೆ ಮನುನ್ ಸಾಂಗ್ತಲೊ ಎಕ್ ತಾಂಡೊ ಹೊತ್ತೊ. ತೆನಿ ಪಾವ್ಲುಚ್ಯಾ, ಅಪೊಲ್ಲೊಚ್ಯಾ ಅಧಿಕಾರಾಚ್ಯಾ ವಿಶಯಾತ್ ಇಚಾರ್ಲ್ಯಾನಿ. ಪಾವ್ಲುನ್ ಅಪ್ಲಿ ಕಾನಿ ಸಾಂಗುನ್ಗೆತ್ ಅಪೊಲ್ಲೊಚ್ಯಾ ವಿಶಯಾತ್ ಜವಾಬ್ 1:11—2:14. ಅನಿ ಜೆಜು ಕ್ರಿಸ್ತಾಕ್ಡೆ ಹೊತ್ತ್ಯಾ ವಿಶ್ವಾಸಾ ವೈನಾ ತವ್ಡೆಚ್ ಸುಟ್ಕಾ ಘೆವ್ಕ್ ಹೊತಾ ಮನ್ತಲೆ ಸಾಂಗುನ್ಗೆತ್, ಬರ್‍ಯಾ ಖಬ್ರೆಚ್ಯಾ ವಿಶಯಾತ್ ಸಮಾ ಕರುನ್ ಜವಾಬ್ ದಿಲ್ಯಾನ್.2:16. ಹೆ ಮಾನ್ಸಾನಿ ನ್ಹಯ್, ದೆವಾನ್ ದಾಕ್ವುತಲ್ಯಾ ದಯೆಚೊ ಎಕ್ ಪ್ರತಿಫಳ್ ಹೊವ್ನ್ ಹಾಯ್.
ಭಾಗ್
1. ಪಾವ್ಲುನ್ ಗಾಲಾತಾತ್ಲ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ನಿ ನಮಸ್ಕಾರ್ ಕರುನ್ಗೆತ್ ಚಿಟ್ ಶುರು ಕರ್‍ಲಾ 1:1-5.
2. ಪಾವ್ಲುನ್ ಅಪ್ನಿ ಖಾಯ್ದ್ಯಾಂಚ್ಯಾ ಸಾರ್ಕೆ ಜಿವನ್ ಕರುಕ್ ಕಟ್ಪಟ್ ಕರ್‍ಲ್ಯಾನ್ ಖರೆ ತೆ ಫಾಯ್ದ್ಯಾಕ್ ಪಡುಕ್ನಾ ಮನ್ತಲೆ ಸಾಂಗುಸಾಟ್ನಿ ಅನಿ ಶಿಕ್ವುಸಾಟ್ನಿ ಅಪ್ಲ್ಯಾ ಜಿವನಾಚಿ ಉಲ್ಲಿ ಘಡಿತಾ ಸೊಡ್ಸುನ್ ಸಾಂಗ್ಲಾ 1:6—2:21
3. ಮಾನಾ ತೆನಿ ಖಾಯ್ದ್ಯಾಂಚೊ ಪಾತ್ರ್ ಅನಿ ಸುಟ್ಕೆಚ್ಯಾ ಕುರ್ಪೆಚ್ಯಾ ವಿಶಯಾತ್ ಸೊಡ್ಸುನ್ ಸಾಂಗ್ಲಾ 3:4
4. ಮಾನಾ ತೊ ಬರೆ ಕ್ರಿಸ್ತಾಚೆ ಜಿವನ್ ಕರುಕ್ ಉಲ್ಲಿ ಸಾಮಾನ್ಯಾ ಸುಚನಾ ದಿತಾ.
5. ಸುನ್ನತ್ ಕರುನ್ ಘೆತಲ್ಯಾ ಭಾಯ್ಲ್ಯಾ ನೆಮಾಚ್ಯಾಕ್ಕಿಂತಾ ಎಕ್ ನ್ಹವ್ಯಾ ಮಾನ್ಸಾಕ್ಡೆ ದೆವಾನ್ ಹಾನಲ್ಯಾ ಬದಲಾವನೆಕ್ನಿ ಯಾದ್ ಥವ್ನ್ ಘೆಯ್ ಸಾರ್ಕೆ ಮಾಗುನ್ಗೆತಾ ಅನಿ ನಮಸ್ಕಾರ್ ಸಾಂಗುನ್ಗೆತ್ ಪಾವ್ಲು ಅಪ್ಲಿ ಚಿಟ್ ಮುಗಸ್ತಾ 6:11-18.
1
1 ಮಿಯಾ ಪಾವ್ಲು, ಅಪೊಸ್ತಲ್ ಹೊವ್ಕ್ ಬಲ್ವಲ್ಲೊ, ಮಾನ್ಸಾನಿ ಧಾಡಲ್ಲೊ ನ್ಹಯ್, ನಾಹೊಲ್ಯಾರ್ ಖಲ್ಯಾಬಿ ಮಾನ್ಸಾನ್ ಎಚುನ್ ಕಾಡಲ್ಲೊ ನ್ಹಯ್, ಖರೆ ಜೆಜು ಕ್ರಿಸ್ತಾನ್ ಅನಿ ತೆಕಾ ಮರ್‍ನಾತ್ನಾ ಝಿತ್ತೊ ಕರುನ್ ಉಟ್ವಲ್ಲ್ಯಾ ದೆವ್ ಬಾಬಾನ್ ನೆಮಲ್ಲ್ಯಾ ಅಪೊಸ್ತಲ್ ಪಾವ್ಲುನ್.
2 ಅನಿ ಮಾಜ್ಯಾ ವಾಂಗ್ಡಾ ಹೊತ್ತ್ಯಾ ಸಗ್ಳ್ಯಾ ಭಾವಾನಿ ಅನಿ ಭೆನಿಯಾನಿ ಗಾಲಾತ್ ಮನ್ತಲ್ಯಾ ಪ್ರಾಂತ್ಯಾತ್ಲ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ನಿ ಲಿವ್ತಲೆ:
3 ಬಾಬಾ ದೆವಾಕ್ನಾ ಅನಿ ಜೆಜು ಕ್ರಿಸ್ತಾಕ್ನಾ ತುಮ್ಕಾ ಕುರ್ಪಾ ಅನಿ ಶಾಂತಿ ಗಾಂವ್ದಿತ್.
4 ಅಮ್ಚ್ಯಾ ದೆವಾಚ್ಯಾ ಅನಿ ಬಾಬಾಚ್ಯಾ ಇಚ್ಛ್ಯಾ ಸಾರ್ಕೆ ಹ್ಯಾ ಬುರ್ಶ್ಯಾ ಕಾಲಾತ್ನಾ ಅಮ್ಕಾ ಸ್ವತಂತ್ರ್ ಕರುಸಾಟ್ನಿ ಕ್ರಿಸ್ತಾನ್ ಅಮ್ಚ್ಯಾ ಪಾಪಾಚ್ಯಾಸಾಟ್ನಿ ಅಪ್ನಾಕುಚ್ ಒಪ್ಸುನ್ ದಿಲ್ಯಾನ್.
5 ತ್ಯಾ ದೆವಾಕ್ ಸದಾಸರ್ವತಾಕ್ ಮಹಿಮಾ ಹೊಂವ್ದಿತ್ ಆಮೆನ್!
ಎಕ್ ಬರಿ ಖಬರ್
6 ಕ್ರಿಸ್ತಾಚ್ಯಾ ದಯೆನ್ ತುಮ್ಕಾ ಬಲ್ವಲ್ಲ್ಯಾ ಬಾಬಾಕ್ ಎವ್ಡ್ಯಾ ಲಗ್ಗುನಾ ಸೊಡುನ್, ದುಸ್ರ್ಯಾ ಬರ್‍ಯಾ ಖಬ್ರಿಚ್ಯಾ ಫಾಟ್ನಾ ತುಮಿ ಜಾತಲೆ ಬಗುನ್ ಮಾಕಾ ಆಜಾಪ್ ಹೊತಾ.
7 ಖರೆ ಮಟ್ಲ್ಯಾರ್ ದುಸ್ರಿ ಬರಿ ಖಬರ್ ನಾ, ಖರೆ ಉಲ್ಲಿ ಲೊಕಾ ತುಮ್ಕಾ ಗೊಂದಳಾತ್ ಘಾಲುಕ್ ಲಾಗ್ಲಾತ್ ಅನಿ ಕ್ರಿಸ್ತಾಚಿ ಬರಿ ಖಬರ್ ಬದ್ಲುಕ್ ಕಟ್ಪಟ್ ಕರುಕ್ ಲಾಗ್ಲಾತ್.
8 ಖರೆ ಅಮಿಚ್ ಹೊಂವ್ದಿತ್, ನಾಹೊಲ್ಯಾರ್ ಸರ್‍ಗಾ ವೈನಾ ಯೆಲ್ಲ್ಯಾ ದೆವ್ ದುತಾನ್ ಹೊಂವ್ದಿತ್, ಅಮಿ ತುಮ್ಕಾ ಸಾಂಗಲ್ಲಿ ಬರಿ ಖಬರ್ ಸೊಡುನ್, ಕೊನ್‍ಬಿ ದುಸ್ರಿ ಎಕ್ ಖಬರ್ ಸಾಂಗ್ತಾತ್ ಹೊಲ್ಯಾರ್ ತೆಚ್ಯಾ ವೈರ್ ಸರಾಪ್ ಪಡುಂದಿತ್.
9 ಅತ್ತಾ ಸಾಂಗಲ್ಲ್ಯಾ ಸಾರ್ಕೆ ಅನಿಪರ್ತುನ್ ಮಿಯಾ ತುಮ್ಕಾ ಸಾಂಗ್ತಾ: ತುಮಿ ಮಾನುನ್ ಘೆಟಲ್ಲಿ ಬರಿ ಖಬರ್ ಸೊಡುನ್, ಕೊನ್‍ಬಿ ಅನಿಎಕ್ ದುಸ್ರಿ ಖಬರ್ ಸಾಂಗ್ತಾ ಹೊಲ್ಯಾರ್, ತೆಂಚ್ಯಾ ವರ್‍ತಿ ಸರಾಪ್ ಪಡುಂದಿತ್.
10 ತಸೆ ಜಾಲ್ಯಾರ್ ಅತ್ತಾ, ಕೊನಾಕ್ ಮಿಯಾ ಹೆ ಬರೆ ದಿಸಿ ಸಾರ್ಕೆ ಕರುಕ್ ಲಾಗ್ಲಾ ಮನುನ್ ತುಮ್ಕಾ ದಿಸ್ತಾ ಮಾನ್ಸಾಕ್ ಕಾಯ್ ದೆವಾಕ್?
ಮಿಯಾ ಮಾನ್ಸಾಂಚ್ಯಾಕ್ನಾ ಹೊಗ್ಳುನ್ ಘೆವ್ಚೆ ಮನುನ್ ತುಮಿ ಚಿಂತಲ್ಲ್ಯಾಸಿ ಕಾಯ್? ಅನಿಬಿ ಮಿಯಾ ಮಾನ್ಸಾಂಚ್ಯಾಕ್ನಾ ಹೊಗ್ಳುನ್ ಘೆವ್ಚೆ ಹೊಲ್ಯಾರ್ ಮಿಯಾ ಕ್ರಿಸ್ತಾಚೊ ಸೆವಕ್ ನ್ಹಯ್.
ಪಾವ್ಲು ಕಸೊ ಅಪೊಸ್ತಲ್ ಹೊಲೊ.
11 ಭಾವಾನು ಅನಿ ಭೆನಿಯಾನು, ಮಿಯಾ ತುಮ್ಕಾ ಸಾಂಗಲ್ಲಿ ಬರಿ ಖಬರ್ ಮಾನ್ಸಾಕ್ನಾ ಯೆಲ್ಲಿ ನ್ಹಯ್, ಹೆ ತುಮ್ಕಾ ಗೊತ್ತ್ ರ್‍ಹಾಂವ್ದಿತ್.
12 ಖಲ್ಯಾಬಿ ಮಾನ್ಸಾಕ್ನಾ ಮಿಯಾ ತಿ ಘೆವ್ಕ್ ನಾ, ನಾಹೊಲ್ಯಾರ್ ಕೊನ್‍ಬಿ ತಿ ಮಾಕಾ ಶಿಕ್ವುಕ್ ನಾ, ಖರೆ ಮಾಕಾ ತಿ ಪರ್ಗಟ್ ಹೊಲ್ಲಿ ಜೆಜು ಕ್ರಿಸ್ತಾಕ್ನಾಚ್.
13 ಮಿಯಾ ಅದ್ದಿ ಜುದೆವಾಂಚೊ ಹೊವ್ನ್ ಹೊತ್ತ್ಯಾ ತನ್ನಾ, ಮಾಜಿ ಚಲ್ನುಕ್ ಕಸ್ಲಿ ಹೊತ್ತಿ ಮನುನ್ ತುಮಿ ಆಯಿಕ್ಲ್ಯಾಶಿ ತವ್ಡೆಚ್, ಮಿಯಾ ದೆವಾಚ್ಯಾ ತಾಂಡ್ಯಾಂಚ್ಯಾ ಲೊಕಾಕ್ನಿ ಲೈ ತರಾಸ್ ದಿವ್ನ್ ನಾಸ್ ಕರುನ್ಗೆತ್ ಹೊತ್ತೊ.
14 ಜುದೆವಾಂಚ್ಯಾ ಲೊಕಾತ್ನಿ ದೆವ್ ಧರ್ಮಾಚ್ಯಾ ಕಾಮಾತ್ ಫಿಡೆ ಹೊತ್ತೊ, ಅನಿ ಅಮ್ಚ್ಯಾ ವಾಡ್ ವಡ್ಲಾಂಚಿ ಪದ್ದತ್ ಲೈ ಹುರ್ಪೆನ್ ಮಿಯಾ ಪಾಳುನ್ಗೆತ್ ಹೊತ್ತೊ.
15 ಖರೆ ದೆವಾನ್ ಅಪ್ನಾಚ್ಯಾ ಕುರ್ಪೆನ್ ಮಾಕಾ ಅದ್ದಿಚ್ ಮಿಯಾ ಬಾಯ್ಚ್ಯಾ ಪೊಟಾತ್ ರ್‍ಹಾತಾನಾಚ್ ಮಾಕಾ ಎಚುನ್ ಕಾಡ್ಲ್ಯಾನ್ ಅನಿ ಅಪ್ನಾಚಿ ಸೆವಾ ಕರುಕ್ ಮಾಕಾ ಬಲ್ವುಲ್ಯಾನ್, ಅನಿ ತೆನಿ ನಿರ್ಧಾರ್ ಕರ್‍ಲ್ಯಾನ್,
16 ಅಪ್ನಾಚ್ಯಾ ಲೆಕಾಕ್ ಮಾಕಾ ದಾಕ್ವುಚೆ ಮನುನ್. ತೆಚ್ಯಾ ವಿಶಯಾತ್ಲಿ ಬರಿ ಖಬರ್; ಮಿಯಾ ಜುದೆವ್ ನ್ಹಯ್ ಹೊತ್ತ್ಯಾ ಲೊಕಾಕ್ನಿ ಸಾಂಗುಕ್ ಪಾಜೆ ಮನುನ್ ದೆವಾನ್ ಮಾಕಾ ಅದ್ದಿಚ್ ಎಚುನ್ ಕಾಡಲ್ಲ್ಯಾನ್, ತನ್ನಾ ಖಲ್ಯಾಬಿ ಮಾನ್ಸಾಕ್ನಾ ಮಿಯಾ ಸಲಹಾ ಘೆವ್ಕ್ ನಾ.
17 ನಾಹೊಲ್ಯಾರ್ ಮಾಜ್ಯಾನ್ಕಿ ಅದ್ದಿ ಅಪೊಸ್ತಲ್ ಹೊಲ್ಲೆ ಹೊತ್ತ್ಯಾಕ್ನಿ ಭೆಟುಕ್ ಜೆರುಜಲೆಮಾಕ್ ಮಿಯಾ ಜಾವ್ಕ್ ನಾ. ಖರೆ ಮಿಯಾ ಅರೆಬಿಯಾ ಮನ್ತಲ್ಯಾ ದೆಶಾಕ್ ಗೆಲೊ ಅನಿ ಮಾನಾ ದಮಸ್ಕಾ ಶಾರಾಕ್ ಪರ್ತುನ್ ಗೆಲೊ.
18 ಮಾನಾ ತಿನ್ ವರ್ಸಾಚ್ಯಾ ಮಾನಾ ಕೆಫಾಸಾಕ್ ಭೆಟುಕ್ ಜೆರುಜಲೆಮಾಕ್ ಗೆಲೊ ಅನಿ ಪಂದ್ರಾ ದಿಸ್ ಥೈ ರ್‍ಹಾಲೊ.
19 ಥೈ ಧನಿಯಾಚೊ ಭಾವ್ ಜಾಕೊಬಾಕ್ ಸೊಡುನ್ ದುಸ್ರೊ ಖಲೊಬಿ ಅಪೊಸ್ತಲ್ ಮಾಕಾ ಬಗುಕ್ ಗಾವುಕ್ ನಾ.
20 ಮಿಯಾ ಕಾಯ್ ಲಿವ್ಲಾ ತೆ ಖರೆ ಹಾಯ್, ಅನಿ ಮಿಯಾ ಝುಟೆ ಬೊಲಿನಾ ಹೊಲಾ ಮನುನ್ ದೆವಾಕ್ ಗೊತ್ತ್ ಹಾಯ್.
21 ತೆಚ್ಯಾ ಮಾನಾ ಮಿಯಾ ಸಿರಿಯಾ ದೆಶಾಚ್ಯಾ ಪ್ರಾಂತ್ಯಾಕ್ನಿ ಅನಿ ಸಿಲಿಸಿಯಾಕ್ ಗೆಲೊ.
22 ತ್ಯಾ ಎಳಾರ್ ಕ್ರಿಸ್ತಾಚ್ಯಾ ವೈನಾ ಜುದೆಯಾಚ್ಯಾ ಪ್ರಾಂತ್ರ್ಯಾತ್ಲ್ಯಾ ಲೊಕಾಕ್ನಿ ಮಾಜಿ ವಳಕ್ ನತ್ತಿ.
23 ಖರೆ , “ಅಮ್ಕಾ ತರಾಸ್ ದಿತಲೊ ಮಾನುಸ್, ಎಕ್ ಎಳಾರ್ ನಾಸ್ ಕರುಚೆ ಮನುನ್ ಘೆವ್ನ್ ಹೊತ್ತ್ಯಾ ವಿಶ್ವಾಸಾಚ್ಯಾ ವಿಶಯಾತುಚ್ ಪರ್‍ಚಾರ್ ಕರುಕ್ ಲಾಗ್ಲಾ ಮನ್ತಲೆ ತೆನಿ ಆಯಿಕಲ್ಲ್ಯಾನಿ”.
24 ತಸೆ ಮನುನ್ ಮಾಜ್ಯಾಸಾಟ್ನಿ ದೆವಾಕ್ ತೆನಿ ಹೊಗ್ಳಾಪ್ ಕರ್‍ಲ್ಯಾನಿ.