ಪೌಲನು ಥೆಸಲೋನಿಕದವರಿಗೆ ಬರೆದ ಮೊದಲನೆಯ ಪತ್ರಿಕೆ
ಥೆಸಾಲೊನಿಕಾಕಾರಾಕ್ನಿಪಾವ್ಲುನ್ ಲಿವಲ್ಲಿ ಪಯ್ಲೆಚಿ ಚಿಟಿ
ವಳಕ್
ಥೆಸಾಲೊನಿಕಾಕಾರಾಕ್ನಿ ಲಿವಲ್ಲಿ ಪಯ್ಲಿಚಿ ಚಿಟಿ ಅಪೊಸ್ತಲ್ ಪಾವ್ಲುನ್ ಲಿವಲ್ಲ್ಯಾ 1:1ಹಿ ಪಾವ್ಲುನ್ ಲಿವಲ್ಲಿ ಪಯ್ಲಿಚಿ ಚಿಟಿ ರ್‍ಹಾವ್ಕ್ ಫಿರೆ ಅನಿ ಹಿ ಜೆಜು ಉಪಾಜಲ್ಲ್ಯಾ ಮಾನಾ ಪನ್ನಾಸಾರ್-ಎಕ್ ವರ್ಸಾ ಹೊಲ್ಲ್ಯಾ ಮಾನಾ ಲಿವಲ್ಲೆ ಹಾಯ್. ಥೆಸ್ಸಾಲೊನಿಕ್ಲ್ಯಾತ್ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ಹಿ ಚಿಟಿ ಲಿವ್ತಾನಾ ಪಾವ್ಲು ಕೊರಿಂಥ್ ಮನ್ತ್ಯಾಲಾ ಗಾಂವಾತ್ ಹೊತ್ತೊ, ಹ್ಯೊ ದೆವಾಚ್ಯಾ ಲೊಕಾಂಚ್ಯಾ ತಾಂಡೊ ತೆನಿ ಅಪ್ನಾಚ್ಯಾ ದೊನ್ವಿಚ್ಯಾ ಬರಿ ಖಬರ್ ಸಾಂಗುಕ್ ಜಾತಲ್ಲ್ಯಾ ದೊನ್ವಿ ಪ್ರಯಾನಾಚ್ಯಾ ಎಳಾರ್ ಬಾಂದ್ಲ್ಯಾನಾಯ್ ಅ.ಕಾ 17:1-10, ಅಪೊಸ್ತಲಾಂಚಿ ಕೃತ್ಯಾ ಪುಸ್ತಕ್ ಮನ್ತ್ಯಾತ್ ಹ್ಯೊ ದೆವಾಚ್ಯಾ ಲೊಕಾಂಚೊ ತಾಂಡೊ ಉಲ್ಲಿ ಜುದೆವ್ ಅನಿ ಸುಮಾರ್ ಗ್ರಿಕ್ ಲೊಕಾನ್ಕಿ ಮಿಳ್ವುನ್ ಕರಲೊ ಹೊತ್ತೊ.
ದೆವಾಚ್ಯಾ ಲೊಕಾಂಚೊ ತಾಂಡೊ ಬಾಂದ್ಲ್ಯಾ ಮಾನಾ ಪಾವ್ಲುಕ್ ಥೆಸ್ಸಲೊನಿಕ್ನಾತ್ ರ್‍ಹಾವ್ಕ್ ಹೊವ್ಕ್ ನಾ ತೆಚ್ಯಾ ಸಾಟ್ನಿ ತ್ಯಾ ವಿಶ್ವಾಸಾತ್ ಹೊತ್ತ್ಯಾ ಲೊಕಾಕ್ನಿ ಉಮ್ಮೆದ್ ದಿವ್ ಸಾಟ್ನಿ ಮಾನಾ ತೊ ಹಿ ಚಿಟಿ ಧಾಡುನ್ ದಿತಾ. ಹ್ಯಾ ಚಿಟಿತ್ ಕ್ರಿಸ್ತಾಂವ್ ಲೊಕಾನಿ ಕಶೆ ಜಿವನ್ ಕರುಕ್ ಪಾಜೆ ಮನ್ತಲ್ಯಾ ವಿಶಯಾತ್ ಸುಮಾರ್ ರಿತಿಚಿ ಸುಚನಾ ಅನಿ ಗೊಸ್ಟಿಯಾ ಹಾತ್. ಪಾವ್ಲು ಉಲ್ಲೆಸೆ ಕ್ರಿಸ್ತಾಚ್ಯಾ ದೊನ್ವೆಚ್ಯಾ ಯೆನ್ಯಾಚ್ಯಾ ವಿಶಯಾತ್ ಧ್ಯಾನ್ ದಿತಾ. ಕಶ್ಯಾಕ್ ಮಟ್ಲ್ಯಾರ್, ಥೆಸ್ಸಲೊನಿಕಾತ್ಲೆ ದೆವಾಚೆ ಲೊಕಾಂಚ್ಯಾ ತಾಂಡ್ಯಾಚ್ಯಾ ಲೊಕಾನಿ ಹ್ಯಾ ವಿಶಯಾಚ್ಯಾ ವರ್‍ತಿ ಲೈ ಉಮ್ಮೆದ್ ಹೊತ್ತಿ. ಕ್ರಿಸ್ತಾಚ್ಯಾ ದೊನ್ವಿಚೆ ಯೆನೆ ದೆವಾಕ್ ಬರ್ಯಾ ದಿಸ್ತಲೆ ಜಿವನ್ ಕರ್ತಾಲ್ಯಾಕ್ ಪ್ರೆರನ್ ಕರುಕ್ ಪಾವ್ಲು, ವಾಪರ್‍ತಾ 5:6-8
ಭಾಗ್
1: ಪಾವ್ಲು ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ನಮಸ್ಕಾರ್ ಕರುನ್ ಘೆತ್ ಅನಿ ತೆಂಚ್ಯಾ ಸಾಟ್ನಿ ದೆವಾಕ್ ಧನ್ಯವಾದ್ ದಿವ್ನ್ ಘೆತ್ ಹಿ ಚಿಟಿ ಚಾಲು ಕರ್‍ತಾ 1.
2: ಮಾನಾ ತೊ ಅಪ್ನಾಚ್ಯಾ ಕಾಮಾಚ್ಯಾ ವಿಶಯಾತ್ ಅನಿ ತಿಮೊತಿನ್ ಘೆವ್ನ್ ಯೆಲ್ಲ್ಯಾ ಖಬ್ರೆಚ್ಯಾ ವಿಶಯಾತ್ ಸೊಡ್ಸುನ್ ಸಾಂಗ್ತಾ 2 ಅನಿ 3
3: ಹೆಚ್ಯಾ ಮಾನಾ ಪಾವ್ಲು ಕ್ರಿಸ್ತಾಂವ್ ಲೊಕಾ ಜೆಜುಚ್ಯಾ ದೊನ್ವಿಚ್ಯಾ ಯೆನ್ಯಾಚ್ಯಾ ವಿಶಯಾತ್ ಉಜ್ವೊಡಾತ್ ಕಶೆ ಜಿವನ್ ಕರುಚೆ ಮನುನ್ ಸುಚನ್ ದಿತಾ 4:1–5:15
4: ಪಾವ್ಲು ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ನಮಸ್ಕಾರ್ ಸಾಂಗಿತ್ ಅನಿ ತಾಂಡ್ಯಾತ್ಲ್ಯಾ ಹರ್ ಎಕ್ಲ್ಯಾನಿ ಹಿ ಚಿಟಿ ವಾಚ್ವುಕುಚ್ ಪಾಜೆ ಮನ್ತ್ಯಾಲೆ ತೆಕಾ ಕಳ್ವುನ್ ಚಿಟಿ ಮುಗಸ್ತಾ 5:16-28
1
1 ಮಿಯಾ ಪಾವ್ಲು, ಸಿಲಾಸ್ ಅನಿ ತಿಮೊತಿ, ದೆವಾ ಬಾಬಾಕ್ ಅನಿ ಧನಿಯಾ ಜೆಜು ಕ್ರಿಸ್ತಾಕ್ ಸಮಂದ್‍ ಪಡಲ್ಲ್ಯಾ ಥೆಸಾಲೊನಿಕಾ ಮನ್ತಲ್ಯಾ ಗಾಂವಾತ್ಲ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ಲಿವ್ತಲೆ ಕಾಯ್ ಮಟ್ಲ್ಯಾರ್. ತುಮ್ಕಾ ಕುರ್ಪಾ ಅನಿ ಶಾಂತಿ ಗಾವುಂದಿತ್.
ಥೆಸಾಲೊನಿಕಾಕಾರಾಂಚೆ ಜಿವನ್ ಅನಿ ವಿಶ್ವಾಸ್
2 ಅಮಿ ಕನ್ನಾಬಿ ತುಮ್ಚ್ಯಾಸಾಟ್ನಿ ದೆವಾಕ್ ಧನ್ಯವಾದ್ ದಿತಾಂವ್ ಅನಿ ತುಮ್ಚ್ಯಾಸಾಟ್ನಿ ಮಾಗ್ನಿ ಕರ್‍ತಾವ್.
3 ತುಮ್ಚೊ ವಿಶ್ವಾಸ್ ತುಮಿ ಕಸೊ ಸಂಬಾಳುಲ್ಯಾಸಿ, ಕಸೊ ತುಮ್ಚೊ ಪ್ರೆಮ್ ತುಮಿ ಕಸ್ಟಾನಿ ಕಾಮ್ ಕರಿಸರ್ಕೆ ಕರ್‍ತಾ, ಅನಿ ಅಮ್ಚ್ಯಾ ಧನಿಯಾ ಜೆಜು ಕ್ರಿಸ್ತಾ ವರ್‍ತಿ ಹೊತ್ತೊ ತುಮ್ಚೊ ಬರೊಸೊ ಕವ್ಡೊ ಘಟ್ ಮನ್ತಲೆ; ಅಮಿ ಅಮ್ಚ್ಯಾ ದೆವಾ ಬಾಬಾಚ್ಯಾ ಇದ್ರಾಕ್ ಯಾದ್ ಕರುನ್ಗೆತ್ ತುಮ್ಚ್ಯಾಸಾಟ್ನಿ ದೆವಾಕ್ ಧನ್ಯವಾದ್ ದಿತಾಂವ್.
4 ಅಮ್ಚ್ಯಾ ಭಾವಾನು ಅನಿ ಭೆನಿಯಾನು, ದೆವ್ ತುಮ್ಚೊ ಪ್ರೆಮ್ ಕರ್‍ತಾ ಅನಿ ಅಪ್ನಾಚಿ ಸ್ವತಾಚಿ ಲೊಕಾ ಮನುನ್ ತುಮ್ಕಾ ತೆನಿ ಎಚುನ್ ಕಾಡ್ಲ್ಯಾನಾಯ್, ಹೆ ಅಮ್ಕಾ ಗೊತ್ತ್ ಹಾಯ್.
5 ಕಶ್ಯಾಕ್ ಮಟ್ಲ್ಯಾರ್, ಅಮಿ ತುಮ್ಚ್ಯಾಕ್ಡೆ ಘೆವ್ನ್ ಯೆಲ್ಲಿ ಬರಿ ಖಬರ್ ಫಕತ್ ಗೊಸ್ಟಿಯಾನಿ ಎವ್ಡೆಚ್ ನ್ಹಯ್, ಬಳಾನ್, ಅನಿ ಪವಿತ್ರ್ ಆತ್ಮ್ಯಾನ್ ಭರಲ್ಲಿ ಹೊತ್ತಿ, ಅನಿ ತ್ಯಾತುರ್ ಹೊತ್ತ್ಯಾ ಖರೆಪಾನಾಚ್ಯಾ ಸಮೆತ್ ಅಮಿ ಘೆವ್ನ್ ಯೆಲ್ಲಾಂವ್. ತುಮ್ಚ್ಯಾ ವಾಂಗ್ಡಾ ಹೊತ್ತ್ಯಾ ತನ್ನಾ ಅಮಿ ಕಶೆ ಹೊತ್ತಾಂವ್ ಮನುನ್ ತುಮ್ಕಾಚ್ ಗೊತ್ತ್ ಹಾಯ್;
6 ತುಮಿ ಅಮ್ಚ್ಯಾ ಅನಿ ಧನಿಯಾಚ್ಯಾ ಸರ್ಕೆಚ್ ಚಲ್ಲ್ಯಾಸಿ, ಅನಿ ತುಮ್ಕಾ ತರಾಸ್ ರ್‍ಹಾಲ್ಯಾರ್‍ಬಿ ಪವಿತ್ರ್ ಆತ್ಮ್ಯಾನ್ ದಿಲ್ಲ್ಯಾ ಕುಶಿನ್ ಅಮಿ ದಿಲ್ಲಿ ಬರಿ ಖಬರ್ ಘೆಟ್ಲ್ಯಾಶಿ.
7 ಅಶೆ ತುಮಿ ಮೆಸಿದೊನಿಯಾತ್ಲ್ಯಾ ಅನಿ ಅಖಾಯಿಯಾತ್ಲ್ಯಾ ಜೆಜು ಕ್ರಿಸ್ತಾಚ್ಯಾ ವರ್‍ತಿ ವಿಶ್ವಾಸ್ ಥವಲ್ಲ್ಯಾ ಸಗ್ಳ್ಯಾ ಲೊಕಾತ್ನಿ ಎಕ್ ಉದಾರನ್ ಹೊವ್ನ್ ಹಾಸಿ.
8 ಧನಿಯಾಚ್ಯಾ ವಿಶಯಾತ್ಲಿ ಬರಿ ಖಬರ್ ತುಮ್ಚ್ಯಾ ವೈನಾ ಸಗ್ಳ್ಯಾ ಮೆಸಿದೊನಿಯಾತ್ ಅನಿ ಅಖಾಯಿಯಾತ್ ಪರ್ಗಟ್ ಹೊಲ್ಲೆ ತವ್ಡೆಚ್ ನ್ಹಯ್, ದೆವಾ ವರ್‍ತಿ ತುಮಿ ಥವಲ್ಲ್ಯಾ ವಿಶ್ವಾಸಾಚಿ ಖಬರ್ ಸೈತ್ ಸಗ್ಳ್ಯಾಕ್ಡೆ ಜಾವ್ನ್ ಪಾವ್ಲಾ, ಹೆಚ್ಯಾ ವಿಶಯಾತ್ ಅಮಿ ಅನಿ ಕಾಯ್ ಜಾಸ್ತಿಚೆ ಸಾಂಗುಚೆ ಮನುನ್ ನಾ.
9 ತಿ ಸಗ್ಳಿ ಲೊಕಾ, ಅಮಿ ತುಮ್ಚೆಕ್ಡೆ ಯೆಲ್ಲ್ಯಾ ತನ್ನಾ ತುಮಿ ಕಶೆ ಅಮ್ಕಾ ಸ್ವಿಕಾರ್ ಕರ್ಲ್ಯಾಸಿ, ಅನಿ ಮುರ್ತಿಚ್ಯಾ ಪುಜ್ಯಾತ್ನಾ ಖರ್‍ಯಾ ಝಿತ್ತ್ಯಾ ದೆವಾಚಿ ಸೆವಾ ಕರುಕ್ ದೆವಾಕ್ಡೆ ಕಶೆ ಪರತ್ಲ್ಯಾಶಿ ಮನುನ್ ಅಪ್ನಿಚ್ ಸಾಂಗುಕ್ ಲಾಗಲ್ಲಿ ಹಾತ್.
10 ಅನಿ ತ್ಯಾ ದೆವಾಚೊ ಲೆಕ್ ಸರ್‍ಗಾ ವೈನಾ ಯೆತಲಿ ವಾಟ್ ಬಗುನ್ಗೆತ್ ಹಾಸಿ, ತೆಚೊ ಲೆಕ್ ಜೆಜು ಕ್ರಿಸ್ತ್, ತೆಕಾ ತೆನಿ ಮರಲ್ಲ್ಯಾತ್ನಾ ಝಿತ್ತೊ ಕರುನ್ ಉಟ್ವುಲ್ಯಾನಾಯ್, ಅನಿ ತೊ ಅಮ್ಕಾ ದೆವಾಚ್ಯಾ ರಾಗಾತ್ನಾ ಬಚಾವ್ ಕರುಕ್ ಯೆವ್ಕ್ ಲಾಗ್ಲಾ ಮನ್ತಲ್ಯಾ ವಿಶಯಾತ್ ಬೊಲ್ತ್ಯಾತ್.