ಮಾರ್ಕನು ಬರೆದ ಸುವಾರ್ತೆ
ಮಾರ್ಕಾನ್ ಜೆಜು ಕ್ರಿಸ್ತಾಚ್ಯಾ ವಿಶಯಾತ್ ಲಿವಲ್ಲಿ ಬರಿ ಖಬರ್
ವಳಕ್
ಮಾರ್ಕಾನ್ ಜೆಜು ಕ್ರಿಸ್ತಾಚ್ಯಾ ವಿಶಯಾತ್ ಲಿವಲ್ಲಿ ಬರಿ ಖಬರ್ ದೆವಾಚ್ಯಾ ಲೆಕಾಚಿ ಜೆಜು ಕ್ರಿಸ್ತಾಚಿ ಬರಿ ಖಬರ್ ಮನ್ತಲ್ಯಾ ಗೊಸ್ಟಿವೈನಾ ಚಾಲು ಹೊತಾ. ಜೆಜು ಎಕ್ ಕಾಮ್ ಕರುನ್ ದಾಕ್ವುತಲೊ ಅನಿ ಅದಿಕಾರ್ ಹೊತ್ತೊ ಮಾನುಸ್ ಮನುನ್ ಹಿ ಬರಿ ಖಬರ್ ದಾಕ್ವುನ್ ದಿತಾ. ತೆನಿ ಶಿಕ್ವುತಲ್ಯಾತ್, ಗಿರ್‍ಯಾಂಚ್ಯಾ ವರ್ತಿ ತೆಕಾ ಹೊತ್ತ್ಯಾ ಅದಿಕಾರಾತ್, ಅನಿ ಲೊಕಾಂಚಿ ಪಾಪಾ ಮಾಪ್ ಕರ್‍ತಲ್ಯಾತ್, ತೆಚೊ ಅದಿಕಾರ್ ಕಸ್ಲೊ ಮನುನ್ ದಿಸುನ್ ಯೆತಾ. ಜೆಜು ಅಪ್ನಾಕುಚ್,ಅಪ್ನಾಚೊ ಜಿವ್ ದಿವ್ನ್, ಲೊಕಾಕ್ನಿ ತೆಂಚ್ಯಾ ಪಾಪಾನಿತ್ನಾ ಸ್ವತಂತ್ರ್ ಕರುಕ್ ಯೆಲ್ಲೊ, “ಮಾನ್ಸಾಚೊ ಲೆಕ್” ಮನುನ್ ಘೆತಾ.
ಹ್ಯಾತುರ್, ಮಾರ್ಕ್ ಜೆಜುಚ್ಯಾ ಬೊಲ್ನ್ಯಾ, ಅನಿ ಶಿಕ್ವುತಲ್ಯಾಚ್ಯಾನ್ಕಿ, ಜೆಜುನ್ ಕಾಯ್-ಕಾಯ್ ಕಾಮಾ ಕರ್ಲ್ಯಾನ್ ಮನ್ತಲ್ಯಾಕ್ ಲೈ ಒತ್ತ್ ದಿತಾ. ಅನಿ ತೆ, ಎಗ್ದಮ್ ಬರೆ ಕರುನ್, ಕಾಯ್ಬಿ ಧಾಪುನ್ ಥೈ ನಸ್ತಾನಾ, ಕಶೆ ಹಾಯ್ ತಸೆಚ್ ದಾಕ್ವುನ್ ದಿತಾ. ಜುವಾಂವ್ ಬಾವ್ತಿಸಾಚ್ಯಾ ವಿಶಯಾತ್,ಅನಿ ಬಾಲ್ತಿಮಾಚ್ಯಾ ವಿಶಯಾತ್, ಅನಿ ಜೆಜುಕ್ ನಾಡ್ತಲ್ಯಾ ವಿಶಯಾತ್, ಎಕ್ ಉಲ್ಲೆಸೆ ಸಾಂಗುನ್ ಹೊಲ್ಲ್ಯಾ ಮಾನಾ, ಲಿವ್ತಲೊ, ಎಗ್ದಮ್, ಜೆಜುನ್ ಲೊಕಾಕ್ನಿ ಗುನ್ ಕರಲ್ಲ್ಯಾಕ್, ಅನಿ ಶಿಕ್ವಲ್ಲ್ಯಾಕ್ ಜಾವ್ನ್ ಪಾವ್ತಾ. ಅಶೆ, ದಿಸಾ ಗೆಲ್ಯಾ-ಗೆಲ್ಯಾ ಸರ್ಕೆ ಜೆಜುಚ್ಯಾ ವಾಂಗ್ಡಾ ಹೊತ್ತ್ಯಾಕ್ನಿ, ಜೆಜು ಕೊನ್ ಮನುನ್ ಕಳುಂಗೆತ್ ಯೆಲೆ, ಖರೆ ಜೆಜುಚ್ಯಾ ವಿರೊದ್ ಹೊತ್ತ್ಯಾಂಚ್ಯಾ ಮನಾತ್ನಿ ಜೆಜುಚ್ಯಾ ವಿಶಯಾತ್ ರಾಗ್ ಜಾಸ್ತಿ ಹೊವ್ನಗೆತ್ ಜಾತಾ. ಹಿ ಬರಿ ಖಬರ್, ಸರು-ಸರುಕ್ ಯೆಲ್ಲ್ಯಾ ತನ್ನಾ ಹೊತ್ತಿ ಪಾಟಾ, ಜೆಜು ಹ್ಯಾ ಜಗಾತ್ ಹೊತ್ತ್ಯಾ ಆಕ್ರಿಚ್ಯಾ ಆಟ್ ದಿಸಾತ್ನಿ ಕಾಯ್-ಕಾಯ್ ಹೊಲೆ ಮನ್ತಲ್ಯಾ ವಿಶಯಾತ್ ಬೊಲ್ತ್ಯಾತ್, ಅನಿ ಲೈ ಕರುನ್, ತೆಕಾ ಕುರ್ಸಾರ್ ಮಾರ್‍ತಲ್ಯಾ, ಅನಿ ತೊ ಝಿತ್ತೊ ಹೊವ್ನ್ ಯೆತಲ್ಯಾ ವಿಶಯಾತ್ ಬೊಲ್ತ್ಯಾತ್.
ಹಿ ಬರಿ ಖಬರ್ ದೊನ್ ವಾಟಾನಿ ಸರ್ತಾ. ಕೌಂಸಾಚ್ಯಾ ಭುತ್ತುರ್ ಲಿವಲ್ಲೆ, ಮಾರ್ಕಾನ್ ನ್ಹಯ್, ಕೊನ್ ಕಿ ದುಸ್ರ್ಯಾನಿ ಲಿವಲ್ಲೆ ಮನುನ್ ಮನ್ತ್ಯಾತ್.
ಮಾರ್ಕಾನ್ ಲಿವಲ್ಲಿ ಬರ್ಯಾ ಖಬ್ರೆಕ್ ಅಶೆ ಎಗ್ಳುಕ್ ಹೊತಾ:
1 ಬರಿ ಖಬರ್ ಸುರು ಹೊತಲೆ. 1:1-13
2 ಗಾಲಿಲಿಯಾತ್ ಜೆಜುಚೆ ಕಾಮ್. 1:14-9
3 ಗಾಲಿಲಿಯಾತ್ನಾ ಜೆರುಜಲೆಮಾಕ್. 10:1-52.
4 ಜೆರುಜಲೆಮಾಚ್ಯಾ ಜಗ್ಗೊಳ್, ಅನಿ ಜೆರುಜಲೆಮಾತ್ ಆಕ್ರಿಚಿ ಆಟ್ ದಿಸಾ.11:1—15:47
5 ಜೆಜು ಝಿತ್ತೊ ಹೊವ್ನ್ ಉಟುನ್ ಯೆತಲೆ. 16:1-8.
6 ಝಿತ್ತೊ ಜೆಜು ದಿಸ್ತಲೆ, ಅನಿ ಝಿತ್ತೊ ಅಮ್ಚೊ ಧನಿ ಸರ್‍ಗಾರ್ ಚಡುನ್ ಜಾತಲೆ. 16:9-20
1
ಜುವಾಂವ್ ದೆವಾಚಿ ವಾಟ್ ತಯಾರ್ ಕರ್‍ತಾ
ಮಾತೆವ್ 3:1-12; ಲುಕ್ 3:1-18
1 ದೆವಾಚ್ಯಾ ಲೆಕಾಚಿ, ಜೆಜು ಕ್ರಿಸ್ತಾಚಿ ಬರಿ ಖಬರ್ ಹಿ.
2 ಇಸಾಯಿಯಾ ಪ್ರವಾದ್ಯಾನ್ ಲಿವಲ್ಲ್ಯಾಸರ್ಕಿ ಅಸೆ ಚಾಲು ಹೊತಾ.
“ದೆವ್ ಮನ್ತಾ ‘ಅಬಕ್!’ ಮಿಯಾ ಮಾಜಿ ಖಬರ್ ಸಾಂಗ್ತಲ್ಯಾಕ್ ತುಜೆನ್ಕಿ ಅದ್ದಿ ಧಾಡುನ್ ದಿತಾ, ಅನಿ
ತೊ ತುಜಿ ವಾಟ್ ತಯಾರ್ ಕರ್‍ತಾ”
3 ಧನಿಯಾಕ್ ಎಕ್ ವಾಟ್ ತಯಾರ್ ಕರಾ,
ತೆಕಾ ಯೆವ್ಕ್ ವಾಟ್ ನಿಟ್ ಕರಾ!.
ಅಶೆ ಮನುನ್ ಡಂಗ್ಳಿತ್ ಎಕ್ ಮಾನುಸ್ ಬೊಬ್ ಮಾರ್‍ತಲೆ ಆಯ್ಕೊ ಯೆತಾ! ಮನುನ್
4 ಇಸಾಯಿಯಾ ಪ್ರವಾದ್ಯಾನ್ ಅಪ್ನಾಚ್ಯಾ ಪುಸ್ತಕಾತ್ ಲಿವಲ್ಲ್ಯಾ ಬಾಸೆನ್. ಜುವಾಂವ್ ಎಕ್ ಮರುಭುಮಿತ್ ದಿಸುನ್ “ತುಮ್ಚೆ ಪಾಪಾಚೆ ಜಿವನ್ ಬದ್ಲಾ ಅನಿ ಬಾಲ್ತಿಮ್ ಘೆವಾ, ಅನಿ ದೆವ್ ತುಮ್ಚೆ ಪಾಪ್ ಮಾಪ್ ಕರ್‍ತಾ” ಮನುನ್ ಲೊಕಾಕ್ನಿ ಸಾಂಗುನ್ಗೆತ್ ಬಾಲ್ತಿಮ್ ದಿವ್ಕ್ ಲಾಗಲ್ಲೊ.
5 ಜುದೆಯಾ ಮನ್ತಲ್ಯಾ ಪ್ರಾಂತ್ಯಾಚ್ಯಾ ಸಾಂದಿ-ಮುಲ್ಲ್ಯಾನಿತ್ನಾ, ಅನಿ ಜೆರುಜಲೆಮಾತ್ನಾ ಲೈ ಲೊಕಾ ಜುವಾಂವಾಕ್ಡೆ ಯೆವ್ನ್, ಅಪ್ನಾಚ್ಯಾ ಸಗ್ಳ್ಯಾ ಚುಕಾ ಒಳ್ಕುನ್ ಘೆವ್ನ್, ಜೊರ್ದಾನ್ ನ್ಹಯ್ತ್, ಜುಂವಾವಾಕ್ನಾ ಬಾಲ್ತಿಮ್ ಘೆವ್‍ಲಾಗಲ್ಲಿ.
6 ಜುವಾಂವ್ ಒಂಟೆಚ್ಯಾ ಕೆಸಾನಿ ಕರಲ್ಲ್ಯಾ ಫಾಳಿಯಾ ನೆಸಿ, ಅನಿ ಕಂಬ್ರೆಕ್ ಚಮ್ಡ್ಯಾಚೊ ಪಟ್ಟೊ ಲಪ್ಟುನ್ ಘೆಯ್, ಅನಿ ಟುಪ್ಪುನ್ಯಾ ಅನಿ ಮಾಂವ್ ಖಾವ್ನ್ ತೊ ಜಿವನ್ ಕರಿ.
7 ಅನಿ ಮಾಜೆನ್ಕಿ ಲೈ ಬಳ್‍ಹೊತ್ತೊ, ಎಕ್ಲೊ ಯೆತಲೊ ಹಾಯ್. ಡೊಗ್ಲಾ ಘಾಲುನ್ ತೆಚ್ಯಾ ಪಾಂಯಾತ್ಲ್ಯಾ ವ್ಹಾನಾಂಚಿ ನಾಡಿ ಸೊಡ್ತಲಿ ಸೈತ್ ಮಾಜಿ ಮರ್ಯಾದ್‍ ನ್ಹಯ್.
8 ಮಿಯಾ ತುಮ್ಕಾ ಪಾನಿಯಾನ್ ಬಾಲ್ತಿಮ್ ದಿವ್ಲಾ, ಖರೆ, ತೊ ತುಮ್ಕಾ ದೆವಾಚ್ಯಾ ಅತ್ಮ್ಯಾನುಚ್ ಬಾಲ್ತಿಮ್ ದಿತಾ." ಮನುನ್ ಥೈ ಗೊಳಾ ಹೊಲ್ಲ್ಯಾ ಲೊಕಾಕ್ನಿ ತೊ ಸಾಂಗುಕ್ ಲಾಗಲ್ಲೊ.
ಜೆಜುಚೆ ಬಾಲ್ತಿಮ್
ಮಾತೆವ್ 3:13—4:11; ಲುಕ್ 3:21-22; ಲುಕ್ 4:1-13
9 ತ್ಯಾ ದಿಸಾತ್ನಿ, ಎಕ್ ದಿಸ್ ಜೆಜು ಗಾಲಿಲಿಯಾ ಪ್ರಾಂತ್ಯಾತ್ಲ್ಯಾ, ನಜರೆತ್ ಮನ್ತಲ್ಯಾ ಗಾವಾತ್ನಾ, ಜುವಾಂವ್ ಹೊತ್ತ್ಯಾಕಡೆ, ಯೆವ್ನ್ ಪಾವ್ಲೊ. ಜುವಾಂವಾಕ್, ಜೆಜುಕ್ ಜೊರ್ದಾನ್ ನ್ಹಯ್ತ್ ಬಾಲ್ತಿಮ್ ದಿಲ್ಯಾನ್.
10 ಜೆಜು ಬಾಲ್ತಿಮ್ ಘೆವ್ನ್ ಪಾನಿಯಾತ್ನಾ ವೈರ್ ಇಬೆ ಹೊತ್ತ್ಯಾ ತನ್ನಾ, ಎಗ್ದಮ್ ಸರ್ಗ ಉಗ್ಡುನ್, ದೆವಾಚೊ ಆತ್ಮೊ ಪಾರಿವಾಳಾಚ್ಯಾ ರುಪಾರ್, ಅಪ್ನಾಚ್ಯಾ ವರ್ತಿ ಉತ್ರುನ್ ಯೆತಲೊ ಜೆಜುನ್ ಬಗಟ್ಲ್ಯಾನ್.
11 ತನ್ನಾ ಸರ್ಗಾವೈನಾ “ತಿಯಾ ಮಾಜೊ ಲೈ ಅಪುರ್‍ಬಾಯೆಚೊ ಲೆಕ್. ಮಾಜ್ಯಾ ಮನಾ ಸರ್ಕೊ” ಮನುನ್ ಮನ್ತಲೊ ಎಕ್ ಧನ್ ಅಯ್ಕೊ ಯೆಲೊ.
ಸೈತಾನ್ ಜೆಜುಕ್ ಪಾಪ್ ಕರಿ ಸರ್ಕೆ ಕರುಕ್ ಬಗ್ತಾ
ಮಾತೆವ್ 4:12-22; ಲುಕ್ 4:14-15
12 ತನ್ನಾಚ್ ದೆವಾಚ್ಯಾ ಆತ್ಮ್ಯಾನ್ ಜೆಜುಕ್ ಎಕ್ ಮರುಭುಮಿಕ್ ಜಾಯ್ ಸರ್ಕೆ ಕರ್ಲ್ಯಾನ್.
13 ಜೆಜು ಚಾಳಿಸ್ ದಿಸಾ, ತ್ಯಾ ಮರುಭುಮಿತ್ ಜಿವಾಕ್ ಅಪಾಯ್ ಕರ್‍ತಲ್ಯಾ ಜನಾವರಾಂಚ್ಯಾ ಮದ್ದಿ ರ್‍ಹಾಲೊ, ಥೈ ಸೈತಾನ್ ಜೆಜುಕ್ ಪಾಪ್ ಕರಿ ಸರ್ಕೆ ಕರುಕ್ ಕಸ್ರತ್ ಕರ್‍ತಾ. ಖರೆ, ಸೈತಾನಾಕ್ ಜೆಜುನ್ ಪಾಪ್ ಕರಿ ಸರ್ಕೆ ಕರುಕ್ ಹೊವುಕ್ನಾ. ಮಾನಾ ದೆವಾಚ್ಯಾದುತಾನಿ ಯೆವ್ನ್ ಜೆಜುಚಿ ಸೆವಾ ಚಾಕ್ರಿ ಕರ್‍ಲ್ಯಾನಿ.
ಜೆಜು ಗಾಲಿಲಿಯಾತ್ ಅಪ್ಲಿ ಸೆವಾ ಚಾಲು ಕರ್‍ತಾ
ಮಾತೆವ್ 4:12-22; ಲುಕ್ 4:14-15; ಲುಕ್ 5:1-11
14 ಜುವಾಂವಾಕ್ ಬಂಧಿಖಾನ್ಯಾತ್ ಘಾಟಲ್ಲ್ಯಾನಿ, ತನ್ನಾ ಜೆಜು ಗಾಲಿಲಿಯಾಕ್ ಬರಿ ಖಬರ್ ಪರ್‍ಚಾರ್ ಕರುಕ್ ಗೆಲೊ.
15 ಅನಿ “ಎಳ್ ಯೆಲೊ,ದೆವಾಚೆ ರಾಜ್ ಜಗ್ಗೊಳ್ ಯೆಲಾ, ತುಮ್ಚೆ ಪಾಪ್ ಒಳ್ಕುನ್ ಘೆವಾ, ಅನಿ ದೆವಾಕ್ಡೆ ಫಾಟಿ ಪರ್ತಾ, ಅನಿ ದೆವಾಚ್ಯಾ ಬರ್ಯಾ ಖಬ್ರೆ ವರ್ತಿ ವಿಶ್ವಾಸ್ ಕರಾ” ಮನುನ್ ದೆವಾಚ್ಯಾ ರಾಜಾಚಿ ಬರಿ ಖಬರ್ ಲೊಕಾಕ್ನಿ ಸಾಂಗುಕ್‍ಲಾಲೊ.
ಜೆಜು ಶಿಸಾಕ್ನಿ ಬಲ್ವುತಲೆ
ಮಾತೆವ್ 4:18-22; ಲುಕ್ 5:1-11
16 ಜೆಜು ಗಾಲಿಲಿಯಾ ಮನ್ತಲ್ಯಾ ಸಮುಂದರಾಚ್ಯಾ ದಂಡೆನ್ ಅಸೆಚ್ ಚಲುನ್ಗೆತ್ ಜವ್‍ಲಾಗಲ್ಲೊ. ಥೈ ಸಿಮಾವ್, ಅನಿ ತೆಚೊ ಧಾಕ್ಲೊ ಭಾವ್ ಅಂದ್ರು, ತೆಕಾ ದಿಸ್ಲೆ. ಹೆನಿ ಮಾಸೊಳ್ಯಾ ಧರ್ತಲಿ ಮಾನ್ಸಾ, ಮಾಸೊಳ್ಯಾ ಧರುಕ್ ಮನುನ್ ತೆನಿ ಸಮುಂದರಾತ್ ಜಾಳೆ ಸೊಡುಲಾಗಲ್ಲೆ.
17 ತನ್ನಾ ಜೆಜುನ್ “ತುಮಿ ಮಾಜ್ಯಾ ಫಾಟ್ನಾ ಯೆವಾ, ಮಿಯಾ ತುಮ್ಕಾ ಮಾನ್ಸಾಕ್ನಿ ದೆವಾಚಿ ಮಾನ್ಸಾ ಕರ್‍ತಲೆ ಕಶೆ ಮನುನ್ ಶಿಕ್ವುತಾ.” ಮಟ್ಲ್ಯಾನ್.
18 ಹೆ ಅಯ್ಕಲ್ಲ್ಯಾ ತನ್ನಾಚ್, ಸಿಮಾವ್ ಅನಿ ಅಂದ್ರು, ಅಪ್ನಾಚಿ ಜಾಳಿ ಥೈಚ್ ಸೊಡುನ್ ಜೆಜುಚ್ಯಾ ವಾಂಗ್ಡಾ ಗೆಲೆ.
19 ಜೆಜು ಥೈತ್ನಾ ಅನಿ ಉಲ್ಲೆ ಫಿಡೆ ಗೆಲೊ, ತನ್ನಾ ತೆಕಾ ಜೆಬೆದೆವಾಚಿ ಪೊರಾ, ಜಾಕೊಬ್ ಅನಿ ತೆಚೊ ಭಾವ್ ಜುವಾಂವ್ ದಿಸ್ಲೆ. ತೆನಿ ಢೊನಿತ್ ಬಸುನ್, ಅಪ್ಲಿ ಜಾಳಿ ಸಮಾ ಕರುಕ್ ಲಾಗಲ್ಲೆ.
20 ಜೆಜು ತೆನಿ ಢೊನಾತ್ ಹೊತ್ತ್ಯಾಕ್ಡೆ ಗೆಲೊ ಅನಿ “ಮಾಜ್ಯಾ ಫಾಟ್ನಾ ಯೆವಾ” ಮನುನ್ ತೆಂಕಾ ಬಲ್ವುಲ್ಯಾನ್. ತನ್ನಾ ತೆನಿ ಅಪ್ನಾಚ್ಯಾ ಬಾಬಾಕ್ ಆಳಾಂಚ್ಯಾ ವಾಂಗ್ಡಾ ಥೈಚ್ ಸೊಡ್ಲ್ಯಾನಿ, ಅನಿ ಜೆಜುಚ್ಯಾ ವಾಂಗ್ಡಾ ಗೆಲ್ಯಾನಿ.
ಜೆಜು ಗಿರೊಲಾಗಲ್ಲ್ಯಾಚೊ ಗಿರೊ ಸೊಡ್ಸುತಾ
ಲುಕ್ 4:31-37
21 ಜೆಜು ಅನಿ ತೆಚಿ ಶಿಸಾ ಕಪರ್‍ನವ್ ಮನ್ತಲ್ಯಾ ಗಾವಾಕ್ ಗೆಲೆ. ಥೈ ಸಬ್ಬತಾಚ್ಯಾ ದಿಸಿ, ಜೆಜು ಎಕ್ ಸಿನಾಗೊಗಾತ್ ಗೆಲೊ, ಅನಿ ಲೊಕಾಕ್ನಿ ದೆವಾಚ್ಯಾ ವಿಶಯಾತ್ ಶಿಕ್ವುಕ್‍ಲಾಲೊ
22 ಜೆಜು ದೆವಾಚ್ಯಾ ಗೊಸ್ಟಿಯಾ, ಎವ್ಡೆ ಬರೆ ಸಾಂಗ್ತಲೆ ಆಯ್ಕುನ್, ಲೊಕಾ ಅಜಾಪ್ ಹೊಲಿ. ಕಶ್ಯಾಕ್ ಮಟ್ಲ್ಯಾರ್, ತೊ ತೆಂಚ್ಯಾ ಖಾಯ್ದೆ ಸಿಕ್ವುತಲ್ಯಾ ಲೊಕಾಂಚ್ಯಾ ಸರ್ಕೆ ಶಿಕ್ವಿನಸಿ, ಎಕ್ ಅದಿಕಾರ್ ಹೊತ್ತ್ಯಾ ಮಾನ್ಸಾ ಸರ್ಕೆ ಶಿಕ್ವುಲಾಗಲ್ಲೊ.
23 ತನ್ನಾ ತ್ಯಾ ಸಿನಾಗೊಗಾತ್ ಗಿರೊಲಾಗಲ್ಲೊ ಎಕ್ ಮಾನುಸ್ ಯೆಲೊ.
24 ಅನಿ ಜೆಜುಕ್ ಬಗುನ್ “ನಜರೆತಾಚ್ಯಾ ಜೆಜು! ತಿಯಾ ಅಮ್ಚ್ಯಾ ಖಬ್ರೆಕ್ ಕಶ್ಯಾಕ್ ಯೆಲೆ? ಅಮ್ಕಾ ನಾಸ್ ಕರುಕ್ ಮನುನ್ ಯೆಲೆ ಕಾಯ್? ತಿಯಾ ಕೊನ್ ಮನುನ್ ಮಾಕಾ ಗೊತ್ತ್ ಹಾಯ್. ತಿಯಾ ದೆವಾಕ್ನಾ ಯೆಲ್ಲೊ ಎಕ್ಲೊ ಪವಿತ್ರ್” ಮನುನ್ ಬೊಬ್ ಮಾರ್‍ಲ್ಯಾನ್.
25 ತನ್ನಾ ಜೆಜುನ್ “ಗಪ್ ರ್‍ಹಾ! ಅನಿ ತ್ಯಾ ಮಾನ್ಸಾತ್ನಾ ಭಾಯ್ರ್ ಯೆ!” ಮಟ್ಲ್ಯಾನ್.
26 ತನ್ನಾ ತೊ ಗಿರೊ ತ್ಯಾ ಮಾನ್ಸಾಕ್ ತಳ್ಮಳಿ ಸರ್ಕೆ ಕರುನ್, ಮೊಟ್ಯಾನಿ ಕಿಂಚುನ್ಗೆತ್ ತ್ಯಾ ಮಾನ್ಸಾಕ್ ಸೊಡುನ್ ಗೆಲೊ.
27 ಸಗ್ಳಿ ಲೊಕಾ ಹೆ ಬಗುನ್ ಅಜಾಪ್ ಹೊಲಿ, ಅನಿ " ಹೆ ಕಾಯ್? ಹ್ಯೊ ಮಾನುಸ್ ಅದಿಕಾರ್‍ಯಾನ್ ಭರಲ್ಲ್ಯಾ ನ್ಹವ್ಯಾಚ್ ರಿತಿನ್ ಶಿಕ್ವುತಾ! ಅನಿ ಗಿರೆ ಸೈತ್, ತೆನಿ ಸಾಂಗಟಲ್ಲೆ ಸಗ್ಳೆ ಆಯಿಕ್ತ್ಯಾತ್. ಮನುನ್ ಎಕಾಮೆಕಾಕ್ನಿ ಬೊಲುಕ್‍ಲಾಲ್ಯಾನಿ.
28 ತನ್ನಾ ತಾಬೊಡ್ತೊಬ್ ಜೆಜುಚಿ ಖಬರ್ ಗಾಲಿಲಿಯಾ ಪ್ರಾಂತ್ಯಾತ್ಲ್ಯಾ ಸಗ್ಳ್ಯಾ ಲೊಕಾಕ್ನಿ ಜಾವ್ನ್ ಪಾವ್ಲಿ.
ಸಿಮಾವಾಚ್ಯಾ ಮಾಮಿಕ್ ಜೆಜು ಬರೆ ಕರ್‍ತಾ
ಮಾತೆವ್ 8:14-17; ಲುಕ್ 4:38-41
29 ಜೆಜು ಅನಿ ತೆಚಿ ಶಿಸಾ, ಸಿನಾಗೊಗಾತ್ನಾ ಬಾಯ್ರ್ ಪನ್, ಸಿಮಾವ್ ಅನಿ ಅಂದ್ರುಚ್ಯಾ ಘರಾಕ್ ಗೆಲೆ. ಜಾಕೊಬ್ ಅನಿ ಜುವಾಂವ್ ಬಿ ಜೆಜುಚ್ಯಾ ವಾಂಗ್ಡಾ ಹೊತ್ತೆ.
30 ಸಿಮಾವಾಚಿ ಮಾಮಿ ತಾಪ್ ಯೆವ್ನ್ ಹಾತ್ರಾನಾತ್ ನಿಜಲ್ಲಿ, ಥೈ ಜಾವ್ನ್ ಪಾವಲ್ಲ್ಯಾ ತನ್ನಾಚ್, ಲೊಕಾನಿ ಜೆಜುಕ್ ಹಿ ಖಬರ್ ಸಾಂಗಟ್ಲ್ಯಾನಿ.
31 ಜೆಜು, ತಿ ನಿಜಲ್ಲ್ಯಾಕ್ಡೆ ಗೆಲೊ, ಅನಿ ತಿಕಾ ಹಾತಾಕ್ ಧರುನ್ ಉಟ್ವುನ್ ಬಸ್ವುಲ್ಯಾನ್. ತನ್ನಾ ತಾಬೊಡ್ತೊಬ್ ತಿಚೊ ತಾಪ್ ಗೆಲೊ, ಅನಿ ತಿ ಉಟುನ್ ತೆಂಚಿ ಸೆವಾ ಕರುಕ್ ಲಾಗ್ಲಿ.
32 ತ್ಯಾ ದಿಸ್ ಸಾಂಜ್ ಹೊಂವ್ಗೆತ್ ಯೆತಾನಾ, ಥೈತ್ಲ್ಯಾ ಲೊಕಾನಿ, ಸಗ್ಳ್ಯಾ ಸಿಕ್ ಹೊತ್ತ್ಯಾಕ್ನಿ, ಅನಿ ಗಿರೊಲಾಗಲ್ಲ್ಯಾಕ್ನಿ ಜೆಜುಕ್ಡೆ ಘೆವ್ನ್ ಯೆಲ್ಯಾನಿ.
33 ಶಾರಾತ್ಲಿ ಸಗ್ಳಿ ಲೊಕಾ ತ್ಯಾ ಘರಾಚ್ಯಾ ಇದ್ರಾಕ್ ಗೊಳಾ ಹೊಲ್ಲಿ.
34 ದುಸ್ರಿ-ದುಸ್ರಿ ರೊಗಾಲಾಗಲ್ಲ್ಯಾ ಲೈ ಲೊಕಾಕ್ನಿ ಜೆಜುನ್ ಗುನ್ ಕರ್ಲ್ಯಾನ್, ಅನಿ ಲೈ ಲೊಕಾಂಚೆ ಗಿರೆ ಸೊಡ್ಸುಲ್ಯಾನ್. ತ್ಯಾ ಗಿರ್‍ಯಾಕ್ನಿ ಜೆಜು ಕೊನ್ ಮನುನ್ ಗೊತ್ತ್ ಹೊತ್ತೆ, ತಸೆ ಮನುನ್ ತೆನಿ ತ್ಯಾ ಗಿರ್‍ಯಾಕ್ನಿ ಬೊಲುಕುಚ್ ದಿವ್ಕ್ ನಾ.
ಜೆಜು ಗಾಲಿಲಿಯಾತ್ ಬರಿ ಖಬರ್ ಸಾಂಗ್ತಾ
ಲುಕ್ 4:42-44
35 ಜೆಜು ದುಸ್ರೆಂದಿಸಿ ಸಕ್ಕಾಳ್‍ಫಿಡೆ ಉಟ್ಲೊ, ಅನಿ ಕೊನ್ಬಿನಸಲ್ಲ್ಯಾ ಶಾಂತ್ ಜಾಗ್ಯಾರ್ ಗೆಲೊ. ಅನಿ ಥೈ ಮಾಗ್ನಿ ಕರುಕ್ ಲಾಗಲ್ಲೊ.
36 ಖರೆ ಹಿಕ್ಡಿ, ಸಿಮಾವ್ ಅನಿ ತೆಚ್ಯಾ ವಾಂಗ್ಡಾ ಹೊತ್ತಿ ಲೊಕಾ, ಜೆಜುಕ್ ಹುಡ್ಕುನ್ಗೆತ್
37 ಜೆಜು ಹೊತ್ತ್ಯಾಕ್ಡೆ ಯೆವ್ನ್ ಪಾವ್ಲಿ, ಅನಿ “ಸಗ್ಳೆ ಜಾನಾ ತುಜಿ ವಾಟ್ ಬಗುನ್ಗೆತ್ ಹಾತ್” ಮನುನ್ ಮಟ್ಲ್ಯಾನಿ.
38 ತನ್ನಾ ಜೆಜುನ್, “ಅಮಿ ಹಿತ್ಲ್ಯಾ ಅಜು-ಬಾಜುಚ್ಯಾ ಗಾವಾಕ್ನಿ ಜಾವ್ಕ್ ಪಾಜೆ, ಕಶ್ಯಾಕ್ ಮಟ್ಲ್ಯಾರ್, ಥೈಬಿ ಮಿಯಾ ದೆವಾಚಿ ಬರಿ ಖಬರ್ ಸಾಂಗುಕ್ ಪಾಜೆ; ತೆಚೆ ಸಾಟಿಚ್ ಮಿಯಾ ಯೆಲಾ” ಮನುನ್ ಜಬಾಬ್ ದಿಲ್ಯಾನ್.
39 ಅಶೆ ಜೆಜುನ್ ಗಾಲಿಲಿಯಾ ಮನ್ತಲ್ಯಾ ಪ್ರಾಂತ್ಯಾತ್ ಸಗ್ಳ್ಯಾಕ್ಡೆ ಫಿರುನ್, ಸಿನಾಗೊಗಾತ್ನಿ ಜಾವ್ನ್, ಬರಿ ಖಬರ್ ಸಾಂಗ್ಲ್ಯಾನ್, ಅನಿ ಗಿರೊಲಾಗಲ್ಲ್ಯಾಂಚಿ ಗಿರೆ ಸೊಡ್ಸುಲ್ಯಾನ್.
ಜೆಜು ಎಕ್ ಮಾನ್ಸಾಕ್ ಗುನ್ ಕರ್‍ತಾ
ಮಾತೆವ್ 8:1-4; ಲುಕ್ 5:12-16
40 ಎಕ್ ದಿಸ್ ಎಕ್ ಕುಸ್ಟ್ ರೊಗ್ ಲಾಗಲ್ಲೊ ಮಾನುಸ್ ಜೆಜುಚ್ಯಾ ಪಾಂಯಾತ್ ಡೊಗ್ಲಾ ಘಾಲುನ್ “ಜೆಜು ತಿಯಾ ಮನ್ ಕರ್ಲ್ಯಾರ್, ಮಾಕಾ ಗುನ್ ಕರುಕ್ ಹೊತಾ” ಮನುನ್ ರಡುಲಾಲೊ.
41 ಜೆಜುಕ್ ತೆಚೊ ಪಾಪ್ ದಿಸ್ಲೊ, ಜೆಜುನ್ ತೆಕಾ ಅಪ್ನಾಚ್ಯಾ ಹಾತಾನಿ ಅಪ್ಡುನ್ “ಮಾಕಾ ಮನ್ ಹಾಯ್. ತಿಯಾ ಪವಿತ್ರ್ ಹೊ” ಮಟ್ಲ್ಯಾನ್.
42 ತನ್ನಾಚ್ ತೆಚೊ ರೊಗ್ ತೆಕಾ ಸೊಡುನ್ ಗೆಲೊ, ಅನಿ ತೊ ಪವಿತ್ರ್ ಹೊಲೊ.
43 ಅನಿ ಜೆಜುನ್ ತೆಕಾ ಫುರಾ ಗುನ್ ಕರ್ಲ್ಯಾನ್ ಅನಿ ಧಾಡುನ್ ದಿಲ್ಯಾನ್,
44 ಜೆಜುನ್ ತೆಕಾ “ಮಿಯಾ ತುಕಾ ಗುನ್ ಕರಲ್ಲ್ಯಾ ವಿಶಯಾತ್ ಕೊನಾಕ್ಬಿ ಸಾಂಗುನಕೊ, ಸಿದಾ ಯಾಜಕಾಂಚಾಕ್ಡೆ ಜಾ, ಅನಿ ತುಜೆ ಆಗ್ ತೆಂಕಾ ದಾಕ್ವು. ತಿಯಾ ಗುನ್ ಹೊಲ್ಲ್ಯಾಸಾಟಿ, ಮೊಯ್ಜೆಚ್ಯಾ ಖಾಯ್ದ್ಯಾತ್ನಿ ಸಾಂಗಲ್ಲ್ಯಾ ಸರ್ಕೆ, ದೆವಾಚಿ ದೆನ್ಗಿ ದಿ, ಹೆ ತಿಯಾ ಗುನ್ ಹೊಲೆ ಮನುನ್ ಸಗ್ಳ್ಯಾಕ್ನಿ ಎಕ್ ವಳಕ್ ಹೊಂವ್ದಿ” ಮನುನ್ ತಾಕಿತ್ ದಿವ್ನ್ ಧಾಡ್ಲ್ಯಾನ್.
45 ಖರೆ ತೊ ಥೈತ್ನಾ ಗೆಲೊ, ಅನಿ ಸಗ್ಳ್ಯಾಕ್ಡೆ ಹಿ ಖಬರ್ ಸಾಂಗುನ್ಗೆತ್ ಗೆಲೊ. ತಸೆ ಮನುನ್ ಜೆಜುಕ್, ಖಲ್ಯಾಬಿ ಗಾಂವಾತ್ ಬಹಿರಂಗ್ ಫಿರುಕ್ ಹೊವುಕ್ನಾ. ತೆಕಾ ಕೊನ್ ಲೊಕಾ ನಸಲ್ಲೆ ಜಾಗೆ ಬಗುನ್, ರ್‍ಹಾತಲೆ ಪಡ್ಲೆ. ಜಾಲ್ಯಾರ್‍ಬಿ ಸಗ್ಳ್ಯಾಕ್ನಾ ಲೊಕಾ ಜೆಜುಕ್ಡೆ ಯೆಂವ್ಗೆತುಚ್ ಹೊತ್ತಿ.