3
ಖರಿ ನಿತ್
1 ಆಕ್ರಿಕ್ ಮಾಜ್ಯಾ ಭಾವಾನು, ಧನಿಯಾಚ್ಯಾ ವಿಶಯಾತ್ ಖುಶಿನ್ ರ್‍ಹಾವಾ, ಅದ್ದಿ ಸಾಂಗಲ್ಲಿ ತಿಚ್ ಗೊಸ್ಟಿಯಾ ಅನಿ ಪರ್ತುನ್ ಲಿವ್ಕ್ ಮಾಕಾ ಬೆಜಾರ್ ನಾ ತೆ ತುಮ್ಕಾ ಘಟ್ ಕರ್‍ತಾ.
2 ತ್ಯಾ ಕುತ್ರ್ಯಾಂಚ್ಯಾಕ್ನಾ ಹುರ್ಶಾಕಿನ್ ರ್‍ಹಾವಾ, ಬುರ್ಶಿಕಾಮಾ ಕರ್ತಲ್ಯಾಂಚ್ಯಾಕ್ನಾ ಹುರ್ಶಾಕಿನ್ ರ್‍ಹಾವಾ, ಅಂಗ್ ಕಾಪ್ತಲ್ಯಾ ವಿಶಯಾತ್ ಹುಶ್ಯಾರ್ಕಿ ರ್‍ಹಾವಾ.
3 ಖರೆ ಸುನ್ನತ್ಕಾರಿ ಕೊನ್ ಮಟ್ಲ್ಯಾರ್, ದೆವಾಚ್ಯಾ ಆತ್ಮ್ಯಾಕ್ನಾ ಪ್ರೆರಿತ್ ಹೊವ್ನ್ ಆರಾದನ್ ಕರ್‍ತಲೆ, ಕ್ರಿಸ್ತ್ ಜೆಜುಚ್ಯಾ ವಿಶಯಾತ್ ಉಮ್ಮೆದಿನ್ ರ್‍ಹಾತಲೆ, ಅನಿ ಆಂಗಾಕ್ ಸಮಂದ್ ಪಡಲ್ಲ್ಯಾ ವಿಶಯಾತ್ನಿ ಬರೊಸೊ ಕರಿನಸಲ್ಲೆ ಹೊವ್ನ್ ಹೊತ್ತೆ ಅಮಿಚ್.
4 ಅಮಿ ತರ್ಬಿ ಆಂಗಾಕ್ ಸಮಂದ ಪಡಲ್ಲ್ಯಾ ವಿಶಯಾತ್ ಬರೊಸೊ ಥವ್ಕ್ ಅವಕಾಶ್ ಹಾಯ್, ದುಸ್ರಿ ಲೊಕಾ ಕೊನ್ ತರ್ಬಿ ಆಂಗಾಕ್ ಸಮಂದ್ ಪಡಲ್ಲೆ ವಿಶಯಾತ್ ಬರೊಸೊ ಥವ್ಚ್ ಮನುನ್ ಚಿಂತುನ್ ರ್‍ಹಾಲ್ಯಾರ್ ಮಿಯಾ ತೆಚ್ಯಾ ಕಿಂತಾಬಿ ಲೈಚ್ ತಸೆ ಚಿಂತುಕ್ ಹೊತಾ.
5 ಮಿಯಾ ಉಪಾಜಲ್ಲ್ಯಾ ಆಟುಚ್ ದಿಸಾತ್ ಮಾಕಾ ಸುನ್ನತಿ ಕರ್‍ಲ್ಯಾನಿ , ಮಿಯಾ ಇಸ್ರಾಯೆಲ್ ಘರಾನಾಚೊ, ಭೆನ್ಯಾಮಿನಾಚ್ಯಾ ಜಾತಿಚೊ, ಇಬ್ರಿಯಾಂಚ್ಯಾಕ್ನಾ ಉಪಾಜಲ್ಲೊ ಇಬ್ರಿಯಾ, ಅನಿ ಖಾಯ್ದ್ಯಾಂಚ್ಯಾ ಸಾರ್ಕೆ ಬಗಟ್ಲ್ಯಾರ್ ಮಿಯಾ ಫಾರಿಜೆವಾಂಚೊ,
6 ಮತಾಸಕ್ತಿ ಬಗಟ್ಲ್ಯಾರ್ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ತರಾಸ್ ದಿತಲೊ, ಖಾಯ್ದ್ಯಾಂಚ್ಯಾ ಪುಸ್ತಾಕಾತ್ ಸಾಂಗಲ್ಲಿ ನಿತ್ ಬಗಟ್ಲ್ಯಾರ್, ಮಿಯಾ ಕಾಯ್ ಚುಕ್ ಕರುಕ್ ನತ್ತೊ.
7 ಖರೆ ಮಾಕಾ ಫಾಯ್ದೊ ಹೊಲ್ಲೆ ಸಗ್ಳೆಬಿ ಕ್ರಿಸ್ತಾಚ್ಯಾ ಸಾಟ್ನಿ ಲುಕ್ಷಾನ್ ಮನುನ್ ಚಿಂತುನ್ ಘೆತಾ.
8 ಯೆವ್ಡೆ ನಸ್ತಾನಾ ಮಾಜೊ ಧನಿ ಕ್ರಿಸ್ತ್ ಜೆಜುಚ್ಯಾ ವಿಶಯಾತ್ಲ್ಯಾ ಲೈ ಮೊಟ್ಯಾ ಶಾನೆಪಾನಾಚ್ಯಾ ವೈನಾ ಮಿಯಾ ಸಗ್ಳೆಬಿ ಲುಕ್ಷಾನ್ ಮನುನ್ ಚಿಂತುನ್ ಘೆತಾ. ತೆಚ್ಯಾ ಸಾಟ್ನಿ ಮಿಯಾ ಸಗ್ಳೆಬಿ ಕಳ್ದುನ್ ಘೆವ್ನ್ ತೆ ಕಚ್ರೊ ಮನುನ್ ಚಿಂತುನ್ ಘೆತಾ.
9 ಹ್ಯಾತುರ್ ಮಾಜೊ ಉದ್ದೆಶ್ ಕಾಯ್ ಮಟ್ಲ್ಯಾರ್, ಮಿಯಾ ಕ್ರಿಸ್ತಾಕ್ ಖಮ್ವುನ್ ಘೆವ್ನ್ ಖಾಯ್ದ್ಯಾಚೆ ಫಳ್ ಸ್ವತಾಚಿ ನಿತಿ ನ್ಹಯ್, ಕ್ರಿಸ್ತಾಚ್ಯಾ ವೈರ್ ವಿಶ್ವಾಸ್ ಥವ್ಲ್ಯಾರ್ ಗಾವ್ತಲಿ ಮಟ್ಲ್ಯಾರ್, ಕ್ರಿಸ್ತಾಚ್ಯಾ ವಿಶ್ವಾಸಾಚ್ಯಾ ಆಧಾರಾ ವೈನಾ ದೆವ್ ದಿತಲಿ ನಿತ್ ಘೆವ್ನ್ ಕ್ರಿಸ್ತಾಕ್ಡೆ ಹೊತ್ತೊ ಹೊವ್ನ್ ರ್‍ಹಾವ್ಚೆ ಮನ್ತಲೆಚ್ ಹೊವ್ನ್ ಹಾಯ್.
10 ಅಶೆ ತೆಕಾ ತೆಚ್ಯಾ ಪರ್ತುನ್ ಝಿತ್ತೊ ಹೊತಲ್ಯಾ ಬಳಾಕ್ ತೆಚ್ಯಾ ತರಾಸಾತ್ನಿ ವಾಟೊ ಘೆತಲೆ ಕಳ್ವುನ್ ಘೆವ್ನ್ ತೆಚ್ಯಾ ಮರ್‍ನಾಚ್ಯಾ ವಿಶಯಾತ್ ತೆಚ್ಯಾ ಸಾರ್ಕೆಚ್ ಹೊವ್ಚೆ ಮನ್ತಲಿ ಮಾಜಿ ಇಚ್ಛ್ಯಾ ಹೊವ್ನ್ ಹಾಯ್.
11 ಅಶೆ ಹೊಲ್ಯಾರುಚ್ ಮರಲ್ಯಾಕ್ನಿ ಪರ್ತುನ್ ಝಿತ್ತೊ ಹೊತಲ್ಯಾ ಸಾರ್ಕೆಚ್ ಅನುಭವ್ ಮಾಕಾಬಿ ಹೊಯ್ಲ್ ಮನ್ತಲೊ ಮಾಜೊ ಬರೊಸೊ.
ಗುರಿ ಪಾವುಕ್ ಸಾಟ್ನಿ ಪಳಾಪ್
12 ಎವ್ಡ್ಯಾ ಪತರ್ ಮಿಯಾ ಹೆ ಸಗ್ಳ್ಯೆ ಪಡ್ದುನ್ ಘೆವ್ನ್ ಪುರಾ ಹೊಲ್ಲೊ ಮನುನ್ ಸಾಂಗಿನಾ, ಖರೆ ಮಿಯಾ ಖಲೆ ಘೆವ್ಕ್ ಸಾಟ್ನಿ ಕ್ರಿಸ್ತ್ ಜೆಜುನ್ ಮಾಕಾ ಧರುನ್ ಘೆಟ್ಲಾ ತೆಚ್ ಘೆವ್ಚೆ ಮನುನ್ ಕಟ್ಪಟ್‍ ಕರುಲ್ಲಾ,
13 ಭಾವಾನು ಅನಿ ಭೆನಿಯಾನು, ಮಿಯಾತರ್ ಧರುನ್ ಘೆಟಲೊ ಮನುನ್ ಚಿಂತುನ್ ಘೆಯ್ನಾ, ಖರೆ ಹೆ ಎಕ್ ಕರ್‍ತಾ , ಮಿಯಾ ಅದ್ಲಿ ವಿಶಯಾ ಇಸ್ರುನ್ ಸೊಡುನ್ ಫಿಡೆ ಹೊತಲೆ ಹೊತ್ತೆ ಧರುಕ್ ಸಾಟ್ನಿ ಮಾಜ್ಯಾಕ್ನಾ ಹೊತಾ ತವ್ಡೆ ಕಟ್ಪಟುಲ್ಲಾ,
14 ಕ್ರಿಸ್ತ್ ಜೆಜುಕ್ಡೆ ದೆವಾಚ್ಯಾ ಮೊಟ್ಯಾ ಬಲವ್ನಿಚಿ ಭೊಮಾನ್ ಫಿಡೆ ಗಾವ್ತಾ ಮನುನ್ ಗುರಿ ಥವ್ನ್ ಘೆವ್ನ್ ಪಳುನ್ಗೆತ್ ಹಾಯ್.
15 ತಸೆ ಹೊವ್ನ್ ಅಮ್ಚ್ಯಾತ್ ತಯಾರ್ ಹೊವ್ನ್ ಹೊತ್ತೆ ಸಗ್ಳೆಬಿ ಹ್ಯಾಚ್ ಮನಾಚೆ ಹೊವ್ನ್ ರಾಂವಾ, ಖಚ್ಚ್ಯಾ ತರಿಬಿ ಎಕ್ ವಿಶಯಾತ್ ತುಮಿ ದುಸ್ರ್ಯಾ ಮನಾನ್ ಹೊತ್ತೆ ಹೊಲ್ಯಾರ್ ತೆ ದೆವುಚ್ ತುಮ್ಕಾ ದಾಕ್ವುನ್ ದಿತಾ.
16 ಅಮಿ ಎವ್ಡ್ಯಾ ಪತರ್ ಚಲುನ್ಗೆತ್ ಯೆಲ್ಲ್ಯಾ ಸಾರ್ಕೆಚ್ ಹೆಚ್ಯಾನ್ ಫಿಡೆಬಿ ತ್ಯಾ ನಿಯಮಾ ಸಾರ್ಕೆಚ್ ಚಲುಂವಾ.
17 ಭಾವಾನು, ತುಮಿ ಸಗ್ಳೆಬಿ ಮಿಯಾ ಕರುನ್ ದಿಲ್ಲ್ಯಾ ವಾಟೆನುಚ್ ಚಲ್ತಲ್ಯಾಕ್ನಿ ಧ್ಯಾನ್ ದಿವಾ;
18 ಕಶ್ಯಾಕ್ ಮಟ್ಲ್ಯಾರ್, ಲೈ ಲೊಕಾ ಕ್ರಿಸ್ತಾಚ್ಯಾ ಖುರ್ಸಾಕ್ ವಿರೊದ್ ಹೊವ್ನ್ ಚಲುಲ್ಲಾತ್, ತೆಂಚ್ಯಾ ವಿಶಯಾತ್ ತುಮ್ಕಾ ಮಿಯಾ ಲೈಂದಾ ಸಾಂಗ್ತಲೊ ಅತ್ತಾಬಿ ರಡುನ್ಗೆತ್; ಸಾಂಗ್ತಾ.
19 ತೆಂಕಾ ಆಕ್ರಿಕ್ ಗಾವ್ತಲೆ ನಾಶುಚ್, ತೆಂಚೆ ಪೊಟುಚ್ ತೆಂಚೊ ದೆವ್, ಮರ್ಯ್ಯಾದ್ ಗೆಡಿ ಕಾಮಚ್ ತೆಂಕಾ ಗೌರವ್ ದಿತ್ಯಾತ್, ತೆನಿ ಹ್ಯಾ ಜಗಾಕ್ ಸಮಂದ್ ಪಡಲ್ಯಾ ವಿಶಯಾತ್ನಿ ಮನ್ ಥವ್ತಾತ್.
20 ಅಮಿ ತರಿಬಿ ಸರ್‍ಗಾತ್ ರ್‍ಹಾತಲೆ ಥೈತ್ನಾ ರಾಕ್ವನ್‍ಕಾರಿ ಯೆತಲಿ ವಾಟ್ ಬಗುಲ್ಲಾಂವ್, ತೊಚ್ ಧನಿಯಾ ಜೆಜು ಕ್ರಿಸ್ತ್.
21 ತೊ ಸಗ್ಳೆಬಿ ಅಪ್ನಾಕ್ ಮಾನಿ ಸಾರ್ಕೆ ಕರುನ್ ಘೆತಲಿ ಬಳ್ ಘೆವ್ನ್ ಗರಿಬ್ಪಾನಾತ್ ಹೊತ್ತೆ ಅಮ್ಚೆ ಆಂಗ್ ಬಳ್ ಹೊತ್ತ್ಯಾ ಅಪ್ಲೆ ಆಂಗ್ ಸಾರ್ಕೆ ರುಪ್ ದಿತಾ.