ಪೌಲನು ತಿಮೊಥೆಯನಿಗೆ ಬರೆದ ಎರಡನೆಯ ಪತ್ರಿಕೆ
ತಿಮೊತಿಕ್ ಪಾವ್ಲುನ್ ಲಿವಲ್ಲಿ ದೊನ್ವೆಚಿ ಚಿಟಿ
ವಳಕ್
ತಿಮೊತಿಕ್ ಲಿವಲ್ಲಿ ದೊನ್ವಿಚಿ ಚಿಟಿ, ಅಪೊಸ್ತಲ್ ಪಾವ್ಲುನ್ ಅಪ್ನಾಚೊ ಶಿಸ್ ಹೊವ್ನ್ ಹೊತ್ತ್ಯಾ ತಿಮೊತಿ ಮನ್ತಲ್ಯಾಕ್ ದೊನ್ವಿಚಿ ಚಿಟ್ ಲಿವ್ಲ್ಯಾನಾಯ್. ಹಿ ಚಿಟಿ ಲೈ ಕರುನ್ ಪಾವ್ಲುಚ್ಯಾ ಜಿವನಾಚ್ಯಾ ಆಕ್ರಿಚ್ಯಾ ದಿಸಾತ್ನಿ ಲಿವಲ್ಲಿ ಹಾಯ್. ತ್ಯಾ ಯೆಳಾರ್ ಪಾವ್ಲು ರೊಮಾತ್ಲ್ಯಾ ಬಂಧಿಖಾನ್ಯಾತ್ ಹೊತ್ತೊ 1:16. ಅನಿ ಪಾವ್ಲು ಅನಿ ತಿಮೊತಿಚ್ಯಾ ಮದ್ದಿ ಎಕ್ ಬರೊ ಸಮ್ಮಂದ್ ಹೊತ್ತೊ, ಪಾವ್ಲು ತಿಮೊತಿಕ್ ಕನ್ನಾಬಿ ಲೆಕ್ ಮನುನ್ ಬಲ್ವಿ ಫಿಲಿ 2:22, 1 ತಿಮೊ 1:2-18.
ಪಾವ್ಲುನ್ ದೆವಾಚ್ಯಾ ಲೊಕಾಂಚ್ಯಾ ತಾಡ್ಯಾಂಕ್ನಿ ಸೊಡುನ್ ಎಕ್ಲ್ಯಾ ಮಾನ್ಸಾಕ್ ಮನುನ್ ಲಿವಲ್ಲ್ಯಾ ಚಾರ್ ಚಿಟಿಯಾನಿತ್ಲಿ ಹಿ ಎಕ್ ಚಿಟಿ. ಹುರಲ್ಲ್ಯಾ ತಿನ್ ಚಿಟಿಯಾ ಖಲ್ಯಾ ಮಟ್ಲ್ಯಾರ್, ತಿಮೊತಿಕ್ ಲಿವಲ್ಲಿ ಪಯ್ಲೆಚಿ ಚಿಟಿ, ತಿತಾಕ್ ಲಿವಲ್ಲಿ ಚಿಟಿ ಅನಿ ಫಿಲೊಮಿನಾಕ್ ಲಿವಲ್ಲಿ ಚಿಟಿ. ಹಿ ಚಿಟ್ ಲಿವ್ತಲ್ಯಾ ಯೆಳಾರ್ ರೊಮ್ ಸಾಮ್ರಾಜ್ಯಾತ್ಲ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ನಿ ತರಾಸ್ ದಿತಲೊ ಯೆಳ್ ಹೊಲ್ಲೊ. ತಸೆ ಹೊವ್ನ್ ಪಾವ್ಲು ಬಂಧಿಖಾನ್ಯಾತ್ ಹೊತ್ತೊ.ಅನಿ ತಿಮೊತಿಕ್ ತರಾಸ್ ಕಸೊ ಸೊಸುನ್ ಘೆತಲೊ ಮನುನ್ ಸಲಹಾ ದಿಲ್ಯಾನ್. ಪಯ್ಲೆಚ್ಯಾ ತಿಮೊತಿಚ್ಯಾ ಚಿಟಿತ್ ಹೊತ್ತ್ಯಾ ಸರ್ಕೆಚ್ ಪಾವ್ಲುನ್ ತಿಮೊತಿಕ್ ಝುಟಿ ಶಿಕಾಪಾ ಶಿಕ್ವುತಲ್ಯಾಂಚ್ಯಾ ವಿರೊದ್ ಉಶಾರ್ಕಿ ದಿಲಾ. 1 ತಿಮೊತಿ 1:16-18 ಅನಿ ಫಿಡೆ ಯೆತಲೆ ಹೊತ್ತ್ಯಾ ತರಾಸಾಂಚ್ಯಾ ವಿಶಯಾತ್ ಸಾಂಗ್ಲಾ. ತಿಮೊತಿ 3:1
ಭಾಗ್
1. ಪಾವ್ಲು ತಿಮೊತಿಕ್ ನಮಸ್ಕಾರ್ ಕರ್‍ತಲ್ಯಾ ವೈನಾ ಚಾಲು ಕರ್‍ತಾ. 1:1-2 ಅನಿ ತೆಕಾ ಉಮ್ಮೆದ್ ದಿತಾ. 1:3-18
2. ಫಿಡೆ ಯೆತಲ್ಯಾ ತರಾಸಾತ್ನಿ ಕಶೆ ಸೊಸುನ್ ಘೆತಲೆ ಮನುನ್ ಸಾಂಗ್ತಾ. 2:1-13
3. ಮಾನಾ ತೊ ತೆಕಾ ಉಲ್ಲಿ ಸಾದಾರನ್ ಮಾರ್ಗದರ್ಶನಾ ದಿತಾ. 2:14-26
4. ಮಾನಾ ತೊ ಯೆತಲ್ಯಾ ಘಟ್ನಾವಳಿಚ್ಯಾ ಅನಿ ತೆಂಕಾ ಸಮಾ ಜವಾಬ್ ದಿತಲ್ಯಾಚ್ಯಾ ವಿಶಯಾತ್ ಹುಶಾರ್ಕಿ ದಿತಾ.3:1,4-8
5. ಮಾನಾ ಪಾವ್ಲು ತಿಮೊತಿಕ್ ಉಲ್ಲಿ ವಯ್ತಿಕ್ ಸಲಹಾ ದಿವ್ನಗೆತ್ ಅಪ್ನಾಚಿ ಹಿ ಚಿಟಿ ಮುಗಸ್ತಾ. 4:9-22
1
1 ಪಾವ್ಲು ಮನ್ತಲೊ ಮಿಯಾ ಲಿವ್ತಲಿ ಚಿಟ್ .ಅಮ್ಚ್ಯಾ ದೆವಾ ಅನಿ ಜಿವನಾಚೊ ಬರೊಸೊ ಹೊವ್ನ್ ಹೊತ್ತ್ಯಾ ಜೆಜು ಕ್ರಿಸ್ತಾಚ್ಯಾ ಹುಕುಮಾ ವೈನಾ ಮಿಯಾ ತೆಚೊ ಅಪೊಸ್ತಲ್ ಹೊವ್ನ್ ಹಾವ್.
2 ತಿಮೊತಿಕ್ ಮಾಜ್ಯಾ ಪ್ರಿತಿಚ್ಯಾ ಲೆಕಾಕ್ ಲಿವ್ತಲೆ.
ದೆವ್ ಬಾಪ್ ಅನಿ ಅಮ್ಚೊ ಧನಿ ಕ್ರಿಸ್ತ್ ಜೆಜು ತುಕಾ ಕುರ್ಪಾ ದಯಾ ಅನಿ ಶಾಂತಿ ದಿಂವ್ದಿತ್.
ಧನ್ಯವಾದ್‍ದಿತಲೆ ಅನಿ ಉಮ್ಮೆದ್ ಭರ್ತಲೆ
3 ಮಿಯಾ ಅಮ್ಚ್ಯಾ ವಾಡ್ವಡ್ಲಾನಿ ಕರಲ್ಲ್ಯಾ ಸರ್ಕೆ ಪವಿತ್ರ್ ಮನಾನಿ ಸೆವಾ ಕರ್‍ತಲ್ಯಾ ದೆವಾಕ್ ಧನ್ಯವಾದ್ ದಿತಾ. ದಿಸ್-ರಾತ್ ಮಾಜ್ಯಾ ಮಾಗ್ನಿತ್ ಮಿಯಾ ತುಕಾ ತಿಮೊತಿ ಯಾದ್ ಕರ್‍ತಾ.
4 ತಿಯಾ ತನ್ನಾ ಜಾತಾನಾ ಡೊಳ್ಯಾನಿ ಕಾಡಲ್ಲ್ಯಾ ದುಕ್ಕಾಂಚಿ ಮಾಕಾ ಯಾದ್ ಹಾಯ್ ಅನಿ ಹೊತಾ ತವ್ಡೆ ಲಗ್ಗು ತುಕಾ ಬಗುಚೆ ಮನ್ತಲಿ ಮಾಜಿ ಆಶಾ. ತನ್ನಾಚ್ ಮಾಜ್ಯಾ ಜಿವಾಕ್ ಸಮಾದಾನ್ ಹೊತಾ.
5 ತುಜೊ ಖರೊ ವಿಶ್ವಾಸ್ ಲೈ ಘಟ್ ಮನ್ತಲೆ ಮಾಕಾ ಗೊತ್ತ್ ಹಾಯ್ ತುಮ್ಚ್ಯಾ ಅಜ್ಜಿಚೊ ಲುಯಿಸಾಚೊ ಅನಿ ತುಮ್ಚ್ಯಾ ಬಾಯ್ಚೊ ಯುನಿಸಾಚೊ ವಿಶ್ವಾಸ್‍ಬಿ ತಸೊಚ್ ಘಟ್ ಹೊತ್ತೊ. ತಸ್ಲೊಚ್ ತುಕಾಬಿ ಹಾಯ್ ಮನುನ್ ಮಾಕಾ ಗೊತ್ತ್ ಹಾಯ್.
6 ಹೆಚೆಸಾಟ್ನಿ ಮಿಯಾ ತುಜ್ಯಾ ಟಕ್ಲ್ಯಾ ವರ್‍ತಿ ಹಾತಾ ಥವಲ್ಲ್ಯಾ ತನ್ನಾ ದೆವಾನ್ ತುಕಾ ದಿಲ್ಲೆ ವರು, ದಿವೊ ಸರ್ಕೆ ಪೆಟುನ್ಗೆತ್ ರ್‍ಹಾಂವ್ದಿತ್. ತೆ ತುಕಾ ಗಾವಲ್ಲೆ ಮಿಯಾ ತುಜಾ ವೈರ್ ಹಾತ್ ಥವಲ್ಲೆ ತನ್ನಾಚ್.
7 ಕಶ್ಯಾಕ್ ಮಟ್ಲ್ಯಾರ್, ದೆವಾನ್ ಅಮ್ಕಾ ಭಿಂವ್ಕುರೊ ಆತ್ಮೊ ದಿವ್ಕ್ ನಾ; ತೆಚ್ಯಾ ಬದ್ಲಾಕ್, ತೆಚೊ ಆತ್ಮೊ ಆಮ್ಕಾ ತಾಕ್ತಿನ್, ಪ್ರೆಮಾನ್ ಅನಿ ಅಮ್ಕಾಚ್ ಅಮಿ ಸಂಬಾಳ್ತಲ್ಯಾ ತಾಕ್ತಿನ್ ಭರ್‍ತಾ.
8 ಅಮ್ಚ್ಯಾ ಧನಿಯಾ ಜೆಜು ಕ್ರಿಸ್ತಾಚಿ ಸಾಕ್ಷಿ ದಿತಾನಾ ಲಜುನಕೊ; ಕ್ರಿಸ್ತಾಸಾಟ್ನಿ ಮಿಯಾ ಬಂಧಿಖಾನ್ಯಾತ್ ಹಾಂವ್ ಮನುನ್‍ಬಿ ಲಜುನಕೊ. ಕಶೆ ದೆವ್ ತುಕಾ ಬಳ್ ದಿತಾ ತಸೆ ಬರ್‍ಯಾ ಖಬ್ರೆಸಾಟ್ನಿ ಕಸ್ಟ್ ಸೊಸ್ತಲ್ಯಾತ್ ಭಾಗ್ ಘೆವ್ನ್ ರ್‍ಹಾ.
9 ದೆವಾನ್ ಅಮ್ಕಾ ಬಚಾವ್ ಕರುನ್ ಅಪ್ನಾಚಿ ಸ್ವತಾಚಿ ಲೊಕಾ ಹೊವ್‍ಸಾಟ್ನಿ ಬಲ್ವುಲ್ಯಾನಾಯ್. ಅಮಿ ಕರಲ್ಲ್ಯಾ ಬರ್‍ಯಾ ಕಾಮಾಸಾಟ್ನಿ ನ್ಹಯ್, ಅಪ್ನಾಚ್ಯಾ ಸ್ವತಾಚ್ಯಾ ಉದ್ದೆಶಾನ್ ಅನಿ ಕುರ್ಪೆನ್ ತೆನಿ ಹೆ ಸಗ್ಳೆ ಕರ್‍ಲ್ಯಾನ್. ಎಳ್ ಮನ್ತಲೆ ಚಾಲು ಹೊವ್ಚ್ಯಾ ಅದ್ದಿಚ್ ಕ್ರಿಸ್ತ್ ಜೆಜುಚ್ಯಾ ವೈನಾ ತೆನಿ ಹಿ ಕುರ್ಪಾ ಅಮ್ಕಾ ದಿಲ್ಲ್ಯಾನ್.
10 ಖರೆ ಅತ್ತಾ ಅಮ್ಕಾ ಸುಟ್ಕಾ ದಿನಾರೊ ಜೆಜು ಕ್ರಿಸ್ತ್ ಯೆಲ್ಲ್ಯಾಚ್ಯಾ ವೈನಾ ತೆಚಿ ಕುರ್ಪಾ ಮಾಳಾಕ್ ಯೆಲಾ. ತೆನಿ ಮರ್ನಾಚ್ಯಾ ಬಳಾಚೊ ನಾಸ್ ಕರ್‍ಲ್ಯಾನ್ ಅನಿ ಬರ್‍ಯಾ ಖಬ್ರೆ ವೈನಾ ಕನ್ನಾಚ್ ಮರಾನ್ ನಸಲ್ಲೆ ಜಿವನ್ ತೆನಿ ಅಮ್ಕಾ ದಾಕ್ವುನ್ ದಿಲ್ಯಾನ್.
11 ದೆವಾನ್ ಮಾಕಾ ಅಪೊಸ್ತಲ್ ಹೊವ್ನ್ ಅನಿ ಬರಿ ಖಬರ್ ಸಾಂಗ್ತಲೊ ಗುರುಜಿ ಹೊವ್ನ್ ಎಚುನ್ ಕಾಡ್ಲ್ಯಾನಾಯ್,
12 ಹ್ಯಾ ಬರ್‍ಯಾ ಖಬ್ರೆಸಾಟ್ನಿ ಮಿಯಾ ಹ್ಯೊ ಕಸ್ಟ್ ಸೊಸುಕ್ ಲಾಗ್ಲಾ. ಖರೆ ಮಾಕಾ ಅನಿಬಿ ಬರೊಸೊ ಹಾಯ್, ಕಶ್ಯಾಕ್ ಮಟ್ಲ್ಯಾರ್ ಮಿಯಾ ಕೊನಾಚ್ಯಾ ವರ್‍ತಿ ಬರೊಸೊ ಥವ್ಲಾ; ತೊ ಮಾಕಾ ಗೊತ್ತ್ ಹಾಯ್ ಅನಿ ಜೆ ಕಾಮ್ ಮಿಯಾ ಕರುನ್ ಸಾರ್ತಲೆ ಮನುನ್ ಹಾಯ್; ತ್ಯಾ ದಿಸಾ ಪತರ್ ಮಾಜಿ ರಾಕನ್ ಕರ್‍ತಲೊ ಬಳ್ ತೆಕಾ ಹಾಯ್ ಮನುನ್ ಮಾಕಾ ಗೊತ್ತ್ ಹಾಯ್.
13 ಜೆಜು ಕ್ರಿಸ್ತಾಚ್ಯಾ ವಾಂಗ್ಡಾ ಎಕ್ ಹೊವ್ನ್ ಹೊತ್ತ್ಯಾ ಅಮ್ಚ್ಯಾ ವಿಶ್ವಾಸಾತ್ ಅನಿ ಪ್ರೆಮಾತ್ ರ್‍ಹಾವ್ನ್ ಎಕ್ ಉದಾರನ್ ಹೊವ್ನ್ ಚಲುಸಾಟಿ ಮನುನ್ ಮಿಯಾ ತುಕಾ ಶಿಕ್ವಲ್ಲ್ಯಾ ಖರ್‍ಯಾ ಗೊಸ್ಟಿಯಾ ಮನಾತ್ ಘಟ್ ಥವ್ನ್ ಘೆ.
14 ಅಮ್ಚ್ಯಾ ಭುತ್ತುರ್ ವಸ್ತಿ ಕರ್‍ತಲ್ಯಾ ಪವಿತ್ರ್ ಆತ್ಮ್ಯಾಚ್ಯಾ ಬಳಾನ್ ತುಕಾ ದಿಲ್ಲ್ಯಾ ತವ್ಡ್ಯಾ ಬರ್‍ಯಾ ಗೊಸ್ಟಿಯಾ ಬರೆ ಕರುನ್ ಸಂಬಾಳ್.
15 ಎಸ್ಯಾ ಪ್ರಾಂತ್ಯಾತ್ಲೆ ಸಗ್ಳೆಜಾನಾನಿ, ಮಾಕಾ ಸೊಡುನ್ ಗೆಲ್ಯಾತ್ ಮನುನ್ ತುಕಾ ಗೊತ್ತ್ ಹಾಯ್ ಫಿಗೆಲಸ್ ಅನಿ ಹೆರ್‍ಮೊಗೆನೆಸ್ ಸೈತ್ ತೆಂಚ್ಯಾ ವಾಂಗ್ಡಾ ಮಿಳ್ಲಾತ್ .
16 ಒನೆಸಿಪೊರಸಾಚ್ಯಾ ಕುಟ್ಮಾಕ್ ಧನಿ ದಯಾ ದಾಕ್ವುಂದಿ, ಕಶ್ಯಾಕ್ ಮಟ್ಲ್ಯಾರ್ ಲೈಂದಾ ತೆನಿ ಮಾಕಾ ಉಮ್ಮೆದಿನ್ ಭರ್‍ಲ್ಯಾನಾಯ್.ಅನಿ ಮಿಯಾ ಬಂಧಿಖಾನ್ಯಾತ್ ಹಾಂವ್ ಮನುನ್ ತೊ ಲಜುಕ್‍ನಾ.
17 ಖರೆ ಹೊತಾ ತೌಡೆ ಲಗ್ಗು ತೊ ರೊಮಾಕ್ ಗೆಲೊ, ಅನಿ ಮಿಯಾ ತೆಕಾ ಗಾವಿ ಪತರ್ ತೆನಿ ಮಾಕಾ ಹುಡಕ್ಲ್ಯಾನ್.
18 ತ್ಯಾ ದಿಸಿ ಧನಿ ತೆಚ್ಯಾ ವರ್‍ತಿ ದಯಾ ದಾಕ್ವುಂದಿ! ಅನಿ ಎಫೆಜಾತ್ ಮಾಜೆಸಾಟಿ ತೆನಿ ಕವ್ಡೆ ಬರೆ ಕಾಮ್ ಕರಲ್ಲ್ಯಾನ್ ಮನುನ್ ತುಕಾ ಗೊತ್ತ್ ಹಾಯ್.