26
Jesus rehteti shinanaibo
(Mr 14.1-2; Lc 22.1-2; Jn 11.45-53)
1 Jato jascajaquin haxemaquin queyoxon sca:
2 —Hoqueha bahquish ta pascua fiesta hihyaxihquiqui. Man tah man honanscai. Jaa neten ta hea jihuin hueonxon rehtehahbo hihxon hea bihmayaxihcanihqui —jahuen haxenicabo Jesusen jaquin.
3 Jaatianbi ta Caifas janeya hapon xoboho sacerdote hapobo betan jaton hahbe hapobo tsinquinishqui. Caifas jaton yohuan hihbo copi jano tsinquicani, yohuannoxon.
4 Quexexon Jesus paranxon bihxon rehteti yohinanax, jeenhihquinannancani.
5 Fiesta naponbi tah bihtima qui. Jonibo sinayohuanax noque potacatsihcanmis hihcani.
Jesus boshnashimahi haibo
(Mr 14.3-9; Jn 12.1-8)
6 Betania jema janin sca Jesus cahi, sipiya hihpahoni jonin xoboho nocoti, jahuen jane cahen Simon, xobo hihbo.
7 Jato betan pihi tsahoti Jesus jaiya sca huesti haibo jahui. Hahan hininjatiya joxon, jahuen pomo quiha xenin Jesus boshnashimaquin. Hihti copi jahuen hininjati.
8 Jesus machicai jisish, sinatax yohuancani:
—¿Jahua copi jaa jatihibi yohyoquihquin?
9 Maromaxon ta hicha coriqui bihquehahniqui, jahuaborajomabo yanapannoxon —hihcani.
10 Jaabo yohuani jai honanxon sca:
—¿Jahua copi man jaa haibo jatsanjahin? Hea ta sirijaquin hahxonaxqui.
11 Jahuaborajomabo ta jascabi jatihiqui, man jato yanapannon. Hea tah man huetsatian jisyamascatihi.
12 Hea tsahonahbo ta hea hininjahaxqui.
13 Nincanahue hen mato yohinon: Jano heen joi siri nincacaibo janin jatihibi ta neatohon hea hahxonai yohuanchaniyaxihcanihqui. Jaa copi ta jaa shinanbehnoyamayaxihcanihqui —jato jaquin.
Judas betan bexohibo
(Mr 14.10-11; Lc 22.3-6)
14 Jaatian ta jahuen haxenica huesti picoti canishqui, Judas Iscariote. Sacerdote hapobo janin cahi.
15 Jato qui nocoxon: —¿Hen mato bihmanon jahua man hea hinantihin? —jato jaquin. Coriqui toponxon sca janacanquin, treinta libra jan bihnon.
16 Bichish, cahi. Caxon, jahuentian cahra bihmahah siritihiquin hihxon shinanquin.
Posen pihibo
(Mr 14.12-25; Lc 22.7-23; Jn 13.21-30; 1 Co 11.23-26)
17 Jaton fiesta nocotai neten sca, jahuen haxenicabo joxon Jesus yocaquin:
—¿Jahuerahnonxon pinoxon non mia fiesta neten pitijaxontihin, Hihbon —hahcanquin.
18 —Hoa non honanai joni yohitannahue jema janin. Heen nete ta nea pishcascaiqui. Miin xobohoxon tah hen heen haxenicabo betan fiesta pinoxihqui hih ta maestro jaiqui. Jascajatannahue.
19 Jesusen raanah sca, bocani. Jan yohiha quescajaxon janoxon fiesta neten pitijacanquin.
20 Bepi sca jaiya jahuen haxenicabo betan janoxon piquin.
21 Piresscaiboya jato yohiquin:
—Man honannon hihxon tah hen mato yohihi: Nenohah ta huesti jaiqui, hea jato bihmaxihqui.
22 Hihti benatax sca tsoan jascajatihiquin hihquish huesti huestibo yocacancani:
—¿Hea nan, Hihbon? —hihcani.
23 —Hehbetanbi nea quenti qui piti bichi joni ta hea bihmanica qui.
24 Papan huishamani joi jai quesca ta noquebaque janoxihquiqui. Hea jascajati jai bi ta hea bihmahi joni Hahrai hihyaxihquiqui. Jahuen papan jaa baquejayamahah cahen siripan —jato jaquin.
25 Jaa bihmanoxihqui hihxon Judasen sca yocaquin:
—¿Hea hin, Maestron?
—Mia rahan —Jesusen jaquin.
26 Pihiboya sca posen bihxon, Papa yocaxon, tehcaxon, jato hinanxon:
—Bihnahue pinoxon. Nea ta heen yora qui —jato jaquin.
27 Tason rihbi bihxon, Papa yocaxon, jato hinanrihbiquin:
—Nea xehanahue, jatihixonbi.
28 Heen jimi tah qui. Jonibaan hohcha copijaquin tah hen heen jimi potaxihqui. Mahuaquin tah hen mato hahxonbahinai. Jaa shinanhahnan xehati ta nea qui.
29 Mato betan huetsapahaquin xehayahnoxon caman tah hen nea xehati hahyamascatihi. Heen Papan jihue janin mato jihuemahi tian pari tah hen mato betan huetsapahaquin xehayaxihqui —jato jaquin.
Jesus qui Pedro paranahxihqui
(Mr 14.26-31; Lc 22.31-34; Jn 13.36-38)
30 Pihax, behuahax, olivo janeya manan qui sca bocani.
31 Janoxon sca jato yohiquin:
—Nea yamebi tah man jatihibichin hea jenebahinnoxihqui, Papan huishani joi jai quesca tah man jatihi. Carnero coirannica tah hen rehtexihqui, heen carnerobo potojahtannon hihqui jaa joi.
32 Jaabi tah hen hahquirihbi teehihquish Galilea main sca catihi, mato rihbi man jano hea merahi canon —jato jaquin.
33 —Caibaan mia jatihixonbi jenebahinai bi tah hen hean mia jenetimahi, hihbon —Pedronen jaquin.
34 —Quimisha coti hatapa queorihyamahi bi tah min nea yamebi heen joni hihtima min yohixihqui —Jesusen jaquin.
35 —Hea rehtehibaan bi tah hen miin joni hihti ma hen yohitimabirestihi —hahscaquin Pedronen. Jatihixonbi sca jascajaribiquin.
Getsemani nahue chianxon Jesusen yocacai
(Mr 14.32-42; Lc 22.39-46)
36 Getsemani janeya nahue chian sca becani, Jesus betan.
—Neno tsahopaquenahue, Papa yocaqui hen hori canon —jato jaquin.
37 Jato jascajaxon Pedroya Zebedeon baque rabe hori boquin. Jano sca Jesus hihti benati, hihti masa shinanquin.
38 —Mahuabena tah hen jai, hihti masa shinanquin. Nenoxonbi hea manahi banenahue, hea coirannoxon.
39 Jato jascajabahini cahax, hori pishca beho racaxon Papa yohiquin:
—Papan. Hea janoxihquibo jatimajahue, jatimajati hahtipahxon. Jaabi hea queenai quescayamahi bi mia queenai quesca janon hihmahue.
40 Yocacax joxon sca hoxahiton jahuen haxenicabo meraquin.
—¿Huesti hora pishca hea mananoxon man hoxa teneti hahtipahyamahin?
41 Hoxa tenexon Papa yocanahue, tiroma yoshiman mato tiromamacatsihquin tanayamanon. Maton shinaman man teneti shinanai bi tah man hahan teneti coshi yamahi.
42 Jascacahini sca Papa yocaqui caribihi.
—Papan, hea janoxihquibo jatimajati yamahiya mia queenai quesca janon jahue —hahquin.
43 Joxon sca, hoxahiton jato merarihbiquin. Jaton bero quextojaquetax hoxa hoxacani.
44 Jato mohinaxma caribixon jahuen quimisha sca jascajaquin yocarihbiquin.
45 Joxon sca:
—¿Man hoxaparihin? ¿Tanti tanti pari man jain? Jisnahue. Hohchayahpabaan bihnon bihmahi ta beresscacanihqui.
46 Hueninahue. Caresscatannon benahue. Hea bihmahi jahui ta nea nocoscaiqui —Jesusen jato jaquin.
Jesus bichibo
(Mr 14.43-50; Lc 22.47-53; Jn 18.2-11)
47 Jato yohihiyabi jahuen haxenica huesti jahui, Judas. Hahbetan rihbi hicha becani, caibo machitoya, caibo chantiya. Sacerdote hapobaan raanah becani, judio hapobaan raanah becani.
48 Jato betan joriyamaxon ca Judasen jato yohihah:
—Hen meraxon betsohahquin hicotanai joni tah qui. Hen betsohahquin hicotanai bihtannahue.
49 Nocotax sca ponte res Jesus qui jahuex, Min jascabi jayamahin hahxon, betsohahxon hicotanquin. Hicotanahbi:
50 —¿Jahuejahi min jahuin, amigon? —Jesusen jaa jaquin. Jaatian nihquirani joxon bihxon Jesus menexcanquin.
51 Jasca jaibaan bi huesti jahuen haxenicaton machito tsecaxon sacerdote hapon joni marequin bi cahnexon jahuen pabinqui paxtebahinquin.
52 —Miin machito bexojahue. Machitonen rehtenanaibo ta jahanbi mahuatihiqui.
53 ¿Heen Papa hean yocacah jan jahuen yonotibo sesenta mil raantihiqui min honanyamahin?
54 Hea nescajayaxihquibo ta Papan huishani joi jaiqui. ¿Hen yocacaiya jenquetsahpax jan yohini quesca jatihiquin? —Jesusen jaa jaquin.
55 Yahtannicabo sca yohiquin:
—¿Jahua copi man rehtemis joni yahtanquin hahcajahin, machitoyaxon chantiyaxon hea chibanbenahin? Netetihibi Papan xoboho tsahoxon haxemahi bi tah man hea bihyamahipiqui.
56 Papan huishani joi jai quesca janon tah man nescajahi —hahquin jato.
Jaatianbi jahuen haxenicabo jatihibi jabacani. Jesus yahtanahbo jenebahini bocani.
Hapobo janin Jesus bohibo
(Mr 14.53-65; Lc 22.54-55, 63-71; Jn 18.12-14, 19-24)
57 Menexxonsca sacerdote hapo Caifas janin Jesus bocanquin. Jaa xoboho jaton huisha hapobo jaton hanibo tsinquiquihranscai.
58 Jano Jesus hiohiboya hocho sca jato chibanquin Pedronen. Sacerdote hapon xoboho jaabo mapenon, jeman res Pedro nihnichi. Jaton sontaro tocan jano tsahoti, jahueja janoxihcanihquin hihquish manati.
59 Chicho cahen sacerdote hapoboya texe judio hapobo yohuancani. Jaa copi rehteti janon hahqui yohuanai quesabo quenamacanquin.
60 Hicha quesabo jano mapetai bi jahua copi rehteti merayamacanquin. Chini sca huetsa quesa rabe nocoti.
61 —Toa joni tah non yohuanai nincaquipiqui. Papan xobo tah hen potojaquetanxon quimisha neten hahquirihbi jaa xahnen xobojati hahtipahi hih ta jaipishqui —hihcani.
62 Jaton quiquin sacerdote sca huenicahinxon Jesus yocaquin:
—¿Min jahuabi yohiyamahin? ¿Jaabo mihqui yohuanai bi min jahuabi yohiti yamahin?
63 Yocacah bi jahuahihyamahi. Jahuabi yohiyamahiya, hapon yohirihbiquin:
—Quiquin Dioscoinyaxon tah hen mia hihti yohihi quesaxonma min yohicoinnon. ¿Mia min Diosen baque Cristo quin? Noque yohihue.
64 —Min yohihi quesca rahan. Hashoan rihbi tah hen mato yohihi: Papan mecayaho jahuen quiquin hapo tsahotai tah man hea noquebaque jisyaxihqui. Nai cohiman jahui tah man hea jisyaxihqui —Jesusen jaquin sacerdote hapo.
65 Nincaxon, jahuen coton huaxabahinxon, jato yohiquin:
—Dios qui ta tiromahi yohuanihqui. ¿Jahua hashoan non nincati pishinain? Jan tiromahi yohuanai tah man nincascai.
66 ¿Jahua shinan man jain?
—Jan yohuanai copi non rehteti jai rahan —hahcanquin.
67 Jahuen bemanan qui toshbanhahxon, copasxon beshrishquicanquin.
68 Rishquixon yocacanquin:
—Yohihue, Criston. ¿Tsoan mia rishquihiquin?
Jaa tah hen honanyamahi hihqui Pedro
(Mr 14.66-72; Lc 22.56-62; Jn 18.15-18, 25-27)
69 Jasca jaabo jai bi jemanhihti janin Pedro tsahoti. Jano tsahotaiton huesti haibaan joxon yohiquin:
—Mia rihbi tah min hoa Galilea mai meha Jesus betan nihrasihi.
70 Jano jaibaan sca jatihixonbi nincanon jahuen joni hihtima yohiscaquin:
—Min yohuanai tah hen honanyamabiresai —Pedronen jaquin.
71 Nichibo tocan mehax huetsa haibo rihbi joxon, Pedro jisquin sirijaxon, jato yohiquin:
—Nea coin ta Jesus Nazareno betan nihcachihiqui.
72 Hahquirihbi jahuen joni hihtima Pedronen yohiquin. Dios quenaxon:
—Jaa joni tah hen honanyamabiresai —hahquin.
73 Basiyamahax jano nichibosca joxon:
—Hihcoini. Mia rihbi tah min jahuen haxenica qui. Min yohuanai tah non honanai. Janoha joni quescapah tah non mia nincacai —Pedro jacanquin.
74 Dios quenaxon, hihcoinyamahax hea mahuapahinon hihxon jascajaribiquin:
—Jaa joni tah hen honanyamabiresai —Pedronen jaquin. Jaatianbi sca hatapa queoti.
75 Jesusen yohiha joi shinanrenenscaquin. Hatapa queorihyama jai bi tah min quimisha coti heen joni hihtima min yohixihqui. Jesus jascari yohuanah shinanax, picocahini cahax coshin huaohihscai.