ICOA LIBAKETEDI LIIǤEXEDI ANEOTEDOǤOJI
Lucas me idí naɡ̶adi notaɡ̶anaɡ̶axi didikotacibige niɡ̶ica ɡ̶oneleegiwa anida naɡ̶atetigi ane liboonaɡ̶adi Teófilo. (Awini miditaɡ̶a Lucas 1.1-4). Maditaɡ̶a naɡ̶adi notaɡ̶anaɡ̶axi Lucas iditedi icoatawece niɡ̶icoa ane loenataka niɡ̶ijo anodiotibece Jesus niɡ̶ijo noɡ̶opitedibigimece ditibigimedi. Yalaɡ̶ata niɡ̶ica anodaaɡ̶ee Aneotedoɡ̶oji Liwigo noɡ̶odibatege me iiɡ̶e lewiɡ̶a niɡ̶ijo liiɡ̶exedi Aneotedoɡ̶oji, odaa niɡ̶ijo noɡ̶oyatematitedibece nibodicetedi anele, odaa eliodi oko joɡ̶oyiwaɡ̶adi Jesus me Niɡ̶ijaa Aneotedoɡ̶oji ane niiɡ̶e me Ǥonewikatoɡ̶odi. Lucas yalaɡ̶ata niɡ̶ijoa nibodicetedi anele aneetece Jesus me dinatemati digoida Jerusalém, codaa miditawece niiɡ̶o Judéia, nipodigi Samaria, codaa yalaɡ̶ata milaagitelogo inoatawece ane iiɡ̶otedi. Lucas eetece niɡ̶icoa ane libaketedi Pedro ijaa Filipe. Codaa aaɡ̶aɡ̶a yalaɡ̶ata Paulo mijo me lakapetegi Jesus, codaa eetece anodaaɡ̶ee naɡ̶a dakapetege Jesus, codaa yalaɡ̶ata anodaaɡ̶ee Paulo naɡ̶a diniigi lewiɡ̶a, odaa ja liiɡ̶exegi Jesus. Aaɡ̶aɡ̶a yalaɡ̶ata judeutedi meliodi mowo Paulo me dawikode leeɡ̶odi me yatematitedibece nibodicetedi anele. Yalaɡ̶ata anodaaɡ̶eeteda niɡ̶icoa niwiajeɡ̶eco Paulo migotece owidi iiɡ̶otedi me yeloɡ̶oditedibece nibodicetedi anele, codaa me niiɡ̶axitiniwace niɡ̶ijo anoyiwaɡ̶adi Ǥoniotagodi. Odaa ijoatawece nipodaɡ̶a anigotece Paulo, idioka limedi moiatetibece. Neɡ̶epaaɡ̶icota moniwilo Paulo, odaa joɡ̶oyadeegiticogi nigotaɡ̶a Roma.
Odaa jiɡ̶idaaɡ̶ee Lucas me yalaɡ̶atiogi niɡ̶ijoa liiɡ̶exedi Jesus modigotece eletidi iiɡ̶otedi moyeloɡ̶oditedibece nibodicetedi anele aneetece Jesus, codaa owote ɡ̶odoxiceɡ̶etedi oibake notoetiigi Liwigo Aneotedoɡ̶oji.
1
Lucas didikotibige Teófilo
(Lucas 1.1-2)
Jidikotacibigaɡ̶aji, iniotagodi Teófilo. Niɡ̶ijo naɡ̶a jidi naɡ̶ajo odoeje notaɡ̶anaɡ̶axi, jiditini anodaaɡ̶eeteda Jesus, ijoatawece ane loenataka codaa me liiɡ̶axinaɡ̶aneɡ̶eco maleeka dinojogotedini meote ane libakedi. Jiditedini notaɡ̶a aneetece libaketedi Jesus neɡ̶epaa niɡ̶ijo noko Aneotedoɡ̶oji naɡ̶a yadeegitedibigimece ditibigimedi. Maleediɡ̶icatibige doɡ̶opitedibigimece ditibigimedi Jesus ibake loniciwaɡ̶a Aneotedoɡ̶oji Liwigo me iiɡ̶e niɡ̶ijoa liiɡ̶exedi, niɡ̶ijoa ɡ̶oneleegiwadi ane iolatedicoace. Yeleo pida niɡ̶idiaaɡ̶idi ja yewiɡ̶atace, odaa icoatigilo cwareenta nokododi elioditibece me dinikeetediogi niɡ̶ijoa ɡ̶oneleegiwadi, dinikeetediogi mewi naɡ̶a yewiɡ̶atace. Onadi odaa aɡ̶alee yakadi me nawienatakanaɡ̶a naɡ̶a yewiɡ̶atace. Niiɡ̶axitediniwace anodaaɡ̶ee Aneotedoɡ̶oji me iiɡ̶e laaleɡ̶enali oko. Ica me yatecoɡ̶o, odaa Jesus ja imonya, meetediogi, “Jinoɡ̶otace anotiticoace we nigotaɡ̶a Jerusalém, pida aliitegetiwaji ane ligegitedaɡ̶awa Eiodi me yajigotedaɡ̶awa, niɡ̶ijo baaniɡ̶ijo mejitaɡ̶awatiwaji. João Batista nilegetiniwace oko datika ninyoɡ̶odi eotibige me ikee noɡ̶odinilaatece libeyaceɡ̶eco, codaa moyemaa Aneotedoɡ̶oji me iiɡ̶e laaleɡ̶enali. Pida nige ixomaɡ̶atedijo onateciɡ̶idiwa nokododi Aneotedoɡ̶oji Liwigo dakatiwece ɡ̶adaaleɡ̶enali, odaa ja ɡ̶adiiɡ̶enitiwaji.”
Aneotedoɡ̶oji yadeegitedibigimece Jesus ditibigimedi
(Marcos 16.19-20; Lucas 24.50-53)
Ica me yatecoɡ̶o niɡ̶ijoa liiɡ̶exedi Jesus, odaa jonoɡ̶oige, moditalo, “Ǥoniotagodi, domige naɡ̶a natigide ica me ɡ̶odoɡ̶aaɡ̶egitice mejonaɡ̶ateloco loniciwaɡ̶a romaanotedi, odaa jaɡ̶awii okomaɡ̶a ɡ̶oninionigi-eliodi?”
Naɡ̶a niniɡ̶odi Jesus, odaa meetediogi, “Aneotedoɡ̶oji ibake naɡ̶atetigi mepaa nibikota noko codaa me lakata nigeote niɡ̶ida anenita, pida aɡ̶akatitiwaji mowooɡ̶oti niɡ̶ica noko nigicota. Pida nige dinikatini Aneotedoɡ̶oji Liwigo me dakatiwaɡ̶ajitiwaji, odaa yajigotaɡ̶awa ɡ̶adoniciwaɡ̶a. Odaa akaamitiwaji jaɡ̶akamaɡ̶akaami nakataɡ̶anadi codaa me enitici. Odaa jeɡ̶eniticitiwaji digoina nigotaɡ̶a Jerusalém, digoida nipodigi Judéia, nipodigi Samaria, codaa me niɡ̶inoa eletidi nipodaɡ̶a ane daɡ̶axa me leegitalo.” Igaanaɡ̶a nigotedini niɡ̶ijoa Jesus lotaɡ̶a, odaa Aneotedoɡ̶oji ja yadeegitedibigimece ditibigimedi. Odaa ja dakatediwece ica lolaadi, odaa aɡ̶aleeɡ̶icoa monadi.
10 Eɡ̶idaa diiticogi Jesus migo ditibigimedi, idiaaɡ̶idi idokee moiwitibigimece ditibigimedi, codaaɡ̶onida noɡ̶onadi icoa itoataale ɡ̶oneleegiwadi ja dinikeetiogi. Niɡ̶icoa ɡ̶oneleegiwadi one odinixotinigilo nowoodi lapacoɡ̶ogoli, dabiditiniwace liwai niɡ̶ijoa liiɡ̶exedi Jesus. 11 Odaa modi, “Akaamitiwaji, ɡ̶oneleegiwadi anicoɡ̶oticogi nipodigi Galiléia, igame leeɡ̶odi maleeɡ̶inaaɡ̶oni awinitibigimece ditibigimedi? Aneotedoɡ̶oji ja yadeegi Jesus digoida ditibigimedi, odaa jiɡ̶inaa ɡ̶adoyaatetiwaji digoina. Pida niɡ̶ijoa Jesus icota me dopitedijo digo anodaaɡ̶eeteda mopitedibigimece ditibigimedi.”
Niɡ̶ijoa liiɡ̶exedi Jesus oiomaɡ̶aditice Matias me waxodi limedi Judas
12 Odaa niɡ̶ijoa liiɡ̶exedi Jesus naɡ̶a dopitiniwace moicoɡ̶otibigimece lojotaɡ̶adi ane liboonaɡ̶adi “Lojotaɡ̶adi Oliveira”, odaa jiɡ̶igotibeci nigotaɡ̶a Jerusalém one onadateci ciloomito me yototice niɡ̶ijo lojotaɡ̶adi. 13 Noɡ̶odakatiwece nigotaɡ̶a, odaa jiɡ̶igotibeci minitaɡ̶a ica dalaɡ̶ate diimigi ane lotokaɡ̶adi. Niɡ̶icoa ɡ̶oneleegiwadi anidiaaɡ̶iticoace one: Pedro, João, Tiago, André, Filipe, Tomé, Bartolomeu, Mateus, Tiago ane lionigi ica Alfeu, Simão niɡ̶ijo ane domaɡ̶a ideleɡ̶e romaanotedi, icaaɡ̶ica Judas ane lionigi ica eledi Tiago. 14 Elioditibece me yatecoɡ̶o moyotaɡ̶aneɡ̶e Aneotedoɡ̶oji awatege niɡ̶ijo nioxoadipi Jesus, ajo eliodo, ijaaɡ̶ijo eledi iwaalepodi.
15 Niɡ̶ijoa nokododi yatecoɡ̶o ejime onaniteci taalia niɡ̶igo viinte anoyiwaɡ̶adi Ǥoniotagodi. Odaa Pedro ja dabiditini liwigotigi, odaa jeɡ̶ee, 16 “Inioxoadipi, leeditibige micota niɡ̶ijo aneeta Aneotedoɡ̶oji lotaɡ̶anaɡ̶axi aneetece analee ninyaagi Judas. Aneotedoɡ̶oji Liwigo eo inionigi-eliodi Davi me eetece analee ninyaagi Judas niɡ̶ijo jotigide. Niɡ̶ijo me ikeetiogi neloɡ̶ododipi ane diɡ̶etedigi Jesus eotibige moyakadi moniwilo Jesus. 17 Judas eledi ijo me ɡ̶odokaaɡ̶edi me jiwaɡ̶atibece Ǥoniotagodi, aaɡ̶aɡ̶a iomaɡ̶aditedice meo libakedi digo mokotaɡ̶a idokida ɡ̶obakedi.”
18 Judas dinoojeteta nipodigi. Ibake niɡ̶ijoa dinyeelo ane dinigaanyetece me yajigo Jesus modibatalo neloɡ̶ododipi. Odaa miditaɡ̶a niɡ̶idi nipodigi, jiɡ̶idiaa lemaɡ̶adi, datope le, icoa liwenadi daxoitedice igotinigi iiɡ̶o. 19 Iditawece niɡ̶eladimigipitigi nigotaɡ̶a Jerusalém oyowooɡ̶odi ane ninyaagi Judas. Joaniɡ̶idaa leeɡ̶odi mowo me liboonaɡ̶adi niɡ̶idi nipodigi, “Aceldama”, nioladi hebraico, amina anejinaɡ̶ata “Nipodigi ɡ̶odawodi”. 20 Pedro eɡ̶idaaɡ̶ee me dotaɡ̶a, odaa jeɡ̶ee, “Niɡ̶ida ane ninyaagi Judas diniditeloco Aneotedoɡ̶oji lotaɡ̶anaɡ̶axi, digoida liwai niɡ̶ijoa enaco, mee niɡ̶ijo nidigo,
‘Leeditibige liɡ̶eladi niɡ̶ini ɡ̶oneleegiwa micota me dinaladi,
codaa aɡ̶aleeɡ̶ica anigo diɡ̶eladetigi.’
Codaa eledi diniditeloco niɡ̶ijo liwai lotaɡ̶anaɡ̶axi Aneotedoɡ̶oji,
‘Leeditibige eledi oko me waxodi limedi,
codaa meo niɡ̶ijo ane libakedi.’
21-22 Enice leeditibige me jiolaaɡ̶atice eledi oko me waxodi limedi Judas me nakataɡ̶anaɡ̶a me naɡ̶a yewiɡ̶atace Ǥoniotagodi Jesus. Leeditibige me jixipenaɡ̶atice oko minoataɡ̶a niɡ̶inoa ɡ̶oneleegiwadi ane akaaɡ̶ina mokotaɡ̶a niɡ̶ijoa nokododi Ǥoniotagodi Jesus maleeɡ̶iniwa mokotaɡ̶a, niɡ̶ijoa nokododi naɡ̶a nilegetiniwace João Batista niɡ̶ijo oko, neɡ̶epaaɡ̶icota niɡ̶ijo noko Aneotedoɡ̶oji naɡ̶a yadeegitedibigimece Jesus ditibigimedi.”
23 Odaa joɡ̶oniboonaɡ̶ateetiniwace itoataale ɡ̶oneleegiwadi, José anoyatigi me Barsabás, codaa nikoxeedi me “Niɡ̶ijo ane iɡ̶enaɡ̶a”, ijaaɡ̶ijo eledi ɡ̶oneleegiwa ane liboonaɡ̶adi Matias. 24-25 Niɡ̶idiaaɡ̶idi niɡ̶ijo lapo joɡ̶oyotaɡ̶aneɡ̶e Aneotedoɡ̶oji, moditalo, “Ǥoniotagodi Aneotedoɡ̶oji, owooɡ̶otitiwece laaleɡ̶ena okanicodaaɡ̶ica oko. Enice natigide anikeenitoɡ̶owa anigepidiɡ̶ica niɡ̶idoa itoataale ɡ̶oneleegiwadi ane aolaatice meote libakedi me ɡ̶adiiɡ̶exegi, me waxodi limedi Judas me liiɡ̶exegi Ǥoniotagodi, leeɡ̶odi Judas jiɡ̶igo miditaɡ̶a anepaa limedi.” 26 Odaa joɡ̶oiwi anepaɡ̶a dinete modibateloco liboonaɡ̶adi, odaa joɡ̶odibateloco liboonaɡ̶adi Matias. Odaa Matias ja dinawanaɡ̶aditege me lokaaɡ̶etedi niɡ̶ijoa oonze ɡ̶oneleegiwadi liiɡ̶exedi Ǥoniotagodi.