5
Lotaɡ̶anaɡ̶axi Niɡ̶ijoa anoiciaceeketege waxacoco
Jinadi notaɡ̶anaɡ̶axi liciagi niɡ̶ina nilipatigi idei libaaɡ̶adi Niɡ̶ijoa ane nicoteloco nibaanco me ɡ̶oneɡ̶egi. Naɡ̶adi notaɡ̶anaɡ̶axi dinidi idoatawece liwailidi, oyexocaɡ̶aditeloco seete lapadijetedi ane noxoco. Odaa ja jinadi ijo aanjo loniciweɡ̶enigi ane dinigetaɡ̶atee me digika, mee, “Amiijo anida naɡ̶atetigi me noɡ̶a lapadijetedi naɡ̶adi notaɡ̶anaɡ̶axi me yomoke?” Pida aɡ̶ica ganigetiɡ̶ijo digoida ditibigimedi, oteɡ̶exaaɡ̶aɡ̶a digoina iiɡ̶o, migetaɡ̶a catinedi iiɡ̶o ane yakadi me yomoke oditaɡ̶a iwi ane diniditeloco naɡ̶adi notaɡ̶anaɡ̶axi. Eliodi me jinoetibece leeɡ̶odi me diɡ̶ica anida naɡ̶atetigi me yomoke oditaɡ̶a yalomeɡ̶eteloco aniwoteloco naɡ̶adi notaɡ̶anaɡ̶axi. Odaa ijo onijoteci niɡ̶idiwa 24 lacilodi meetiwa, “Jinaɡ̶anoeni! Digawini! Niɡ̶ijoa anoyatedigi me ‘Liaon’ anida aneetege licoɡ̶egi loiigi Judá, ane litaagi Davi inionigi-eliodi ɡ̶oneɡ̶egi, ja iɡ̶eke loniciwaɡ̶a némaɡ̶a, odaa baɡ̶a yakadi me yaaɡ̶adi niɡ̶idiwa seete lapadijetedi ane noxoco naɡ̶adi notaɡ̶anaɡ̶axi, odaa ja yomoke.”
Odaa ja jinadi Niɡ̶ijoa anoiciaceeketege waxacoco dabiditedi lodoe nibaanco niɡ̶ijoa ane ɡ̶oneɡ̶egi, oyawiile niɡ̶idiwa cwaatolo ewikaɡ̶a, ijaaɡ̶ijoa 24 lacilodi. Niɡ̶ijoa Waxacoco latopiwatibige niɡ̶ijo moyeloadi. Idiwa seete libiwedi, ligecooɡ̶eli idaa liwokodi seete, anoikee niɡ̶icoa seete liwicidi Aneotedoɡ̶oji ane niwakateetedeloco inatawece iiɡ̶o. Niɡ̶ijoa anoiciaceeketege Waxacoco jiɡ̶igo dibate naɡ̶ajo notaɡ̶anaɡ̶axi ane idei libaaɡ̶adi Niɡ̶ijoa ane nicoteloco nibaanco me ɡ̶oneɡ̶egi.
Naɡ̶a dibate naɡ̶ajo notaɡ̶anaɡ̶axi, niɡ̶ijoa cwaatolo ewikaɡ̶a, ijaaɡ̶ijoa 24 lacilodi dakagitiniwace lodoe niɡ̶ijoa Waxacoco. Oninitecibeci niɡ̶idiwa lacilodi ada noɡ̶oxiɡ̶a-liwenaɡ̶a, codaa idoa nibaxiatedawaanaɡ̶a oolo, nolee edokojegi, ane ikee lipoketedi noiigi ane nepilidi Aneotedoɡ̶oji niɡ̶ina moyotaɡ̶aneɡ̶e. Oigaa gela elaagi, modi,
“Daɡ̶axa mida ɡ̶anaɡ̶atetigi,
joaniɡ̶idaa makati mabaata naɡ̶adi notaɡ̶anaɡ̶axi,
odaa aaɡ̶ati niɡ̶idiwa seete lapadijetedi leeɡ̶odi metiɡ̶adeloati,
codaa leeɡ̶odi ɡ̶adawodi me anado,
ane loojedi manoojeteetema Aneotedoɡ̶oji oko,
inoatawece ane noiika,
inoatawece ane iolatedi niɡ̶ina iiɡ̶o,
codaa anoicoɡ̶oticogi inoatawece iiɡ̶otedi,
codaa minoatawece ane latopaco oko.
10 Odaa jaɡ̶awii mokiditece noiigi,
odaa jiɡ̶iiɡ̶eni laaleɡ̶enali,
codaa majicitiogi naɡ̶atetigi modibatema Aneotedoɡ̶oji,
odaa joɡ̶oiiɡ̶e inatawece iiɡ̶o.”
11 Naɡ̶a inoletacibige, odaa ja jajipata lapo nelegi aanjotedi. Oyawiile nibaanco ɡ̶oneɡ̶e, idiaaɡ̶idiwa cwaatolo ewikaɡ̶a, ijaaɡ̶ijoa 24 lacilodi. Daɡ̶axa meliodi, ajakataɡ̶a me inilaaɡ̶ataɡ̶atiogi. 12 Odaa dinigetaɡ̶ateetibigiwaji modi,
“Niɡ̶idoa Waxacoco anoyeloadi daɡ̶axa me ɡ̶oneɡ̶egi,
odaa leeditibige me dibatetege naɡ̶atetigi,
niliicaɡ̶ajetecidi,
lowooɡ̶otakaneɡ̶egi,
codaa me loniciwaɡ̶a.
Codaa leeditibige me jiweniɡ̶idenaɡ̶a,
jocaɡ̶anaɡ̶atalo,
codaa me joɡ̶eeɡ̶atalo niɡ̶iniwa anoiciaceeketege Waxacoco.”
13 Odaa ja jajipatiogi iditawece ane newiɡ̶a digoida ditibigimedi, digoina iiɡ̶o, codaa aneite émaɡ̶aɡ̶a, codaa aneitinigi akiidi-eliodi. Iditawece modi,
“Niɡ̶iniwa ane nicoteloco nibaanco me ɡ̶oneɡ̶egi,
idaaɡ̶idoa anoiciaceeketege Waxacoco,
leeditibige midioka limedi me joɡ̶eeɡ̶atiogi,
jiweniɡ̶idenaɡ̶a, jocaɡ̶anaɡ̶atiogi,
codaa me jikanaɡ̶atece ane naɡ̶atetigi.”
14 Odaa niɡ̶ijoa cwaatolo ewikaɡ̶a joɡ̶oigidi, modi, “Ewi! Jiɡ̶idaaɡ̶ee (Amém)!” Odaa niɡ̶ijoa 24 lacilodi ja dakagitiniwace, joɡ̶oiweniɡ̶ide niɡ̶idi anidioka limedi me newiɡ̶a.