Kọ̃kọ̃bị́ ãlu ni Páũlũ ní sĩí sẽé ꞌbá
Tẽsãlõníkẽ
vé rĩ pi ní rĩ
Tã búkũ rĩ vé rĩ ã ũlũngárá
Páũlũ íꞌdó kãnísã ãngũ Tẽsãlõníkẽ vé rĩ agá (Ẹ̃zị́ 17). Tẽsãlõníkẽ ri kụ̃rụ́ ãmbúgú ãngũ Mãkẽdõníyã vé rĩ agá, ãngũ ĩ ní zịị́ Gị̃rị́kị̃ rĩ vé wọ̃ọ́kọ̃ ụ́rụ́lé rú rĩ gé. Páũlũ nga mbẽlẽŋá mụụ́ ꞌdãásĩ rá, ãꞌdiãtãsĩyã Yãhụ́dị̃ ụrụkọ ní lẽé ĩri rụụ́ rĩ sĩ. Vụ́drị̃ ni gé, Tĩmõtéyõ riípi ĩri ẽ ĩzã koópi rĩ ní lũzú ĩri ní kĩnĩ, kộpi ã rikí dõ Kũrĩsĩtĩyánĩ rĩ pi ọ̃cụ̃ụ́ drãáãsĩyã, kộpi ꞌbãkí ẹ́sị́ kuú Múngú drị̃gé. Páũlũ sĩ kọ̃kọ̃bị́ ꞌdĩri kộpi ẽ ẹ́sị́ ímbázú, ãzini tã kộpi ní zịị́ rĩ újázú.
Kọ̃kọ̃bị́ ꞌdĩri agá, Páũlũ sẽ Múngú ní õwõꞌdĩfô Kũrĩsĩtĩyánĩ Tẽsãlõníkẽ agá rĩ pi vé ẹ̃ꞌyị̃ngárá ã tã sĩ, ãzini kộpivé lẽngárá ã tã sĩ. Ũlũ kpá kộpi ní ívé adringárá Kũrĩsĩtĩyánĩ rú kộpi ãsámvú gé rĩ vé tã. Ũlũ kpá kộpi ní tã úmvúlésĩ ímụ́pi ꞌi ngaápi Kũrĩsĩtĩyánĩ rĩ pi ã rụ́ꞌbá gá kộpivé drãngárá ã vụ́drị̃ gé rĩ vé tã, ãzini ũlũ tã úmvúlésĩ ímụ́pi ꞌi ngaápi sâ Yẹ́sụ̃ ní ímụ́zú ímvízú rĩ gé rĩ vé tã. Ímbá kộpi ní lẹ́tị adrizú ãní múké cĩmgbá cazú ụ́ꞌdụ́ Yẹ́sụ̃ ní ímvízú rĩ gé rĩ vé tã.
1
Páũlũ sẽ mõdó ꞌbá Tẽsãlõníkẽ vé rĩ pi ní
1 Ma Páũlũ ꞌi, ꞌbâ Sílã be Tĩmõtéyõ sĩ, ꞌbá sĩkí kọ̃kọ̃bị́ ꞌdĩri sẽé ĩmi ní, ĩmi ꞌbá kãnísã vé adriꞌbá kụ̃rụ́ Tẽsãlõníkẽ vé rĩ agá, Múngú ꞌbá Ẹ́tẹ́pị ri ẹ̃ꞌyị̃ꞌbá gí, ãzini Úpí Yẹ́sụ̃ Kúrísítõ ri ẹ̃ꞌyị̃ꞌbá gí rĩ pi. Ẹ́sị́ múké Múngú vé rĩ, ãzini tãkíri ĩrivé rĩ ã adri ĩmi be.
Ẹ̃ꞌyị̃ngárá ꞌbá Tẽsãlõníkẽ gá rĩ pi vé rĩ
2 Ụ́ꞌdụ́ ãlu ãlu, ꞌbâ ri õwõꞌdĩfô sẽ Múngú ní ĩmi tã sĩ céré, ꞌbá kãdõ rií Múngú ri zịị́, ꞌbâ ri zị ĩmi ní ĩndĩ.
3 ꞌBá kãdõ rií ꞌbá Ẹ́tẹ́pị Múngú ri zịị́ ĩmi tã sĩ, ꞌbâ ri zị ẹ̃zị́ ĩmi ní ngaá ẹ́sị́ be céré ẹ̃ꞌyị̃ngárá be rĩ ã tã sĩ, ãzini ꞌbâ ri zị ẹ̃zị́ ĩmi ní ngaá lẽngárá be rĩ ã tã sĩ, ãzini ꞌbâ ri zị ĩmi ní ẹ́sị́ ꞌbãá ꞌbávé Úpí Yẹ́sụ̃ Kúrísítõ drị̃gé rĩ ã tã sĩ.
4 Má ẹ́drị́pị́ị má ọ́mvụ́pị́ị, ꞌbá nị̃kí rá ꞌyozú kínĩ Múngú lẽ ĩmi rá, ũpẽ ĩmi adrií ꞌbá ívé ni pi.
5 Ãꞌdiãtãsĩyã ꞌbá ní ụ́ꞌdụ́kọ́ múké rĩ jịzú ũlũzú ĩmi ní rĩ gé, ꞌbá ũlũkí ꞌyéŋá átángá ꞌbá tị gé rĩ ọ́ꞌdụ́kụ́lẹ kuyé, ụ́ꞌdụ́kọ́ múké ꞌbá ní jịị́ ũlũú rĩ ũkpõ be, Índrí Uletere rĩ iꞌda ĩmi ní ꞌyozú kínĩ, tã ꞌbá ní ũlũú ĩmi ní rĩ, ĩri tã áda. Ĩmi nị̃kí ꞌbávé adringárá ĩmi ãsámvú gé ĩmi ĩzã kozú rĩ rá.
6 Ĩmi nyakí dõ ĩzãngã ụ́ꞌdụ́kọ́ múké rĩ ã tã sĩ ambamba drãáãsĩyã, Índrí Uletere rĩ vé ũkpõ sĩ, ĩmi ẹ́ꞌyị́kí ụ́ꞌdụ́kọ́ rĩ ãyĩkõ be ambamba. ꞌDĩri ĩmi ũbĩkí tã ꞌbá ní ꞌoó rĩ ã pámvú, ãzini Úpí Yẹ́sụ̃ ní ꞌoó rĩ ã pámvú.
7 Tã ꞌdĩri sĩ, ĩmi ufukí adrií ụ̃ꞌbị̃tã rú ꞌbá Yẹ́sụ̃ ri ẹ̃ꞌyị̃ꞌbá gí ãngũ Mãkẽdõníyã vé rĩ agá, ãzini ãngũ Ãkáyã vé rĩ agá rĩ pi ní.
8 Ĩmivé tã sĩ, sẽ ụ́ꞌdụ́kọ́ múké Úpí Yẹ́sụ̃ vé tã sĩ rĩ kụ mụzú ãngũ Mãkẽdõníyã vé rĩ agásĩ, Ãkáyã vé rĩ agásĩ, ãngũ rĩ pi agásĩ céré. Ẹ̃ꞌyị̃ngárá ĩmi ní Múngú ri ẹ̃ꞌyị̃zú rĩ vé tã kụ mụzú ãngũ rĩ pi agásĩ céré gí, ꞌbá lẽkí tã ni átá ĩmi ní dị̃ị́ ku.
9 Ãꞌdiãtãsĩyã kộpi ũlũkí tã ĩmi ní ꞌbâ ẹ́ꞌyị́zú ẹ́sị́ be céré rĩ vé tã rá, ãzini kộpi ũlũkí tã ĩmi ní gãzú ngá ĩ ní údé múngú rú rĩ pi ị̃njị̃gá sĩ rĩ vé tã rá, ãzini kộpi ũlũkí tã ĩmi ní ẹ́sị́ újázú Múngú áda ídri rú ĩmi ní ẹ̃zị́ ngaá ĩri ní rĩ vé tã rá,
10 ãzini kộpi ũlũkí tã ĩmi ní ẹ́sị́ ꞌbãzú Múngú vé Mvá ĩri ní ingaá gõó ídri rú drãngárá gálésĩla rĩ vé ĩgõngárá ꞌbụ̃ gélésĩ rĩ vé tã rá. Mvá ꞌdĩri Yẹ́sụ̃ ꞌi, ĩri úmvúlésĩ ímụ́ ꞌbâ pa Múngú vé jĩkó tã lịzú rĩ agásĩ nĩ.