Kọ̃kọ̃bị́ ị̃rị̃ ni Páũlũ ní sĩí sẽé ꞌbá
Tẽsãlõníkẽ
vé rĩ pi ní rĩ
Tã búkũ rĩ vé rĩ ã ũlũngárá
Páũlũ sĩ kọ̃kọ̃bị́ ꞌdĩri sẽé Kũrĩsĩtĩyánĩ Tẽsãlõníkẽ vé rĩ pi ní, ị́sụ́ ãkũdẽ sĩ kọ̃kọ̃bị́ drị̃drị̃ 1 Tẽsãlõníkẽ rĩ gí. Sĩ kọ̃kọ̃bị́ ꞌdĩri sâ mãdãŋá agá, ꞌdụ caá mbãá kárákará kuyé. Sĩ kộpi ní kĩnĩ, ã rikí dõ Kũrĩsĩtĩyánĩ rĩ pi ọ̃cụ̃ụ́ drãáãsĩyã, lẽ kộpi ã tukí pá tị́tị́ ĩvé ẹ̃ꞌyị̃ngárá agá. ꞌBá ụrụkọꞌbée rikí ũlũú kộpi ní kínĩ, Kúrísítõ ímví ĩgõó gí, dõku ĩri ímví ĩgõ úꞌdíkírĩŋá nõgó, lẽ kộpi ã ngakí ẹ̃zị́ ku. ꞌBo Páũlũ ꞌyo kộpi ní kĩnĩ, kộpi ã yịkí ꞌbá ꞌdíni ꞌdĩꞌbée vé tã ku. ꞌYo kộpi ní kĩnĩ, lẽ Kũrĩsĩtĩyánĩ rĩ pi ã adrikí ũvú rú ku, ãꞌdiãtãsĩyã Kúrísítõ ní drĩ ícázú kuyé rĩ gé, tã ũnjí ri ímụ́ ga ambamba vũ drị̃gé nõgó, drị̃koma adriípi ũnjí rĩ, ĩri ꞌbá Múngú vé rĩ pi ẽ drị̃ ụ́cị́, kộpi Múngú ri gã ãní sĩ.
1
Páũlũ sẽ mõdó ꞌbá Tẽsãlõníkẽ vé rĩ pi ní
1 Ma Páũlũ ꞌi, ꞌbâ Sílã be Tĩmõtéyõ sĩ, ꞌbá sĩkí kọ̃kọ̃bị́ ꞌdĩri sẽé ꞌbá adriꞌbá kãnísã kụ̃rụ́ Tẽsãlõníkẽ vé rĩ agá, Múngú ꞌbá Ẹ́tẹ́pị ri ẹ̃ꞌyị̃ꞌbá gí, ãzini Úpí Yẹ́sụ̃ Kúrísítõ ri ẹ̃ꞌyị̃ꞌbá gí rĩ pi ní.
2 Ẹ́sị́ múké, ãzini tãkíri ꞌbá Ẹ́tẹ́pị Múngú vé rĩ, ãzini Úpí Yẹ́sụ̃ Kúrísítõ vé rĩ ã adri ĩmi be.
Páũlũ zị Múngú ri ꞌbá Tẽsãlõníkẽ vé rĩ pi ní
3 Má ẹ́drị́pị́ị má ọ́mvụ́pị́ị, ụ́ꞌdụ́ céré ꞌbâ ri õwõꞌdĩfô sẽ Múngú ní ĩmi tã sĩ, ãꞌdiãtãsĩyã ĩmivé ẹ̃ꞌyị̃ngárá, ãzini ĩmivé lẽngárá ĩmi ãsámvú gé sĩ rĩ ní rií mụụ́ drị̃drị̃ rĩ sĩ.
4 ꞌBá kãnísã vé rĩ pi ãsámvú gé, ꞌbâ ri ĩmî rụ́ íngú, ãꞌdiãtãsĩyã ụ́ꞌdụ́ ĩ ní ĩmi ọ̃cụ̃zú, ãzini ĩmi ní ĩzãngã nyazú kárákará rĩ gé, ĩmi úmbékí ẹ́sị́ ĩzãngã rĩ ã nyangárá gá rá.
5 Ẹ́sị́ ĩmi ní úmbé ĩzãngã nyazú ꞌdĩri lũ ꞌyozú kínĩ, Múngú ri tã lị pịrị, ĩri ĩmi ãꞌyĩ fi ívé mãlũngã agá ꞌdãá rá.
6 Múngú ri tã lị pịrị, ĩri ímụ́ ꞌbá ĩmi ꞌoꞌbá ũnjí rĩ pi ĩrĩŋã rá,
7 Ĩmi ꞌbá ĩzãngã nyaꞌbá rĩ pi, Múngú ri sẽ ĩmî rụ́ꞌbá ri ímụ́ ndrĩ rá, ĩri kpá sẽ ꞌbâ rụ́ꞌbá ri ímụ́ ndrĩ rá. Tã ꞌdĩri ímụ́ ꞌi nga lókí Úpí Yẹ́sụ̃ ní úmvúlésĩ ímụ́zú ꞌbụ̃ gélésĩ, ꞌi iꞌdazú ãcí be ívé mãlãyíkã ũkpõ be rĩ pi be rĩ gé.
8 Múngú ri ímụ́ ꞌbá ꞌi nị̃ꞌbá kuyé rĩ pi ĩrĩŋã rá, ãzini ĩri ímụ́ ꞌbá ꞌbávé Úpí Yẹ́sụ̃ vé ụ́ꞌdụ́kọ́ múké rĩ gãꞌbá sĩ rĩ pi ĩrĩŋã rá.
9 Ĩ ímụ́ ꞌbá ꞌdĩꞌbée ĩrĩŋã mụzú ụ̃dụ̃ ãkó. Ĩ kộpi dro Úpí Yẹ́sụ̃ ã gãrã gá sĩ rárá rú, kộpi ícókí adrií ĩrivé dị̃ngárá pọ̃wụ̃pọ̃wụ̃ ũkpõ be ꞌdĩri ã gãrã gá ku.
10 Ụ́ꞌdụ́ Úpí Yẹ́sụ̃ ní ímvízú rĩ gé, ĩrivé ꞌbá uletere rĩ pi ímụ́ ĩri íngú rá, ãzini ꞌbá Yẹ́sụ̃ ri ẹ̃ꞌyị̃ꞌbá gí rĩ pi céré ímụ́ ãyãyã. Ĩmi kpá Yẹ́sụ̃ ri íngú rá, ãꞌdiãtãsĩyã ĩmi ní tã ꞌbá ní ũlũú ĩmi ní rĩ ẹ̃ꞌyị̃ị́ gí rĩ sĩ.
11 Ĩmi ní ẹ̃ꞌyị̃ị́ gí rĩ sĩ, ꞌbâ ri Múngú ri zị ĩmi ní ụ́ꞌdụ́ céré, ã ko rí ĩmi ĩzã, ĩmi adrikí rí sụ̃ ĩri ní lẽé rĩ tị́nị. Ãzini ꞌbâ ri Múngú ri zị, ã sẽ rí ĩmi ní ũkpõ, ã ko rí ĩmi ĩzã tã múké ĩmi ní lẽé rĩ pi ꞌozú, ĩmi ngakí rí ẹ̃zị́ ĩmi ní íꞌdó ngaá ĩmivé ẹ̃ꞌyị̃ngárá agá rĩ mụzú drị̃drị̃.
12 ꞌBâ ri Múngú ri zị ꞌdíni, ĩmi ꞌbá Yẹ́sụ̃ ri ẹ̃ꞌyị̃ꞌbá gí rĩ pi ẽ íngúkí rí ꞌbávé Úpí Yẹ́sụ̃ ri íngúngũ, Yẹ́sụ̃ ẽ íngú rí kpá ĩmi íngúngũ. Tã ꞌdĩri ꞌi nga ẹ́sị́ múké Múngú vé rĩ ã tã sĩ, ãzini ẹ́sị́ múké Úpí Yẹ́sụ̃ Kúrísítõ vé rĩ ã tã sĩ.