2
Yónã zị Úpí Múngú ri ị̃ꞌbị́ agá ꞌdãá
1 Yónã ri ívé Úpí Múngú ri zịị́ ị̃ꞌbị́ agá ꞌdãlé.
2 Ĩri ní ꞌyozú kĩnĩ,
“Ĩzãngã má ní ị́sụ́ rĩ agá, Úpí Múngú, á zị mi,
ꞌí yị ma rá.
ꞌBụ́ ãngũ sị̃zú rĩ agá ꞌdãá, á zị mi mâ ĩzã koó,
ꞌí yị ma rá.
3 ꞌÍ ꞌbe ma tĩí yị̃ị́ tafu rĩ ã ndụ́gé ꞌdãá,
á tĩ yị̃ị́ tafu kụụ́pi kụkụ rĩ ã ndụ́gé ꞌdãá,
yị̃ị́ rĩ ĩmũlũ ma rá.
Ũlí mí ní sẽé vịị́ ũkpõ be ꞌdĩri,
sẽ yị̃ị́ rĩ ĩmũlũ ma céré.
4 Má ụ̃sụ̃ déna,
mí adi ma gí,
má ícó gõó
mívé jó ãmbúgú uletere rĩ ndreé dị̃ị́ ku.
5 Á tĩ yị̃ị́ kụụ́pi kụkụ rĩ ã ndụ́gé ꞌdãá,
yị̃ị́ rĩ ĩmũlũ ma céré,
ásé dụụ́pi yị̃ị́ agá ꞌdãá rĩ ĩmũlũ mâ drị̃ céré.
6 Á ꞌde tĩí írã ã ndụ́gé ꞌdãá,
nyọ̃ọ́kụ́ rĩ ọ̃zụ̃ mâ drị̃ céré,
ꞌbo mávé Úpí Múngú,
mí ídrí ma ꞌbụ́ agá ꞌdãásĩ rá.
7 Úpí Múngú, má kã ámá mávé ídrí lẽ fũúfũ,
á zị mi,
mávé zịngárá ca
mívé jó ãmbúgú uletere rĩ agá ꞌdãá, ꞌí yị ma rá.
8 ꞌBá riꞌbá ngá ĩ ní údé drị́ sĩ rĩ ị̃njị̃ꞌbá múngú rú rĩ pi,
kộpi gãkí ẹ́sị́ múké Múngú vé rĩ sĩ.
9 ꞌBo ma mí ní úngó õwõꞌdĩfô sẽzú ni ngo,
ma mí ní rọ̃bọ̃ŋọ̃ zã.
Ũyõ má ní sõó rĩ, ma tã ni ꞌdụ nga rá.
Úpí Múngú ri ꞌbâ pa tã ũnjí agásĩ nĩ.”
10 Úpí Múngú ní ꞌyozú kĩnĩ, ị̃ꞌbị́ rĩ ẽ íwé Yónã ri ãmvé, ị̃ꞌbị́ rĩ ní Yónã rĩ íwézú nyọ̃ọ́kụ́ ãꞌwí rú rĩ drị̃gé ꞌdãá.