4
Iꞌdakí Yũwánĩ ní tã ĩ ní Múngú ri ị̃njị̃zú ꞌbụ̃ gé ꞌdãá rĩ
1 Tã ꞌdĩri ã vụ́drị̃ gé, ĩ ní má ní ị́ndrị́lị́kị́ ãzi iꞌdazú. Ị́ndrị́lị́kị́ rĩ agá ꞌdãá, á ndre kẹ̃ẹ́tị ꞌbụ̃ vé rĩ zị̃kí kú mgbọ. Á yị ụ́ꞌdụ́kọ́ ọ́ꞌụ́ sụ̃ jẽlẽgú vé rĩ tị́nị, ụ́ꞌdụ́kọ́ rĩ ꞌyo má ní kĩnĩ, “Mí ímụ́ má vúgá ꞌbụ̃ gé nõó, á lẽ mí ní tã ãzi ímụ́pi ꞌi ngaápi ni ũlũú.”
2 Mbẽlẽŋá Índrí Uletere rĩ ní ma ásúzú, má ní ꞌbá ãzi ndrezú úrí kuú lúpá drị̃gé mãlũngã ꞌbụ̃ vé rĩ gé ꞌdãá.
3 ꞌBá úrípi lúpá rĩ drị̃gé rĩ, rụ́ꞌbá ni índré sụ̃ írã mãlámãlá rú ũnyĩ be ĩ ní zịị́ jásĩpã rĩ tị́nị, ãzini írã ika ĩ ní zịị́ kãrĩnẽlíyã rĩ tị́nị. Gẹ́rị́ índrépi sụ̃ írã ị̃rị́bị̃lị́ rú ĩ ní zịị́ ẽmẽrídã rĩ tị́nị rĩ tra lúpá rĩ ã gãrã kụ́rụ̃.
4 Ũꞌbãkí lúpá pụ̃kụ́ ị̃rị̃ drị̃ ni sụ lúpá mãlũngã vé rĩ ã gãrã gá sĩ kụ́rụ̃, ꞌbá ambugu pụ̃kụ́ ị̃rị̃ drị̃ ni sụ úríkí kuú lúpá rĩ pi drị̃gé sĩ. Kộpi úsúkí ĩ bõngó imve imve ni pi sĩ, kụ̃lá kộpi ní úsú ĩ drị̃gé rĩ pi údékí ngá dábũ rú ni sĩ.
5 Ũvi ní gazú ãcí be lọ́kụ́lọ́kụ́ lúpá mãlũngã vé rĩ gé ꞌdãá. Ũꞌyũkí tãdúꞌbã ẹ́zị̂rị̃ ũꞌbãá rií dị̃ị́ lúpá mãlũngã vé rĩ ẹndrẹtị gé, tãdúꞌbã ẹ́zị̂rị̃ ꞌdĩꞌbée iꞌda índrí ẹ́zị̂rị̃ Múngú vé rĩ.
6 Lúpá Múngú vé rĩ ẹndrẹtị gé ꞌdãá, ãngũ rĩ ọ́gụ́ sụ̃ múndũrã tị́nị.
Á ndre ngá sụ ídri rú ni pi ĩnyiŋá lúpá rĩ ã gãrã gá sĩ kụ́rụ̃, ũꞌbãkí mị ngá sụ ídri rú ꞌdĩꞌbée ã rụ́ꞌbá gá sĩ, ẹndrẹtị gélésĩ, ãzini úgóró gálésĩ.
7 Ngá ãlu rĩ índré sụ̃ kẹ̃mị̃rọ́ tị́nị, ị̃rị̃ rĩ índré sụ̃ tị́ ágó tị́nị, na rĩ vé ẹndrẹtị índré sụ̃ ꞌbá áda vé rĩ tị́nị, sụ rĩ índré sụ̃ bị̃bị̃ riípi ngaápi nganga rĩ tị́nị.
8 Ngá sụ ídri rú ꞌdĩꞌbée ãrẽvú céré ãlu ãlu ụ̃pẹlẹ́ꞌbị́ be ázíyá ázíyá. Ũꞌbãkí mị kộpi ã rụ́ꞌbá gá sĩ kụ́rụ̃ cĩmgbá cazú kộpi ã ụ̃pẹlẹ́ꞌbị́ ã ndụ́gé sĩ céré. Ụ́ꞌdụ́ céré ụ̃tụ́ŋá sĩ, ãzini ị́nị́ŋá sĩ, kộpi újíkí ku, kộpi ri átá mụzú ꞌdíni,
“Úpí Múngú Ũkpõ ꞌDị́pa ri uletere, uletere, uletere,
ĩri ị́nọ́gọ́sị́ anigé, ãndrũ anigé, ĩri úmvúlésĩ ímụ́ rá.”
9 Ngá sụ ídri rú ꞌdĩꞌbée rikí ꞌBá úrípi lúpá drị̃gé adriípi ídri rú mụzú nyonyo rĩ íngú, rikí ĩri ị̃njị̃ị́, ãzini rikí ĩri ní õwõꞌdĩfô sẽé.
10 Sâ ãlu ãlu ꞌdĩri gé, ꞌbá ambugu pụ̃kụ́ ị̃rị̃ drị̃ ni sụ rĩ pi céré ũtị̃kí kũmũcí ꞌBá úrípi lúpá drị̃gé adriípi ídri rú mụzú nyonyo rĩ ẹndrẹtị gé, kộpi rikí ĩri ị̃njị̃ị́. Kộpi unjekí ĩvé kụ̃lá ĩ drị̃gé sĩ ũꞌbãá lúpá rĩ ẹndrẹtị gé ꞌdĩgé, kộpi rikí ꞌyo kínĩ,
11 “Múngú, mi múké agaápi rá rĩ, mi ꞌbávé Úpí, mi ꞌbávé Múngú.
ꞌBâ mi íngú, ꞌbâ mi ị̃njị̃, ũkpõ mívé rĩ ã mụ drị̃drị̃,
ãꞌdiãtãsĩyã ngá rĩ pi ãrẽvú céré ꞌí gbi mi ꞌi,
ngá mí ní gbií rĩ pi nóni anigé,
ãꞌdiãtãsĩyã mí lẽ kộpi ã adrikí sụ̃ ꞌdĩri tị́nị.”