2 KORINTIWU
Wotiya kǝnyindiye Bulusse jama Isaa gawu bǝrni Korintiyero ruwujǝgǝnadǝ
Badiduram
Bulus, ti kǝngayam Isa Almasiwuye, wotiyanju burwoyea jama Isaa gawu bǝrni Korintiyero alama saa findi wuri gai ngawo karmo-a karmolan cidu-a Isayen ruwuyeyeno, koro wotiya adǝa tayiro tussǝnni ngawo wotiyanju burwoye ruwujǝgǝnayen ruwuyeyeno. Sadǝn kǝngayamba kattuwuyeso laa Bulus-a nankǝngayamnju-aa rujane mananju ye awima gǝni wuljai. Ti bone cai. Adǝ nangaro wotiya adǝn Bulus nankǝngayamnjudǝ-a mananjudǝ-a jirero fǝleje dalil bone njanjuyedǝ, tima kambǝrsenju duno kaanjuro gǝni, Almasiwuyero cakkoro yeno. Nonowo, jiɍi bone Almasiwu canadǝa ni ye jaumaro yamidǝ gai, ngaima Almasiwulan ro boda ngǝwu fandǝmi.
Akko nashawa curo wotiya adǝyen dasaanadǝ:
Lewa-a Alaa wusedu-a (1.1-11)
Jaawu Bulusse kǝla waduwunjuyen (1.12–2.13)
Jaawu Bulusse kǝla kida aman bǝɍinnen (2.14–7.4)
Bulus lardu Makidoniyayen (7.5-16)
Wuɍi capta talaawa Isaa gawu Jerujalembe nangaro (8.1–9.15)
Dabbarda kǝnde Bulusse kǝnyakkuyero (10.1–12.21)
Marmarea-a lewa-a daryeye (13.1-14)
Wotiya kǝnyindiye Bulusse jama Isaa gawu bǝrni Korintiyero ruwujǝgǝnadǝ
LEWA-A ALAA WUSEDU-A
1
1 Wuma Bulus rawo Alayen kǝngayam Isa Almasiwuye-a kǝraminde Timoti-adǝ jama Alaye bǝrni Korintiyen dasaana-a muminna lardu Akayaye ngalan dasaana samma-aro:
2 Ala Bawande-a Kǝma Isa Almasiwu-a nayiro ser-a nanlewa-a njado!
Ala ro boda sammayedǝa wusedu
3 Bargaa Ala Bawa Kǝmande Isa Almasiwuye, Bawa kanjimaɍiye, Ala ro boda fiye yaye,
4 ti duwon basarinde samman ronde isabojiyidǝ. Adǝa dionjudǝ, andi ye ro boda na Alayen fandiyenadǝlan rangiye am basari fin yaye dasaanadǝye ronja isabogǝiye.
5 Jiɍi bone Almasiwu canadǝa andi ye jaumaro yaiyedǝ gai, ngaima Almasiwulan ro boda ngǝwu fandiye.
6 Basari kiyaiyea, adǝ ro bodando-a njǝkkawo fandondo-a nangaro, koro ronde boyenoa, bone yaiyenadǝa nayi ye nedduwe yawwaa, rondo bodaro.
7 Koro tǝmande kanjindon dunoa, bonedǝn nuwando mbejidǝ gai, ro bodadǝ yen nuwando mbejiro noniyena.
8 Kǝramiya, basari lardu Asiyayelan andia sawandǝnadǝa nonuwiya, rayiye. Tai daje dunonde koje, kutturo walsagane, har rondema fuddiyero tǝmaniyena.
9 Ai, andi kǝlandeman wowom karmoye gai fanniyena, ngaima tǝmande kǝlanden gǝni, Ala am sanunaa cǝsangidǝn kǝrga,
10 ti duwon karmo jiɍi adǝn samowona, fuwu yen samoyidǝ, timaro tǝmande njǝkkawoye kekkiye.
11 Nayi ye moduwalan banasanowo, ngainin moduwa am ngǝwuyen barga fandiye, kǝladǝn andi nangaro Alaa wusejai.
JAAWU BULUSSE KƎLA WADUWUNJUYEN
Kǝnsio Bulusse fuwuro gǝrduwu
12 Karwunde shedajǝnadǝ gai, andidǝ nanrashidu adamgǝnayen gǝni, ser Alayen, koro karwu tiloa-a nantayir Alaye-alan kǝndǝgai dunian diyena, masammanno nandon. Adǝma dǝlwu awulo bondeyedǝ wo.
13 Awo gade gǝni nayiro ruwunjagaiye, sai awo kǝranuwe asunuwi bas. Koro cotto asunuwiro tǝmakkǝna,
14 calan ganaro asunuwwadǝ gai. Awo ruwunjagaiyedǝ tima yim Kǝmande Isayen nayidǝ dǝlwunde awulo boyedǝ gai, andi ye dǝlwundo awulo boye.
15 Adǝa mǝrsanǝkkǝna nangaro, barga kawakyindi fandoworo nandoro burwon leduro raakko.
16 Ai, nandoyen lardu Makidoniyayero lekko, koro Makidoniyalan waldǝkke nandoro isǝkke cidi Yahudiyayero lekkoro banasǝgǝwiya, raakko.
17 Nia ngoduni adǝ, kǝskero dikkǝna wa? Ra, awo dikkidǝa kǝla hal kamben wa nianǝkke wuye: «Aaa,» nǝkke koro waldǝkke: «A'a,» nǝkki wa?
18 Ala amanmadǝ gai, kawuɍinde nandon mana jambaye gǝni.
19 Isa Almasiwu Tada Alaye ti duwon wu-a Silas-a Timoti-a nandon mawoniyenadǝ awo jireye-a kattuwuye-a gǝni, tilan kullum jirero waljǝna.
20 Ai, tilan waduwa Alaye samma jirero waljana, koro daraja Alayero tiyen andiye: «Amin!» niye.
21 Ala kǝlanjuma andi-a nayi-aa Almasiwulan kǝresane duno sade
22 tawanju gǝnasagane koro karwundero naptu rannero Ruhunju kekko.
23 Wu kǝla roniyeman, Aladǝma shedamani wo, bare hangalndo sangǝkkǝniro bǝrni Korintiyero waldǝkke kǝnde wayekko.
24 Kambǝrsendo raddiye gǝni, amma karwukǝjindoro sawawando kidayero walliyena, awoa kambǝrsendon dunoaro danuwwa.