IBRANAWU
Wotiya Ibranawu Isaa jaanadǝro ruwudǝgǝnadǝ
Badiduram
Wundu kitawu Ibranawuyea ruwujo bi saa fi ngawo karmo-a karmolan cidu-a Isayen tia ruwujǝnadǝa noniyende, amma ti kam duwon mana Isayea am Isa kǝlanjua fanjanayen cǝmowonadǝro noniyena. Bare yaudiya Isaa gawu kambǝrsenjan casambarǝnniro, ruwudumadǝ wotiya adǝa ruwuje tayiro Isa Almasiwudǝ Ala ye, adamgǝna ye nangaro, ti runju naptu solomaye katte Ala-a adamgǝna-ayen cǝdi yeno. Koro Isa jiɍi fin yaye malaiyawa so, nawiya samma soa ngalworo fǝleduro, karwunjaro duno cakke tayiro kambǝrselan dasaa, wuraja, kalkallo walja yeno.
Akko nashawa curo wotiya adǝyen dasaanadǝ:
Alaye Tadanjuyen mana njǝddo (1.1–4.13)
Isama ɍiman kura martawaa wo (4.14–10.18)
Sǝmo kasta-a karwuro duno njo-a (10.19–13.19)
Lewa daryeye (13.20-25)
Wotiya Ibranawu Isaa jaanadǝro ruwudǝgǝnadǝ
ALAYE TADANJUYEN MANA NJƎDDO
1
1 Kuren Ala gǝnagǝniro jiɍi gadegaden ci nawiyayen kaariyandero mana cǝddǝna,
2 amma jaman daryeye adǝn andiro Tadanjuyen mana seddo. Tia warasama awo sammayero kido, koro tiyen duniaa alakkeno.
3 Ti Tadadǝ yiyildu daraja Alaye, tima camuno kalkal naptunjuyedǝ wo, koro dunia ngasoa kǝnduwo mananjuyen roji. Ngawo adamgǝnaa biwuwalan tayirro kalakcǝnayen, samen kǝmboram Martawamayen napkeno.
Tadadǝ malaiyawaro kura wo
4 Kaalanju nantadaye warasajǝnadǝ cu malaiyawayero ngalwodǝ gai, tima tayiro kura wo.
5 Malaiyawaye finja gǝle Alaye ngalte tiro: «Ni Tadani, ku Bawanǝmbo wallǝkkǝna,» cǝne wuljuwo, bi kǝlanjun: «Wudǝ Bawanjuro wallǝkki, ti ye Tadaniro walji,» cǝne wuljo?
6 Koro walde sa karunju duniaro cuwudidǝn tiye: «Malaiyawa samma tiro ambǝccaa!»
7 Koro kǝla malaiyawadǝyen tiye: «Malaiyawanjua ruhuwaro cǝdi, kidawunju yea tǝlam kannuyero cǝdi,»
8 amma kǝla Tadadǝyen tiye: «Ala, kurisnǝm kǝrmaiye sawisoro dǝgai, koro kanǝm kǝrmaiyedǝ tima nanjire wo.
9 Nanjire raamma, jirenambu wanǝmma. Adǝma nangaro Ala Alanǝmdǝ nia kǝndawu karwukǝjiyen amanǝmbea kojǝnaro samngeno.»
10 Koro tiye: «Nidǝ, Kǝmande, badiduramnin fǝrdu duniaye gǝnayem, koro samedǝ ye kida mukkonǝmbe.
11 Tayidǝ sidagai, amma nidǝ dǝgami. Tayi samma kajǝmu gai dinjai,
12 barmus gai tayia kǝɍinǝmi, gǝmaje gai faldai, amma nidǝ faldǝmbaworo dǝgami, koro kawunǝm ye dajiwawo.»
13 Koro malaiyawaye finja gǝle Alaye ngalte tiro: «Namme kǝmborammilan duwon, kǝladowanǝmba si gǝnadurammǝmbo dikki!» cǝne wuljuwo?
14 Tayi samma wolodiya ruhuye am duwon njǝkkawo warasajaidǝro kida njǝddoro juwaada, gǝna?