1 YAHAYA
Wotiya kǝntiloye Yahayaye jama Isaa gawuro ruwujǝgǝnadǝ
Badiduram
Yahaya, ti kǝngayam Isa Almasiwuye, wotiyanju yakku alama saa firakku bi firakkun uwun gai ngawo karmo-a karmolan cidu-a Isayen ruwuyeno. Yahayadǝ tadawa Jabadiye falnja, tiro fuwura Isa jauro cǝraana ye cani, koro Linjila kǝndewuye-a Wahayi Yahayaye-aa ruwujǝna. Kǝla ruwuwu Isaa gawu jamannjuyen, ngawo sojiya bǝrni Rombe Jerujalem-a Fado Alaye-aa sijanayen, Yahaya nadǝa kolje bǝrni Afisayero leyeno. Curo jama Isaa gawuyen jǝktu jiɍi jiɍi mbeji nangaro, Yahaya nadǝn tayiro ruwujiye mana Alayea kasacca, kǝndo jireye cado, koro Ala-a amanja-a yea carawo yeno.
Wotiya kǝntiloye Yahayaye jama Isaa gawuro ruwujǝgǝnadǝ
1
Kalma roye
1 Awo tǝn badiduramnin dǝgana, awo fanniyena, awo simnden ruiyena, awo lawarniye mukkonde lejǝna, wotte lawar kǝla Kalma royedǝa nayiro wulnjagaiye.
2 Rodǝ fǝleyaada, koro tia ruiyena, koro tia shedaniye nayiro ro sawisoye Bawa-a rokko dasaana ye, andiro fǝledǝgǝna yedǝa wulnjagaiye.
3 Awo ruiye fanniyenadǝa nayi yero wulnjagaiye, ngainin nayi ye andi-a rokko naptu nanyaanaye diye. Ai, naptunde nanyaanayedǝn Bawa-a Tadanju Isa Almasiwu-a rokko kǝrgaiye.
4 Awo ania karwukǝjindedǝ kalkallo waljoro ruwuniye.
Aladǝ nur
5 Awo na Isayen fanniyena nayiro wulnjagaiyedǝ, tima Aladǝ nur, koro tilan duwu tǝmmaro bawo.
6 Andi ti-a rokko naptu nanyaanaye diye niye duwon duwulan dǝgaiyea, kattuwu kammiyena, jire diyewawo.
7 Amma nurlan dǝgaiyea, ti kǝlanju nurlan dǝganadǝ gai, kattenden naptu nanyaanaye diye, koro bu Tadanju Isayedǝ andia biwu sammalan tayirro kalansai.
8 Biwunde bawo niyea, kǝlande jambaniyena, koro jiredǝ andilan bawo.
9 Amma biwuwande wulliyea, tidǝ amanma ye, jirema ye, andiro biwuwande gawursagane jirenambu sammalan tayirro kalansai.
10 Amma biwu diyende niyea, tia kattuwumaro kalangiyena, koro mananju andilan bawo.