☰ 2 Yahaya 1
2 YAHAYA
Wotiya kǝnyindiye Yahayaye Isaa gawuro ruwujǝgǝnadǝ
Badiduram
Yahaya, ti kǝngayam Isa Almasiwuye, wotiyanju yakku alama saa firakku bi firakkun uwun gai ngawo karmo-a karmolan cidu-a Isayen ruwuyeno. Yahayadǝ tadawa Jabadiye falnja, tiro fuwura Isa jauro cǝraana ye cani, koro Linjila kǝndewuye-a Wahayi Yahayaye-aa ruwujǝna. Kǝla ruwuwu Isaa gawu jamannjuyen, ngawo sojiya bǝrni Rombe Jerujalem-a Fado Alaye-aa sijanayen, Yahaya nadǝa kolje bǝrni Afisayero leyeno. Curo wotiya adǝyen Yahaya kamu laa kǝreyadaro gala cǝdde am gadea jauro cǝrawo, am jambawuro hangal gǝnajo yeno.
Wotiya kǝnyindiye Yahayaye Isaa gawuro ruwujǝgǝnadǝ
1
Lewa
1 Wuma amwurawaye falnjadǝ* kamu kǝreyada-a yallanju-aro:† Curo jireyen njaraakkǝna, koro wu runi gǝni, am jire nojana samma ye, 2 dalilnjudǝ jiredǝ curonden dǝgana, koro andi-a rokko har abadaro dǝgai nangaro. 3 Jire-a kǝrawo-alan Ala Bawa-a Isa Almasiwu Tada Bawadǝye-a andiro ser-a kanjimaɍi-a nanlewa-a sadi.
Jire-a kǝrawo-a
4 Jiɍi Bawa andiro wada sadǝnadǝ gai, yallanǝmbe laanja kǝndǝgai jireye cadi nagǝkkǝna nangaro karwuni jauro kǝjiyeno. 5 To, kamu kǝreyada, kǝrma nia lowonjǝkki, wada bǝɍin gǝni, wada tǝn badiduramnin taiyenadǝa niro ruwunjǝgǝkki: Amandea rayiyo! 6 Kǝrawodǝ tima wadawanju gaiyo! Tǝn badiduramnin fannuwwadǝ gai, wadadǝ tima kǝrawolan dǝgaiwo!
7 Jambawu kada duniaro caluwuna, tayi duwon Isa Almasiwu tiyilan isǝnaro kasaccaiwawodǝ. Kam adǝ gai tima jambama ye, waduma Almasiwuye‡ ye wo. 8 Bare awo ngǝnǝptiye fanduwwadǝa fudduwwi, amma mukowa cap fandoworo hangal gǝnanowo! 9 Wundu duwon kǝla alamdu Almasiwuyen dǝgannin fuwuro lejimadǝ karwunjun Ala bawo. Amma kam duwon alamdudǝlan dǝganamadǝ Bawa-a Tadanju-aa cuwandǝna. 10 Kam laa alamdu adǝa cuwudǝnnin nandoro isia, bare tia fanndon sawuwwi bi lewanuwwi, 11 awoa kam tia lewajǝnadǝ kidanju diwidǝro mukkonju cakki.
Lewa daryeye
12 Awo ngǝwu nayiro ruwuduwuro takkǝna duwon, kakkadu-a tadduwa-alan gǝni, cujudǝro karwukǝjinde tai daje kǝjijoro, nandoro isǝkke sim-a sim-alan mananǝkkiya, tǝmakko. 13 Yalla yanǝmgǝna kǝreyadadǝye§ nia lewanjai.
* 1:1 amwurawaye falnjadǝ - Fuwuma laa jama Isaa gawu. † 1:1 kamu kǝreyada-a yallanju-aro - Jamanja Isaa gawuye. ‡ 1:7 waduma Almasiwuye - Kam duwon sa njeroramben Isa Almasiwu-a jama tia gawu-aa wajimadǝ. § 1:13 yalla yanǝmgǝna kǝreyadadǝye - Jamanju Isaa gawuye.
☰