4
Ngama mzinongo
1 Avo, Imulungu kwa bazi jake, katugwaa sang'hano ino, na siye hatubwela kuchugu.
2 Tuzileka mbuli zose zigela kinyala na za kinyelegezi, hatulonga mbuli za uvizi hebu kuilonga vihile mbuli ya Imulungu. Lakini kwa kulonga ukweli mgameso ga Imulungu, ili wayagwe watugese mmizoyo yao kamba totamaniligwa.
3 Avo kamba Mbuli Inogile ituwapetela wanhu ifisigwa, ifisigwa kwa hewo opotela.
4 Hawatogola kwavija Mwenembago, imulungu wa isi ino kazigela nzewele zao mdiziza, ili sikuwawone mulenge wa Mbuli Inogile ya ukulu wa Kilisito, yaigalile na Imulungu kwa kila kinhu.
5 Kwavija hatuipetela wenyego, ila tompeta Kilisito yeli Mndewa na siye twa wasang'hanaji zenu kwa Yesu.
6 Imulungu yalongile, “Mulenge umwemwese kulawa mdiziza!” Ayo yatendile mulenge wake umwemwese mmizoyo yetu, katugwelela mulenge wa nzewele za ukulu wa Imulungu mkihanga cha Yesu Kilisito.
7 Lakini siye tuli na ngama ino tuigala na nongo, ili kulagusa kamba nguvu ng'hulu yolawa kwa Imulungu, siyo kumwetu.
8 Siku zose togaya, lakini hatuhondigwa, tokona shaka, lakini hatubwela kuchugu,
9 todununzigwa, lakini hatulekigwa kutazigwa, tolagazigwa hasi, lakini hatubanangigwe bule.
10 Kipindi chose toisola ifa ya Yesu mzing'huli zetu, ili ugima wa Yesu vivija oneke mzing'huli zetu.
11 Siku zose za ugima wetu twa mdizumozumo da ifa mbuli ya Yesu, ili ugima wake oneke mzing'huli zetu zifa.
12 Avo, ifa yosang'hana mgati mmwetu, lakini ugima osang'hana mgati mmwenu.
13 Maandiko Gang'alile golonga, “Nitogola lekaavo nonga.” Kwa kutamanila kukuja, na siye vivija totogola lekaavo tolonga,
14 kwavija tojuwa kamba Imulungu yamzilibule Mndewa Yesu kwa wafile, vivija kotuzilibula siye hamoja na Yesu, na kotwika siye na mweye kuulongozi wake.
15 Kwavija gano gose kwa sama ya mweye, ili ng'hekewa ya Imulungu iwavikile wanhu bwando, itende wamtogole Imulungu na wamgwelele ukulu.
Kukala kwa kumtamanila Imulungu
16 Lekaavo hatubwela kuchugu. Hata kamba ng'huli zetu zofa, lakini siku zose loho zetu zotendigwa za sambi.
17 Magazo gotupata gabuha na gokala kwa kipindi kidodo, lakini gotugalila ukulu wa milele kubanza gago gamagazo.
18 Avo sambi tugese vinhu vikoneka, ila tugese vija havikoneka. Kwavija vinhu vikoneka vokala kwa kipindi kidodo, lakini vija havikoneka vabule uhelelo.