5
Malagizo Longo
(Kulawa 20:1-17)
1 Musa kawakema wanhu wose wa Izilaeli na kawalongela, “Mweye wanhu wa Izilaeli, tegelezeni mafundizo na malagizo goniwalongela lelo. Ifunzeni na mugagoge goya.
2 Mndewa Imulungu, Imulungu wetu, katenda lagano na siye ako kulugongo lwa Holebu.
3 Hatendile lagano dino na iwahenga zetu, lakini katenda na siye wose tuli wagima lelo.
4 Mndewa Imulungu kalonga na mweye meso kwa meso kulawa kuko kulugongo hagati ya umoto.
5 Kipindi acho niye ng'hala nimile hagati yenu na Mndewa Imulungu, na niwalongela gaja gayalongile, kwavija mweye mudumba uja umoto na hamukwelile kulugongo.
“Mndewa Imulungu kalonga,
6 ‘Niye ayo Mndewa Imulungu, Imulungu wako nikulavile mwiisi ya Misili, kuko kuukalile mtumwa.
7 “ ‘Sikuumtambikile imulungu yoyose iyagwe ila niye.
8 “ ‘Sikuutende kinyago kiigalile na kinhu chochose kili kuulanga hebu mwiisi hebu mgamazi hasi ya isi ili ukitambikile.
9 Sikuuvifugamile hebu kuvitambikila, kwavija niye Mndewa Imulungu, Imulungu wako nina migongo. Nowakoboza wana mbuli ya nzambi za tata zao, hata ulelo wa kadatu na wa ikane wa waja onihila.
10 Lakini nowatendela ganogile maelufu ga ulelo ga wanhu waja oninogela na kugagoga malagizo gangu.
11 “ ‘Sikuuditambule bule twaga jangu, niye Mndewa Imulungu, Imulungu wako, kwavija niye Mndewa Imulungu sileka kumkoboza munhu yoyose yoditambula bule twaga jangu.
12 Ikumbuke siku ya kubwihila kwa kuitenda ing'ale kamba Mndewa Imulungu, Imulungu wako viyakulagize.
13 Kwa siku sita usang'hane na utende mbuli zako zose,
14 lakini siku ya saba, siku ya kubwihila ya Mndewa Imulungu, Imulungu wako. Siku ayo sikuusang'hane sang'hano yoyose, gweye mwenyego hebu mwanago wa kimbigalo hebu wa kitwanzi hebu mtumwa wako wa kimbigalo hebu wa kitwanzi hebu ng'ombe wako hebu kihongwe wako hebu mnyama wako yoyose, hebu munhu baki iyokala mwiisi yako, ili mtumwa wako wa kimbigalo na wa kitwanzi wabwihile kamba viubwihila gweye.
15 Kumbuka kamba gweye kukala mtumwa ako mwiisi ya Misili, na Mndewa Imulungu, Imulungu wako, kakulava kuko kwa udahi wake mkulu, avo Mndewa Imulungu, Imulungu wako kakulagiza uigoge siku ya kubwihila.
16 “ ‘Wategeleze tatako na mamako, kamba Mndewa Imulungu, Imulungu wako viyakulagize, utende vivo ili ukale mgima siku nyingi na mbuli zako zokugendela goya mwiisi iyokugwelela Mndewa Imulungu, Imulungu wako.
17 “ ‘Sikuukome.
18 “ ‘Sikuutende ugoni.
19 “ ‘Sikuwibe.
20 “ ‘Sikuumulavile miyago usindila wa uvizi.
21 “ ‘Sikuumsulukile mwehe wa miyago, sikuuisulukile ng'anda ya miyago hebu mgunda wake hebu mtumwa wake wa kimbigalo hebu wa kitwanzi hebu ng'ombe wake hebu kihongwe wake hebu kinhu chochose kiyelinacho.’
22 “Gano gago malagizo gayalongile Mndewa Imulungu kwa sauti ng'hulu kulawa muumoto na mdiwingu na ziza totolo vimuiting'hane ako kulugongo na hongeze mbuli yoyose. Abaho kagandika malagizo gago mna ivibao vibili va mabwe na kanigwaa niye.
Wanhu odumba
(Kulawa 20:18-21)
23 “Vimuihulike sauti yake kulawa mdiziza totolo, na uchanha ya lugongo lukalile lokwaka, ivilongozi wenu wa makabila na iwavele wenu weza kumwangu,
24 walonga, ‘Mndewa Imulungu, Imulungu wetu katulagusila ukulu wake na udahi wake, tuihulika sauti yake kulawa hagati ya umoto. Lelo tumona Imulungu kolonga na wanhu, na iwanhu wang'hali wagima.
25 Lakini sambi habali tufe? Moto uno mkulu otusakaza, na siye tofa kamba twahaihulika kabili sauti ya Mndewa Imulungu, Imulungu wetu.
26 Vino, munhu gani yahulike sauti ya Imulungu yeli mgima kolonga kulawa hagati ya umoto, kamba vituhulike siye, abaho kawa mgima?
27 Gweye uchole behi, ukategeleze gose goyolonga Mndewa Imulungu, Imulungu wetu, abaho utulongele gose gonda yakulongele. Siye togategeleza na kugagoga.’
28 “Avo, Mndewa Imulungu kawahulika vimulongile vivo, avo kanilongela, ‘Nigahulika gose gawalongile iwanhu wano, walonga goya.
29 Maza wagelegezaga vivo siku zose na kunidumba niye na kugoga malagizo gangu! Wahagendelele vinogile hewo wenyego na ulelo wao siku zose.
30 Genda kawalongele wabwele mvibanda vao.
31 Lakini gweye wime baha behi na niye, na niye nokulongela gaja golondigwa na malagizo gose na mafundizo gonda uwafunze wagoge ako mwiisi iniwagwelela iwe yao.’
32 “Avo, muiteganye musang'hane kamba viyawalagize Mndewa Imulungu, Imulungu wenu, gagogeni gose na sikumuleke kinhu chochose.
33 Kwelelezeni gose gayawalagize Mndewa Imulungu, Imulungu wenu ili muwe wagima na mugendelele goya na mukale siku nyingi mwiisi yonda muisole.