10
Mbalangulu
1 Abaho Mndewa Imulungu kamulongela Musa, “Genda kwa Falao, kwavija niye niwatenda heyo na watawala zake wawe na mizoyo midala ili nitende unzonza hagati yao.
2 Avo, mweye muwasimulile wanenu na wazukulu zenu, viniwagelile bumbuwazi Wamisili kwa kutenda vilaguso hagati yao, na baho mweye mojuwa kamba niye na Mndewa Imulungu.”
3 Avo Musa na Haluni wachola kwa Falao wamulongela, “Mndewa Imulungu wa Waebulania kolonga, ‘Mbaka lini kolema kugwa kingubanguba kuulongozi wangu? Waleke wanhu zangu wasegele, wakanitambikile.
4 Wahalema kuwaleka wanhu zangu wasegele, mayo nogala mbalangulu mwiisi yako.
5 Isi yose yogubikigwa na mbalangulu na kuduhu hanhu honda honeke. Na woja kila kinhu kidodo kisigasigwe na mvula ya mabwe, vivija woja hata mibiki isigale.
6 Mbalangulu wao omema mzing'anda zako na mzing'anda za watawala zako na ng'anda za Wamisili wose. Okuwa wengi hata wahenga zenu hawanachona kinhu kamba acho toka viwaleleke mbaka lelo.’ ” Abaho Musa kasegela kwa Falao.
7 Watawala wa Falao wamuuza, “Vino, munhu ino kotugaza mbaka lini? Waleke Waizilaeli wasegele, wakamtambikile Mndewa Imulungu wao. Vino hulola kamba isi ya Misili yobanangika?”
8 Abaho Musa na Haluni wakemigwa wabweleganye kwa Falao, nayo Falao kawalongela, “Gendeni mkamtambikile Mndewa Imulungu wenu. Lakini nouza, kina nani onda wachole hamoja na mweye?”
9 Musa kamwidika, “Tochola hamoja na wabwanga na wavele na wanetu wa kimbigalo na wa kitwanzi, ng'hondolo na ng'ombe na mbuzi, kwavija tolondigwa tukamtendele nyimwilinyimwili Mndewa Imulungu.”
10 Lakini Falao kawalongela, “Mawe! Mndewa Imulungu yawe hamoja na mweye, kamba nahawatogolela mweye mugende, hamoja na watwanzi na wanenu! Niye nokona mweye mogelegeza gehile mmizoyo yenu.
11 Bule! Wambigalo waiyeka wao onda wachole kumtambikila Mndewa Imulungu, kwavija mbuli ayo iyo imulonda.” Abaho Musa na Haluni wawingigwa kuulongozi wa Falao.
12 Mndewa Imulungu kamulongela Musa, “Golosa fimbo yako uchanha mwiisi ya Misili, ili mbalangulu walawilile na wengile mmigunda na waje minoga yose ili mmigunda, na kila kinhu kilekigwe kunangigwa na mvula ya mabwe.”
13 Avo Musa kagolosa fimbo yake uchanha mwiisi ya Misili. Mndewa Imulungu kagala beho kulawa mwambu wa kudilawilila zuwa na beho dijo dibuma uchanha mwiisi, imisi mbaka kilo chose. Imitondo beho dijo digala mbalangulu.
14 Mbalangulu awo wenela kila hanhu mwiisi ya Misili, wahumulukila uchanha mwiisi yose. Mbalangulu awo wakala madali kwa madali. Hawanalawilila mbalangulu kamba wano na honda walawilile kabili.
15 Waigubika isi yose ya Misili mbaka ikala ziza. Wakija kila kinhu kisigasigwe na mvula ya mabwe na waija minoga na matunda gakalile mna imigunda. Kuduhu tepo jojose disigale mdibiki wala mna iminoga mwiisi ya Misili.
16 Abaho Falao kalopola kawakema Musa na Haluni, kawalongela, “Niye nibananga kwa Mndewa Imulungu wenu, na kumwenu mweye.
17 Avo nowapula mugele kumgongo nzambi zangu mwanza uno na Mndewa Imulungu wenu yanisegesele mbuli ino igala ifa.”
18 Musa kasegela kwa Falao na kachola kumpula Mndewa Imulungu.
19 Nayo Mndewa Imulungu kagala beho kulu kulawa mwambu wa kudihongela zuwa diwapwililisa mbalangulu wose na diwagala mbahali ya Shamu. Kuduhu hata mbalangulu yasigale mwiisi ya Misili.
20 Lakini Mndewa Imulungu kamtenda Falao yawe na moyo mdala, nayo hawalekile Waizilaeli wasegele.
Ziza
21 Abaho Mndewa Imulungu kamulongela Musa, “Golosa mkono wako uchanha kuulanga, isi ya Misili iwe na ziza, wanhu wababase babase mdiziza.”
22 Avo Musa kagolosa mkono wake uchanha kuulanga, kukala na ziza totolo mwiisi yose ya Misili kwa siku ndatu.
23 Kuduhu munhu yadahile kumona miyage hebu munhu kusegela hanhu hayakalile kwa siku ndatu. Lakini Waizilaeli wose hanhu hawakalile kukala na mulenge.
24 Abaho Falao kamkema Musa kamulongela, “Gendeni mkamtambikile Mndewa Imulungu. Watwanzi na wanenu vivija odaha kuchola hamoja na mweye. Lakini ng'hondolo zenu na ng'ombe na mbuzi osigala.”
25 Lakini Musa kamulongela, “Wahatenda vivo gweye utugwelele wanyama wa nhosa na nhosa ya kusoma moto ili tukamtambikile Mndewa Imulungu wetu.
26 Tolondigwa tuwasole wanyama wetu wala kuduhu hata imoja yonda yasigale. Kwavija kwa iwanyama awo tomulavila nhosa Mndewa Imulungu wetu, na mbaka sambi siye hatujuwa mbaka twahavika kuko, kinhu gani tolondigwa tukamulavile nhosa Mndewa.”
27 Lakini Mndewa Imulungu kamtenda Falao yawe na moyo mdala na kalema kuwaleka Waizilaeli wasegele.
28 Falao kamulongela Musa, “Segela, witeganye sikuuchone kihanga changu kabili, kwavija siku yonda uchone kihanga changu kofa!”
29 Musa kamwidika, “Kulonga goya, sichona kabili kihanga chako.”