12
Pasaka
1 Viwakalile wang'hali mwiisi ya Misili, Mndewa Imulungu kamulongela Musa na Haluni,
2 “Mwezi uno okuwa mwezi wa ichanduso wa mwaka kumwenu.
3 Walongele Waizilaeli kamba mdisiku da longo da mwezi uno, kila munhu mng'anda yake yasole mwana ng'hondolo, hebu mwana mbuzi.
4 Kamba ng'anda ina wanhu wadodo na haidaha kumuja mwana ng'hondolo wose, iilumbe na wayao weli behi nao wamuje kamba hewo viweli, na wasagule mnyama yodaha kugoligwa kwa kila munhu kamba viyodaha kuja.
5 Mnyama ayo yonda mumsagule yatelele, na yawe mbigalo na yawe wa mwaka umoja na modaha kumsola mwana ng'hondolo hebu mwana mbuzi.
6 Kila ng'anda imkalize mbaka siku da longo na nne ya mwezi uno, wanhu wa Izilaeli olondigwa wawachinje wanyama awo ichungulo.
7 Abaho wasole idamu ya wanyama awo na kuibaka mna iviwambaza va imilango na uchanha ya imilango, mumo monda wadile izinyama.
8 Kilo acho nyama ayo ibanikigwe na idigwe hamoja na kinhu kili usungu na gate hadigeligwe hamila.
9 Sikuidigwe ing'hali mbisi hebu sikuikimusigwe na mazi, ila ibanikigwe yose hamoja na pala na migulu na vinhu va mgati.
10 Sikumuleke nyama yoyose mbaka imitondo. Nyama yoyose yonda isigale mbaka imitondo muisome moto.
11 Nyama ayo, muije kuno muitanda kwa mwanza kwa kuifunga mikwiji mvigudi venu na kuvala vilatu na mugoge fimbo mmakono genu na muje himahima, na ino ayo Pasaka ya Mndewa Imulungu.
12 “Kilo acho nobita hagati ya isi ya Misili na nowakoma wana wa chaudele wa Wamisili, wose chaudele wa wanhu na chaudele wa wanyama. Noitagusa milungu yose ya Misili. Niye ayo Mndewa Imulungu.
13 Damu ili mna iviwambaza yokuwa kilaguso kulagusa ng'anda zimukala. Nahayona damu ayo, nowabita mweye, na siwalumiza bule kipindi viniwabananga Wamisili.
14 Siku ayo muikumbuke, na mweye mutende nyimwilinyimwili kwa Mndewa Imulungu, muitende iwe nyimwilinyimwili kwa ulelo wenu wose mbuli ya niye, dino dokuwa lagizo da milele kumwenu.”
15 Mndewa Imulungu kagendelela kulonga, “Kwa siku saba, muje magate hagageligwe hamila. Siku ya ichanduso ya siku azo saba musegese hamila mna izing'anda zenu, munhu yoyose yahaja gate digeligwe hamila mzisiku azo saba, kobaguligwa mna iwanhu wa Izilaeli.
16 Siku ya ichanduso na siku ya saba hokuwa na mting'hano ung'alile. Na munhu yoyose mna izisiku azo sikuyasang'hane sang'hano yoyose ila sang'hano ya kutanda indiya.
17 Mutende nyimwilinyimwili ino ya magate hagageligwe hamila kukumbuka viniwalavile mweye makabila ga Izilaeli kulawa Misili. Ulelo wenu wose uideng'helele siku ayo, kamba lagizo da milele.
18 Avo muje magate hagageligwe hamila kusongela ichungulo ya siku ya longo na nne ya mwezi wa ichanduso, mbaka ichungulo ya siku ya malongo mabili na imoja ya mwezi uwo.
19 Mna izisiku azo saba hamila sikuyoneke mzing'anda zenu. Na munhu yoyose, munhu baki hebu mwenekae yonda yaje kinhu chochose kili na hamila kobaguligwa mna iwanhu wa Izilaeli.
20 Hanhu hohose honda mukale sikumuje kinhu chochose kigeligwe hamila. Molondigwa muje magate hagageligwe hamila.”
Pasaka ya ichanduso
21 Avo Musa kawakema wavele wose wa Izilaeli, kawalongela, “Saguleni wana ng'hondolo na muwachinje kamba kila munhu viweli mng'anda yake mbuli ya nyimwilinyimwili ya Pasaka.
22 Soleni bunho da hisopo na mdivabike mwiidamu ili mbakuli na imizeni idamu mviwambaza va milango na uchanha na munhu yoyose sikuyalawe mng'anda yake mbaka imitondo.
23 Mndewa Imulungu viyobita mwiisi ya Misili na kuwakoma Wamisili, koyona idamu ili mviwambaza va imilango na uchanha na komgomesa ija imsenga wa ifa sikuyengile mzing'anda zenu na kuwakoma.
24 Mweye na ulelo wenu mugagoge malagizo gano milele.
25 Mwahavika mwiisi yonda yawagwee Mndewa Imulungu kamba viyawalongele, molondigwa muigoge nyimwilinyimwili ino.
26 Na wanenu wahawauza, ‘Nyimwilinyimwili ino yofambula choni?’
27 Walongeleni, ‘Ino nhosa ya Pasaka kwa Mndewa Imulungu, kwavija kazibita ng'anda za Waizilaeli mwiisi ya Misili. Kawakoma Wamisili lakini siye hatukomile.’ ”
Abaho Waizilaeli waidulika wamtambikila Mndewa Imulungu.
28 Waizilaeli watenda kamba Mndewa Imulungu viyawalagize Musa na Haluni.
Kufa kwa wana wa chaudele
29 Kilo kikulu Mndewa Imulungu kawakoma wana wa chaudele wose wa Wamisili. Wose wafa kusongela mwana chaudele wa Falao, imuhazi wa undewa mbaka mwana chaudele wa mfungwa yeli mkifungo, vivija wana chaudele wa wanyama wafa.
30 Avo Falao na watawala zake na Wamisili wose walamuka ikilo, kukala na kililo mwiisi yose ya Misili, kwavija kukala kuduhu ng'anda iswelile kufa munhu.
31 Kilo acho Falao kawakema Musa na Haluni, kawalongela, “Lamukeni! Segeleni mwiisi yangu mweye hamoja na Waizilaeli, gendeni mukamtambikile Mndewa Imulungu kamba vimulongile.
32 Soleni ng'hondolo zenu na ng'ombe na mbuzi musegele, kamba vimulongile. Vivija nipulileni kwa Mndewa yanitendele ganogile.”
33 Wamisili wawasusumiza Waizilaeli walopole kusegela mwiisi yao. Walonga, “Kamba hamusegela wose tofa.”
34 Avo Waizilaeli wasola usage wao ukandigwe ung'hali haunageligwa hamila, na mabakuli gao ga kukandila wavigela mzimbahasha na wapapa mna gamaega.
35 Waizilaeli watenda kamba Musa viyawalagize na wawapula Wamisili wawagwelele vinhu va shaba na zahabu na viwalo.
36 Mndewa Imulungu kawatenda Wamisili wawatendele ganogile Waizilaeli, na Wamisili wawagwelela kila kinhu kiwapulile, vivo Waizilaeli viwasolile vinhu va Wamisili.
Waizilaeli osegela mwiisi ya Misili
37 Waizilaeli wasegela Lamesesi wachola Sukoti. Wakala wambigalo ovika kamba laki sita, watwanzi na wana hawapetigwe.
38 Vivija kukala na bumbila da wanhu wengi wayagwe wacholile hamoja nao. Vivija wakala na ng'hondolo wengi na mbuzi na ng'ombe.
39 Kwavija wakala walopole kusegela mwiisi ya Misili hawadahile kutanda ndiya ya kuja mnzila, ila uja uusage ukandigwe bila kugeligwa hamila wiiyeka, avo woka magate hagageligwe hamila.
40 Waizilaeli wakala mwiisi ya Misili kwa kipindi cha miyaka magana mane na malongo madatu.
41 Viishile miyaka ayo magana mane na malongo madatu, makabila gose ga Mndewa Imulungu gasegela mwiisi ya Misili.
42 Kilo acho Mndewa Imulungu kakala kowalolesa Waizilaeli ili yawalave mwiisi ya Misili, kilo acho cholondigwa kikumbukigwe na Waizilaeli na ulelo wao wose kamba kilo cha kumgwaa ukulu Imulungu.
Mwiko wa Pasaka
43 Mndewa Imulungu kawalongela Musa na Haluni, “Uno awo mwiko wa Pasaka.
“Munhu baki sikuyaje ndiya ya Pasaka.
44 Mtumwa yoyose yaguligwe, tanhu yengizigwe kumbi lekaavo yaje ndiya ino.
45 Munhu yoyose yokala kumwenu kamba munhu baki hebu kibaluwa yolihigwa sikuyaje ndiya ino.
46 “Nyama yose idiligwe mng'anda ayo itelekeligwe. Sikumutule zege jake jojose.
47 Waizilaeli wose olondigwa waideng'helele nyimwilinyimwili ino.
48 “Munhu baki yoyose yokala hamoja na mweye yahalonda kudeng'helela nyimwilinyimwili ya Pasaka, kolondigwa tanhu yawengize kumbi wambigalo wose weli mng'anda yake, baho kogesigwa kamba mwenekae miyenu na kodaha kuideng'helela. Mbigalo yoyose yalekile kwingila kumbi sikuyaje.
49 Mwiko uno okuwa kwa Mwiizilaeli na kwa munhu baki yokala na mweye.”
50 Waizilaeli wose watenda kamba Mndewa Imulungu viyamulagize Musa na Haluni.
51 Mdisiku dijo Mndewa Imulungu kagalava makabila ga Izilaeli mwiisi ya Misili.