☰ Kulawa 14
14
Kuloka bahali ya Shamu
1 Abaho Mndewa Imulungu kamulongela Musa, 2 “Walongele Waizilaeli wabweleganye kukisogo na weke ng'hambi haulongozi ha Pi Hahiloti, hagati ya buga da Migidoli na bahali ya Shamu na behi na Baali Sefoni. 3 Falao kogesa kamba Waizilaeli onyawanyawa mwiisi, na kiwala kiwatenda walemelwe kubita. 4 Noutenda moyo wa Falao uwe mdala na heyo kowakweleleza. Na niye nopata ukulu kwa kuwabananga heyo hamoja na iwakalizi zake. Abaho Wamisili ojuwa kamba niye ayo Mndewa Imulungu.” Avo Waizilaeli watenda vivo.
5 Mndewa wa Misili viyalongeligwe Waizilaeli wasegela, heyo na watawala zake wagalusa nzewele zao walonga, “Totenda choni? Tuwaleka Waizilaeli wasegela sikuwatusang'hanile!” 6 Avo Falao kautanda mtuka wake wa ng'hondo na wakalizi zake. 7 Kasola mituka yake magana sita inogile kwa ng'hondo, na mituka yose ya Misili ya ng'hondo ilongozigwe na watawala wa isi. 8 Mndewa Imulungu kautenda moyo wa Falao, mndewa wa Misili, uwe mdala, nayo kawakweleleza Waizilaeli wakalile wasegele mwiisi ya Misili kwa kuitapa. 9 Wakalizi wa Kimisili wawakweleleza Waizilaeli hamoja na falasi zao wose na mituka ya ng'hondo, na wanhu wawakwelile iwafalasi. Wawavika weka ng'hambi kumgwazo wa bahali ya Shamu behi na Pi Hahiloti, na Baali Sefoni.
10 Waizilaeli viwamone Falao kokwiza na wakalizi zake wadumba na wamulilila Mndewa Imulungu yawataze. 11 Waizilaeli wamuyalalila Musa walonga, “Vino kukala kuduhu hanhu ha kuzikila kuja Misili mbaka kutugala tufile kuluwala? Habali kututenda tusegele mwiisi ya Misili! 12 Vino hatukulongele vitukalile mwiisi ya Misili, ‘Tuleke, tuwasang'hanile Wamisili’? Vinoga ng'hani siye tuwasang'hanile Wamisili kubanza kufila kuno kuluwala.”
13 Musa kawedika, “Sikumudumbe, imeni mulole lelo Mndewa Imulungu vonda yawakombole, kwavija wano Wamisili omuwona lelo honda muwone kabili. 14 Mndewa Imulungu kowagombela, mweye nyamaleni.”
15 Abaho Mndewa Imulungu kamulongela Musa, “Habali monililila? Walongele Waizilaeli wagendelele na mwanza wao. 16 Inula fimbo yako uigolose uchanha ya bahali, mazi goigola na Waizilaeli odaha kubita hagati ya bahali mna iisi inyalile. 17 Niye Mndewa noitenda mizoyo ya Wamisili iwe midala, na avo owakweleleza na niye nogweleligwa ukulu kwa kumbananga Falao na wakalizi zake okwela falasi na mituka yake. 18 Wamisili ojuwa kamba niye ayo Mndewa Imulungu, vonda nigweleligwe ukulu kubitila Falao na mituka yake ya ng'hondo na wakalizi zake okwela falasi.”
19 Avo msenga wa kuulanga, yakalile kuulongozi kwa Waizilaeli, kasegela kema kukisogo chao. Na ija imhanda ya wingu vivija isegela kuulongozi wao ima kukisogo chao, 20 hagati ya Waizilaeli na Wamisili. Wingu dijo ditenda ziza kwa Wamisili na diwamwemwesela Waizilaeli. Avo Wamisili hawadahile kuwakwesela behi Waizilaeli kilo kigima.
21 Musa kaugolosa mkono wake uchanha ya bahali, na Mndewa Imulungu kaibweza bahali kukisogo kwa beho kulu kulawa mwambu wa kudilawilila zuwa. Beho dijo dibuma kilo kigima na kuigola bahali banzi mbili na hagati yake kulawilila isi inyalile. 22 Waizilaeli wabita hagati ya bahali, mwiisi inyalile, na ng'huta za mazi zikala mwambu wao wa mkono wa ukudila na wa ukumoso. 23 Wamisili wawakweleleza kubitila isi inyalile ikalile hagati ya bahali hamoja na falasi zao na mituka yao ya ng'hondo na wakwela falasi zao. 24 Ulukwili Mndewa Imulungu kawasungulila Wamisili kubitila mhanda ya moto na mhanda ya wingu, kawagela bwembwe Wamisili. 25 Kagatenda malingi ga mituka yao galemelwe kutembela goya. Wamisili walonga, “Tusegele hano, Mndewa Imulungu kowagombela Waizilaeli.”
26 Abaho Mndewa Imulungu kamulongela Musa, “Golosa mkono wako uchanha ya bahali ili mazi gawagubike Wamisili, hamoja na mituka yao na wakwela falasi wao.” 27 Musa kaugolosa mkono wake uchanha ya bahali, na imitondo mazi gabwela kamba vigakalile. Wamisili wageza kugakimbila gamazi lakini Mndewa Imulungu kawasung'hila mbahali. 28 Mazi gabwela na kuigubika mituka na wakwela falasi, na wakalizi wose wa Falao wawakweleleze Waizilaeli hagati ya bahali. Kuduhu hata munhu yahonyeke. 29 Lakini Waizilaeli wabita hagati ya bahali mna iisi inyalile, ng'huta za mazi ga bahali zikala zimile mwambu wao wa ukudila na mwambu wa ukumoso.
30 Mdisiku dijo Mndewa Imulungu kawakombola Waizilaeli kulawa mna gamakono gawa Misili, na Waizilaeli wawona Wamisili kumgwazo wa bahali wafa mwaka. 31 Waizilaeli viwonile unzonza uyatendile Mndewa Imulungu kwa Wamisili, wamdumba Imulungu na wamtamanila Mndewa Imulungu na msang'hanaji wake Musa.
☰