21
Malagizo mbuli ya watumwa
(Kumbukumbu 15:12-18)
1 “Wagwelele Waizilaeli malagizo gano,
2 wahamgula mtumwa Muebulania, yakusang'hanile kwa miyaka sita, mwaka wa saba mulekese bila heyo kukuliha.
3 Kamba viumgulile kakala hana sola kosegela yaiyeka. Lakini kamba keza na mwehe wake avo yasegele na mwehe wake.
4 Kamba mkulu wake kamsolela mwehe, nayo yahalela wana wa kitwanzi na wa kimbigalo wana awo okuwa wa mkulu wake, na mtumwa ayo kosegela yaiyeka.
5 Kamba mtumwa ayo yahalonga, ‘Nomnogela mkulu wangu na mwehe wangu, vivija nowanogela wanangu na silonda kusegela,’
6 avo, mkulu wake mtumwa ayo komgala mtumwa ayo kuulongozi wa Imulungu kuikiwambaza, na ayo imkulu komtoga digwiti kwa sindano na kokuwa mtumwa wake siku zose.
7 “Munhu yahamuuza mndele wake yawe mtumwa, honda yasegele kamba watumwa wa kimbigalo.
8 Kamba mkulu ayo kawasa nayo na hanogeligwe nayo, aho yatogole mtumwa ayo yagomboligwe. Mkulu ayo halondigwa kumuuza mtumwa ayo kwa wanhu baki kwavija kamvizila.
9 Yahamgula mbuli ya mwanage wa kimbigalo kolondigwa yamtendele kamba mndele wake.
10 Kamba kosola mwehe wa kabili, kolondigwa yagendelele kumgwelela mwehe wake wa ichanduso ndiya na viwalo na vivija yawase nayo.
11 Kamba mbigalo ayo hamgwelela mtwanzi ayo vinhu avo vidatu, mtwanzi ayo kosegela bila kumuliha kinhu chochose.
Malagizo mbuli ya kuwalumiza wanhu wayagwe
12 “Yomtowa miyage na kumkoma nayo kolondigwa yakomigwe.
13 Kamba munhu halondile munhu ayo yafe lakini Imulungu kaileka mbuli ayo ilawilile, munhu ayo yakimbilile hanhu hanogile honda niwasagulileni.
14 Lakini munhu yahatenda giladi kumtowa munhu na kumkoma, hata kamba yahakimbilila hana uupango wa nhosa, mumsegese munhu ayo na mumkome.
15 “Munhu yoyose yahamtowa tatake hebu mamake yakomigwe.
16 “Munhu yoyose yomwiba munhu, ili yakamuuze hebu kumtenda mtumwa wake munhu ayo yakomigwe.
17 “Munhu yoyose yomduwila tatake hebu mamake munhu ayo yakomigwe.
18 “Wanhu wabili wahagomba, abaho imoja yahamtowa miyage kwa dibwe hebu konde bila kumkoma lakini yahamulumiza na kumtenda yalumwe na kuwasa mulusazi,
19 yahalawilila munhu yatoigwe kahona na abaho kotembela kwa mkongoja, munhu ayo yamtowile miyage nzambi zake zogeligwa kumgongo, lakini kamba munhu ayo yatoigwe hadaha kwinuka mulusazi, ayo yamtowile miyage yamulihe fungu da kipindi chose kiyawasile mulusazi na kolondigwa yamulole goya munhu ayo mbaka yahone.
20 “Munhu yahamtowa kwa fimbo mtumwa wake wa kimbigalo hebu wa kitwanzi na kumkoma, na heyo kolondigwa yakobozigwe.
21 Lakini kamba mtumwa ayo hafile bule siku dijo hebu da kabili, mkulu ayo honda yakobozigwe kwavija mtumwa ayo kakala wake.
22 “Wambigalo wahaitowa na wahamulumiza mtwanzi yeli na inda, na kumtenda inda yake ilawe lakini heyo mwenyego halumile bule, munhu ija yamulumize kolondigwa yalave sente yonda yaitambule mkasano wa mtwanzi ayo kamba vija wasemi vonda walamule.
23 Lakini kamba mtwanzi ayo kalumizigwa ng'hani yalihigwe ugima kwa ugima,
24 siso kwa siso, zino kwa zino na mkono kwa mkono na mgulu kwa mgulu,
25 kusomigwa moto kwa kusomigwa moto na kilonda kwa kilonda na kulumizwa kwa kulumizwa.
26 “Munhu yahamtowa mdisiso mtumwa wake wa kitwanzi hebu wa kimbigalo na kudikoma disiso, yamuleke yasegele mtumwa ayo mbuli ya siso jake.
27 Vivija yahamtowa na kumng'ola zino, yamuleke yasegele mbuli ya zino jake.
Malagizo mbuli ya kuwalola wanyama
28 “Ng'ombe yahamtowa munhu kwa mhembe zake na kumkoma, ng'ombe ayo yakomigwe kwa kutoigwa mabwe na nyama yake sikuidigwe na munhu. Lakini mwene ng'ombe ayo yalekigwe.
29 Lakini kamba ng'ombe ayo kazoela kuwatowa wanhu kwa mhembe zake, na mwene ng'ombe kazumigwa lakini hamfungile bule, avo yahamkoma munhu yakomigwe kwa mabwe na mwene ng'ombe ayo vivija yakomigwe.
30 Lakini kamba mwene ng'ombe ayo yahatogola kuliha sente ili kuukombola ugima wake, kolondigwa yalihe sente yose ilondigwa kulihigwa.
31 Ng'ombe yahamkoma kwa mhembe mwana wa kimbigalo hebu wa kitwanzi lagizo dino dolamuligwa vivino.
32 Kamba ng'ombe yahamkoma kwa mhembe mtumwa wa kimbigalo hebu mtumwa wa kitwanzi, mwene ng'ombe yamulihe mwene mtumwa gilamu magana madatu za shaba, na ng'ombe ayo kolondigwa yakomigwe kwa mabwe.
33 “Munhu yahaleka kugubika simo hebu yahahimba simo abaho hadigubike, abaho ng'ombe hebu kihongwe yahadumbukila mdisimo dijo,
34 munhu mwene simo kolondigwa yamulihe ayo mwene ng'ombe hebu kihongwe yengile mdisimo, na mnyama ayo yafile mdisimo kokuwa wake.
35 “Kamba ng'ombe wa munhu kamkoma ng'ombe wa munhu iyagwe, wanhu awo wabili wamuuze ng'ombe yamtowile mhembe ng'ombe iyagwe na abaho waigolele zisente ziwamuuzile, na vivija waigolele nyama ya ng'ombe ayo yafile.
36 Lakini kamba ng'ombe ayo kazoela kuwatowa mhembe ng'ombe wayagwe, na mwene ng'ombe hamfungile ng'ombe wake, avo yalihe ng'ombe kwa ng'ombe na ija yafile kokuwa wake.