32
Ng'ombe wa zahabu
(Kumbukumbu 9:6-29)
1 Wanhu viwonile Musa kokawa kuhumuluka kulugongo, waiting'hana kuulongozi wa Haluni, wamulongela, “Tutendele imilungu yonda itulongoze kwavija hatujuwa choni kimulawile Musa ayo yatulavile mwiisi ya Misili.”
2 Haluni kawedika, “Laveni heleni za zahabu zili mmagwiti ga wehe zenu na wanenu munigalile.”
3 Avo wanhu wose walava iziheleni zao za zahabu na wamgalila Haluni.
4 Nayo kazisola kazilumbula na katenda kinyago cha ng'ombe wa kimbigalo.
Wanhu wakemelela, “Ino ayo imulungu wetu Waizilaeli yatulavile mwiisi ya Misili.”
5 Abaho Haluni kazenga upango wa kulavila nhosa kuulongozi wa kinyago acho cha ng'ombe, abaho kawalongela wanhu, “Mayo hokuwa na nyimwilinyimwili ya kumgwaa ukulu Mndewa Imulungu.”
6 Imitondo yake wanhu walamuka ulukwili walava nhosa za kusoma moto na nhosa za kugala kuilumba. Wanhu wakala hasi waja na kung'wa ng'hani, abaho wasonga kucheza.
7 Abaho Mndewa Imulungu kamulongela Musa, “Humuluka hasi kwavija wanhu zako uwalavile mwiisi ya Misili wainanga na watenda nzambi.
8 Wagaleka malagizo ganiwalagize na waitendela kinyago kiigalile na ng'ombe wa kimbigalo. Nao wakitambikila na okilavila nhosa kuno olonga, ‘Gweye Izilaeli ino ayo imulungu wetu yatulavile mwiisi ya Misili.’ ”
9 Mndewa Imulungu kamulongela Musa, “Nojuwa kamba wanhu wano wana mizoyo midala.
10 Avo, sikuugeze kungomesa. Nileke niwakoboze abaho nokutenda gweye uwe na ulelo onda uwe kabila kulu.”
11 Lakini Musa kampula Mndewa Imulungu wake kalonga, “Go Mndewa Imulungu, habali kowagevuzikila ng'hani wanhu wako uwalavile mwiisi ya Misili kwa udahi na mkono wenye nguvu?
12 Wahatenda vivo Wamisili olonga, ‘Kawalava ili yawakome kulugongo na sikuwoneke kabili mwiisi.’ Go Mndewa Imulungu, leka kuwagevuzikila na sikuutende acho kiulonda kutenda kwa wanhu zako.
13 Wakumbuke wasang'hanaji zako Abulahamu na Isaka na Izilaeli, gweye mwenyego kuiduwila kwa kulonga, ‘Nowatenda muwe na ulelo kamba nhondo za kuulanga na nowagwelela isi yose inilongile nowagwaa iwe yao milele.’ ”
14 Avo, Mndewa Imulungu kaleka kuwatendela dija dihile diyalongile kotenda.
15 Abaho Musa kahumuluka hasi ya ulugongo, kuno kagoga vibao vibili va mabwe ga lagano vandikigwe malagizo ga Imulungu banzi zose.
16 Vibao avo vikala vitendigwe na Imulungu mwenyego, na Imulungu mwenyego heyo yandike.
17 Yoshua viyahulike wanhu okemelela, kamulongela Musa, “Wanhu otowa nyangi za ng'hondo kuna ing'hambi.”
18 Musa kamwidika, “Siyo nyangi za kuhuma, hebu kuhumwa, ila niye nohulika nyangi za wanhu okwimba.”
19 Viwavikile behi ya ng'hambi wachona acho ikinyago cha ng'ombe wa kimbigalo na wanhu ocheza, aho Musa kagevuzika, kavasa hasi avo ivibao kulawa mmakono gake na kavibena.
20 Avo, kakisola kinyago acho kakilukuza, kakihonda honda kiwa kamba usage, kaukologa usage awo mgamazi na kawananahiza Waizilaeli wang'we.
21 Musa kamuuza Haluni, “Wa kutenda choni wanhu wano mbaka kuwengiza mna inzambi kamba ino?”
22 Haluni kamwidika Musa, “Chonde go mkulu sikuunigevuzikile niye msang'hanaji wako. Gweye kuwajuwa goya wanhu wano viwaitandile kutenda gehile.
23 Wanilongela, Musa yatulavile mwiisi ya Misili hatujuwile choni kimpatile avo, ‘Tutendele imulungu wetu yonda yatulongoze.’
24 Niye niwalongela, kila munhu yeli na zahabu yalave. Avo wangalila na niye nizilumbula muumoto na kilawa kinyago kino cha ng'ombe wa kimbigalo!”
25 Musa viyonile wanhu watenda ubozi, na Haluni kawalekela watende ubozi awo, na kuigalila kinyala kuulongozi wa wanhu owehila,
26 Musa kema hana ulwivi lwa kwingilila kuna ing'hambi kalonga, “Munhu yoyose yeli mwambu wa Mndewa Imulungu yeze kumwangu!” Walawi wose wamcholela Musa.
27 Abaho kawalongela, “Mndewa Imulungu wa Izilaeli kolonga vino, ‘Kila munhu yaifunge sime mkigudi chake na yazunguluke kila hanhu mna ing'hambi kulawa mulango uno mbaka uyagwe, na kila munhu yamkome ndugu yake, mbwigake na munhu yokala nayo behi.’ ”
28 Walawi watenda kamba viwalagizwe na Musa, siku dijo wakomigwa wanhu elufu ndatu.
29 Musa kawalongela, “Lelo mweye wenyego muilava kwa Mndewa Imulungu, kwavija hamulemile hata kuwakoma wanenu na ndugu zenu. Imulungu yawatende mumwede lelo.”
30 Imitondo yake Musa kawalongela wanhu, “Mtenda nzambi ng'hulu ng'hani. Lakini sambi nokwela kulugongo kwa Mndewa Imulungu, sengine nodaha kutenda Imulungu yazigele kumgongo nzambi zenu.”
31 Avo Musa kabweleganya kwa Mndewa Imulungu kamulongela, “Chonde Imulungu, wanhu watenda nzambi ng'hulu, waitendela imulungu wao wa zahabu.
32 Lakini sambi nokupula uzigele kumgongo nzambi zao, kamba huzigela kumgongo, dilave twaga jangu mna ikitabu chako kiwandike matwaga ga wanhu zako.”
33 Mndewa Imulungu kamwidika Musa, “Munhu yoyose yatendile nzambi nodilava twaga jake mna ikitabu changu.
34 Lakini sambi chola, ukawalongoze wanhu mbaka hanhu hanikulongele. Nomtuma msenga wangu wa kuulanga yakulongolele, lakini siku yovika vonda niwakoboze wanhu wano kwa nzambi zao.”
35 Mndewa Imulungu kawagalila wanhu mikubulo kwavija wampula Haluni yawatendele kinyago cha ng'ombe kimbigalo.