36
1 “Avo Bezaleli na Oholiabu na kila mbigalo yagweleligwe udahi na Mndewa Imulungu wa kujuwa kusang'hana sang'hano ya kuzenga dihema, yatende sang'hano kamba Mndewa Imulungu viyalagize wasang'hane.”
Wanhu ogala sadaka nyingi
2 Musa kamkema Bezaleli na Oholiabu na kila munhu yagweleligwe ufundi wowose na Mndewa Imulungu na yalondile kusang'hana sang'hano na kawalongela wasonge isang'hano.
3 Nao wabokela kulawa kwa Musa vinhu vose vilavigwe na Waizilaeli mbuli ya sang'hano ya dihema ding'alile. Wanhu wagendelela kulava sadaka zao kwa kulonda wenyego kila imitondo.
4 Abaho wanhu wose weli na ufundi wakalile ozenga dihema da mting'hano wamcholela Musa,
5 wamulongela, “Wanhu okugalila vinhu vingi ng'hani kubanza vinhu vilondigwa kwa sang'hano ilagizwe na Mndewa Imulungu tuisang'hane.”
6 Abaho Musa kawalagiza wanhu waleke kugendelela kusanga vinhu mbuli ya dihema da mting'hano, avo wanhu hawagalile vinhu kabili.
7 Kwavija vinhu vigaligwe vikala vingi ng'hani kubanza vilondeke kwa sang'hano.
Kuzenga hema da mting'hano
(Kulawa 26:1-37)
8 Wambigalo wose weli na ufundi wakuzenga dihema da mting'hano, wadizenga ajo dihema kwa mapanziya longo ga kitani ilukigwe vinogile na kwa sufi ya buluu na ya zambalau na ndung'hu na ulembo wa viumbe weli na mabawa.
9 Kila panziya dikala na utali wa makono longo na mabili na ugazi wa makono mabili. Mapanziya gose gaigala.
10 Mapanziya matano wagasonela hamoja dilawila panziya dimoja na vivija gaja ga matano gayagwe.
11 Abaho weka vitanzi va buluu mna imhindo ya panziya da ikimambukizo na watenda vivo kwa mhindo ya panziya diyagwe.
12 Vivija weka vitanzi malongo matano mna idipanziya dimoja na vitanzi malongo matano mdipanziya diyagwe, vitanzi vose viilola.
13 Abaho watenda vifungilo va zahabu malongo matano, na walumbiliza vihande avo vibili va panziya na dihema diwa dimoja.
14 Vivija watenda ngubiko ya dihema kwa mapanziya longo na dimoja ga mibahila ya mbuzi.
15 Kila panziya dikala na utali wa makono longo na ndatu na ugazi wa makono mabili. Mapanziya gose gaigala.
16 Mapanziya matano wagalumbiliza hamoja na mapanziya sita wagalumbiliza hamoja.
17 Abaho weka vitanzi malongo matano mna idipanziya dimoja na vitanzi malongo matano mdipanziya diyagwe.
18 Vivija watenda vifungilo va shaba ya kiguzi malongo matano na wavigela mvitanzi na wagalumbiliza gago gamapanziya na kutenda ngubiko imoja ya dihema.
19 Watenda ngubiko iyagwe ya dihema kwa ng'hwembe za ng'hondolo mbigalo zigeligwe langi ndung'hu na ng'hwembe za mnyama wa mbahali.
20 Abaho watenda mbao za mkese za kwimila dihema.
21 Kila lubao lukala na utali wa makono mane, na ugazi wa behi kuvikila mkono umoja,
22 kila lubao lukala na vilimi vibili va kulumbilizila. Mbao zose za dihema wazitenda vivo.
23 Vivija watenda mbao malongo mabili za mwambu wa kusini wa dihema,
24 na vikalilo malongo mane va shaba, kila lubao vikalilo vibili ili kugogeleza vija ivilimi vibili.
25 Abaho watenda mbao malongo mabili za mwambu wa kasikazini wa dihema,
26 na vikalilo malongo mane va shaba, kila lubao vikalilo vibili.
27 Kwa mwambu kwa kukisogo wa dihema, mwambu wa kudihongela zuwa watenda mbao sita,
28 na watenda mbao mbili kuvingolobweda va mwambu wa kukisogo wa dihema.
29 Mbao azo mbili za kutenda avo ivingolobweda vibili wazilumbiliza kulawa hasi mbaka uchanha kuna ipete ya ichanduso. Mbao azo mbili za ivingolobweda avo vibili vivo wazitendile.
30 Avo kukala na mbao nane na vikalilo longo na sita va shaba, kila lubao vikalilo vibili.
31 Abaho watenda mango za muhamvi, mango tano mbuli ya mwambu umoja wa dihema,
32 na mango tano mbuli ya mwambu uyagwe na mango tano mbuli ya mwambu wa kudihongela zuwa, kukisogo mwa dihema.
33 Abaho mango ili hagati ya mbao za dihema waibalaza kulawa mwambu uno mbaka uyagwe wa dihema.
34 Mbao zose wazibaka zahabu, na watenda vipete va zahabu va kugogeleza zimango. Vivija mango zose wazibaka zahabu.
35 Abaho watenda panziya da kitani inogile dilukigwe na sufi ya langi ya buluu na ya zambalau na udung'hu na wadigela ulembo wa viumbe weli na mabawa watendigwe na mafundi wanogile.
36 Vivija watenda mhanda nne za muhamvi wazibaka zahabu na weka vifungilo va zahabu ili wadinanike dipanziya. Vivija watenda vikalilo vine va shaba va kukalila zimhanda.
37 Hana ulwingililo lwa dihema watenda panziya da kitani inogile dizamile dilukigwe na sufi ya langi ya buluu na ya zambalau na udung'hu na wadihamba kwa ulembo.
38 Abaho watenda mhanda tano za muhamvi za dipanziya na wazibaka zahabu na weka vifungilo va zahabu na watenda vikalilo vitano va shaba ya kiguzi mbuli ya azo zimhanda.