38
Upango wa kulavila nhosa
(Kulawa 27:1-8)
1 Abaho katenda upango wa kulavila nhosa kwa mbao za mkese. Upango awo uigala kila mwambu, utali wake makono mabili na nusu na ugazi wake makono mabili na nusu na utali wake kuchola uchanha ukala mkono umoja na nusu.
2 Vivija katenda mhembe nne mna zikona nne, na mhembe azo zikala kinhu kimoja na upango awo na kaubaka shaba ya kiguzi.
3 Viya vose va kulavila nhosa kavitenda kwa shaba ya kiguzi, zae da kwikila mitozi na lwiko lwa kuzolela mitozi na bakuli na lwiko lwa kuhindulila nhosa na viya va kuhalila moto.
4 Abaho katenda lwavu lwa shaba ya kiguzi. Kalwika lwavu awo mumgwazo hasi ya upango wa kulavila nhosa, na uvikila nusu ya upango wa kulavila nhosa.
5 Vivija kalwikila vipete vine va shaba ya kiguzi mna zikona nne za ulwavu.
6 Abaho katenda mango za muhamvi za kupapila awo uupango wa kulavila nhosa na kazibaka shaba ya kiguzi,
7 na kazigela azo zimango mvipete kila mwambu wa upango wa kulavila nhosa ili upapigwe na katenda upango awo kwa mbao na kawikila na uvungu.
Bakuli da shaba
(Kulawa 30:18)
8 Abaho katenda bakuli da shaba ya kiguzi, na mgimbo wake ukala wa shaba ya kiguzi, bakuli dijo na mgimbo wake kavitenda kwa shaba ya vioo va watwanzi osang'hana hana ulwivi lwa dihema da mting'hano.
Luwa lwa mting'hano
(Kulawa 27:9-19)
9 Abaho katenda luwa lwa mting'hano. Mwambu wa kusini keka mapanziya gatendigwe kwa kitani inogile ilukigwe, mapanziya gago gakala na utali wa makono malongo mane na nne kwa mwambu umoja.
10 Mapanziya gago gagogelezwa kwa mhanda za shaba ya kiguzi malongo mabili zili na vikalilo va shaba ya kiguzi. Ivifungilo va zimhanda na nzabi zake vikala va shaba.
11 Vivija mwambu wa kasikazini, utali wa dipanziya ukala makono malongo mane na nne kwa mwambu umoja na mhanda malongo mabili na vikalilo va shaba ya kiguzi, lakini vifungilo va zimhanda na nzabi zake vikala va shaba.
12 Mwambu wa kudihongela zuwa dipanziya dikala na utali wa makono malongo mabili na mbili kwa mwambu umoja na mhanda longo zili na vifungilo na nzabi za shaba na vikalilo longo.
13 Vivija mwambu wa kudilawila zuwa, mwambu wa kwingilila, katenda luwa luli na ugazi wa makono malongo mabili na mbili.
14 Panziya da mwambu umoja wa umulango dikala na ugazi wa makono sita na nusu hamoja na mhanda ndatu na vikalilo vidatu.
15 Vivija mwambu uyagwe wa umulango dipanziya dikala na ugazi wa makono sita na nusu hamoja na mhanda ndatu na vikalilo vidatu.
16 Mapanziya gose kuzunguluka uluwa gatendigwa kwa kitani inogile ilukigwe.
17 Vikalilo vose va zimhanda vikala va shaba ya kiguzi na vifungilo vake na nzabi zake na uchanha ya zimhanda vose vitendigwa kwa shaba. Mhanda zose zigogelezwa kwa mango za shaba.
18 Hana umulango wa uluwa keka panziya ditendigwe kwa sufi ya langi ya buluu na ya zambalau na udung'hu na kitani inogile ilukigwe na dihambigwe vinogile. Panziya dijo dikala na utali wa makono tisa na ugazi wa makono mabili kamba vigakalile gamapanziya gayagwe ga uluwa.
19 Panziya dijo digogigwa na mhanda nne zili na vikalilo vine va shaba ya kiguzi. Uchanha ya zimhanda na vifungilo vake na nzabi zake vose kavitenda kwa shaba.
20 Vifungilo va nzabi za uluwa na dihema vose kavitenda kwa shaba ya kiguzi.
Vinhu vizengiligwe dihema
21 Vino avo vinhu vitumike kuzengela dihema da mting'hano, mumo mudikalile disanduku da lagano. Vinhu avo vose vandikigwa na Walawi kwa kulagizwa na Musa na vikala mna uwimilizi wa Itamali mwanage imulava nhosa Haluni.
22 Bezaleli mwanage Uli na mzukulu wa Huli kulawa kabila da Yuda, katenda kila kinhu Mndewa Imulungu kiyamulagize Musa.
23 Mtazaji wake Oholiabu mwanage Ahisamaki kulawa kabila da Dani, ayo yakalile yosongola gamabwe na kagela ulembo ivinhu, na katenda sufi ya langi ya buluu na ya zambalau na ndung'hu na kitani inogile ilukigwe goya.
24 Zahabu yose ilavigwe kwa kwinuligwa uchanha kwa Mndewa mbuli ya kuzengela dihema da mting'hano ikala na uzito wa kilo kamba elufu imoja kwa kipimo cha mdihema.
25 Shaba iwasangile wanhu awo viwapetigwe ikala na uzito wa kilo kamba elufu ndatu na nusu kwa kipimo cha mdihema.
26 Kila munhu yapetigwe yakalile na miyaka malongo mabili na kugendelela kasanga gilamu tano za shaba kamba viyalondigwe, na wambigalo wose wapetigwe wakala laki sita na elufu ndatu na magana tano na hamsini.
27 Kilo azo kamba elufu ndatu na nusu zitumika kutenda vikalilo gana va dihema na uluwa, kila kikalilo kitendigwa kwa kilo kamba malongo madatu na tano.
28 Kilo kamba malongo madatu za shaba zisigale, wazitumia kilo azo kutenda vifungilo na zinzabi na wabaka uchanha ya zimhanda.
29 Shaba ya kiguzi ilavigwe kwa kwinuligwa uchanha kwa Mndewa Imulungu ikala na uzito wa kilo kamba elufu mbili magana nne.
30 Bezaleli katumia shaba ayo ya kiguzi kutendela vikalilo va ulwivi lwa dihema da mting'hano na uupango wa kulavila nhosa na lwavu lwake na viya vose va upango awo,
31 kwa shaba ayo ya kiguzi katenda vikalilo va uluwa na va ulwivi lwa uluwa na vifungilo va nzabi va dihema na uluwa.