6
Abaho Mndewa Imulungu kamulongela Musa, “Sambi kochona chonda nimtendele Falao. Kwa udahi wangu kowaleka wanhu zangu wasegele. Nayo kowawinga wasegele mwiisi yake kwa udahi wangu.”
Imulungu kolonga kowakombola Waizilaeli
Imulungu kamulongela Musa, “Niye na Mndewa Imulungu. Nimulawilila Abulahamu na Isaka na Yakobo, njuwika kamba Imulungu yeli na Udahi wose, lakini siwalongele bule kamba twaga jangu Mndewa Imulungu. Vivija niilagana nao kuwagwaa isi ya Kanaani, kuko kuwakalile kamba wanhu baki. Sambi nihulika kuiyalala kwa Waizilaeli viwodununzwa na Wamisili, avo nidikumbuka lagano jangu. Walongele Waizilaeli vino, ‘Niye Mndewa Imulungu, nowalava mwiisi ya Misili. Nowatenda mulekeswe kulawa muutumwa. Nougolosa mkono wangu na nowakoboza Wamisili na kuwakombola mweye. Nowatenda muwe wanhu zangu, na niye nokuwa Imulungu wenu. Mojuwa kamba niye na Mndewa Imulungu, Imulungu wenu, vonda niwalave muutumwa ako Misili. Nowagala mwiisi ija inilongile kwa kuiduwila nowagwaa Abulahamu na Isaka na Yakobo. Nowagwaa mweye isi ayo iwe yenu. Niye na Mndewa Imulungu.’ ” Musa kawalongela Waizilaeli mbuli azo, lakini hewo hawamtegeleze bule, kwavija wakala na lusikisiki mmizoyo yao mbuli ya magazo ga utumwa.
10 Abaho Mndewa Imulungu kamulongela Musa, 11 “Genda kamulongele Falao, mndewa wa Misili, yawaleke Waizilaeli wasegele mwiisi yake.”
12 Lakini Musa kamwidika Mndewa Imulungu, “Kamba Waizilaeli hawanitegeleze, avo Falao konitegeleza vilihi? Na niye munhu mwenyego sili mulongaji.”
13 Lakini Mndewa Imulungu kalonga na Musa na Haluni na kawalagiza wachole kwa Falao, mndewa wa Misili, wawalave Waizilaeli mwiisi ya Misili.
Matwaga gayagwe ga iwahenga wakulu wa Waizilaeli
14 Gano gago matwaga ga iwahenga wakulu wa Waizilaeli.
 
Wanage Lubeni chaudele wa Izilaeli wakala, Hanoki na Palu na Hesiloni na Kalimi. Wano wakala wahenga wa kabila da Lubeni.
15 Wanage Simeoni wakala, Yemueli na Yamini na Ohadi na Yakini na Sohali na Shauli yakalile mwana wa mtwanzi wa Kanaani. Wano wakala wahenga wa kabila da Simeoni.
16 Gano gago matwaga ga wana wa kimbigalo wa Lawi, Gelishoni na Kohati na Melali. Lawi kawa mgima kwa miyaka gana na malongo madatu na saba.
17 Wanage Gelishoni wakala, iwakulu wa lukolo lwa Libini na Shimei.
18 Wanage Kohati wakala, Amulamu na Ishali na Hebuloni na Uzieli. Kohati kawa mgima kwa miyaka gana malongo madatu na ndatu.
19 Wanage Melali wakala, Mahili na Mushi.
Wano awo iwahenga wa kabila da Lawi.
20 Amulamu kamsola Yokebedi lumbu wa tatake, nayo kamulela Musa na Haluni. Amulamu kawa mgima kwa miyaka gana dimoja na malongo madatu na saba.
21 Wanage Ishali wakala, Kola na Nefegi na Zikili.
22 Wanage Uzieli wakala, Mishaeli na Elisafani na Sitili.
23 Haluni kamsola Elisheba, mndele wa Aminadabu na lumbu jake Nashoni, nayo kamulelela Nadabu na Abihu na Eleazali na Itamali.
24 Wanage Kola wakala, Asili na Elikana na Abiasafu, wano wakala wahenga wa lukolo lwa Kola.
25 Eleazali mwanage Haluni kamsola mndele wa Putieli, nayo kamulelela Finehasi.
 
Wano awo iwahenga wakulu wa kabila da Lawi.
26 Musa na Haluni awo walongeligwe na Mndewa Imulungu, “Muwalave Waizilaeli mwiisi ya Misili kwa ng'holo zao.” 27 Ona awo wamulongele Falao, mndewa wa Misili, yawaleke Waizilaeli wasegele.
Mndewa Imulungu kowalagiza Musa na Haluni
28 Kipindi acho Mndewa Imulungu viyalongile na Musa mwiisi ya Misili, 29 kamulongela, “Niye na Mndewa Imulungu. Mulongele Falao, mndewa wa Misili, gaja gose gonikulongela.”
30 Lakini Musa kamwidika Mndewa Imulungu, “Niye sili mulongaji, avo Falao konitegeleza vilihi?”