12
Mndewa komkema Abulamu
1 Mndewa Imulungu kamulongela Abulamu, “Segela mwiisi yako, waleke ndugu zako na ng'anda ya tatako uchole mwiisi yonda nikulagusile.
2 Nokutenda uwe na ulelo onda uwe kabila kulu.
Nokutenda umwede na kuditenda twaga jako dijuwigwe ng'hani, na gweye kokuwa kilamuso cha wanhu wengi kumweda.
3 Munhu yonda yakutendele ganogile na niye nomtendela ganogile.
Lakini munhu yonda yakuduwile na niye nomduwila.
Kubitila gweye nowatenda wanhu wa isi zose wamwede.”
4 Abulamu viyakalile na miyaka malongo saba na tano kasegela Halani, kamba viyalongeligwe na Mndewa Imulungu, na Lutu kachola hamoja na heyo.
5 Abulamu kamsola imwehe Salai na Lutu mwana wa ndugu yake hamoja na vinhu vao vose na wanhu wose wawapatile ako Halani. Wasegela kuchola isi ya Kanaani. Viwavikile ako,
6 Abulamu kabita mziisi mbaka Shekemu, hanhu hong'ala heli na biki kulu da Mole. Kipindi acho Wakanaani wao wakalile iwenekae wa isi ayo.
7 Ako Mndewa Imulungu kamulawilila Abulamu, kamulongela, “Ino ayo isi yonda niwagwee ulelo wako.” Abaho Abulamu kamzengela upango wa kulavila nhosa Mndewa yamulawilile.
8 Kulawa kuko Abulamu kasegela kachola kuvigongo mwambu wa kudilawila zuwa wa Beseli keka ng'hambi hagati ya buga da Beseli mwambu wa kudihongela zuwa na buga da Ai mwambu wa kudilawila zuwa. Kuko vivija kamzengela Mndewa Imulungu upango wa kulavila nhosa na kaditambikila twaga da Mndewa.
9 Abaho Abulamu kagendelela na mwanza kuchola mwambu wa Negebu ubanzi wa kusini.
Abulamu ka Misili
10 Lakini kukala na lufilili lwa nzala mwiisi ayo. Avo Abulamu kachola kukala Misili, kwavija nzala ikala ng'hulu ng'hani.
11 Viyakalile mmambwegambwega kuvika Misili, kamulongela imwehe Salai, “Nojuwa gweye kwa mtwanzi unogile na kogela lembo.
12 Wamisili wahakona olonga, ‘Ino mwehe wake,’ avo ong'homa na gweye okuleka mgima.
13 Avo walongele gweye kwa lumbu jangu, avo mbuli ya gweye hawang'homa bule na onhenda goya.”
14 Abulamu viyavikile Misili, wenekae wa kuko wamona Salai kakala mtwanzi yanogile ng'hani.
15 Wanhu weli na ukulu muundewa wa Falao viwamone Salai wamtogola ng'hani kwa mndewa Falao, avo Salai kagaligwa mng'anda ya mndewa.
16 Avo, mbuli ya Salai mndewa Falao kamtendela Abulamu ganogile, na kagweleligwa ng'hondolo na ng'ombe na vihongwe mbigalo na vihongwe watwanzi na watumwa wa kimbigalo na wa kitwanzi na ngamiya.
17 Lakini Mndewa Imulungu kamkoboza Falao na wanhu wose wa mng'anda yake na kawagwaa mitamu mbuli ya Salai, mwehe wake Abulamu.
18 Avo Falao kamkema Abulamu, kamulongela, “Kunhenda choni gweye? Habali hunongele kamba Salai mwehe wako?
19 Habali kunongela kakala lumbu jako na kundeka nimsole yawe mwehe wangu? Avo sambi, ayo baho mwehe wako, msole uhalawe hano!”
20 Avo Falao kawalagiza wanhu zake, na hewo wamuleka Abulamu yasegele na mwehe wake hamoja na vinhu vake vose.