15
Imulungu koilagana na Abulamu
1 Vizibitile mbuli azo, Mndewa Imulungu kamulongela Abulamu mzinzozi, “Abulamu, sikuudumbe! Niye ayo ngao yako. Niye na hamoja na gweye, na kinhu acho kinoga ng'hani kumwako.”
2 Lakini Abulamu kalonga, “Go Mkulu Mndewa Imulungu, kongwaa choni na niye nabule mwana wa kuhazi na muhazi wangu ayo Eliezeli munhu wa ako Damesiki?”
3 Abulamu kalonga, “Lola hungwelele bule mwana, avo mtumwa yaleligwe mng'anda yangu ayo yonda yawe muhazi wangu.”
4 Abaho Mndewa Imulungu kamulongela, “Munhu ino honda yawe muhazi wako, lakini mwana yonda umulele mwenyego ayo yonda yawe muhazi wako.”
5 Aho Mndewa Imulungu kamulava kunze Abulamu, kamulongela, “Lola uchanha upete zinhondo, kamba kweli kodaha kuzipeta. Ulelo wako okuwa kamba vizili zinhondo azo.”
6 Abulamu kamtogola Mndewa Imulungu na kwa mbuli ayo Mndewa Imulungu kamgesa Abulamu kamba munhu yanogile mgameso gake.
7 Abaho Mndewa Imulungu kamulongela Abulamu, “Niye ayo Mndewa Imulungu nikugalile kulawa Uli, buga da Wakalidayo, ili nikugwee isi ino.”
8 Lakini Abulamu kalonga, “Go Mkulu Mndewa Imulungu, nojuwaze kamba isi ino yokuwa yangu?”
9 Avo Mndewa kamwidika, “Ngalila ng'ombe yeli na miyaka midatu na mbuzi wa kitwanzi yeli na miyaka midatu na ng'hondolo wa kimbigalo yeli na miyaka midatu na huwa na kinda da njiwa.”
10 Abulamu kamgalila Mndewa Imulungu wanyama awo, kila imoja kambalula, kavika ivihande mmisafa mibili kuno na kuno, lakini iwandege hawabalule bule.
11 Jola viwezile kuna imitufi ayo, Abulamu kawawinga.
12 Zuwa vidikalile dohonga, Abulamu kapata utulo kawasa, bwembwe da ziza kulu dimwizila.
13 Abaho Mndewa Imulungu kamulongela Abulamu, “Ujuwe goya kamba ulelo wako okala kamba wanhu baki mwiisi ya ugeni, okuwa watumwa na odununzigwa ng'hani kwa miyaka magana mane.
14 Lakini nowakoboza wanhu wa isi yonda wakale muutumwa, kukimambukizo osegela mwiisi ayo iwakalile kuno wana vinhu vingi.
15 Lakini gweye mwenyego kokuwa mgima kwa siku nyingi na kofa moyo hoole na kozikigwa goya.
16 Vizukulu vako vilembwe vobwela hano, kwavija nzambi za Waamoli zing'hali hazinavikila kuwa nyingi avo niwataguse.”
17 Viivikile ikilo, nongo ilava yosi na wenge da moto ukwaka voneka vobita hagati ya maunde ga nyama.
18 Siku ayo Mndewa Imulungu kailagana na Abulamu, kalonga, “Nowagwaa isi ino wanhu wa ulelo wako, kulawa lwanda lwa Misili mbaka lwanda luja mkulu lwa Fulate,
19 hamoja na isi za Wakeni na Wakenizi na Wakadimoni,
20 na Wahiti na Wapelizi na Walefai,
21 na Waamoli na Wakanaani na Wagiligashi na Wayebusi.”